_ يا غبي لسه ما فات الأوان !
= فات الآوان و أنا اتأخرت شديد ، الله ينعل اليوم الإتافهت فيهو معاها ! لو ما عملت كدا و فكرت فيها بطريقه غلط ما كان دا كلو حصل !
_ ياخ أفهم يا غبي هي عملت دا كلو عشانك ، كذبت عشان تكون معاك و لمن حست إنو كذبتها دي ممكن تأذيك اتصلت و نبهتك و إلا زي الوقت دا انت في عداد الموتى
= ياخ كيف تكون عملت كدا عشاني ! هي هسي بتكرهني كره شديد ، عليك الله ما تقولي كلام خارم بارم !
_ اشرح لي طيب ، شنو البخليها تكذب كذبه زي دي !!؟ صدقني هي من زمان معجبه بيك و كانت بتحكي لي عنك ، اسمك دائماً على لسانها ، لمن تتناقر و تتجادل معاها بتكون مبسوطه حتى لمن تغيظها ، العملتو انت صدمها فيك بس انا متأكدة إنو ما كتل مشاعرها الشايلاها ليك
= هي حصل قالت ليك كدا ؟؟ و لو فرضت إنو كلامك حقيقه فـ ليييه ما كلمتني !
_ ما عارفه ليه هي ما كلمتك بس دي الحقيقه ، إذا هي البت ضحكت بسمعتها و ما هماها زول و عملت دا كلو عشان تكون معاك ، معقوله انت ما مستعد تحاول عشانها !؟
= اعمل شنو أنا و هي خلاص حـ تعرس !
_ انت بعد عملتك ديك قفلت كل الطريق الممكن تقودكم لبعض و هي عشان تلقى طريق جديد يجمعكم تاني كذبت الكذبه الخطيره دي !
=.......
_ غيتو أنا العندي جيت و قلتو ليك و كدا حـ أكون مرتاحه عشان حكيت ليك الحقيقه كلها ، بعد دا انت حر ، لو عايز تتجابن و تسكت على كيفك ، و لو عايز تبقى راجل بالجد و ما تخلي تضحيتها دي تروح على الفاضي فـ هنا أنا معاك ، المهم انا حـ أمشي و ان شاء الله انت تقدر تاخد القرار الصحيح و خليك عارف إنو لسه ما فات الآوان.....
___________________________
شرقت شمس يوم أجمل جمعه في حياتي ، كان صباح ما زي أي صباح مر علي ، رغم إنو البيت كان جايط و الناس طالعه و داخله و كواريك و صريخ الشفع إلا اني كنت مستكينه و حاسه نفسي عايشه في عالم تاني ، مسكت تلفوني و اتمنيت اتصل على عمر و اشاركو لحظات ما قبل العقد و بعدها لحظات ما بعد العقد زي ما كل البنات بعملوا لمن ينزلوا فيديوهات عقدهم أو أول مكالمه ليهم بعد العقد مباشرة بس ما قدرت ، يعني كيف اتصل عليهو و ذاتو أقول ليهو شنو ! هو براهو متضايق و مخنوق بسبب الكذبه الكذبتها ، و أكيد متخيل إنو أنا حالتي اسوأ منو و كاتمه جواي ، فـ لو اتصلت عليهو و حس إني مبسوطه يمكن يشك في الكذبه القلتها ليهو....
فجأه معزه جات داخله و قالت لي جاهزه عشان نمشي ؟؟ قلت ليها ايوه ، سكتت مسافه بعدها قالت لي أنا والله بتمنى ليك الخير و السعاده ، لكن يا مها انتِ حاسه إنو عمر دا بعد الزواج حـ يتعامل معاك عادي بعد الكذبه الكذبتيها !؟ لأنك واقعه بين نارين ، يعني لو عمر ما عرف حقيقة انك كذبتي عليهو حـ يفضل عمرو كلو نافر منك ، لأنو عمر دا ظاهر إنو من نوعية الرجال الما بقبلو بـ وحده .... فاهمه قصدي صح !؟ يعني حتى لو عرسك ما اظن يتعامل معاك كـ زوج و حيكون نافر منك ، أما لو عرف الحقيقه حـ تسقطي من نظرو لأنك كذبتي كذبه زي دي و اتوقعي منو اسوأ شي !
