رجعنا البيت و أنا ساكته و بيان طول الطريق كانت بتسأل فيني الحصل شنو ، لمن دخلت غرفتي و دخلت معاي قالت لي ياخ ما تبوظي لي أعصابي ، قلتي لـ عمر الحقيقه ولا لا ؟؟
إتلفت منها و قلت ليها : قلت ليهو
قالت لي و اها قال ليك شنو ؟؟... جات وقفت قدامي و قالت لي مها الحصل شنو بعد ما عرف !
قلت ليها ما قال شي !
كيف يعني ما قال شي ، ردة فعلو كانت شنو ! يعني استحاله يكون قعد زي الصنم لا عمل حاجه لا قال شي !...دموعي كانت حـ تنزل بس منعتهم ، قلت ليها قال حـ يتصرف و ينهي العقد دا ، قال لي طيب ما شاكلك أو لامك على الكذبه الكذبتيها و العملتيهو قبل كدا ؟؟
قلت ليها لا ، قالت لي انتِ حكيتي ليهو من البدايه ؟؟ قلتي لا ما قدرت و أصلاً ماف داعي أجيب ليهو سيرة عنود و سهى العملتو مع ماريا لأنو ما حـ يفيد بـ شي و حـ يخليهو يزعل مني زياده و صورتي قدامو حـ تبهت أكتر ، قالت لي هسي أنا مستغربه و ما فاهمه شي ! يعني عمر مالو اتبارد كدا و ليه ما سألك ليه كذبتي ولا يمكن يكون فهم ليه انتِ كذبتي عليهو عشان كدا ما شاكلك !
يعني خلاص الموضوع دا شبه اتحلى بما إنو عمر اتفهمك ، باقي يخلصك من علاء و يقول الحقيقه للباقين ، ساعتها كل شي حيكون تمام و انتِ و عمر حتكونوا لبعض....
قلت ليها ما أظن ، عمر لمح لي بحاجه تانيه و خلاني أفهم انو نحنا مستحيل نكون لبعض ، قالت لي أجي دا كلام شنو ! لمح ليك قال شنو ؟؟!
طوالي حكيت ليها ، قالت لي يمكن ضرب مثل ساي عشان يفهمك بيهو كيف كذبه زي دي ممكن تأثر على حياة البت ، قلت ليها لا ما كان قاصد كدا !
، قالت لي جوطتوا لي راسي ! عمر ما مفهوم و انتِ ذاتك ما مفهومه ، يعني قدرتي تعملي دا كلو غلبك تعترفي ليهو و تقولي ليهو بعباره صريحه عملت دا كلو عشانك يا عمر ! عشان بحبك أو بريدك أو اي كلمه بالمعنى دا و هو يعترف ليك و تنهوا الحاصل دا كلو!
طبعاً بعد كلامها دا فجأه اتذكرت حاجه ، قلت واااي كيف نسيت حاجه زي دي !
بيان قالت لي بسم الله اتذكرتي شنو ، قلت ليها الريكوردات و بقيت أفتش على تلفوني زي المجنونه ، قالت لي ريكوردات شنو و انتِ مش خليتي تلفونك في بيت أمك !
وقفت عن التفتيش و قلت ليها صح نسيت إني خليتو هناك ! هسي حـ أعرف كيف إذا سمعهم أو لا ، و إذا سمعهم رد قال لي شنو !! إذا سمع الريكوردات معناها عرف الحقيقه دي قبل ما أجي و أحكيها ليهو ، طيب إذا عرفها ليه سكت و ما اتكلم ؟! ولا لمن كان بقول لي حـ نتناقش بعد تطلعي من المستشفى كان قاصد بخصوص الكذبه دي !
يعني هو سمعهم !
