بعد ما معزه مشت عمتي قال لي هي عايزا تحسسك انها احسن منك و بتمشي التلاوه و بتختم القرآن ، عشان كدا أنا كذبت عليها ، قلت ليها أنا لو ما كان الصيام متعبني و الشمس حاره كنت حـ أمشي معاها ، بس والله ما قادره ... جاني صوت عمر لمن قال لي فعلاً هي أحسن منك و بعدين من متين الصيام بمنع الناس تمسك المصحف و من متين الشمس الحاره بتمنع الزول يمشي التلاوه أو يطلع من البيت !؟
لو مستشعره عظمة رمضان و عارفه أجر قيام الليل و قراءة القرآن ما بتقولي كلامك دا ، الشمس الأصلاً انتي ما قاعده تطلعي فيها دي الناس ماشه فيها عااادي و هي صايمه ، في ناس لا عندهم مرواح لا مكيفات ، عايشين في سموم و سخانه و هم صايمين ، و انتي القاعده في التكييف و الما بتشوفي الشمس إلا في الدقيقه البتطلعي تتوضي فيها و تجي راجعه قاعده تتشكي !
قلت ليهو خلاص هسي حـ اقفل المكيف أو حـ أطلع أقعد ليك برا في الشمس دي عشان ترتاح !... قال لي دا الفهمتيهو من كلامي !؟
عمتي قالت ليهو عمر عليك الله خلي البت في حالها ، طبعاً اتغظت منو غيظ ، بعد مشى قلت لـ عمتي هو من يوم اتشاكل مع بتو القطريه ديك بقى شاميني ! قالت لي لا لا ما تقولي كدا ، أصلاً انتي علاقتك شنو بشكلتهم ! عمر دا مستهبل ساي ما تشتغلي بيهو ...
المهم بعدها عمتي بدت تجهيزات العيد ، يوم الوقفه عمر ساقنا و ودانا السوق ، طبعاً محمد لمن عرس و سافر مع مرتو خلى العربيه لأخوانو ، المهم مشينا اشترينا حاجات العيد و كمان اشتريت ملابس جديده و اكسسوارات ، طبعاً من اليوم داك عمر بقى ما شغال بي كتير و بقى ما بقول لي أعملي لي حاجه ، أنا في البدايه زعلت أكتر منو و قلت تاني ما حـ اتكلم معاهو و لو طلب مني اعمل ليهو شي ما حـ اعملو بس لمن سكاتو طال و سفهتو لي وجعتني و فرقت معاي ، قررت أمشي و أعتذر منو ، في نفس يوم الوقفه المشينا فيهو السوق ، بليل طلعت ليهو برا في الحوش و أنا مشربكه أصابعي ، كان مركز مع تلفونو ، قلت ليهو عمر !
قال لي نعم من دون ما يعاين لي !
سكته و اترددت مسافه ، بعدها قلت ليهو معليش !... برضو ما رفع راسو و عاين لي ! قال لي على شنو ؟
قلت ليهو ما كنت قاصده اتسمع على كلامك ! بالصدفه بس سمعتك ، قال لي حصل خير ، المهم انك عرفتي غلطك !... طبعاً برضو ما كلف نفسو يعاين لي !
قلت ليهو انت كمان غلطان و مفروض تعتذر مني لأنك فضيت كل زهجك و غضبك فيني ، و لأنك بقيت تتزهج فيني بسبب و بدون سبب ! يعني إذا انت متشاكل مع بتك القطريه ديك أنا ذنبي شنو !؟
هنا خت التلفون على جنب و عاين لي ! قال لي ما قلتي ما سمعتي شي ! قلت ليهو بالصدفه !
قال لي أنا المزعلني منك انك كذبتي ! أنا متأكد انك كنتي واقفه و بتسمعي في مكالمتي و مع ذلك كذبتي و أصريتي على نقطة انك ما كنت واقفه و بتتصنتي !
قلت ليهو طيب انا آسفه !... سكت و ما رد علي ، قلت ليهو ما حـ أعيدها تاني يا عمر !
