أول ما فتحت عيوني و عاينت حوليني عرفت نفسي في المستشفى ، غمضت عيوني و استحضرت كل الحصل معاي ، و اتمنيت إنو يطلع حلم ، كل ما اتذكر علاء و إنو عقد علي قلبي بوجعني أكتر و كل ما اتذكر عمر و العملو بحس روحي عايزا تطلع ، هو اكتر واحد أنا مصدومه فيهو 💔
فجأه جات ممرضه داخله ، قالت لي حمدلله على السلامه ، ما رديت عليها ، قالت لي أهلك ميتين من خوفهم عليك ، هنا دموعي جات نازله ، قالت لي ما عارفه الخلاك تعملي كدا شنو بس ماف حاجه تستاهل إنو الواحد ينتحر بسببها و يخسر آخرتو ، مهما حصل معاك ما تضعفي للدرجه دي و تسمعي كلام الشيطان و بعدين انتِ شفتي شنو للحياه دي عشان تحاولي تنتحري !؟
طبعاً هي بتتكلم و أنا دموعي نازله زي المطر ، في الآخر قالت لي ربنا يتم عافيتك و ان شاء الله ما تكرريها تاني ، قالت كدا و طلعت و بعدها مباشرة أمي و عمتي جوا جاريين كل واحده بتسبق التانيه ، لمن وصلوني أمي قعدت تبكي و ما قدرت تقول حاجه ، عمتي قالت لي وقفتي قلبي يا بتي ليه تعملي كدا في نفسك و كانت حـ تمسك يدي بس سحبتها منها ، فجأه عمو النور و فاروق و سليم و محمد و بيان جوا داخلين و قالوا لي حمدلله على السلامه ، طبعاً لا عاينت ليهم لا اتكلمت معاهم و لفيت وشي منهم ، عمو النور قال لي يا بتي هسي تصرفك دا صح !؟ كل مشكله و ليها حل ، ما كان تستعجلي و تعملي العملتيه ، هسي كما لحقناك كان رحتي فيها !.... قعدوا يتكلموا معاي كدااا لمن فتروا ، في الآخر طلعوا و خلوا معاي أمي و عمتي و بيان ، طبعاً أبوي نهاي ما جا ، أمي قالت لي بعد تطلعي من هنا حـ تمشي معاي البيت طوالي ، من اليوم ماف ليك قعده في بيتوت الناس ، عمتي عاينت ليها و سكتت ، فجأه كدا الباب إنفتح و عمر جا داخل توووش زي الكأنو كان جاري !! لمن شفتو نفسي قام و حسيت بحرقه في قلبي ، جا وقف قصادي و قال لي حمدلله على سلامتك ، طبعاً كان زهجان و غضبان ، اتجاهلتو و حسستو كأنو اتكلم مع حيطه ، حسيتو كان عايز يتكلم بس يمكن عشان لا المكان لا الزمان مناسب و أصلاً ما كنت حـ اهتم بكلامو ، جات ممرضه تانيه و قالت ليهم بعد ما اتطمنتوا عليها ياريت تطلعوا و تخلوها ترتاح شويه ، ناس أمي طلعوا قبل عمر و هو قبل ما يطلع قال لي مجنونه انتِ عشان تحاولي تنتحري ! يعني هسي لو ما كان لحقوك في الوقت المناسب كان..... المهم لمن تطلعي من هنا حـ نتفاهم 😊
ما رديت عليهو ، عاين لي مسافه و طلع ، قعدت براي و أنا حاسه إنو في بركان جواي و شوفة عمر دي فورت لي بطني ، بعد مسافه جات الدكتوره شافتني و لمن كانت حـ تطلع ناس عمتي تاااني جوا داخلين و أولهم عمر ، قلت ليهم أطلعوا من هنا ! طبعاً قعدوا يعاينوا لي بإستغراب عشان قلتها ليهم بنبره عاليه و حاده ! عمتي قالت لي لكن يا بتي.... بقيت أصرخ و اقول ليهم أطلعوا من هنا ما عايزا اشوف وش واحد فيكم ، بيان جات و حاولت تهديني بس لزيتها و قلت ليهم كان تخلوني أموت عشان ترتاحوا مني و ارتاح منكم ، بس ما فات شي لو الليله ما انتحرت بكرا حـ انتحر و إذا ما بكرا فـ البعدو .... طبعاً بقيت أصرخ فيهم بطريقه جنونيه ، عمر جا علي و قال مها أهدي شويه ! نزلت من السرير و وقفت قدامو و قلت ليهو انت بالذات ما تتكلم معاي و زح من هنا ، طير من وشي و خلقتك دي ما عايزا أشوفها تاني ، قلت ليهو كدا و طوالي لزيتو بكل قوتي ، الدكتوره قالت لي براحه براحه ما تعصبي نفسك ، قلت ليها طلعيهم برا و تاني ما تخليهم يجوا داخلين ، قالت لي تمام ، إتلفتت عليهم و قالت ليهم أنا كلمتكم و قلت ليكم ما تدخلوا عليها كتير عشان ما تتعبوها و يحصل معاها إنهيار عصبي ، عمر دا قعد يعاين لي كدااا بعدها طلع و وراهو عمتي و بيان ، أمي جات ضمتني عليها و بقت تحاول تهديني ، الدكتوره قالت ليها لو سمحتي اطلعي عشان هي تهدى فـ طوالي طلعت ، و لمن طلعت سمعتها جااايطه برا مع ناس عمتي و عمو النور بحاول يخمد النيران ، هو ذاتو أمي ما قصرت منو ، قالت ليهو دا كلو بسببكم انتوا الله ينتقم منكم ... جاطت شديد و أدت كل واحد حقو ....