بيان قالت لي يا بت بتقولي في شنو انتِ !؟فهميني و ما تخليني زي الأطرش في الزفه ، قلت ليهو يوم حاولت انتحر ، قبل ما أعمل كدا رسلت لـ عمر ريكوردات و....... الخ
قالت معقوله ما اتذكرتي إلا هسي ! قلت ليها نسيتهم على الآخر ، رسلتهم ليهو و أنا ما واعيه على نفسي و ما عارفه بقول في شنو ! قالت لي معناها سمعهم و عرف حقيقة الكذبه قبل ما تجي و تقوليها ليهو ، طيب ليه ما عمل شي !!؟
قعدت على السرير و قلت ليها عمر ما بحب الكذب ، ياداب اقتنعت إنو عمر دا لو الواحد عمل مية حاجه عشانو ، و قصاد الـ 100 دي كذبه واااحد بس حـ يتجاهل الإنعمل عشانو و ما حـ يشوف شي غير الكذبه دي !💔
أصلاً أنا ذاتي تعبت و قنعت من كل شي ، عايزا بس اتقفل ورا أربع حيطان ، و أقعد براي أو أمشي مكان بعيييد ما فيهو زول من الناس البعرفهم ، قالت لي يا بت ما تقولي كدا ، غيتو أنا متأكده إنو عمر دا بحبك ، قلت ليها ايوه بحبني لكن زي أختو ، أنا ما عايزا أعشّم نفسي ساي ، و ما عايزا اتعلق في حاجه زايله ، و ما عايزا أجري ورا سراب ، زمان كنت بطمن نفسي و بغشها و بفسر تصرفات عمر و كلامو على هواي ، بس هسي كل شي بقى واضح .... طبعاً هنا اتذكرت كلام سهى لمن قالت لي ما تعشمي في ولد عمتك دا ساي ، و هو شايفك زي أختو .... معناها براي الكنت واهمه نفسي ... بيان قالت لي أنا حاسه إنو انتِ أكتر من أخت بالنسبه لـ عمر ، قلت ليها أنا ذاتي كنت حاسه كدا بس الإحساس ما كفايه ، قالت لي شوفي يمكن عمر ما قالها ليك أو ما حـ يقولها بس تصرفاتو و خوفو عليك أكبر دليل ، صدقيني ما ضروري الواحد يقول ليك بحبك أو ميت عليك عشان انت تعرف إنو بحبك ، الأفعال خير من الأقوال ....
لمن عاينت ليها بسخريه قالت لي بكرا حـ تشوفي كلامي دا ، فجأه كدا محمد بقى ينادي عليها ، قالت ليهو ايوه يا محمد أنا هـ... طوالي قاطعتها و قلت ليها اطلعي ليهو ، طلعت ليهو و جات راجعه تاني و قالت لي انتِ زعلانه من محمد ؟؟ قلت ليها زعلانه منهم كلهم ، قالت لي ما تظلميهو ساي لأنو القرار ما كان بـ يدو هو ، قلت ليها صدقيني حالياً هم كلهم شاميّني و أنا كمان ، لو بالجد كان عايز يوقف العقد دا كان وقفو ، بس ما عمل شي عشان هو كمان مصدق القالو علاء ، على الأقل بعد ما جيتكم في البيت كان يجي و يتكلم معاي ، بس عامل فيها لسه زعلان ، ما هو بس حتى فاروق من جيت ماف واحد فيهم شغال بي ، و معزه الكانت بتجيني على طول بقت ما بتجي مع انها عارفه الحقيقه ، والله لو هم بقوا ما بطيقوني فأنا كمان بقيت ما بطيقهم ، و عايزا أمشي من هنا بأسرع وقت ، قالت لي يخسسي عليك يا مها ، انتِ أولاد عمتك ديل لا قاعده معاهم من الليله لا قاعده معاهم من أمبارح ، عليك الله ليك كم سنه معاهم عشان تجي تقولي كلامك دا بكل بساطه ؟! هم زعلانين عشان معتبرنك أختهم و ماف راجل برضى أو بقبل إنو الناس تجيب سيرة أختو بالعاطل ، و سمعتها تبقى لبانه في خشوم الناس !
قلت ليها بيان المشكله انهم قبل ما يرجعوا لي و يسألوني عقدوا طوالي ! يعني إذا أي زول جا و قال ليهم أي كلام عني حـ يصدقوا من دون ما يسألوني ! لو هم أخواني بالجد ما كان صدقوا الإنقال عني ... فجأه جاني صوت محمد و بقول لي لو كنتِ شايفانا أخوانك بالجد ما كان غلطتي غلطه زي دي !
من دون ما أعاين ليهو قلت لـ بيان شفتي ؟؟ عشان كدا ما حاولت أبرر ليهم تاني و اعيد و أكرر في الكلام ، بيان قالت ليهو محمد انتوا ظالمين البت دي ساي ، و دا الموضوع الكنت عايزا اتكلم معاك فيهو و على فكره نحنا مشينا لـ عمر بالخصوص دا و.... قاطعتها و قلت ليها ماف داعي تحكي ليهو ، خليهو كدا ، الما عايز يصدقني عنو ما يصدق 😊
محمد قال ليها بيان أمرقي و طوالي طلع ، قالت لي ماشين هنا نشوف بيتنا الجديد و حـ احكي ليهو ، قلت ليها يعني ما عايزين تسكنوا هنا !؟
قالت لي لا لا محمد اشترى البيت الفاتح علينا دا ، قلت ليها لكن دا فيهو ناس خالتو عواطف ! قالت لي سيد البيت قال عايز يبيعو عشان كدا هم رحلوا قبل أيام و محمد اشتراهو ، المهم ما حـ اتأخر ... قالت كدا و مشت ، بقيت قاعده برااااي لحد ما فجأه كدا معزه جاتني داخله !
