_ الببيع أمو و ناس بيتهم بخسر في النهايه ، ماف واحد بتوفق في حياتو طول ما أمو غضبانه منو و ما راضيه عليهو ، قول لي دا أي بيت البكون خالي من المشاكل ! قول لي دي ياتو أم الما بتتمنى الخير لأولادها و الما بتنصحهم و تقيف في وشهم لمن يمشوا على الغلط ! انت زعلت و قاطعتني و مشيت خليت أمك و أخوانك عشان بس انا إعترضت على البت القلت عايزها و كلو عشان مصلحتك !... هسي انت إستفدت شنو بعد السنوات دي ؟؟ كسبت شنو في الآخر يا سليم غير حرقت قلبك و قلبي !... انت عارف هسي البت ديك عايشه كيف ؟؟ عارف إنها طلعت وحده أنانيه و إستغلاليه و راجلها كل يوم متشاكل معاها بسبب أمها و بسبب إنو هو بقى ما قادر يتحمل مسؤوليتها هي و أهلها ! رغم انها بعيده مننا بس آخبارها واصله و كل يوم بشربوا بيها الجبنه ، الواحد لمن أمو تتكلم معاهو و تنصحو أحسن يسمع كلامها عشان ما يندم بعدين ، أنا ما كنت عايزا شي غير مصلحتك بس براك زعلت و إتحمقت و شلت نفسك و مشيت سكنت مع مرت أبوك و ان شاء الله بقت ليك أم ! و بالمناسبه هي فتحت ليك بيتها عشان تقهرني بيك نظام ولدك خلاك و جا قعد معاي في البيت !... ماف زول بتحمل الأولاد و تصرفاتهم غير أمهم ، لو قالوا أي زول بزعل يشيل شنطتو و يخلي البيت كان أنا من زمااان طلعت من البيت و خليتكم مع أبوكم ...
= أمي عليك الله أعفي لي ، عارف إني غلطت و كتير كمان و ما كان لازم اتصرف كدا ، و أنا الرجعني البيت ما بسبب تصرفات مرت أبوي معاي ، أنا رجعت لأنو دا المفروض ، لأني خلاص وعيت و ختيت عقلي في راسي ، من جيت يا أمي و انتِ تشيلي و تلومي فيني ، ليك حق بس عليك الله أعفي لي ، والله عدم رضاك علي ما مريحني ....
_ دي ما سنه ولا سنتين ، دي 7 سنوات يا سليم ! سبع سنوات و انت بعيد عن البيت دا و ما سائل عن زول ، سبع سنوات و أنا كل يوم ببكي عليك ، سبع سنوات و أنا قلبي دا من شدة الوجع حسيتو اتفتفت ، سبع سنوات و انت معتبر مرت أبوك دي أمك و بتسمع كلامها و تحاريشها و أنا عااارفه إنو هي الكانت بتملى ليك راسك ، هي الكانت بتحرضك علي و بتحاول تكرهك فيني و هسي لمن خلاااص فترت من التمثيل و بطنها طمت منك بقت تطاعنك و ترمي ليك الكلام عشان انت تفهم إنو قعادك معاها مضايقها ، و عاااد كيف ما تشمك و انت ولد ضرتها !
= كلامك كلو صاح و انا غلطان يا أمي ، صح أنا كنت هناك بس بالي كلو هنا و معاك ، قايلاني كنت مبسوط و أنا بعيد عنك و عن أخواني ! والله ما مر علي يوم من دون ما أشتاق ليكم و أتمنى أكون معاكم بس.....
_ بس عنادك و قوة راسك و تحريض مرت أبوك ما خلوك !... المهم أنا عااافيه ليك يا ولدي خلاااص أمسح دموعك دي لأنو ماف راجل ببكي ....
________________________
طبعاً أمي لمن اتصلت على أبوي قال فعلاً إنو عمر قال ليهو عايزني بس طلب من أبوي إنو يكلمني لأنو عايز يكلم بنفسو و يتناقش معاي ، بعد أمي كلمتني طوالي شلت تلفوني و إتصلت عليهو ، لمن رد قلت ليهو عمر انت عايز مني شنو ؟؟ أنا بالجد ما قادره أفهمك ! ليه بتحب تعقد الأمور دي كدا ! ليه رجل قدام و رجل ورا ، ليه عين على دي و عين على ديك ! عايز منو أو شنو في الحياة دي ! بالجد انا خايفه انك تكون ما عارف نفسك عايز شنو !