إبتسم و قال لي تمااام ، قلت ليهو سامحتني ولا بتمشي فيني ؟ قال لي لا اتطمني سامحتك والله ، أخدت نفس و قلت ليهو أخيراً كدا إرتحت ، قال لي أكيد كنتي شايله هم العيديه و بتفكري منو تاني الحـ يشتري ليك هدايا !
ضحكت و قلت ليهو لا لا والله ! ما جيت أصالحك عشان مصلحه !... قال لي ما صدقتك ! قلت ليهو اقسم بالله يا عمر ما صالحتك عشان مصلحه ، قعد يضحك و قال لي بهظر معاك ، مصدقك والله ، فجأه علاء جا و قال يبدو إنو المياه رجعت إلى مجاريها ! والله يا مها ما قايلك حـ تجي و تعتذري من عمر بعد عنادك و قوة راسك ! عمر قال ليهو ما عيب الواحد يجي يعتذر لمن يعرف غلطو ، قال ليهو فعلاً ما عيب ، بس انا مستغرب فيها ! قلت ليهو ما تستغرب ساي ، أنا مستعده أعتذر من كل الناس إلا انت ، قال لي معناها عااارفه نفسك غلطانه كتير في حقي !
قلت ليهو غلطت معاك في شنو ؟ ياخ انت يا علاء ما عندك موضوع بس !
قال لي الله يجيب اليوم الحـ تعتذري فيهو مني زي إعتذارك من عمر ، عمر قال ليهو غيره شديده يا علاء ! قال ليهو لا ما كدا بس لاحظ كيف هي بتتكلم و بتتعامل معاي بـ لئامه ، خالص ما بتحترمني و بتتعامل معاك عكس تعاملها معاي ، قلت ليهو دا عمر و دا انت ، شن جاب لـ جاب !
عمر ضحك و قال لي ما تجيبي لي الهواء ! علاء قال لي عشان اشترى ليك تلفون غالي مش !
قلت ليهو اففف منك ! قال لي إعترفي يا زوله ! قولي الحقيقه قدااام عمر ، قلت ليهو اتطمن عمر عااارف إني ما اعتذرت منو عشان شي ، اعتذرت لأني غلطت ، انت بس عايز تطلعني بتاعة مصالح قدامو !
قال لي و انتي كذلك يا مها !
قلت ليهو أصلاً أنا ما شغاله بكلامك ، أسكت مني عليك الله ، عمر قال لي بالمناسبه انتي علاء الدين دا كاتل ليك زول ؟! ليه بتتعاملي معاهو كدا و الغريبه انو علاقتكم ببعض زمان كانت أفضل من كدا !
قلت ليهو بقى مسيخ و بحب يضايقني و يزعجني ! علاء قال لي بالعكس ، انتي اتغيرتي و بقيتي ما بتحترميني و لسانك طول علي ! بقيت أحس كأني ولد ضرة أمك !
فجأه كدا عمر تلفونو رن ، وقف على حيلو و قال لينا تلفون مهم ، انتوا واصلوا لومكم و عتابكم لبعض لحد ما تتفقوا و تبطلوا مناقرات ، بعد ما مشى ، علاء قال لي بالجد أنا بضايقك ؟؟
قلت ليهو مرات ، قال لي بضايقك كيف ؟
قلت ليهو أنسى أنسى و كنت حـ أمشي بس جا وقف قدامي و قال لي ما تمشي إلا تقولي أنا مضايقك في شنو !؟ نحنا مش كنا كويسين مع بعض ؟ ايوه دائماً بنتناقر و دائماً بنحب نغيظ بعض و هسي دا الحاصل بس في شي مختلف ! حاسس انك جاده في لئامتك معاي و عدم إحترامك لي !
طبعاً أنا اتفاجأت لأني ما قايله إنو علاء حاسي إني معادياهو أو بكرهو ! أنا نهاي ما ختيت حاجه زي دي في بالي و شايفه إنو تعاملي معاهو ما اتغير ، لسه بنتناقر و بنستفز بعض زي زمان ، بس بما إنو حس كدا معناها أنا من دون ما أنتبه كترت المحلبيه !
قلت ليهو انت جااادي ! قال لي كل الجد ، عايز أعرف مضايقك في شنو و ليه بقيتي تكرهيني ؟!