جات سلمت علي و قالت لي مشتاقين والله ، كيفك و أخبارك شنو !؟
قلت ليها تمام !
قعدت تتكلم معاي و تسألني الحصل علي شنو و أنا بجاوب بإختصار ، لأني بالجد بقيت أزهج من الكلام الكتير ، حكيت ليها الحصل بإختصار ، قالت لي علاء دا بالجد طلع حيوان ! بس بما إنو عمر قال حـ يخلصك منو اتطمني ، لكن بعدها حـ يحصل شنو !؟ علاء دا تاني حـ يقدر يقعد معاكم هنا في البيت و يكمل جامعتو !؟
قلت ليها ما عندي بيهو شغله ، أصلاً أنا ما قاعده ليهو ، قالت لي شنووو ! ماشه وين يا بت !؟ قلت ليها اي مكان بس ما حـ أقعد في البيت دا تاني !
قالت لي ليييه يا مها ! طيب و عمر ؟؟!
قلت ليها بعد الحصل دا كلو لسه بتسألي ليه !؟ و عمر مالو يعني ؟
قالت لي مش انتِ بتحـ..... قاطعتها و قلت ليها لا ، كانت مجرد هباله و عواره مني ما تذكريني بيها ، قالت لي ما علي أنا ، قلت ليها عليك الله يا معزه أنا ما قادره اتكلم أكتر ، قالت لي طيب انا حـ أمشي بس حـ اجيك تاني ، أوعك تتهوري فاهمه ولا لا !؟
أول ما إتحركت قلت ليها ما معروف يمكن أمك ما تخليك تجي تاني ، إتلفتت علي و سكتت ، قلت ليها معناها تخميني صحيح ، أمك منعتك مني صح !؟
قالت لي والله رغم إني قلت ليها انك صادقه و إنو علاء كذاب ، بس هي زيها و زي أهلك مصدقين علاء ، قلت ليها ما مهم ، أصلاً بقى ماف شي بفرق معاي !!
بعدها معزه مشت .... طبعاً محمد و بيان لمن جوا راجعين بيان نادتني و قالت لي محمد عايز يتكلم معاك ، لمن مشيت ليهو قال لي الكلام القالتو بيان حقيقه !؟
قلت ليهو حسب انت عايزو يكون شنو ، قال لي سألتك جاوبي ، قلت ليهو ايوه دي الحقيقه ، قال لي في وحده بتكذب في نفسها كذبه زي دي ؟؟ ما تقولي لي عشان عمر و بتاع ، ماف أي سبب يخليك تكذبي في نفسك و تعملي الجوطه دي كلها ، هسي شوفي كذبتك دي ودتك لـ وين ، بالجد أنا مصدوم فيك و ما متخيل إنو ممكن يطلع منك تصرف زي دا ! معقوله البت الكانت هاديه و رايقه تكذب كذبه زي دي !! .... طبعاً قعد يشاكل فيني و في الآخر قال لي عموماً الزواج دا حـ ينتهي ، قبل شويه اتصلت على عمر ، بكرا كلهم حـ يجتمعوا هنا عشان نشوف حل للموضوع دا و تاني إياك تكذبي كذب زي دا فاهمه ولا لا ؟؟
هزيت ليهو راسي بس ، طبعاً عمتي نهاااي ما طلعت ، بتطلع لمن أنا أكون في غرفتي....
المهم تاني يوم أثناء ما أنا كنت في الحوش سرحانه و بفكر الحيحصل شنو سمعت صوت الجرس ، ما مشيت أفتح الباب رغم إني كنت قريبه منو ، قلت بيان حـ تجي تفتحو بس هي ما جات و الجرس كان برن ، مشيت على الباب و أول ما فتحتو لقيت عمر في وشي !!
للحظات إتوترت و قلبي عمل شححح و بقيت أهرب منو بـ عيوني ، فتحت ليهو الباب على الواسع و وقفت على جنب ، قال لي السلام عليكم و طوالي دخل ، قفلت الباب و بقيت أعاين ليهو لحد ما دخل جوه ، طبعاً ما دخلت جوه إلا لمن ناس أبوي جوا ، طبعاً علاء الحيوان ذاتو جا و بدون خجله كمان ، وشو ما كان بتقابل ، كلو جروح و كدمات ، اها لمن إتلموا كلهم عمتي ذاتا جات و قعدت معاهم ، عمو النور قال الموضوع دا لازم يتحسم اليوم ، هسي أنا بسبب الموضوع دا و المشاكل الكتيره دي أجلت سفري !
