لمن جاني طالع كان بصلح في ساعتو و بعاين لي ، قال لي هااا خير ؟؟ طبعاً دموعي طوالي بدت تتساقط ! مسحت دموعي و قلت ليهو عمر انت ليييه حقار كدا ياخ !!
ربع يدينو و قال لي نعم !!
قلت ليهو سهى و ناس ماريا قاعدين يضحكوا علي ، شمتوا فيني قدرتهم عشان انت خليتني أمسح المكياج ، هم كانوا عارفنك ما حـ ترضى ليهم لو شفتهم عاملين شنو في نفسهم ، عشان كدا مشوا الصاله طوالي ، و أنا الغبيه جيت راجعه البيت و كمان سمعت كلامك لمن قلت لي أمسحي المكياج ، لو دي ماريا أو منهل أو أي وحده غيرهم ما كانت حـ تسمع كلامك و كانت حـ تعمل الفي راسها ، انت بس عشان لاقيني بسمع كلامك بتتحكم فيني ... طبعاً بتكلم معاهو و أنا بقطع في الكلام و ببكي ، قال لي انتي حاسه إني بتحكم فيك ؟! و بعدين ناس ماريا ديل أساساً ما قدرك عشان تباريهم و تعملي أي حاجه هم بعملوها !
قلت ليهو يعني عايزني أباري منو !؟ أباري فاروق ولا علاء ولا أباريك انت !؟....ناس ماريا قالوا ما حـ يسمعوا كلامك و قالوا إنك عايز تتحكم فيهم و ضحكوا علي عشان أنا بسمع كلامك و.... قاطعني و قال لي خليك من قالوا لي و قلت ليهم و خليك من ناس ماريا ، انتي شايفه إني بتحكم فيك !!؟
بتردد قلت ليهو ايوه ، قال لي خلاص أمشي و أعملي البريحك ، رفعت راسي و ختيت عيوني في عيونو عشان اتأكد من القالو ! قال لي أمشي منتظره شنو !! قلت ليهو الحاجات دي ما عندها عُمر معين ، كل البنات صغار و كبار بتمكيجوا و بفكوا شعرهم و بلبسوا البعجبهم و ماف زول بسألهم ! اتجاهل كلامي و قال لي على الفكره الناس ديل دقيقه دقيقتين بالكتير و حـ يطلعوا طوالي ، فـ حاولي تستعجلي و ان شاء الله الزمن يكفيك عشان تلطخي وشك !!
طبعاً ما عرفت أقول ليهو شنو ! عاين لـ ساعتو و قال لي أنا حـ ادخل و انتي أمشي جهزي نفسك ... دخل و خلاني واقفه ، بعدو طوالي معزه جات طالعه و قالت لي الحصل شنو !؟؟ طوالي حكيت ليها ، قالت لي ختاك في موقف صعب ، اها هسي حـ تتمكيجي ولا لا ؟؟ قلت ليها ما عارفه ! المهم لمن دخلنا بيتنا و شفت عمتي طوالي مشيت ليها و حكيت ليها بالعملو عمر ، قالت لي بالغ والله ! خلاك تمسحيهو عديل كدا !! المهم ما تشتغلي بيهو و أمشي خلي معزه أو أي وحده من البنات تمكيجك و إستعجلي عليك الله ، قلت ليها طيب ، طوالي ناديت معزه و مشينا دخلنا غرفة عمتي و سهى جات لاحقانا ، قالت لي مشيتي وين انتي من قبيل أفتش عليك ، قلت ليها عمر قال لي اتمكيجي ، ضحكت و قالت ايوااا يعني مشيتي أخدتي إذنو عشان تعملي ميك اب مره تانيه ؟!! لا لا كويس والله يا الطالبه المثاليه ! هو وقت ما عندو مانع ليه من البدايه خلاك تغسليهو و انت دافعه فيهو قروش !!
