المره دي عاهدت نفسي إنو مهما يحصل ما حـ أتنازل ، و ما حـ أمشي أعتذر منو أو أحاول أراضيهو ، أصلاً هو ياتو يوم جا راضاني أو اعتذر مني عشان في كل مره اعمل حساب لزعلو و أمشي اعتذر منو ، إذا هو ما شغال بي فـ ليه انا اشتغل بيهو !!
طبعاً طلعت و مشيت قعدت في الحوش جنب الشتلات ، إتكلت على الحيطه و بقيت أهبش في الشتلات و أنا زعلاااانه ، شويه كدا فاروق جا داخل ، قال لي قاعده كدا مالك ؟؟ ما رديت عليهو ، جا وقف قصادي و قال لي زعلانه يعني !؟ رفعت راسي عاينت ليهو بس ما قلت حاجه ، جا علاء و قال لي ما تزعلي ساي لأنك بالجد المره دي غلطانه و الإنقال لـ صالحك بس بطريقه قاسيه شويه ، أنا قبيل ما حبيت أزيد عليك و أغلطك أكتر ، عشان كدا سكته ، المهم رايك شنو تدخلي معانا المطبخ ؟؟ أنا و فاروق عايزين نعمل لينا طبخه كدا من الموووت أرح شاركينا ، قلت ليهو ما عايزا ، فاروق قال لي حـ أشتري ليك دفاتر ملونه ، النوع البتحبيهو داك ، قلت ليهو ما عايزا ! علاء قال لي حـ أشتري ليك 3 إندومي ، قلت ليهم ما عايزااا يااااخ ما بتفهموا انتوا !!
فجأه جاني صوت عمر و هو بقول ليهم بالجد انتوا ما عندكم موضوع ! واقفين الوقفه دي عشان تحنسوها !؟ والله واضح إنو أمي ما براها الخاربه طبعها !
علاء قال ليهو ليها حق تزعل ، كلامك معاها قبيل كان قاسي جداً ، قال ليهو ما عرفتك يا أبو قلب حنين ! فاروق ضحك و قال ليهو يا مان كلام علاء صحيح ، و انت لو ما عايز تعتذر منها و تراضيها على الأقل خلينا نحنا نحاول نراضيها ، قال ليهم اشتروا ليها مصاصه و لو عايزين اشتروا لروحكم كمان و تعالوا اقعدوا واسوها و اتضامنوا معاها تحت الحيطه كدا زي الغنم الداقاها مطره....
حييييا أنا من عمر دا ! هيج زعلي زياده و غاظني غيظه ! علاء و فاروق إتلفتوا علي في نفس اللحظه عشان يشوفوا ردة فعلي ، لقوني خاته عيوني على عمر و بعاين ليهو بكل الغضب و الحقاره الفي الدنيا دي ، طبعاً فاروق كان ماسك نفسو من الضحك ، أصلاً هو طبيعي بضحك ، علاء قال لي ما تشتغلي بكلامو ، اي نحنا غنم داقاها مطره المشكله وين ! طبعاً علاء قالها بزعل كدا ، فاروق إتلفت على عمر و قال ليهو لو اتكلمت تاني يا مان كتااار الحـ يزعلوا عشان كدا اسكت و خلينا نتفاهم معاها ، قال ليهو الحيطه قاعده ، أي زول زعلان يجي يتلصق فيها ، طبعاً الوقت داك أنا لسه كنت بحمر ليهو و ما كسرت نظرتي ، قلت لـ علاء لو نحنا غنم هو حـ يكون شنو !؟ في غنم بتكون بت خال أو ود خال بني آدم كما كلنا غنم و جاين من نفس الزريبه ، طبعاً هنا فاروق و علاء قعدوا يضحكوااا قدرتهم ! بس اول ما عاينوا لـ عمر كل واحد دخّل سنونو ، ما أكذب أنا ذاتي خفت من عمر و من ملامح وشو و من النظره العاين لي بيها ، عمر هو الإنسان الوحيد الأنا ما قاعده أقول ليهو غير طيب و حاضر بس غاظني و قهرني و خلاني اقول ليهو كلام شين حتى لو ما كنت قاصده ، علاء قال لي لا لا شكلك شميتي عمر دا شديد !
طبعاً في نفسي خفت و بلعت ريقي بس عملت فيها مصندده ، قلت ليهو ما بس شميتو ، أنا كرهتو و شديد كمان !
طبعاً اللحظه ديك عمر كان بعاين لي عشره عشره ، فاروق قال لي عيب ، كيف يعني تقولي كدا قدام عمر ، كان تخليهو بعد ما يمشي 🤣🤣
عمر وزع نظروا علينا نحنا التلاته و قال لينا بالجد نفس الطينه و العجينه ... قال كدا و مشى و أنا قعدت اضحك بصوت عاااالي عشان أغيظو ، بعدها قمت من مكاني و مشيت المطبخ مع علاء و فاروق و قعدنا نطبخ بمزاج ، علاء قال عمر شكلو شمانا شديد ، تاني مية سنه لقدام ما حـ يتكلم معانا ، فاروق قال ليهو قبيل حسيتو حـ يجي يمسكني و يمسكك و يضربنا في بعض ، قلت ليهو دا مستهبل ساي ، فاروق قال لي بالمناسبه يا مها ما ما كان تردي ردك داك لـ عمر ، هو لا أنا لا علاء عشان تردي ليهو رد زي دا ، أنا قدامو ما قلت ليك حاجه بس النصيحه ردك ما عجبني ، علاء قال ليهو يقول علينا غنم ماف مشكله و لمن يقولوا ليهو نفس الكلام تبقى عيب و مصيبه ! قال ليهو أنا ذاااتي قال لي كدا معاكم بس ما حسيت كلامو مُهين بس لمن مها ردت عليهو حسيت ردها فيهو تصغير و عدم إحترام ليهو !!!!
طبعاً بعد كلام فاروق دا للحظات حسيت بالذنب و قلت إنو ما كان ألمح ليهو بفكرة إنو هو ذاااتو غنمايه زينا ! بس تاني إتراجعت و قلت يستاهل....