عمر قال ليهم و أنا اختصرت ليكم كل الورجغه الممكن تحصل لمن اتصلت امبارح و حكيت ليكم بإختصار عشان لمن تجوا هنا تجوا و انتوا عارفين مفروض تقولوا و تعملوا شنو ، بس حـ اقول ليكم تاني بإيجاز ، علاء يا خالي كان بضايقك بتك في نص بيتنا ، و نحنا ما جايبين خبر ، و هي ما قادره تحكي بسبب خوفها من ردة فعلنا ، لمن اتشجعت و جات حكت لي ، أنا فهمت إنو اتمادى عليها أكتر ، فـ بقيت أفتش عليهو بس ما لقيتو ، و قبل العرس بيوم عرفتو قاعد وين ، و لمن مشيت ليهو و حصلت جوطه كبيره و هو عرف ليه انا بضرب فيهو ما فتح خشمو و قال لي إنو دا كلو ما حصل ، سكت عشان يجي و يكذب عليكم يوم العرس و يختكم أمام الأمر الواقع و فعلاً دا العملو ، كذب و قال إنو غلط معاها ، يعني قال حاجه أبداً ما حصلت يا خالي ، و شوه سمعت بتك و سمعتنا كلنا 😊
هنا علاء نط و قال ليهو انت بتنطط مالك ما تقول الحقيقه كامله ، بتدسدس مالك !.... طبعاً هنا أنا خفت إنو علاء يقول ليهم إنو عمر جا داخل و لقانا سوا في الغرفه و يتهمني اتهام باطل تاني و يحكي ليهم عن الفيديوهات ديك ، خاصة إنو بقى عديم حياء و أي شي متوقع منو ، ختيت يدي على قلبي و بقيت أعاين ليهو بـ خوف ، علاء إتلفت على أبوي و قال ليهو يا عمي ، الحقيقه إنو بتك جات لـ عمر عديل و قالت إني إعتديت عليها ، و هي قالت كدا عشان تخليكم تعقدوا لي عليها ، و أنا أصلاً عايزها عشان كدا لمن عمر جا و ضربني و خلاني واقع في الشارع زي الكلب و مشى ما فتحت خشمي و ما قلت إنو هي كذابه ، و لمن عرفت انها عملت دا كلو عشاني جيت و إعترفت ليكم بحاجه أنا ما عملتها ، بس ما قدرت أخلي تضحيتها دي تروح في الفاضي .... هنا طوالي عمر مسكو من لياقة قميصو و قال ليهو متخلف انت ولا شارب ليك شي قبل ما تجي هنا و طوالي ضربو كف ، طبعاً علاء اتعصب و قال ليهو ياخ انت مالك خليني اتكلم ، عارفك عايز تسكتني بأي طريقه ، عايز تنهي الزواج دا بأي طريقه عشان يفضى ليك الجو قايلني ما عارفك ولا ما فاهم عليك !
اتصدرت المشهد و عملت نفسك بطل و عايز تتستر عليها ، محمد نهرو و قال ليهو عليك الله يا علاء كلامك دا انت قادر تصدقو ؟؟ كيف يعني تكذب فيك و في نفسها عشان تخلينا نعقد ليكم ! يعني ما كان في طريقه غير دي ولا انت ما راجل عشان تمشي و تطلبها من أبوها !؟
هنا علاء ياداب فهم إنو بقول في كلام خارم بارم ! عمر إتلفت على أبوي و أبوهو و قال ليهم الموضوع ما محتاج شرح أكتر ، ياهو علاء قدامكم و الحقيقه ظاهره في وشو و في كلامو الغبي دا !
طبعاً أبوي دا كان بعاين لـ علاء عشره عشره ، عشان عمر قال ليهم إنو كان بضايقني و ماف زول جايب خبر ، أول شي قام و دقاهو دقه تمااام كدا بعدها رجع قعد و هو معصب و عمتي تهدي فيهو ، طبعاً هي ذاتا اتخلعت بكلام السمعتو بس ما قالت لي حاجه ، علاء زعل و إنفعل عاين لي و قال لي بهرشه كدا : ساكته ليه ؟؟
قولي ليهم انك عملتي دا كلو عشاني ، قولي ليهم انك عايزاني أنا ما عمر !
اتخيلوا قال الكلام دا من دون خجله قدام أبوي و عمو النور و عمتي !
قلت ليهو ما فاهمه ، عملت شنو أنا عشانك ! و ليه يعني اعمل شي عشانك !!
كان في كبايه في التربيزه الفي نصنا ، شالها و ضرب بيها الأرض لمن اتكسرت حته حته ، و قال لي خايفه منهم للدرجه دي ؟؟ ناسيه ريدتك لي و كيف كنتِ تحكي لـ صحبتك سهى عني !
