طبعاً البت ما قدرت تتهم زول لأنها ما متأكده إذا في زول عمل كدا قاصد ولا هي من دون ما تنتبه قعدت في حاجه بـ اللون دا !! المهم بعدها عدت الأيام و أنا مشيت قعدت ورا مع ناس سهى ، بدلت بت و قعدت هناك من دون رجعه ، و حسن بدل واحد من ناس الكنبه القدامنا و جا قعد مكانو ، رؤى قالت لي دا كلو عشانك ، لويت ليها خشمي ، بقينا في الكنبه أنا و سهى و رؤى و فاديه و أسامه ، يوم جاتنا أستاذه ياسمين ، قبل ما تبدأ الحصه عاينت لناس كنبتي و قالت الليله مها وين !؟ رفعت ليها يدي و قلت ليها أنا هنا ، قالت لي قاعده ورا ليه ؟ سهى قالت لي بصوت واطي قولي ليها انتِ مالك و مالي ! قلت ليها ساي بس 😅
قالت لي في زول من قدام برجع ورا !؟ فاديه قالت ليها نحنا صحباتها عشان كدا جات تقعد معانا ، أستاذه ياسمين قالت ليها صحبات من متين !! و طوالي عاينت لي بإستغراب ! فاديه قالت ليها من لمن جات !
تاني أستاذه ياسمين ما قالت حاجه و بدت حصتها بس لمن خلصت نادتني في المكتب ، لمن مشيت ليها قالت لي البنات ديل ما شبهك عشان كدا أرجعي مكانك و ابعدي عنهم ، كان في أستاذ عاطف و استاذه مروه و معلمين تانيين بس بدرسوا الفصول الصغيره ، أستاذه مروه قالت ليها فعلاً ما شبهها خالص و أنا كم مره انتبهت انها قاعده ورا و كنت بستغرب هي اللماها بيهم شنو ! أستاذ عاطف قال لي انتِ بت مهذبه و شاطره و خلوقه و البنات ديل عكسك تماماً اسألينا منهم نحنا ديل ، دائماً عاملين شغب و مشاكل ، لو باريتيهم بغطسوا حجرك و سهى دي اسأليها عايده كم مره عليك الله ! أستاذه ياسمين قالت لي انتي يمكن عشان جيتي السنه الفاتت ما عارفه منو الكويس و منو الكعب ، و يمكن قعادك معاهم ورا في الصف السادس هو الخلاك تصاحبيهم ، بس السنه دي بما انك قعدتي قدام فـ ماف شي تاني يخليك ترجعي ليهم ورا ، ركزي مع قرايتك ، و حافظي على مستواك .... المهم قعدوا يتكلموا معاي و ينصحوني و أنا شغاله ليهم حاضر ، حاضر ، لمن طلعت منهم و حكيت لناس سهى ، قالوا لي المتخلفين ديل مالهم كمان ! فاديه قالت الحارقهم شنو ما عارفه ! قلت ليهم حـ اضطر ارجع مكاني ، سهى قالت لي خااايفه منهم ولا شنو !؟ قلت ليها لا ما كدا بس.... رؤى قاطعتني و قالت لي عاااادي قولي انك خايفه منهم أو انتي بتفضليهم علينا بس ماف مشكله يا زوله أعملي البريحك ، حسن قال لي أنا جيت هنا عشانك ، فكرت مسافه بعدها قررت إنو في حصص استاذه ياسمين و عاطف و مروه ما أقعد ورا مع ناس سهى بس باقي الحصص بقعدها معاهم و فعلاً دا الحصل ، بعدها مرت الأيام و إمتحنا و بقينا منتظرين النتائج الكانت بعد أسبوعين ، طبعاً عمتي مشت معاي المدرسه ، كان في أمهات كتاااار مع أولادهم ، النتائج ذاعوها في الطابور من الصف الأول لحد السابع بس كانوا بندهوا العشره الأوائل ، لمن جا دور نتيجتنا عمتي كانت متحمسه شديد و قالت لي الليله حـ أزغرد بأعلى حس عندي ، ندهوا الطالبه الأولى ، و بعدها ولد ، كان التاني و التالته بت ، عمتي قالت لي حتكوني الخامسه بس ما حصل ، لمن وصلوا لـ المرتبه التاسعه ، عمتي قالت لي معناها انتِ العاشره بس للأسف ما كنت من العشره الأوائل !