قلت ليها المهم في الآخر خلاني ، طبعاً من جواي ما كنت مرتاحه لأنو عمر ما سمح لي بكامل إرادتو ، سهى قالت لي خلاص جيبي أظبطك ، قلت ليها طيب بس عليك الله ما تكتريهو لي ، قالت لي هوووي ولا بكذب عليك ، أنا ما بحب اعمل ميك اب خفيف ، يعني يا أعمل ليك فل ميك اب يا لا ، معزه قالت ليها أنا بعمل ليها ، فعلاً معزه بدت لي ، و أول شي سرحت لي حواجبي و عملت لي روج هااادي كدا و لونو مناسب ، مكياجها كان خفيف و لطييف كدا ! بعد خلصت قالت لي أنا ما شفتك لمن جيتي من الكوفير بس متأكده الميك اب العملتو ليك دا أحسن منو ! سهى قالت ليها لو سمحتي ما تقولي عليهو ميك اب ، قولي هبشه أو لمسه ساي ، لمن عاينت لنفسي في المرايه قلت لـ سهى أنا راضيه بيهو ، دا عجبني أكتر من حق الكوافير ، معزه قالت لي كدا حـ ترضي نفسك و حـ ترضي عمر ! سهى قالت و بعدييين مع عمرر المخوفكم دا !!
قلت ليهم شايفه الناس بدت تطلع ، خلونا نمشي بعد دا ، فعلاً طلعنا و قفلنا الغرفه ، طبعاً النسوان العندهم شفع أول ما سمعوا صوت بوري الباصات خموا شفعهم و قاموا جاريين عشان يركبوا ، و في ناس من قبييل راكبين و منتظرين الباقين ، المهم لمن كل الناس طلعت و مشت ركبت و البيت بقى فاضي ، كنا أنا و سهى و معزه بنضاير في البيت و بندخل الحاجات في الغرف و بنقفلها ، عمتي ذاتا كانت بتضاير معانا رغم إنو الناس شغالين ليها أمرقي بعد دا يا ام العريس !! عمر جانا داخل و قال لينا بتعملوا في شنو انتوا ! قلنا ليهو بنضاير في البيت عشان نقفلوا ، قال لينا أطلعوا ، أنا حـ أقفلو ، طبعاً نهاااي ما عاين لي مرتين أو علق علي ، رغم إني شبه عملت الهو عايزو لأنو الميك ما كان شاذ ، كان هااادي كأني ما عامله شي ، لمن قفلنا البيت و طلعنا عشان نركب ظنيت إنو عمر حـ يحذرني زي كل مناسبه نكون طالعين فيها سيره أو يخليني اركب معاهو في نفس العربيه بس ما عبرني ، معزه قالت لي عمر شكلو زعل عشان قلتي إنو بتحكم فيك ! قلت ليها عنو خليهو يزعل ساي ، ما عندي بيهو شغله و طوالي ركبنا الباص و قعدنا جنب بعض بس سهى ما ركبت معانا ، كالعاده مباريه ناس الهجيج ، عمتي و راجلها و أبوي ركبوا في وحده من العربات الصغار و مشوا قدااامنا مع ناس عمر ، طبعاً عمتي كانت شغاله ليهم نادوا لي مها عشان أركب معاها بس قلت ليها عايزا اركب في الباص مع معزه ، قالت لي خلاص لكن أعملي حسابك ، قلت ليها طيب ، طبعاً في الباص كانت شغاله حفله عديييل ، راكبه معانا وحده غناااايه و دقااااقه ولا فاضيه لناس الهجيج و الكواريك ديلك !!
معزه قالت لي لو كنت عارفه إنو نسوان الباص غناهم سمح كدا كان من زمااان ركبت معاهم ، قلت ليها أحسن من إنو نطلع راسنا بالشباك و قبل ما نفتح خشومنا يهرشونا ، ضحكت و قالت لي فعلاً ! بعد شويه خالتو إعتزاز أم معزه شالت الدلوكه و بقت تدق و تغني و النسوان و البنات يشيلوا وراها ، قلت ليها ما شاء الله أمك غناااايه ، قالت لي مواهب مدفونه ! أول مره أسمعها تغني في سيره أو عرس !