قلت ليها خلاص رأيك شنو أطلع هسي أمشي افتشو و اقول ليهو الحقيقه ؟ ولا تمشي تقوليها ليهو انتِ ؟؟
قالت لي شنووو !؟
قلت ليها أنا ما حـ اقدر أمشي و اقول ليهو الحقيقه بس بما إنو الموضوع مضايقك للدرجه دي و شايله هم بسببو أمشي افضحيني قدااامو عليك الله و قولي ليهو الحقيقه كلها و خلي كل شي يخرب 😊
قالت لي ما قصدي كدا !... قلت ليها ماف تفسير لـ كلامك غير كدا ، يعني جايه قبل سويعات من العقد عشان تقولي لي الكلام دا لـ شنو !؟
بقينا ساكتين الإتنين و كل وحده بتعاين في اتجاه لحد ما جات
عمتي داخله و قالت لينا مها ، معزه المقعدكم شنو ؟! أمرقي يا بتي الله يرضى عليك البنوت ديل من قبيل منتظرنك عشان تمشوا الكوافير ، قلت ليها طالعه طالعه ، جات ضمتني و قالت لي ما حـ تقدري تتخيلي قدر شنو أنا مبسوطه بيكم و فرحانه انك حتكوني بتي و مرت ولدي 🖤
المهم طلعت و مشيت مع البنات الكوافير ، ما كان بعيد شديد ، تبع وحده بت حينا ، طبعاً ماريا جااات مع أهلها بس قالت ما ماشه معانا الكوافير ، كانت زعلانه شديد و الحاجه دي كانت ظاهره في وشها ، المهم مشوا معاي معزه و اتنين من بنات الجيران و 4 من بنات أهلنا ، ما اتأخرنا هناك ، ظبطنا نفسنا على الخفيف كدا و جينا راجعين ، الوقت داك الناس فطرت و رفعوا الصواني و الرجال جهزوا نفسهم عشان يمشوا صلاة الجمعه و بعدها يعقدوا ... طبعاً ما كلمت سهى ، لي فتره ما اتواصلت معاها و عشان عاااارفه انها حـ تقعد تشمت فيني و تقول لي معقوله عايزا تعرسي ولد عمتك المنفسن داك و و و ... ما حبيت أكلمها و يمكن عشان عمر ما بحبها و لو جات حـ يتضايق منها أكتر....
طبعاً في غرفتي البنات كانوا بدقوا و بغنوا و جزو منهم برسموا في يدينهم ، لقوا ليهم بيقن و قالوا يملوا يدينهم رسم ، طبعاً أنا شدة ما مبسوطه لمن قلبي كان بدق بسرعه و حاسه نفسي زي البحلم ، بعد شويه كدا سمعنا صوت النسوان و هم بزغردوا و شغالين يقولوا : عقدوا ، عقدوا !