بعد مسافه قال لي أنا أكتر واحد عارف نفسو عايز شنو ، و بالمناسبه انتِ البتعقدي الأمور ما أنا و أول عُقدة عملتيها لمن كذبتي الكذبه ديك ، لو بس كنتِ فكرتي بطريقه تانيه أو شلتي الفكره الخبيثه ديك من راسك ما كان وصلنا لـ النحنا فيهو هسي دا ، قلت ليهو حـ تقعد عمرك كلو تذكرني بالكذبه دي ، زيك و زي الباقين ، زيك و زي ماريا ، أيوه أنا غلطت و اعترفت بأغلاطي بس الكذبه ديك ما ليها علاقه بـ كلامنا الحالي دا ! قال لي لا ليها علاقه ، لو في اليوم داك انتِ ما صدمتيني و كذبتي كان زي الزمن دا زواجنا ... المهم ما كان حنكون كدا ! قلت ليهو مفروض تكون مبسوط من كذبتي لأنها خلصتك من عرس انت وافقت عليهو عشان أمك ... قال لي منو القال كدا ؟ على فكره في اليوم داك كنت عايز اقول ليك إني موافق و على فكره تانيه أنا ماف زول بقدر يغصبني على شي و أنا ما بعمل حاجه ما مقتنع بيها ، وقعت ليك ؟😊
طبعاً لمن قال لي كدا قلبي قعد يدق بسرعه ، بقيت أقول في سري : معقوله عمر في اليوم داك كان عايز يقول لي إنو عايزني و كمان بكامل إرادتو !!
طبعاً بعدها سكتنا مسااافه طويله ، كسرت الصمت و قال لي و تاني عقدة لمن حاولتي تنتحري ، كل ما أقول أحل قصه ألقاك دخلتي في قصه تانيه ، و تالت عُقدة لمن هربتي مع أمك ، و رابع عُقدة البتعملي فيهو هسي دا 😊
= بترمي اللوم علي ؟ طيب و انت ؟ ايوه انا عملت حاجات كتيره ما كان لازم اعملها بس في الآخر جيت صارحتك و حكيت ليك حتى لو ما قلت الحقيقه كلها ، و الخلاني أمشي مع أمي إني فقدت الثقه فيكم كلكم بالذات انت ، خاصة بعد آخر كلام قلتو لي ، انت ما أنصفتني و ما شفت الموضوع إلا من وجهة نظرك انت ، متوقع مني شنو بعد كلامك داك ؟؟
_ انتِ الكنتِ متوقعه مني شنو ؟؟ يعني اتخيلي معاي تكوني راسمه صوره كويسه و معينه لإنسان في مخيلتك و شايفاهو برئ شديد و كل الصفات الكويسه فيهو و في الآخر تجي حقيقتو و تصدمك ! في اليوم داك أنا شاكلتك و قلت ليك كلام قاسي بس لحد آخر لحظه ما كنت مستوعب إنو انتِ ممكن تعملي كدا ! كنت بعاين ليك و بحاول أشوف الصدق في عيونك بس ما كان في شي غير الكذب ... و جملة :" عشان حاجه تافهه زي دي " المزعلاك دي ، طلعت مني فجأه كدا و من دون قصد بس لو جينا نقارن العملتيهو و السبب الخلاك تعمليهو حـ نلقى إنو ما بستاهل !... ما بستاهل تنزلي مستواك و تعملي حاجات سيئه و خطيره شديد عشان تثبتي لي شي ! ما إلا تعملي كدا عشان تتخلصي من أي وحده تقرب مني .... طبعاً لمن قال لي كدا بلعت ريقي و نططت عيوني و ختيت يدي على قلبي ، طبعاً ما قدرت أنطق شي !... واصل كلامو و قال لي ماريا قبل كدا شكتك لي و قالت إنتِ الجبتي الراجل الغريب داك بس أنا ما صدقتها ، بالنسبه لي دا كان من ساااابع المستحيلات و كلام ما بدخل العقل ، و قبل العقد بأيام واحد من الرقمين الكانوا برسلوا لـ عنود بعد ما رفع عني الحظر رسل لي و برضو الكلام الإنقال كان ضدك بس ما صدقت رغم إني ما فهمت صاحب الرقم دا بعرفك من وين و ليه قال إسمك تحديداً ، المهم الموضوع دا ما طلع من بالي خالص لحد يوم العقد ، قبلو بدقائق إتصلت علي ماريا و صوتها أوحى لي انها ما طبيعيه كل القالتو لي عمر تعالني ضروري ، قلت ليها في شنو ، قالت لي ما حـ اأخرك حالياً أنا جنب البقاله القريبه من بيتكم ، يمكن لو زول غيري كان ممكن يرسل ليها زول تاني بس أنا مشيت ليها بذات نفسي لأنها اتصلت علي أنا شخصياً و يمكن لأني متعاطف معاها ، من يوم الحصل ليها في بيتنا وهي بقت ما على طبيعتها ، دائماً خايفه و دائماً مقلقه و أهلها ما عارفين ، المهم لمن مشيت ليها عرفت إنها شافت الراجل الجا في البيت قبل كدا جنب بيتنا !