المهم السيره و الغنى و الزغااااريد استمرت كدا لحد ما وصلنا الصاله ، جنب باب الصاله الناس أخدت ليها دقه دقتين كدا مع غنى و رقيص بعدها دخلوا الصاله ، طبعاً أنا و معزه مشينا قعدنا في الطاولات القداااام جنب ناس عمتي ، جات قعدت معانا سهى ، شويه كدا جاتنا ماريا و منهل و هم بضحكوا ، قالوا لي ما عجبنا ليك والله ، عاد عمر بالغ معاك ، قلت ليهم المهم إنو في النهايه سمح لي و متأكده إنو لو دي وحده فيكم ما كان حـ يرضى ليها بس عشان دي أنا سمح لي 😎
ماريا بعد ضحكت قالت لي كويس والله ، المهم قعدت معانا ، اشتغلت غنيه غنيتين بعدها وزعوا العشاء على الناس ، أول ما خلص وقت العشاء العرسان جوا داخلين ، طبعاً معظم الناس اتوجهت لمدخل الصاله على راسهم أهل العريس و العروس ، بعد ما العرسان خلصوا رقصتهم و مشوا قعدوا في المنصه الناس بدت هجيجها ، طبعاً أنا و معزه كأننا لاصقين في بعض ، وين ما نمشي بنمشي سوا ، لافين في الصاله نرقص مع ديل و نمشي نرقص مع ديلك ، ناس ماريا لمن تعبوا من الرقيص قعدوا في أقرب طاوله ، سهى ذاااتا مشت و قعدت معاهم ، معزه قالت لي شايفه صحبتك بقت صحبتهم !!
مشيت ليهم و قلت ليهم قاعدين ليه و الحفله شغاله ! ماريا قالت لي تعبنا ، طبعاً هم كانوا بتكلموا و لمن أنا جيت سكتوا ! طبعاً الشمار حرقني شديد ، قعدت معاهم و قلت ليهم أنا ذاتي تعبت ! منهل قالت لي شوفي البنات القدرك لسه برقصوا كيف و انتِ تقولي تعبتي ! قلت ليها تعبت زي ما انتوا تعبتوا ! ماريا قالت لي نحنا ما قدرك ، نحنا كباااار و عجايز ! ... طبعاً الفهمتو من كلامهم دا انهم عايزيني أمشي عشان يتكلموا على راحتهم !! اتغظت منهم غيظ بالذات من سهى لأنها صحبتي !! قمت من مكاني و إتحركت من جنبهم خطوتين بعدها رجعت تاني و قلت لـ سهى أمسكي لي تلفوني دا و طوالي مسكتها التلفون و مشيت خليتهم ، قايليني غبيه و ما حـ افهم عليهم ، الموضوع الما عايزين يتكلموا فيهو قدااامي دا حـ أعرفو أول ما أشيل تلفوني من سهى 😈
طبعاً حكيت لـ معزه الحصل و وريتها إنو ناس سهى ما عايزيني أقعد معاهم و أسمع كلامهم ! قالت لي يمكن عايزين يقولوا كلام شايفنوا كبير عليك ! قلت ليها كيف كبير علي !! أنا بقرا في الثانوي يعني ما صغيره ! قالت لي ما عارفه غيتو يمكن موضوع حساس!
في اللحظات ديك كانوا ناس عمر و فاروق و سليم جنبنا و بتصوروا مع أصحابهم و أولاد أهلهم ، عمتي جات وقفت معاهم و قالت ليهم صوروني معاكم ، نادتنا أنا و معزه و قالت لينا تعالوا اتصوروا معانا ، طوالي مشيت وقفت جنبها و اتصورنا صور كتيره ، مره جماعيه و مره فرديه ، عمر طلع تلفونو و قال لـ فاروق صورنا أنا و أمي ، قلت ليهو جيب أنا بصوركم ، طبعاً كنت عايزا اتكلم مع عمر بأي طريقه ، فعلاً أداني تلفونو و بقيت أصور فيهم و الباقين مشوا ، لمن خلصنا عمتي مشت للعرسان و عمر مازن ناداهو ، قلت ليهو تلفونك تصويرو سمح خلينا نتصور بيهو أنا و معزه و كمان حـ أصور ليك الحفله دي كلها ، قال لي ماف داعي أصلاً كل تفاصيل العرس حالياً بتتصور ، قلت ليهو عمر عليك الله خلينا نتصور بيهو ! قال لي تمام و أمسكيهو لي معاك أوعى بعدين اسألك منو تقولي لي ما عارفاهو ، قلت ليهو لا لا حـ احافظ عليهو أكتر من تلفوني ، قال لي تمام و كان حـ يمشي بس وقفتو لمن قلت ليهو عمر !...
"أحبُّ صوتَك..
كيفَ لصوتٍ كَهذا أن يتسلّل
من وترِ كمانٍ
وقصبةِ نايٍ
ومفاتيحِ بيَانو
و يستقرُّ في حُنجرة ؟ " 🖤
يتبع.....