طبعاً قلبي عمل شححح و بقى يضرب بسرعه ، جاني إحساس خوف و فرح في نفس الوقت ، أطرافي إرتعشت ، ما قايله العرس دا بفرح و بخوف كدا في نفس الوقت ، كل الأحاسيس الفي الدنيا دي اجتمعت فيني ، البنات قاموا يباركوا لي و يزغردوا ، عمتي جات أول وحده ضمتني و باركت لي ، بعدها جوا ناس أمي و بنات اعمام و عمات أبوي و بيان و الجيران و باقي الأهل ، غرفتي بقت زحمه شديد ، تفكني دي و تمسكني دي ، بقيت زي اللعبه بيناتهم ، بعدها بدوا يضربوا رصاص و كل البنات جوا داخلين جوه و النسوان طلعوا يرحبوا و يستقبلوا الرجال الجوا داخلين ، وحده من بنات الأهل قالت استعدوا عشان تطلعوا يا بنات ، العريس هسسي حـ يجي داخل ، قعدوا يضحكوا و يشغلوها لي و أنا ميته من الخجل ، طبعاً ماريا و منهل خااالص ما جوا باركوا لي ، كنت متوقعه عمر يجي في أي لحظه و البنات كل دقيقه تطلع وحده منهم تتابق و تجي راجعه و تقول العريس لسه ما جا ! وحده قالت ليهم احتمال خجلان منكم يا جماعه أو هو ما نوعية الرجال البجوا بعد العقد يحضنوا زوجاتهم و يباركوا ليهم !
طبعاً كانوا عادين الموضوع هظار و شغالين لي يا حليلك شكلك اتدبستي و وقعتي في اب جيقه كبير بس انا ما كنت مرتاحه و مقلقه شديد ....
شويه كدا جا عمو النور و معاهو سليم و كم راجل كدا من الأهل باركوا لي و طلعوا ، قلت معناها عمر حـ يجي داخل بعديهم ، و هنا اتطمنت شويه و بقيت أعاين للباب بس للأسف ما جا 💔
انتظرت و انتظرت بس عمر ما جا و الناس باركت و مشت و البيت بقى خفيف ، زعلت شديد و قلت ليه عمر ما جا عشان يبارك لي ! على الأقل كان يجي ساي يوري الناس وشو و يخليهم يباركوا ليهو و يمشي !
طلعت كل الإكسسيرز الكنت لابساها و أزلت الميك اب الإتعمل لي و أنا زهجانه ، كان معاي في الغرفه معزه و بنتين ، لمن عمتي جات داخله وحده من البنات قالت ليها العريس مشى وين يا خالتو سميره !؟ عقد و إختفى طوالي !
عمتي قالت ليها ما عارفاهو اتأخر وين لكن أكيد حـ يجي ان شاء الله ، طبعاً هي ذاتا ما كانت فاهمه شي و الشي الكان محير إنو أبوي ما جا بارك لي و من الصباح بـ عيني ما شفتو ، حتى فاروق و محمد ما جوا باركوا !
لحد ما قريب صلاة المغرب أنا ما فاهمه حاجه ، الجيران الما قدروا يجوا قبيل بقوا يجوا يباركوا لي و يمشوا و أنا ما مركزه معاهم ، بعد المغرب وقفت الزيارات ، طبعاً أمي رجعت بيتها و معزه كمان ، بقيت قاعده براي في الغرفه و ماسكه تلفوني ، شويه كدا بيان جاتني داخله و هي شايله تلفونها و لونها مخطوف ، إنخلعت و خفت تكون حاصله حاجه ما كويسه على عمر ! قلت ليها بيان في شنو !؟ عمر كويس !؟
سكتت ساي ، قلت ليها اتكلمي ياخ ! لمن ما ردت علي خليتها و طلعت برا لقيت عمتي قاعده على الكرسي و خاته يدينها على راسها ، هنا الخوف اتمكن مني ، جريت عليها و قلت ليها عمتي في شنو ؟؟! عمر كويس !؟
فجأه سمعنا صوت الجرس ، مشت بيان عشان تفتح الباب و أنا لسه بتكلم مع عمتي و هي من شدة الزعل ما قادره ترد علي ، فجأه كدا فاروق و سليم جوا داخلين و وشوشهم ما كانت بتبشر بالخير ، قلت خلاص معناها عمر دا حصلت عليهو حاجه ، دموعي طوالي نزلت ، قلت لـ فاروق و أنا ببكي مالكم انتوا عاملين كدا و من قبيل اختفيتوا وين !؟ عمر كويس ؟ عليك الله يا فاروق قول لي إنو كويس!