قلت ليهو والله انا ما بكرهك !
قال لي حـ أحاول أصدقك ، قلت ليهو والله جد ، أكرهك لـ شنو ذاتو ؟! آي انت غياظ و مستفز و بتضايقني لكن ما لدرجة الكراهيه دي !
_ بااااس أنا عايز أعرف بضايقك كيف ؟!
= يعني هسي مثلاً لمن قلت ليك أنسى و كنت حـ أمشي وقفتني و أصريت تعرف انت مضايقني في شنو ! يلا إصرارك دا بعد مرات بضااايقني و بزهجني منك ! يعني بالمختصر كدا انت بقيت لايوق و كمان البغيظني شديد انك بتألف كلام من عندك و دائماً بتحب تطلعني غلطانه قدام عمر أو غيرو ، بقيت أحس إنك بترتاح لمن تشمت فيني و تعملني مضحكه ...
خت يدينو على راسو و قال يا إلهي ! معقوله كاتمه دا كلو في قلبك و ساكته !؟... أنا والله ما بتقصد أجرحك أو اشمت فيك و اعملك أضحوكه ! والله بحب أهظر معاك ساي و ما خاتي حاجه في بالي !
قلت ليهو غيتو أنا كنت حاسه كدا !
قال لي لو على الإحساس أسكتي ساااي ، انتي كمان ما قصرتي و أكتر من مره حسستيني إني أقل من أولاد عمتي 😅 يعني لو قلت ليك أعملي لي حاجه بترفضي و بتتلائمي معاي و لو عمر طلب منك من دون تردد بتنفذي القالو !
قلت ليهو زي ما قلت ليك عشان انت بقيت تغيظني ، قال لي خلاصة القول إنو لا انتي لا أنا كنا قاصدين نجرح بعض أو نقلل من قيمة بعض ، قلت ليهو فعلاً ، مد يدو و قال لي صافيه لبن ؟؟
مديت ليهو يدي و قلت ليهو صافيه بس لو إتلائمت معاي ما حـ أسكت ليك ، ضحك و قال لي بما إنو نيتك صافيه ما تسكتي لي ، نتشاكل و نتناقر قدرتنا بس ما نكره بعض يا بت العم ، قلت ليهو أصلاً براااك فهمت غلط ، قال لي اها هسي دي لئامه ولا ما لئامه ؟
قلت ليهو دي صراحه ، قال لي بالمناسبه دي رايك شنو تغسلي لي ملابسي ! قلت ليهو لاااا لمن اتخلع ! عاين لي و هو منطط عيونو ، ضحكت و قلت ليهو طيب لكن ما تتعود ، قال لي ياداب حسيت إنك مها البعرفها....
شويه كدا عمر جا و قال لينا ان شاء الله المياه رجعت لمجاريها !... علاء قال ليهو ايوه رجعت ! .. قلت ليهو المهم حـ أمشي اغسل ليك ملابسك بس ما تتعود تاني ، قال لي خلاص فهمنا يا بت العم !... عمر قال ليهو صالحتها و طوالي جبت راسها و خليتها توافق تغسل ليك !؟
علاء قال ليهو ما جبت راسها ولا احتلت عليها ، برضاها وافقت و أصلاً هي ما بترفض لي طلب ، بس كانت حاسه إني بتقصد أطلعها كذابه قدام الناس و بضحك عليها ، عشان كدا كانت شايلاها معاي و طوالي بتتلائم معاي ، المهم نحنا زي توم و جيري ، بنتشاكل و بنتناقر لكن في النهايه بنرجع تاني زي الأول ، يعني لا بريدك لا بحمل بلاك ... عمر قال ليهو كويس والله....