عمر قال ليهو احترم نفسك عشان ما تلقى نفسك في المستشفى ، علاء جا وقف قصادي و قال لي أنا معاك يا مها ما تخافي منهم ، بما انني وصلنا المرحله دي خلينا نقول ليهم العندنا و ما ندس شي !
طبعاً أنا كنت مستغربه فيهو و ما عارفه بقول في شنو و سهى الدخلها شنو ، عمر جراهو و قال ليهو خليك بعيد منها ، بيان كانت من قبيل ساكته عشان ما عايزا تتكلم في وجود ناس أبوي ، بس لمن كلام علاء غاظها ، قالت ليهو انت يا علاء ساطل ولا شنو ؟؟
مها دي متين قالت ليك أرح نكذب كذبه زي دي و نختهم أمام الأمر الواقع !؟ و بعدين كيف انت ذاتك تصدق انها ممكن تكذب في نفسها عشانك و هي أصلاً ما شغاله بيك ولا بتعاملك معامله استثنائيه ، فـ شنو البخليك تقول كلام خارم بارم و تفكر بالطريقه دي !! كيف يعني مها تمشي و تقول لـ عمر علاء اعتدى علي عشان تخليهو يعرس ليكم ! هي قالت ليك كدا ؟؟ اتصلت عليك و قالت ليك انها كذبت على عمر عشانك و قالت ليك واصل في الكذبه !!
طبعاً علاء كل مره بكتشف إنو غبي و إنو كلامو عبيط و غبي زيو ... عاين لي بإستغراب و قال لي انتِ لمن كذبتي على عمر مش اتصلتي علي و نبهتيني و قلت لي لو عمر بعرف بيوت أصحابك و انت في بيت واحد منهم أطلع طوالي ! طيب دا كلو معناهو شنو !؟
طبعاً هنا عمر قعد يعاين لي و أنا ما قدرت أقول حاجه ، بيان قالت ليهو يا ود الحلال انت واهم نفسك ساي ، ياخ مها لمن عرفت انو عقدوا ليها عليك حاولت تنتحررر ، يعني فضلت الموت على انها تكون معاك ، تجي انت و تقول ليها ناسيه ريدتك لي ، هسي ما بتخجل من أعمامك ديل ؟!
طبعاً كلهم بقوا يعاينوا ليهو بغضب ، بقى يعاين لي و منتظرني اقول حاجه ، لمن ما اتكلمت غضب زياده و قال لي ما عارف ليه انتِ قاعده و ساكته و من جواك عايزاني ، أبوي وقف و كشطو كف و قال ليهو إحترم نفسك و اتخارج من هنا ، قال لي بتضاري الحقيقه ليه !؟ لمن اتصلت على سهى صحبتك عشان أفهم ليه انتِ كذبتي فيني كذبه زي دي عرفت منها انك عملتي كدا عشاني ، طيب ليه هسي بتنكري ؟ ما قلتي دا لـ سهى ؟ خايفه من عمر ولا من أبوك ؟؟ سهى قالت لي انك دائماً بتحكي ليها عني و انك عايزاني زي ما أنا عايزك ، هنا محمد جراهو و قال ليهو ياخ احترم نفسك علاء .... كان لسه بعاين لي و هو بتكلم زي الزول الما واعي على نفسو ، كان كأنو بتوسل لي بنظراتو عشان اقول أو اعمل شي ، عمتي أخيراً اتكلمت و قالت ليهو صدمتي فيك كبيره يا علاء ! كيف تصرف تصرف مقرف زي دا و في نص بيتي و لـ بت عمك !! عمى اليلايسك ان شاء الله ! عمر قال بما إنو كل حاجه وضحت و كل الناس عرفت إنو علاء واحد كذاب و منافق نمشي للخطوه التانيه .... عاين لـ علاء و قال ليهو حـ تطلقها من دون أي نقاش ، قال ليهو ما بطلقها لو كتلتوني ، عمر تاني مسكو من لياقتو و قال ليهو المره دي حـ انسى انك ولد خالي ، علاء دفر عمر بكل قوتو و قال ليهو ما بطلقها يعني ما بطلقها ، و طوالي طلع بإستعجال و عمر كان ماشي يلحقو بس محمد مسكو و قال ليهو خليهو ، كدا كدا حـ يطلقها ، لو ما اليوم فـ بكرا ...
أنا طوالي دخلت غرفتي و بديت أفكر كيف يعني سهى تكذب على علاء و تقول إني قاعده أحكي ليها عنو !!... و هو متواصل مع سهى من متين و متين شال رقمها !!
بيان لمن جاتني داخله ، قلت ليها حاسه راسي لافي و أفكاري جاطت ! سهى ليه تقول كدا لـ علاء!