طبعاً و هو بتكلم عنها أنا متغاااايظه منها غيظ ! قلت ليهو جا لشنو يعني و خليك عاااارف إنو أنا ما لي علاقه بالموضوع دا و أصلاً الراجل دا أنا ما بعرفو و ما حصل شفتو و..... قاطعني و قال لي عارف عارف ... و على فكره ماريا ما شافتو و هو أصلاً ما جا ، كانت عايزا تضيع زمني و تأخرني على العقد و حصل العايزاه !
طبعاً أنا استغربت ! قلت ليهو كيف يعني ! ما فهمت !... قال لي صحبتك الما بتتسمى ديك ، يوم العقد اتصلت على ماريا و قالت ليها لو عايزا العقد دا ما يتم أخري عمر ... طبعاً أنا ما استغربت لأنو كنت حاسه إنو هم الإتنين في إحتمال كبير يكونوا متفقين مع بعض !... قلت ليهو عملوا كدا عشان علاء يسبقك و يعمل العملو ! بس انت عرفت كيف ؟؟
قال لي يوم الإتنين بعد ما انتِ دخلتي و خليتينا برانا ضغطت عليها فـ حكت لي ، قلت ليهو شفتها طلعت خسيسه كيف ؟؟ دائماً كنت بتلومني أنا و محسسني إني اسوأ وحده في العالم كلو ! شفت هسي بت عمك عملت شنو ! قال لي على فكره هي ما كانت عارفه بـ الحـ يعملو علاء و صحبتك و هي أصلا من فتره طويله ما كانت متواصله معاها ، صحبتك اتصلت عليها يوم العقد و كل القالتو ليها أخري عمر شويه.... قلت ليهو و انت صدقتها !؟
قال لي ايوه ... قلت ليهو لا تمام والله و كنت حـ اقفل بس وقفني و قال لي ما تقفلي !... شفتي نفسك بتعقدي الأمور كيف !؟... هسي أنا قلت ليك ماريا ما غلطانه !؟ ايوه هي غلطت و غلطها دا انا ما حـ اسامحها عليهو بس قلت ليك الحقيقه كامله و هي فعلاً ما كانت عارفه و دا ما معناها إنو عملتها اخف قدراً و ما معناها إني حـ اسامحها .... قلت ليهو ئهه ! ساي بتقول كدا ، إذا انا بـ عمايلي ديك كلها شبه سامحتني و بقيت تتعامل معاي عادي فـ كيف ما حـ تسامحها فهمني ؟!
قال لي دي انتِ و ديك هي ، و أنا غصباً عني حـ اسامحك!
طبعاً لمن قال لي كدا قلبي عمل شححح ... واصل و قال لي المهم ماريا إعترفت بـ غلطها و أنا أصلاً ما خاتيها في حساباتي و صحبتك الخبيثه هي و اختها اتسجنوا لـ فتره مؤقته و أمهم ما عارف اتسجنت كم سنه أو الحكم الصدر في حقها كان شنو ، قلت ليهو عرررف دا من وين ؟ من ماريا ! قال لي لا مصادر خاصه ... بعدها سكته ، قال لي بالمناسبه أنا سمعت الريكوردات ، ايوه سمعتها متأخر بس المهم إني سمعتها 🌚
طبعاً هنا حسيت قلبي حـ يطلع من مكانو ، قال لي و على فكره الريكوردات دي هي الأثبتت لي صحت الإنقال عنك و هي أثبتت لي اتهام ماريا ليك ، ايوه انتِ ما حكيتي العملتيهو بالتفصيل في الريكورد بس كان إعتراف واضح ، واتسابي ما كان محدث فـ في اليوم داك من سألتيني إذا وصلتني ريكوردات منك كنت لسه ما سمعتهم و ما أديت كلامك أهميه بس مشيت حدثت الواتس و سمعتهم !
طبعاً هنا الإتنين سكتنا ساااي ، بعدها فجأه كدا سمعت صوتي !... كانت الريكوردات السجلتها لـ عمر ، بقى يسمعني ليها و أنا ميته من الخجل و كل ما اسمع صوتي و البقول فيهو جسمي برتعش و قلبي بدق شديد فـ طوالي قفلت الخط و أنا خاته يدي على قلبي ، طبعاً إتصل علي بس ما رديت !