المهم تاني يوم كان العيد ، صحينا بدري و كل واحد بدأ يجهز حاجاتو ، عمر و فاروق و علاء جهزوا نفسهم و لبسوا جلاليبهم و مشوا الصلاة و أنا و عمتي بدينا نفرش في البيت بعدها لبسنا ملابس العيد ، طبعاً سهى لحد يوم الوقفه كانت بترسل و بتحنسني عشان أوريها أنا قاصده منو بالإستوري داك فـ كنت بتهرب منها ، في الآخر زهجت و قالت لي انتي وحده كذابه ساااي و كسرت حنك الإستوري ، المهم مشيت وقفت جنب المرآيه و شلت علبة الميك اب حقت عمتي ، لمن كنت حـ أعمل ميك اب طوالي اتذكرت عمر ، للحظات اترددت و قلت حـ يزعل مني تاني ! فجأه تلفوني رن ، لمن شلتو لقيتها سهى ، رديت عليها و عايدنا بعض ، قالت لي أنا جاياكم ، المره دي عايزا أعيد معاكم و نطلع و نلف زي ما عايزين ، قلت ليها نطلع وين ؟؟
قالت لي اي مكان ياخ ان شاء الله نلفلف ساااي في حيكم ، بت جيرانكم ديك الإسمها معزه ولا منو ديك كلميها و خلينا نطلع و نعيد مع بعض ، زي ما قلت ليك ناس حينا ديل ماف زول شغال بزول عشان كدا ما بفكر فيهم ، المهم حـ اقفل ، لمن أجيك ألقاك جاهزه ، قفلت منها و رجعت وقفت جنب المرآيه ، سهى لو جات و شافتني ما عامله شي حـ تضحك و تشمت و حـ تقول لي عمر بتحكم فيك و انتي بتسمعي كلامو !
ما عرفت أعمل شنو ، أخت ميك اب ولا لا !؟!
اتصلت على معزه و خليتها تجيني و حكيت ليها ، قالت لي ما فهمتك ، يعني انتي خايفه من سهى ولا خايفه من عمر ؟؟
قلت ليها ما خايفه من أي واحد فيهم ! بس ما عايزا عمر يزعل و يقول إني ما بسمع الكلام و ما عايزا سهى تشمت و تقول إني بسمع كلام عمر ! قالت لي ما أصلاً دي الحقيقه و انتي بتسمعي كلامو و فيها شنو يعني لو سمعتي كلامو ! في النهايه هو زي أخوك !... طبعاً لمن قالت لي كدا عاينت ليها بس ما قلت حاجه ، قالت لي البت الإسمها سهى دي أنا نهاي ما حبيتها ، ما عارفاك مصاحباها كيف ! قلت ليها بالعكس هي بت ظريفه و وناسه ، المهم قولي لي هسي أعمل شنو !؟
_ ما عارفاك متوتره كدا ليه ! الموضوع ما مستاهل ، ما عايزا ميك اب ما تعمليهو و بس ، لا عمر لا سهى ليهم دخل في القصه دي !
= انتي ما بتعرفي سهى ! هسي لو شافتني ما عامله شي حـ تقعد تقول لي أكيد عمر هو المنعك
_ قولي ليها أنا الما عايزا أعملو و انتهينا !
= ما حـ تصدقني !
_ دي الحقيقه ليه ما حـ تصدقك ! مش انتي ما عايزا تعملي ميك اب ؟
= والله نص نص
_ طيب لو عايزا حـ اعمل ليك ....
فعلاً معزه عملت لي ميك اب خفيف و لمن خلصنا سهى جات داخله ، أول شي مشت سلمت على عمتي بالأحضان و باركت ليها العيد بعدها جاتنا نحنا ، برضو سلمت علينا بالأحضان و قالت لينا مشتاااقين والله ، عمتي جات داخله و هي شايله تلات كبابي عصير ، سهى قالت ليها ما كان تتعبي نفسك يا سمسم يا عسل ... طبعاً عمتي بتنبسط من كلامها قالت ليها ماف أي تعب يا جميله ، قالت ليها اليوم صاباها معاكم ، العيد شكلو حلو عندكم ، عمتي قالت ليها طوااالي و لو عايزا بيتي معانا طوالي ، المهم بعد شويه كدا قلت ليهم خلونا نطلع ، سهى قالت لي طالعه كدا ؟؟!
قلت ليها كدا كيف ؟؟ قالت لي الصراحه الفستان دا ما حلو ! و للصراحه بعد رمضان وزنك نقص عشان كدا الفستان ما جاي فيك ، كأني قبل كدا لمحت عندك بناطلين في دولابك ، ثواني بس ... طبعاً من دون ما تتردد مشت فتحت الدولاب و بقت تنبش في ملابسي و معزه دي بتعاين ليها ساااي و هي متغايظه منها ...