سليم قال لي عمر كويس ، قلت ليهو طيب ليه ما جا و ليه انتوا عاملين كدا و ناس أبوي وين !؟
فاروق قال لي والله ما عارف اقول ليك شنو ، كدي يا أمي قولي ليها !
عاينت لـ عمتي و هي نهاي ما عاينت لي ، قلت ليها عمتي في شنو و أول ما قربت منها لزتني!
طبعاً استغربت ! قلت ليها عمتي مالك في شنو ؟... ما ردت علي طوالي دخلت غرفتها و قفلت الباب عليها ، راسي جاط و ما عرفت في شنو ! شويه كدا محمد جا داخل ، جريت عليهو و بقيت اقول ليهو في شنو يا محمد ! في زول مات يعني !؟
حسيتهم كلهم ما راضيين يعاينوا لي في وشي ! بيان جات جرتني من يدي و قالت لي تعالي ، ساقتني و دخلتني غرفتي ، قعدتني على السرير و قالت لي مها انتِ ليه عملتي عمله زي دي !؟ صح أنا ما بعرفك من زمان و ياداب جاياكم عروس جديده بس ما إتوقعت منك حاجه زي دي خالص ! وقفت على حيلي و قلت ليها عملت شنو أنا يا بيان ما فاهمه حاجه ! فجأه باب الغرفه انفتح و أبوي جا داخل و في لمح البصر وقف قدامي و ضربني كف و عدلني بالتاني و كان حـ يضربني للمره التالته بس بيان صرخت و محمد جا داخل مسكو مني ! كان بقول ليهو فكني ليها عشان أربيها الكلبه الواطيه دي ، وطت لي راسي و دفنتو في التراب ، محمد بقى يقول ليهو اهدى ، أهدى يا خالي الله يرضى عليك ، أبوي قال ليهو أهدى كيف بعد ما سودة وشي ! جوا سليم و فاروق مسكو أبوي و طلعوا بيهو برا ، بقيت أبكي و أقول لـ بيان أنا ما فاهمه شي أبوي مالو و عملت شنو أنا و عمر وين !؟
قالت لي بسبب الغلطه الغلطتيها مع علاء أبوك عقد ليك عليهو ، ما عارفه تفاصيل الحصل بس دا القالو لي محمد قبل ما يجوا بشويه !
طبعاً لمن قالت لي كدا إنصدمت ! ، قعدت على الأرض و أنا منهاره على الآخر و فتحت بيت بكى و أنا ما مصدقه الكلام السمعتو ! بيان قعدت معاي في الأرض و ضمتني عليها و بقت تحاول تهديني ، طبعاً قلت معناها عمر لقى علاء و عرف منو الحقيقه و عشان يعاقبني خلاهم يعقدوا لي عليهو ، كسرني و خلاني في أهم يوم في حياتي ، و علاء شنو الخلاهو يقبل يعرسني ! معناها هم الإتنين اتفقوا علي ، واحد عشان كذبت عليهو و واحد عشان كذبت فيهو و قرر يقلب الكذبه جد ، بقيت أبكي و أقول لـ بيان اقسم بالله أنا ما غلطت معاهو ، اقسم بالله دا كلو كذب ، عمر كذاب و منافق و علاء كمان كذاب ، والله انا ما غلطت معاهو يا بيان .....
رغم انها كانت بتقول لي خلاص كل شي حـ يبقى تمام إلا اني حسيتها ما مصدقاني ! قمت منها و فتحت الباب و طلعت الهول و بقيت أصرخ و اقول ليهم علاء كذاب ، والله هو كذاب و أنا ما غلطت معاهو و عمر ذاتو كذاب ، أبوي قعد يعاين لي و عيونو مليانه غضب ، كان حـ يقوم و يجي علي و يضربني بس محمد مسكو و نادى بيان بـ نهره كدا و قال ليها دخليها جوه ، لمن بيان مسكتني اتفكيت منها و مشيت لـ عمتي في غرفتها و بقيت اقول ليها ديل كذابين ما تصدقيهم ، والله يا عمتي علاء كذاب و ولدك عمر كمان كذاب ....