قالت لي واضح إنو نيتها ما كانت صافيه ، غيتو البت دي من حكيتي لي عنها شميتها ، قلت ليها بس ما فاهمه ليه هي تعمل كدا و تعشم على و تغشو ؟؟! قالت لي التفسير الوحيد انها عايزا تخرب ليك ! سكته مسااافه بعدها قلت ليها برضو حـ تعمل كدا ليه !؟ قالت لي في ناس قلوبهم وسخانه ، حبوا يأذوا الناس و يخربوا ليهم فرحتهم ، قلت ليها يمكن عشان أنا ما كلمتها بـ العقد و عرفت من علاء ! قالت لي احتمال ، قلت ليها المهم ناس أبوي قالوا شنو ؟؟
قالت لي ما عارفه والله لسه بتكلموا ، المهم تاني لمن طلعت من غرفتي ما لقيت زول ، قلت معناها كلهم طلعوا و مشوا بس ما قالوا لي حاجه !!
لمن طلعت برا الحوش لقيت عمر في وشي ، اتوضا و قام ، ما عاين لي مرتين ، أول ما اتحرك اتشجعت و بتردد قلت ليهو عمر ... وصلتك ريكوردات مني ؟؟
إتلفت علي و قال لي أنا عايز اسألك سؤال ، قصدي اسئله : متين انتِ بقيتي كدا ؟ و ياربي كذبتي كم كذبه و عملتي كم عمله !
قلت ليهو ايوه انا بكره علاء ، بس عشان اتهمتو و كذبتي ما حقيقه خفت إنو يموت بسببي ، و انت تبقى كاتلو و تدخل السجن بسببي ، عشان كدا اتصلت عليهو و نبهتو ، قال لي ما شاء الله والله ، اها و تاني عملتي شنو ؟؟!
عاينت ليهو بإستغراب و قلت ليهو ما عملت شي ، قال لي وقت فتحتي باب الإعترافات دا كان تعترفي بعمايلك كلها ، ليه بتقولي جزو و بتغطي جزو !
قعدت أعاين ليهو بإستغراب ، قال لي ياخ والله انا للآن مستغرب و مصدوم فيك ، قلت ليهو عمر انا كذبت و ندمت على كذبتي ، و هسي الحقيقه كلها ظهرت ، قال لي بهرشه : لا ما ظهرت لأنك ما اعترفتي ، ليه ما جبتي سيرة عنود !!؟
لمن قال كدا نططت عيوني و قعدت أعاين ليهو و أنا بسأل نفسي هو قاصد شنو !؟
واصل كلامو و قال لي ليييه ما جيتي و اعترفتي انك سبب في المشاكل الحصلت بيني و بينها ؟ و رأيك شنو في العملتيهو مع ماريا !! خليك من المشاكل الصغيره الكنتِ بتعمليها ليها زي انك تخربي كل حاجه هي بتعملها ، الغلط الما قادر اتجاوزو ليك و البسببو انتِ جد جد سقطتي من نظري لمن خليتي راجل يدخل ليها في البيت عشان تبهتي صورتها قدامي ! باريتي صحبتك ديك و كنتِ مستعده تعملي أي شي عشان ترضي نفسك !
والله بتكلم معاك و أنا حاسي نفسي زي البحلم ! يعني هسي كلامي دا لو جبت زول من ناس البيت و حكيتو لـيهو حـ يصدقني ؟؟ حـ يصدق انك ممكن تعملي حاجات زي دي !؟
في البدايه انتِ و بمساعدة صحبتك الما بتتسمى ديك بقيتوا ترسلوا لـ عنود و تحاولوا تفقدوها الثقه فيني ، لحد ما نجحتوا و زرعتوا الشك في قلبها ، و خلقتوا عدم تفاهم بيناتنا لحد ما خليتها !
ما وقفتي هنا ، حتى ماريا ما قصرتي منها ، قعادها في بيتنا كان مضايقك و عملتي كل البتقدري عليهو عشان تصغريها قدامنا لحد ما قربتي تجننيها ! و الله أعلم يمكن عملتي أكتر من كدا !