المهم سهى طلعت لي بنطلون جينز و معاهو قميص و طرحه مشكله ، قالت لي ألبسي ديل حـ يطلعوا حلوات عليك ، قلت ليها صراحة أنا من دخلت الثانوي بقيت ما بطلع ببنطلون جينز إلا تحت العبايه ، لأنو.... قاطعتني و قالت لي لأنو السي عمر ما بسمح ليك ! عايزا تقولي كدا صح !؟
قلت ليها لا لا أنا براااي البقيت بمنع نفسي ! قالت لي و السبب !؟
قلت ليها ساي كدا ، بقيت أحب الفساتين و الإسكيرتيات ، قالت كذب زي الناس ما بتعرفي تكذبي ، المهم أمشي بدلي ملابسك و تعالي اعمل ليك ميك اب ، قلت ليها ما بحتاج ، معزه عملت لي ، قالت لي شنووو ! إتلفتت على معزه و قالت ليها هسي دا ميك اب ليك يا بيب !
طبعاً معزه شاماها شديد ، ما ردت عليها ، سهى قالت لي أسمعيني أمشي بدلي ملابسك دي بسرعه و تعالي عشان أظبطك و نطلع طوالي ، بقيت واقفه و أنا متردده ! قالت لي إلا لو خايفه و ميته من الخوف بسبب ولد عمتك المنفسن داك ! قلت ليها لا ما خايفه !
طوالي طلعت و جابت عمتي معاها و قالت ليها تعالي شوفي بت أخوك الهبله دي ! عايزا أظبطها و أبقيها بت جد جد و هي رافضه ، شوفي اللبسه الإخترتها ليها عشان تلبسها ، ما رضت تلبسها و تظبط نفسها عشان خايفه من عمر ولدك !
عمتي قالت ليها هييي عمر بسوي ليها شنو ! خليها تلبس العايزاه ، سهى قالت ليها عليك الله أهرشيها و فهميها يا سميره ، البت دي حارمه نفسها من حاجات كتيره و كلو بسبب خوفها من عمر ، يعني ما ظنيت عمر حـ يشاكلها عشان بنطلون جينز و شوية ميك اب !
عمتي قالت لي ألبسي العايزاه و عمر ذاتو ماف و لو سألك أنا حـ اتكلم معاه ، سهى قالت لي لو طلعتي الشارع و شفتي البنات مزز كيف حـ تجيك نفسيات ، ياخ سمحات سماحه ، لاقيت واحده عامله فل ميك اب بس رهييب رهيييب لمن بهناك !
المهم بعد كلام كتير و تحانيس مشيت بدلت ملابسي و لبست بنطلون الجينز و خليت سهى تعمل لي فل ميك اب ، ما أكذب لمن عاينت في المرآيه نفسي عجبتني شديد ! يعني ميك اب على تسريحه على بنطلون الجينز كانوا تحفه علي ! سهى قالت لي اها الميك اب و اللبس الأنيق بعملوا فرق ولا ما بعملوا ؟
قلت ليها في فرق والله ، و حبيت نفسي بـ اللبسه دي و بالمكياج العملتيهو لي دا ! معزه قالت لي البنطلون دا مش كأنو ضيق ! سهى قالت ليها لا ما ضيق ، حلو و جاي فيها ...
فكرت بيني و بين نفسي و قلت أصلاً عمر ما حـ يشوفني لابسه شنو لأنو ما موجود و ما أظن يرجع هسي ، بعدين لمن أجي راجعه البيت حـ اتصرف و أصلاً عمر زي ما قالت عمتي مستهبل ساي ، بقيت أحسو واقف لي على الهبشه ، سهى قالت لي يلاااا خلينا نطلع بعد دا ، قبل ما نطلع فجأه كدا باب الغرفه إتفتح !!....
" معك عرفتُ معنى الحُب
أيقنتُ أنَّ للحياة لذّة
أن الجمال خُلِق
ليسكنُ
بين عينيك
و كياني اتخذ منك
وطناً أبدياً " 💛
يتبع.....