بقيت أبكي ليها و هي ما شغاله بي و أبوي من برا يجوط و يقول لي اقسم بالله لو جايب معاي سكين كان ضبحتك بيها و إرتحت منك ، يا عديمة التربيه يا الما عندك حياء ، بيان جات ساقتني و دخلتني غرفتي ، قعدت أبكي كدااا لحد ما بعد شويه سمعت صوت جوطه و صوت أبوي بقول ليهم زحوا لي منو أنا لسه ما فشيت غبينتي فيهو الكلب الحيوان الوسخ عديم الرجوله و الإحساس ، لو كل أولاد الأعمام زيك ان شاء الله ينحرقوا و يموتوا ، من خلال كلامو عرفت إنو بتكلم مع علاء و كمان كان في صوت عمو النور و كمان صوت مازن ، ما عارفه عمر معاهم ولا لا ، بيان كانت مقلقه ، ماشه و جايه في الغرفه و هي شغاله ربنا يستر ، ربنا يستر ، لمن الأصوات إرتفعت بيان فتحت الباب و طلعت ، أما أنا بعد ما إقتنعت خلاص إنو حياتي اتدمرت و إني خسرت عمر و فقدت الأمل حسيت إنو ما لازم أعيش بعد الحصل لي دا ، كلهم ما صدقوني كلهم غضبانين مني و الاسوأ من كدا عقدوا لي على علاء ، علاء البكرهو من جوه قلبي ، علاء البقيت ما بطيق اسمع اسمو ، علاء المستعده أموت ولا يرتبط اسمي بإسمو ، ايوه انا كذبت نفس الكذبه دي بس ما قلتها لـ زول غير عمر ، لأني بثق فيهو و لأني كنت متخيله إنو ماف زول حيكون عارف بالحاجه دي غيرنا نحنا الإتنين ، بس للأسف خذلني ، مشيت فتحت الدرج و طلعت منو حاجتين ، تاني حاجه هي تلفوني ، لقيت فيهو مكالمات كتيره من علاء كانت من قبل العقد و بعدو ، قلت الحيوان مصدق نفسو و متصل علي كمان عشان يبارك لي ولا عشان يشمت فيني ! في اللحظه ديك كرهي ليهو اتضاعف و عمر ذاتو كرهتو لأنو كسرني و أذاني بطريقه ما خطرت على بالي في اسوأ كوابيسي ! كنت بحبو من أعماق قلبي و هسي بكرهو من أعماق قلبي....
دخلت الواتس ، تحديداً حساب عمر و بديت اسجل ليهو في ريكورد و أنا مقهوره و حسي دا من شدة البكى انقرش ، قلت ليهو و أنا ببكي :
غلطي الوحيد في الدنيا دي إني اتعلقت فيك ، حبيتك أكتر من نفسي ، كنت مستعده أعمل أي شي عشان أكون معاك ، أي شي عشان أصل ليك ، بسببك عملت حاجات ما اتخيلت إني اعملها في حياتي كلها ، حتى ماريا بت عمك أنا كرهتها بسببك ، كنت بكره أي شي و أي زول احسو واقف بيني و بينك ، بسببك أنا طلّعت ابشع حاجه فيني ، ياخ أنا كنت مهوسه بيك لدرجة اني كذبت في نفسي و خاطرت بسمعتي ، في بت بتخاطر بـ سمعتها ؟؟ في بت بتكذب كذبه زي دي في نفسها ؟! بس انا كذبتها و كلو عشان انت تقبل تعرسني ، رخصت نفسي شديد و جريت وراك كتير و ما كنت بعرف أو بفهم شي غير اني عايزاك تكون معاي العمر كلو ، بس للآسف طلعت ما بتستاهل دا كلو ، حالياً أنا ندمانه و قرفانه من نفسي و حاسه بالرخصه ، بالنسبه لي بقى ماف فرق بينك و بين علاء ، الإتنين بنفس النداله و الخباثه ، ياخ على الأقل انت لمن عرفت إني كذبت عليك كان تلغي العقد ما تقوم تمشي و تعقد لي على علاء و تفضح الكلام العلى أساس هو سر بيني و بينك لكل الناس ، عمر أنا حالياً بكرهك أكتر من علاء ، حالياً انت اكتر إنسان أنا بكرهو في الدنيا دي ، كسرت ثقتي فيك و خلفت بوعدك و انتقمت مني بأبشع طريقه ، كنت بتقول لي أنا ما عدوك بس هسي انت أثبت لي إنك أكبر عدو لي ، حـ افضل عمري كلو أكرهك ... قصدي حـ اقضي الدقائق الباقيه لي من عمري كلها كره ليك 💔