بعد يومين فاروق عمل قروب ، كان فيهو عمر و محمد و سليم و مازن و معزه و بيان و ضافني معاهم ، طبعا في البدايه ماف زول رسل غير بيان ، قالت شبااااب كيفكم ، لمن ماف زول رد عليها قالت لينا بتسفهوني مششش طيب عاملين القروب دا ليه إذا ما عايزين تتكلموا و بقت تشيل و ترسل و تعاتب فينا و أنا بضحك عليها ، جا محمد قصاد رسايلها الكتييره ديك رد و خت ليها قلب قصاد أول رساله فـ طوالي سكتت ، جوا أخوانو و بقوا يشغلوها ليهو بالذاات فاروق ، بعدها بقوا يتكلموا و بتونسوا إلا أنا و عمر ما رسلنا شي ، فاروق قال : مها و عمر ليييه بتقروا رسايلنا و ما بتردوا عليها ؟🌚
بيان قالت ليهو إحساس مخطوبين و كدا !... طبعاً أنا اتخلعت و جاني إحساس ما عادي ، رديت و قلت ليها يا بت هييي دا كلام شنو ! أنا مشغوله عشان كدا ما رديت ، قالت لي بتتكلمي مع عمر بهناك ولا شنو !؟
قلت ليهو محمد تعااال لِم مرتك دي ! قال لي والله يا مها ما قادر عليها ! ... طوالي عمل تاق لـ عمر و قال ليهو شنو يا أبو الشباب بتقرا الرسائل و ما بترد !
بيان قالت ليهو انت يا عمر متييين عايز تعمل خطوبتكم انت و مها ! عليكم الله استعجلوا لينا عايزين نفرح نحنا !... طبعاً أنا كل مره بنخلع زياااده ، قلت ليها يا بت خطوبة شنو ! انتِ بتجيبي الكلام دا من وين !؟
جا عمر رد عليها و قال ليها ماف أي خطوبه.... طبعاً أنا للحظات ملامح وشي اتغيرت بس لمن رسل تاااني و قال ليها عقد بس ما عرفت ابتسم ولا اتخلع ولا أنصدم ولا ازعل عشان ما كلمني و عشان أنا ما فاهماهو ولا اعمل شنو !
خليتهم بتكلموا في القروب و عملت رد على رسالتو بس في الخاص ، عملت ليهو استفهامات ، رد علي في نفس اللحظه و قال لي الما واضح شنو يا مها !؟
قلت ليهو كل شي ! كل شي ما واضح يا عمر ، انت متين قررت كدا و أخدت اذن و موافقة منو ؟
قال لي والله كلهم عارفين و أولهم أبوك ، قلت ليهو و أنا طيب ؟؟ رأيي ما مهم ؟؟
رسل لي ريكورد و قال لي طيرتي لي زولتي القطريه ، و طيرتي لي بت عمي و عملتي السبعه و ذمتها و هسي جايه تقولي و أنا رأيي ما مهم !
طبعاً اتخلعت من كلامو ! قلت ليهو مية مره قلت ليك أنا ما لي علاقه ب عنود ولا عمود دي !
رسلي لي ريكورد و هو بضحك ، قال لي ما عندك حس فكاهه و ما بتعرفي الهظار من الجد ، المهم يا زوله رأيك مهم بس هو معروف !
طبعاً سكت سااااي ، قال لي يعني معقوله لا أعرس قطريه لا أعرس بت عمي لا أعرس بت خالي و اطلع من العيد بدون حمص!؟😂...قلت ليهو معنى كلامك انك بتعرس من طرف ، و إذا بنات أعمامك ديل خاااطفات قلبك للدرجه دي عرس منهم ، منهل موجوده دا في حال انك ما سامحت ماريا ، و إذا سامحتها أمشي عرسها طوااالي بنات أعمامك أولى بيك !
ضحك شدييد و قال لي كدا اتأكدت إنو اكتر انسانه انتِ بتكرهيها في الدنيا دي ماريا ! قلت ليهو أكرها ليه أساساً ... قال لي خلاص ما عايزين نلف و ندور و نرجع لـ نقطة النكران و الكبرياء !