طبعاً بقيت أعاين ليهو و انا مصدومه ! هو عرف دا كلو من وين ! لمن كان حـ يمشي وقفتو و جيت وقفت قصادو و قلت ليهو والله ما أنا العملت كدا يا عمر ، ديل ماريا و سهى و أصلاً انت عرفت كيف ؟؟
قال لي المهم عرفت ، قلت ليهو لو ماريا هي القالت ليك كدا اتأكد انها كذبت عليك ، يعني لو أنا العملت كدا هي عرفت من وين عشان تجي و تحكي ليك ؟؟
هرشني و قال لي اسألي نفسك السؤال دا ! انتِ العملتي كدا فـ ماريا حـ تعرف من وين عشان تجي و تحكي لي !؟
سكته مسااافه بعدها قلت ليهو معناها دي سهى !... أو منهل ! لأنو هم التلاته خططوا عشان يعملوا مشاكل بينك و بين عنود ! عاين لي بعدم تصديق و قال لي كفايه كذب ، قلت ليهو عمر متذكر يوم عرس محمد لمن شلت منك تلفونك و بقيت اتصور بيهو ! ماريا شالت مني التلفون و عملت نفسها عايزا تشوفو و في الحقيقه هي شالت رقم عنود من تلفونك ، أنا عرفت الحاجه دي من سهى بعد فتره طويله ، سهى كانت بترسل ليها من شريحه و ماريا من شريحه تانيه !
قال لي بطلي استهبال ، دا كلو عملتيهو انتِ ، ماريا ما بتعمل كدا و أساساً تعمل كدا ليه ؟؟
قلت ليهو و أنا أعمل كدا ليه !؟... لمن خت عيونو في عيوني بلعت ريقي و إتوترت و شلت عيوني عن عيونو ، قلت ليهو عمر والله العظيم دي ما أنا ، ديل ناس ماريا العملوا كدا ! قال لي فرضاً إنو ماريا عملت كدا انتِ عارفه ليه ما جيتي كلمتيني !؟
قلت ليهو ما كنت عارفه ياخ ، قال لي بس في الآخر عرفتي ولا لا ؟😊
قلت ليهو عرفت مؤخراً بعد ما انت خليت عنود ، تاني لو اتكلمت الحـ يفرق شنو !!؟
قال لي كان حـ يفرق كتييير بس انتِ ما اتكلمتي ، ما عشان عرفتي متأخره ، عشان أصلاً ماريا ما دخلها في القصه دي كلها ، انتِ و صحبتك ديك ورا العمايل دي كلها !
قلت ليهو طيب لو ديل أنا و سهى ليهم أنا من بين كل الناس اتهم ماريا !؟ ما ملاحظ انك من أول ما سألتني أنا ذكرت ليك اسم ماريا من بين كل الناس !! والله دي هي !
قال لي و السبب !؟
عاينت ليهو جوه عيونو و قلت ليهو لأنها خاته عيونها عليك ، و قالت بخشمها ليه انت تخليهم هم و تمشي تعرس وحده غريبه ، قال لي بتتكلمي عن نفسك صح ؟! تمام خليك من دا ، الراجل الجبتيهو و دخلتيهو البيت جبتيهو من وين !!؟... دا شنو السؤال الغبي دا ، أكيد جابتو ليك صحبتك الخبيثه أو انتِ أصلاً بتعرفيهو و جبتيهو براك ! ياخ انتِ مصنوعه من شنو !؟ كيف نفسك تسمح ليك تجيبي واحد غريب و تدخليهو البيت عشان ......هنا سكت و ما قدر يكمل ، بقيت أبكي و أقول ليهو والله العظيم دي ما أنا يا عمر ، ديل ماريا و سهى ، قال لي نفس العملتيهو لـ ماريا حصل معاك ، شفتي كيف !؟ أول مره أحس إني ما متعاطف معاك ولا قادر اتعاطف معاك ، حالياً أنا ما شايف قدامي غير وحده خبيثه كانت بتدعي البراءه ! جاوبيني بس استفيدتي شنو من دا كلو ؟؟ حصلتي على شنو ؟؟ بسبب عمايلك و كذبك دمرتي حياتك و وسختي سمعتك !
طبعاً هو بتكلم و أنا ببكي و كلامو واجعني ، قلت ليهو قصة عنود أنا ما لي دخل فيها والله ، و الراجل داك ما كنت قايلاهو حـ يدخل جوه البيت لـ ماريا ، كنت بس عايزاك تشوفو طالع من البيت عشان تفهم ماريا غلط و تشك فيها .... حسيتو شويه كدا و حـ يضربني كف ! كان بعاين لي بنظرات مليانه غضب !