خلصت و رسلت ليهو الريكورد طوالي ، ما كان خاشي ، جدعت التلفون و فتحت فتيل البيقن الكانوا برسموا بيهو البنات قبيل ، في الغرفه كان في كبايه و جك مويه ، طوالي كبيت مويه في الكبايه و فضيت فيها كل الصبغه الكانت في الفتيل ، غمضت عيوني و بكيت مسافه ، و دعيت إنو ربنا يغفر لي ، يغفر لي و يسامحني على العملتو و على الحـ اعملو هسي ، جواي كان في ألم كبير ، كان في وجع كبير ما بقدر أستحملو ، حسيت الدنيا ضاقت بي و إني خلاص انتهيت ، فتحت خشمي و شربت كل الصبغه الفي الكبايه ، قعدت على الأرض و شلت تلفوني و تاني سجلت ريكورد لـ عمر ، قلت ليهو :
حالياً أنا قاعده و جواي كميه من الصبغه ، دقائق بس و أفارق الدنيا دي ، كدا انتوا حـ ترتاحوا مني و أنا حـ أرتاح من الوجع الجواي دا ، عارف إنو هسي قلبي واجعني شديد و حاساهو بنزف ؟ عارف إني كل دقيقه بخت يدي على صدري عشان اتأكد إنو ماف جرح و إنو ماف دم نازل ! ... لمن أموت يا عمر حـ اكون حققت ليك انتقامك الجد جد و عاقبت ليك نفسي ، يمكن انت انصدمت فيني بس صدمتي فيك كانت أكبر ، لو بعدين حـ تلقى وحده تحبك زي حبي ليك و ما تشوف غيرك و تكون ليك زي العبد المأمور عرسها طوااالي و ما تتردد دا لو لقيتها أصلاً 💔
كنت بتكلم معاهو و أنا ببكي و خشمي كل ما يزبد بمسح الزبد ، أول ما رسلت الريكورد و ختيت التلفون على الأرض بيان جاتني داخله ، اتخلعت لمن شافتني ، جاتني جاريه و بقت و تقول لي مها دا شنو الفي خشمك دا ، قلت ليها دي صبغه ، قلت ليكم الحقيقه و ما صدقتوني ، يمكن لمن أموت تصدقوني ، نططت عيونها و قامت بإستعجال و بقت تنادي يا محمد يا محمد ، عمتييييي ألحقيني ، لمن كانت واقفه جنب باب الغرفه لزيتها و قفلت الباب علي ، بقت تضرب لي في الباب و تصرخ بأعلى حس عندها ، بعدها جاني صوت محمد و فاروق و سليم و مازن حتى علاء كل واحد فيهم كان بضرب لي في الباب و يحنسني عشان افتح الباب ، جا عمو النور و بقى يقول لي يا بتي استغفري و انعلي الشيطان ، كل مشكله و ليها حل ، افتحي لينا الباب دا ، حتى عمتي ذاتا جات و بقت تضرب لي في الباب ، مرات بخاف و بتراجع و بقرب أفتح ليهم الباب بس أول ما اسمع صوت علاء بطني بتطم زياده ، حسيت بحرقان في معدتي و الزبد زاد ، قعدت على الأرض لمن راسي لفه ، بعدها رقدت على الأرض و بقيت أعاين للسقف و أنا عارفه إنو دي قد تكون آخر لحظات لي في الدنيا ، بعدها لا حيكون في عمر لا حيكون في عمتي لا أمي لا أبوي لا غيرهم ، عارفه إنو بعد ساعات من عملتي دي حـ امشي مكان تاني ، مكان ضلام حـ اكون فيهو براي ، عارفه إنو أول ما أغمض عيوني ما حـ افتحهم تاني ، للحظات ندمت و الخوف اتملكني بس بعد شنو !؟
دعيت بس إنو ربنا يغفر لي ...