في نفس اليوم دا أبوي جانا و كان معاهو عمتي و بيان و محمد و سليم ، طبعاً من شفتهم قلبي قعد يدق بسرعه ، ضيفتهم و أنا يديني برجفوا و عمتي دي تعاين لي سااااي و هي مبتسمه و فاروق برفع لي في حواجبو ، لمن جيت أشيل الكبابي من شدة التوتر وقعوا مني و اتكسروا كلهم ، محمد قال لي معناها انتِ عاااارفه نحنا جايين ليه !... لمن كنت حـ ألم القزاز أمي قالت لي خليهو أنا بلمو تعالي أقعدي أبوك عايزك ... أمي لمت القزاز و مشت و جات لقتنا لسه ساكتين ، اظن أبوي كان منتظرها تجي عشان يبدا يتكلم ، عمتي قالت ليهو هوووي يا أخوي الموضوع ما بحتاج رسميات ، البت بتك و الولد ولدك ولا بنحتاج مقدمات و تقريباً كلنا عارفين إنو عمر عايز مها ! هي ذاتا عارفه و نحنا جينا هنا عشان نحدد موعد العرس ... عاينت لي و قالت لي أنا اتصلت على أمك و اتكلمنا في الموضوع ، ما عارفه هي رأيها شنو لأنها ما قالت لي شي غير خير !... طبعاً أمي نهاي ما جات كلمتني ! يعني بما إنو عمتي اتصلت عليها و عرفت انهم جايين و سبب جيتهم كان تكلمني ! إلا إذا هي ما موافقه !
أبوي اتكلم معاي مساااافه و اتأسف على الحصل قبل كدا و في الآخر قال لي ما بشكر ليك عمر عشان هو ولد أختي و ولد عمتك بس عمر زول كويس شديد و ما بنلقى زيو ، عمتي قالت ليهو لو ما حصل الحصل كان زي الزمان دا هم معرسين ، عمر والله عايزها و كان عرسهم حـ يتم لو ما العوارض !
المهم كلهم اتكلموا و في الآخر أبوي قال لي في النهايه القرار قرارك ، موافقه ؟؟
عاينت لـ أمي و بتردد قلت ليهو القرار قرار أمي و طوالي قمت منهم و دخلت جوه ، لو كنت مها الزمان ، القبل سنتين ، كنت حـ أوافق طوالي و ما حـ اهتم برأي زول ، كنت حـ أفكر في مصلحتي أنا و بس ، لكن هسي الوضع إختلف ، ما عايزا افكر في نفسي و بس ، أمي كمان ليها حق علي و من واجبي اسمع كلامها حتى لو ما كان برضيني 💔
بعد مساااافه طويله أمي جات داخله ، قعدت جنبي و سكتت ، بعد صمت طويل قالت لي عمر ما فيهو أي كلمه ، راجل و سيد الرجال و وقفتو معانا عمري ما بنساها ليهو ، زول محترم و خلوق لكن عمتك !... لو كان ولد وحده تانيه كنت وافقت طوالي ، بس سميره دي أنا و هي الشحمه و النار ، قلت ليها أنا حـ اعمل الإنتِ عايزاهو ، مش ما موافقه عليهو !؟ خلاص أنا كمان ما موافقه عليهو .... عاينت لي جوه عيوني و قالت لي حتى لو كان في خلاف كبير بيني و بين عمتك ، حتى لو كنا أنا و هي الشحمه و النار لكن ما حـ أخلي خلافي معاها يأثر على حياتك و إختياراتك ، ما تقولي لي أنا بعمل الإنتِ عايزاهو ، شوفي انتِ عايزا شنو و أنا معاك ، قولي لي هسي موافقه ولا لا ؟؟
سكته ساااي ، قالت لي أنا أمك ما تخجلي مني ، موافقه ؟؟...لمن ما رديت عليها قالت لي إذا انتِ كنتِ موافقه عليهو في المره الأولى معناها حـ توافقي عليهو تاني مره ، صح ولا لا ؟؟
غمضت عيوني و هزيت ليها راسي و حاولت أخفي خجلي ، فرحت و ضمتني عليها و قالت لي ربنا يتم ليكم على خير ، فـ طوالي اتصلت على أبوي و عمتي و كلمتهم ، أما أنا فـ سليم إتصل علي ، لمن رديت عليهو قال لي انتظرناك كدااا بس ما جيتينا طالعه ، انتِ يا زوله مالك عايزا تعاكسي ؟!😂
