يوم الرحله صحيت بدري و أنا كلي حماس ، لبست اللبسه الإشترتها لي عمتي ، قميص و بنطلون ، مع اللبسه كان في نظاره و شنطه متوسطة الحجم عمتي ختت لي فيها فطوري و غداي و مشت معاي لحد المدرسه و انتظرت لغاية ما ركبنا الحافله و إتحركنا ، طبعاً الحافله كانت كأنها حافلة سيره ! بنات على أولاد قعدوا يغنوا و يصفقوا ، هججوا كدا لحد ما وصلنا مدينة الطفل ، لمن نزلنا المعلمين وقفونا صف و دخلونا بالدور بالدور ، قبل ما نفترق و نتجارى في الحديقه المعلمين جمعونا كلنا في مكان واحد و قالوا لينا المكان دا حيكون نقطة تجمعنا و معظمنا حيكون هنا ، ما عايزنكم تمشوا بعيد ، و ما عايزين طالب يمشي براهو عشان ما يضيع ، خليكم قريبين مننا ، لِفوا و تعالوا راجعين لينا هنا ، واحد من المعلمين قال أنا شايف انو الأفضل نقسمهم لمجموعات و على رأس كل مجموعه يكون في معلم أو معلمه يشرف عليهم ، هنا الطلاب اعترضوا ، و قالوا لا ، عايزين كل أصحاب يمشوا براهم و ما محتاجين زول يرافقهم ، أستاذ علي قال ليهم تمام بس لمن ننادي و نقول ليكم تعالوا تجوا طوالي ، مفهوم ؟ قالوا ليهو مفهوم و بعدها كل شُله مشت على إتجاهـ و أنا بس الكنت لافه براي !
مشيت ركبت زي تلات ألعاب كدا ، لقيت جزو من ناس فصلنا هناك ، آخر لعبه مشيت ليها لقيت فيها ناس سهى ، لعبنا و نزلنا ، بعدها اتفرقنا ، لفيت كدا و لمن تعبت رجعت المكان الموجودين فيهو المعلمين ، لقيتهم بفطروا ، قعدت بعيد شويه منهم و طلعت فطوري و بديت أفطر ، طبعاً انتبهت إنو ناس سهى برضو قاعدين في الفرشه بعيده شويه عن المعلمين و بلعبوا بالورق !
بعد خلصت فطور ما إتحركت من مكاني لأني فترت ، كنت بعاين لناس سهى و هم بلعبوا ، كان معاهم أسامه و حسن ، فجأه كدا جاني صوت أستاذه ياسمين و هي بتقول لي ليه قاعده بعيد ؟! تعالي ألعبي معاهم يا مها ، إتلفتت على ناس سهى و قالت ليهم خلوها تلعب معاكم ، أروى قالت ليها ماف زول مانعها لو عايزا خليها تجي و تلعب ، فاديه قالت لي تعالي مالك واقفه !
بتردد مشيت و قعدت معاهم ، زادوا الورق و بدوا لعب من جديد ، صراحة في البدايه كنت منكمشه منهم و ما بتكلم معاهم كتير بس لمن دخلت في جو اللعبه اتفاعلت و بقيت أضحك و اتكلم معاهم ، لمن خلاص زهجنا وقفنا لعب ، حسن قال ليهم ارح نمشي الألعاب ! أروى قالت ليهو بعد شويه ، فاديه قالت ليها ليه أريح ياخ ، من قبيل نحنا قاعدين هنا ! عملت ليهم حركه كدا بعيونها و عاينت وراها ، بعدها كلهم قعدوا يتبسموا و أنا كنت زي الأطرش في الزفه ! مع إني عاينت للمكان العاينت ليهو أروى بس ما فهمت شي ! طبعاً هم كانوا بعاينوا للأساتذه و بتبسموا ، بس ما عرفت السبب إلا لمن سهى همست و قالت عايشين الدور ! فاديه قالت ليها ما صدقوا قعدوا براهم ! اسامه قال ليهم ديل عصافير الحب ! أروى قالت ليهم والله لو سمعوكم !!
طبعاً بعد ضحكوا و اتهامسوا انتبهوا إني بعاين ليهم بإستغراب كأنو في طيره على راسي ! عاينوا لبعض و قعدوا يضحكوا علي ، حسن قال ليهم البت قاعده معانا و ما فاهمه شي ! سهى قالت لي أستاذ علي و أستاذه ياسمين بحبوا بعض ، ما شايفاهم قاعدين براااهم كيف !