أما انا كل ما يجيني واحد منهم عشان يتطمن علي بطردو و بتجنن فيهو ، لحد ما جاني عمر داخل ، قلت ليهو أطلع برا ، عايزني أطردك كم مره انت عشان ما أشوف خلقتك دي ؟ جاني قريب و قال لي الناس دي كلها ميته من خوفها عليك و ما عايزين شي غير يتطمنوا عليك ، قلت ليهو ماف داعي للنفاق ، ما عايزا أي زول يخاف علي ، قال لي تمام خلينا منهم ، كان قصدي اقول ليك إنو انا الخايف عليك و شايل همك ، قلت ليهو كتير خيرك والله 😊
قال لي حالياً ممكن تبطلي عناد ؟ ما عايزك تضايقي نفسك و تمام مش ما عايزا زول يجيك داخل ! معناها ماف زول حـ يجي داخل و يزعجك ، حالياً راحتك اهم شي بالنسبه لي ...
قلت ليهو اتخارج عليك الله ، قال لي مها أنا اقسم بالله الفيني مكفيني ، فـ ما تزيديها علي ، ما تشوفيني واقف قدامك و ماشي على رجليني و تفتكري إنو كل شي تمام !
قلت ليهو و لييييه كل شي ما تمام !؟ ايوااا عشان ما مُت صح !... نهرني و قال لي ما تجيبي سيرة الموت ، مجنونه انتِ عشان تظني إني حـ انبسط لو شفتك... ميته قدامي !؟ قلت ليهو معناها بتنبسط لمن تشوفني بتهان و بتذل و بتعذب !
ما حـ تقدر تتخيل قدر شنو أنا بكرهك و كيف انك سقطت من نظري !
طلعت واحد منافق و غدار و خاين
اتنهد و غمض عيونو مساااافه و مسح وشي بـ يدينو و قال لي أنا للآن ماسك نفسي عشان الوضع الإنتِ فيهو و ما عايز اتجادل معاك .....
المهم بعد العصريه مازن جا و معاهو معزه و خالتو إعتزاز ، طبعاً لمن دخلوا حمدلوا لي السلامه ما فكيت خشمي مع واحد فيهم ، فجأه أمي جات داخله و هي شايله ليها طرحه و عبايه ، قالت لي بدلي ملابسك عشان حـ نطلع من المستشفى بعد شويه ، عمتي قالت ليها سايقاها وين !؟
لمن ما ردت عليها طوالي قعدت تجوط و نادت أولادها و عمو النور ، أمي قالت ليها مااااف واحد فيهم بقدر يمنعني أسوق بتي معاي ، لمن سكته و خليتها معاكم بهدلتوها و اتهمتوها في شرفها و عقدتوا ليها على زول هي ما عايزاهو ، غفلتوها و غفلتونا كلنا ، قايلنها لعبه هي ولا ما عندها أم ! عمتي قالت ليها ما.... طوالي أمي رفعت ليها أصبعها و قالت ليها ما تصرفي معاي عربي كتير ، مش لو ناديتي أولادك لو ناديتي الدنيا دي كلها الليله مااااف زول بقدر يمنعني أسوقها معاي ، حـ اسوقها يعني حـ اسوقها و الرهيفه التنقد ، اشوووف منو فيكم راجل و بقدر يمنعني ... طبعاً قالت الكلام دا و هي بتعاين لـ عمو النور و لـ أولاد عمتي ، كنت قايله إنو عمر ما موجود بس لمن جهزت نفسي و طلعت مع أمي برا الغرفه لقيتو واقف ، كان بعاين لي و هو ساكت ، ما عاينت ليهو كتير ، طوالي مشيت قدام أمي و هي ذاتا ما عاينت ليهم ، جات لاحقاني ، طلعنا و أجرنا عربيه لحدي بيتها ، مع اني ما برتاح في بيتها بس ما عايزا أمشي بيت عمتي بعد الحصل ، طبعاً كنت قاعده يوم كامل في المستشفى و طلعت نهاية اليوم التاني و أبوي دا بالغلط ما لمحتو و دا الخلاني اكره نفسي و أغضب منهم كلهم ، رضيت أمشي مع أمي عشان ماف مكان أمشي ليهو غير بيتها و عشان على الأقل هي ما كانت عارفه و ما شاركتهم في عملتهم.....