قلت ليهو ما معاكسه والله ، قال لي أنجزوا بسرعه عشان الناس تنجز بعدكم ، قلت ليهو قصدك شنو ! عايز تعرس ؟ قال لي أكيد ! بتردد قلت ليهو منو ؟! قال لي منو يعني غير بت الجيران البتحبني من زمان !؟😂 قلت ليهو سليم انت كلمتها ؟ قال لي لا و ما حـ أكلمها ، شوفي أنا بعد السنوات دي كلها ما استفدت حاجه من انتظار وحده ما انتظرتني دقيقه ، من وحده عايشه حياتها و بأطفالها و أنا حياتي جحيم ، عشان كدا قررت أعرس من طرف و خلاص ، و معزه هي الخيار المناسب ، أنا حالياً ما مستعجل و إلا كنت عملت عرسي معاكم ، عايز فتره اتعرف عليها أكتر و عشان هي ذاتا تراجع نفسها و تعرف إذا مشاعرها دي نفسها الكانت من قبل سنوات و إذا هي مشاعر حب ولا مشاعر إعجابي ، لأنو الزواج قرار مصيري بعدو ماف تراجع ، قلت ليهو والله ما حـ تلقى بت أحسن من معزه ، قال لي أنا كمان حاسي كدا بس ما عايز أستعجل .... المهم إتكلمنا شويه بعدها قفلنا من بعض ، في نفس اليوم دا عمتي إتصلت علي باركت لي و أنا استغليت الفرصه دي و إعتذرت منها كتيير ، قلت ليها عمتي ما عايزا يكون في حساسيه بيناتنا ، أنا عايزا نرجع زي زمان ، صدقيني انتِ في مقام أمي و أنا بحبك زي ما بحبها ، من يوم زعلتي مني و أنا متضايقه و ما مرتاحه ، عليك الله يا عمتي سامحيني مسامحه من جوه قلبك ما كلام خشم ... قعدت تبكي و تقول لي انتِ بتي حبيبة قلبي و أنا ما بقدر أشيل في قلبي منك ، والله زعلت شديد بسبب كلامك بس ما قدرت أملى قلبي زعل و نفور منك ، والله يا بتي أنا بريدك شديد و محبتي ليك زي محبة أولادي ما بفرزك منهم ، قعدنا نتكلم كتيير و نعتذر من بعض و أمي تسمع في كلامنا و في الآخر قالت دا الصح لأنو عمتك ما قصرت منك ، ما تركزي مع خلافاتنا اعملي الصح بس لكن ما تخلي كلام أي زول يأثر عليك أو يقلبك ضد أمك و أنا هنا بتكلم بصوره عامه ....
المهم بعدها بدت تجهيزات الزواج ، رغم إنو مبسوطه و حـ يحصل العايزاه و أعرس البحبو من زمان بس كمان كنت خايفه ، خايف إنو تحصل حاجه و تخرب الزواج دا ، خايفه ماريا تدخل و تخطط تعمل شي ، خايفه إنو بعد ما أفرح أرجع أحزن تاني .. خايفه تحصل كارثه أو مصيبه تخرب كل شي !
زي الساعه 10 كدا عمر إتصل علي ، أول ما فتحت الخط قال لي بعد دا بقدر أقول مبروووك علينا صح ؟!
بتردد قلت ليهو عمر انت موافق ؟ قال لي لا في زول خاتي سلاح على راسي ! دا كلام شنو البتقولي فيهو دا !... قلت ليهو أنا ما متطمنه خايفه ماريا تعمل شي ، قال لي ما تخافي ، صدقيني ماريا تاني ما حـ تقدر تعمل شي ، لو بتثقي فيني حتكوني متأكده إني المره دي بالذات ما حـ اسمح يحصل شي يخرب علينا فرحتنا ، قلت ليهو انت قبل كدا قلت لـ ماريا انك عايزها ؟! لأنو لمن كنا جنب المحل هي قالت.... قاطعني و قال لي قبل سنتين رشحوها لي ، و أنا رغم إني رفضتها بطريقه ممكن أقول عليها بارده عشان ما أحرج عمي و أهلها ، بس هي النشرت الكلام دا و كانت عشمانه فيني ، بس بعد العملتو هي عارفه انها تاني ما حـ تقدر تقيف قدامي ساي خليها لمن تفكر تعمل شي تضرك بيهو ، قلت ليهو والله ما شاء الله واثق فيها شدييد لو دي أنا كان أديتيني محاضره طويله عريضه و خاصمتني زي ما بتعمل كل مره ، قال يا لطيييف ! ايوه انا بديك محاضرات و لمصلحتك و على فكره انا ما قاعد أخاصمك أنا بس بديك فرصه عشان تحسي على نفسك و تنتبهي لـ أغلاطك ، قلت ليهو كذاااب والله ، لمن جيت اشتغلت معاكم في المحل قاطعتني فتره و حسستني كأني عملت ليك حاجه أو كأنك ما راضي إني اشتغل معاكم رغم إنو انت الإقترحت لـ مازن يشغلني معاكم !