قال لي انتِ عارفه أنا لمن وصلني الكلام دا ما صدقت بس براااك لمن جيتي امبارح و في بداية كلامك كنتِ حـ تذكري اسم عنود شكيت فيك و اليوم اتأكدت !... بقى يشاكلني و يقول لي كيف قدرتي تعملي دا كلو ؟ هسي عليك الله بأمانه حاسه نفسك غلطانه ولا لا ؟
قلت ليهو الوصل ليك الكلام دا منو أساساً و عرف من وين ؟ ما خطر على بالك إنو القال ليك الكلام دا ممكن يكون بكذب عليك ؟؟
قال لي خطر على بالي و لو ما كنت متأكد ما كان سألتك ، قلت ليهم ياهم تلاته ، يا ماريا يا سهى يا منهل الحكت ليك و كلهم كذابين ، يعني أنا اعترفت ليك إني خليت الباب فاتح للراجل بغلبني اعترف و اقول ليك اني فتنت بينك و بين عنود ؟! بس عايزا أعرف دا منو القال ليك كدا و انت ما سألتو عرف من وين؟ إذا زي ما قلت أنا و سهى العملنا كدا فـ القال ليك الكلام دا عرف من وين ؟؟قال لي معناها دي سهى ذاتا رسلت لي برقم تاني و قالت لي حقيقتك ! شكلك اتشاكلتي معاها عشان كدا فضحتك !!😊
قلت ليهو بتصدق صاحب رقم غريب بس ما بتصدقني !؟ على فكره صاحبة الرقم دا يا سهى يا ماريا ، أنا العندي قلتو ليك ، لو ما عايز تصدق بطريقتك 💔
بقينا ساكتين الإتنين و كل واحد بعاين للتاني ، بعد مسافه قال لي عموماً الفات مات بس في حاجات ما بقدر اتجاوزها ليك و ثقتي فيك بقت مهزوزه ، غمضت عيوني شديد و قلت ليهو أنا عملت العملتو عشانك ... ما كنت عايزا بت تشاركني فيك !
لمن فتحت عيوني و عاينت ليهو ما لقيتو مستغرب أو متفاجأ و أصلاً أنا كنت حاسه إنو عارف إني بحبو لأنو الموضوع بقى واضح ، قال لي دا ما مبرر ليك ، هسي عليك الله تعملي دا كلو عشان حاجه تافهه زي دي !؟
طبعاً هنا حسيت قلبي اتكسر !
دخلت جوه و خليتو واقف و طبعاً ما حكيت لـ بيان ، بس كنت متأكده إنو الرسلت ليهو برقم تاني يا ماريا يا سهى ، لو دي ماريا فأنا عارفه اسبابها بس لو دي سهى ليه تعمل كدا بعد ما كانت واقفه معاي ؟! معناها رجعت تاني و صاحبت ماريا و قررت تقيف معاها ، اللحظه ديك كرهتها من جوه قلبي و ندمت على صحبتها ، طلعت وحده غداره و ما مضمونه و الواحد ما بقدر يأتمنها....
المهم قررت إنو بكرا اتصرف و أمشي لأمي رغم انها ما جات كاستني ، دائماً لمن أبوي يسوقني منها في البدايه بتجوط و بعدها بتسكت ، عارفه إنو لا بيت أمي نافع معاي لا بيت أبوي لا بيت أمي ، حسيت إني وحيده في الدنيا دي و ما عندي ولا زول قريب مني ، حسيت إني خسرت كل الناس و حالياً ماف زول واقف معاي 💔
تاني يوم عمتي كانت بتتكلم مع عمو النور بالتلفون ، في البدايه ما كنت مركزه معاها بس لمن حسيت انهم بتكلموا عني ركزت ، كانت بتقول ليهو : الفاضل أخوي جا متين من البلد ؟... بري والله ما جاني .... اها في الآخر قلتوا شنو !؟ والله يا النور بطريقتكم ، البت بتكم و الولد ولدكم .... بتسألني ليه بعد ما قررتوا ! أصلاً أنا كلامي ما مهم و ذاتو ما عايزا اتدخل في الموضوع دا ... والله لو رضت تقعد ليكم معاهو و قبلت بالعقد دا فـ على كيفها .... طبعاً هنا حسيت بخطر !! طبعاً عمي الفاضل دا أبو علاء ، حسيت إنو الطلاق دا ما حـ يحصل و ماف شي تاني حـ يحلني من علاء !
دخلت جوه و أنا عيوني مليانه دموع ، فجأه سمعت بيان بتتناقش مع عمتي و قالت ليها كيف يعني تخلوها تعيش معاهو بعد عمايلو دي كلها و الأهم إنها ما عايزاهو و و و ... عمتي قالت ليها هووووي يا بت ديلك أعمامك أمشي قولي ليهم كلامك دا ، أنا ما عندي كلمه عند زول ، طبعاً هنا ياداب بكيت كويس و بيان جات تحنس فيني ، قالت لي محمد و عمر حـ يتصرفوا ، خلي محمد دا لمن يجي ، قالت لي عمر بكون ما عارف ، شالت تلفونها و لمن كانت حـ تتصل عليهو شلت منها التلفون و قلت ليها ما تتصلي عليهو ، قالت لي بس هو.... قاطعتها و قلت ليها بزهج قلت ليك ما تتصلي عليهو يعني ما تتصلي عليهو !