قال لي ما خاصمتك ولا قاطعتك ممكن نقول إني كنت مخاصم نفسي لأني ما قادر أو ما عارف اشرح و أوصل نقطه معينه ، قلت ليهو ما فهمت ، قال لي دي من أكبر مشاكلك ! بتفهمي الما لازم يتفهم و البتفهم ما بتفهميهو ! قلت ليهو انت لو ما قلت لي حـ أعرف من وين ؟! قال لي اليوم العلى قولك خاصمتك فيهو انتِ عملتي شنو ؟ قلت ليهو ولا شي ، قال لي يعني مزاااج ساي مني بقيت ما بتكلم معاك !... قلت ليهو يعني عااارف نفسك و متقصد تعمل كدا ، كنت عايزني ألاحظ ليك و أجي اسألك في شنو ، بس ما اشتغلت بيك ، قال لي لو كان جيتي و سألتيني كنتِ حـ تجلطيني بـ غباءك زي ما هسي قربتي تجلطيني ، قلت ليهو اها قولي لي أنا عملت شنو !؟... قال لي خلاص أنسي خلينا في المهم ، الناس ديل حددوا موعد العرس بعد شهر ، اها انتِ رأيك شنو ؟؟ شايفه الوقت مناسب !؟
بلعت ريقي و قلت ليهو احم يعني ... يعني هناي ... قال لي تمام معناها ما عندك أي مشكله !... قلت ليهو عمر طيب قول لي عملت شنو أنا ؟ والله العظيم ما متذكره و ما عارفه أنا غلطت عليك في شنو !؟
بعد مسااافه قال لي تمام ، اسمعي أنا ما بحب فكرة إنو وحده من الأسره تطلب مساعده من غريب بالذات انتِ ، مازن صحبي و ولد جيرانا و زولي شديد و أي حاجه بس ليه تتصلي عليهو و أنا موجود ! ليه تطلبي مساعدتو و أنا موجود ! ليه في اليوم داك لمن تهتي و ما لقيتي المحل اتصلتي عليهو و ما اتصلتي علي ! ما تقولي لي كنت زعلانه منك أو بسبب الحاجات الحصلت بيناتنا ، مهما يحصل في النهايه أنا ولد عمتك ، ما عدوك ولا غريب ، لمن يحصل ليك شي أو تحتاجي مساعده مفروض تخلي كل شي على جنب و تتصلي علي أنا ما على مازن أو غيرو لأني أكيد ما حـ أقول ليك ما ح اساعدك عشان زعلان منك أو متناقش معاك !!
طبعاً ياداب عرفت الكان مزعلو شنو و عرفت إنو كان بتضايق و بزعل شديد لمن يشوفني بتكلم مع مازن ! ابتسمت و قلت ليهو والله في اليوم داك كنت عايزا اتصل عليك و لمن اتصلت علي و ما رديت عليك كان بسبب..... و حكيت ليهو الحصل كلو ، قال لي تمام ماف مشكله بس تاني ما تطلبي حاجه من أي زول حتى لو كانت بسيطه ، تمام ؟؟ قلت ليهو تمام قال لي طيب يلا تصبحي على ألف خير و ربنا يتم لينا على خير ♥️
بعد قفل حضنت التلفون و بقيت أتبسم براي ، بعد يومين لمن سمعنا صوت الباب مشت ريل فتحتو ، بعدها جا صوت راجل بسلم ، أنا طوالي قمت و دخلت غرفتي و أمي لبست توبها و طلعت ليهو برا .... بعد مسافه لمن جات داخله قلت ليها دا منو ؟؟ قالت لي قال سيد البيت ! قلت ليها الناس الكانوا برا السودان جوا راجعين !! يعني هسي قاعدين برا ؟
قالت لي لا و أصلاً البيت دا عمر طلع مأجرو لينا إيجار ! كذب علينا لمن قال إنو بيت قاعد ساي و أهلو برا السودان ! الراجل الجا هسي دا كان جايب معاهو نسوان قال جا يوريهم البيت عشان يسكنهم معانا بما إنو البيت كبير ، طبعاً أنا استغربت و قلت ليهو انت منو و بتتكلم عن شنو ، قال لي أنا سيد البيت ، طبعاً في البدايه قلت خلاص معناها دا هو و ديل أهلو مع إنو كان ظاهر عليهم انهم جاين من برا السودان ، لمن دخلتهم الهول و الراجل اتكلم معاي عرفت إنو عمر مأجر لينا البيت ! ما قال لينا الحقيقه عشان عارفني حـ أعترض !
طبعاً بعد أمي طلعت طوالي إتصلت على عمر ، أول ما فتح الخط قلت ليهو عمر انت ليه كذبت علينا و ما قلت لينا انك مأجر لينا البيت !... قال لي شنو ؟! أي بيت ! قلت ليهو ما تكذب ، سيد البيت قبل شويه جانا و عرفنا انك مأجرو منو !....سكت مسافه بعدها قال لي طيب المشكله وين !؟ قلت ليهو لو ما فيها مشكله ما كان انت كذبت علينا ! قال لي عارف أمك ما حـ ترضى و انتِ بسبب الفجوه و الخلاف الكان بيناتنا ما كنتِ حتقبلي و حـ تحرضي أمك و تخليها تطلع بيكم من البيت ، قلت ليهو هسي ما قبلانه ! قال لي أطلعكم طيب و أخليكم تقعدوا في الشارع !؟ قلت ليهو ما كدا بس خلينا برانا بنعرف نتصرف ، هسي أمي بدت تشتغل و داخله صناديق و أنا شغاله فـ برانا حـ نمشي وضعنا و ما تنسى إنو أبوي برسل لي و أمي راجلها برسل ليها يعني الحمدلله نحنا ما محتاجين يا عمر ، انت ما تصرف قروشك علينا !...قال لي تمام و قفل... حسيتو اتضايق ، بعد شويه كدا اتصل على أمي سامعاها بتتكلم معاهو ، تاني يوم اتصل علي و قال لي بالنسبه لموضوع أمبارح أبوك هو الحـ يدفع ليكم إيجار البيت عشان ما تتحسسي ، بعد دا دي قروش أبوك الحـ تندفع على إيجار البيت ، قال كدا و طوالي قفل الخط و لمن رجعت ليهو ما رد ! اتوترت و قلقت و قلت أصلاً كنت حاسه إنو حـ تحصل حاجه تخرب الزواج دا !... بعد ربع ساعه كدا رسل لي رسالة SMS كاتب لي فيها : "نقاشي و زعلي منك ما ليهو علاقه بـ العرس دا ، داك كوم و دا كوم براهو ، نتشاكل و نتناقش و نتضارب عديل بس العرس في موعدو "
حسيتو كأنو قرا أفكاري !... بقيت اتبسم براي و أنا متطمنه ! متطمنه من فكرة إنو مهما يحصل و مهما يحصل مشاكل و نقاشات بينا أنا و عمر ما حـ يخلط الكيمان ، حـ يحكم عقلو زي كل مره ، أنا أغلط و هو يزعل بس تاني نرجع و نتصالح و العكس ، مطمنه فكرة إنك مقبول بكل أخطائك و عيوبك ، مطمنه فكرة إنو مكانتك حتكون محفوظه مهما عملت ، مطمنه فكرة إنك حـ تنوم مرتاح و بالك ما ينشغل لمن تتناقش نقاش مع زول قريب منك لأنك متأكد إنو ما حـ يخليك !... عمر دا أنا ما حبيتو من فراغ ولا مزاج مني ولا إعجاب ساي ، عمر في أصغر تصرفاتو و أبسط كلماتو بجذبني ليهو ، لأنو ما إنسان عادي ، ماف زول بشبهو ، ماف زول بالنسبه لي ممكن يكون زي عمر أو ياخد مكانو ❤️
اتصلت عليهو كتير و لمن رد قلت ليهو اقسم بالله أنا ما قاصده احسسك إنو انت زول غريب و ما قصدي احسسك إنو ما لازم تدخل فينا ... يمكن أنا خاني التعبير أو ما قدرت أفهمك العايزا أقولو بالجد ... أخد نفس و قال لي تمام فهمتك ، قلت ليهو لسه زعلان ؟ و قبل ما تجاوب عليك الله لو لسه زعلان مني ما تكذب و تقول لي لا و تمشيني ساي ! عشان ما نعقد الأمور تااااني !🌚
ضحك و قال لي لا خلاص ما زعلان والله ، عشان كلام العقلاني دا ... اتكلمنا شويه بعدها قفلنا من بعض....
طبعاً أبوي ذاتو ما كان عارف إنو عمر مأجر لينا البيت و إلا كان رفض ، عمر كذب على أبوي زي ما كذب علينا ، أبوي لمن عرف من أمي اتصل على عمر و عاتبو لأنو متعب نفسو شدييد معانا و متحمل مسؤوليه ما مسؤوليتو.....
المهم مرت الأيام و خلاص العرس قرب و بيان جات قعدت معانا في البيت و معزه بتجينا و بتمشي بس ما بتبيت عشان أمها ما بتخليها ، يوم بيان قالت لي طبعاً ما وريتك علاء ليهو فتره بتصل على عمتي و يشيل و يعتذر منها ، و آخر مره قال عايز رقمك ، طبعاً عمتي ما رضت تديهو الرقم ، قالت ليهو ما عايزين أي مشاكل ، كان بقول ليها أنا بس عايز أعتذر منها ، طبعاً محمد لمن عرف اتصل شاكلو و قال ليهو تاني ما تتصل و قال لأمو و انتِ ما تردي عليهو تاني ، لو عمر عرف كان سافر ليهو البلد و كسر راسو......
______________________