ما كان فيني حيل عشان اقوم ، حسيت الغرفه لافه بي ، بقيت أعاين لكل حاجه في الغرفه و أبكي لحد ما بقيت اشوف طشاش طشاش و أصوات ناس عمتي دي بقت لي بعيده ، لحد ما اصواتهم اختفت تماماً و انعدمت الرؤيه ....
_____________________
_ حسبي الله ونعم الوكيل ولا حول ولا قوة إلا بالله ، والله لسه مصدومه و حاسه نفسي زي البحلم ... هسي البت دي استفادت شنو ! كانت عايزا شنو من الدنيا دي و ما لقتو ؟! مشت عملت ليها عمله سوده و ضيعت بيها نفسها و نزلت راس أهلها و هسي كل الناس ماسكه سيرتها ، خسرت دنيتها و آخرتها!
= أمي عليك الله ما تقولي كدا ، صدقيني الكلام الإنقال دا كلو كذب ، و الناس بتحب اللف و الدوران ، أنا عارفه الحقيقه لأنها حكت لي ، ما عارفه علاء ولا عمر القال عنها كدا بس هو كذاب ، والله العظيم هي ما غلطت معاهو ما تظلموها ساي يا أمي ، أدعي أدعي ليها بس يا أمي ، لو الليله مها دي حصلت ليها حاجه ذنبها في رقبة الزول الكذب فيها و كلم أهلها و في رقبة الناس البتتكلم عنها حتى و هي مرقده في المستشفى بين الحياة و الموت
_ هووووي يا معزه ، ماف دخان من دون نار ، و عوداً ما فيهو شق ما بقول طق ، و الكلام دا ما انقال من الغرباء انقال من اهلهم القريبين ، أصلاً يوم العقد الناس كانت حاسه إنو في شي لكن ماف زول كان متوقع إنو تحصل حاجه زي دي ، و علاء دا حسبي الله ونعم الوكيل فيهو ، لا خاف الله في بت عمو لا خت إعتبار لـ عمو ولا خجل من عمتو القاعد في نص بيتها دي ، لكن الغلط غلط مها ، كما أدتو الضوء الأخضر ما كان غلطتوا غلطه زي دي ، و سميره دي أنا من زمان كلمتها و قلت ليها ما صح تختي البنزين جنب النار بس ما اشتغلت بي و كانت بتقول ديل زي أخوانها ، و هي أختهم و قعدت تقول كدا لحدي ماف الآخر حصل البنخاف منو ، شوفي جنس دا عليك الله غيتو استغفر الله بس
= أمي عليك الله اسكتي لأنو البتقوليهو دا كلو ما صح ، بكرا لمن مها تبقى كويسه كلكم حـ تعرفوا الحقيقه و حـ تعرفوا انكم أكلتو لحمها أكل💔
_ والله حسب القالو مازن ما اظن تطلع منها و الله يكضب الشينه ، رغم إنو عملتها سوده لكن ربنا يغطي عليها و يحفظها و ان شاء الله تطلع منها...
أنا أكتر وحده زعلت من مها لمن كذبت الكذبه دي و حالياً أنا أكتر وحده متعاطفه معاها ، يعني إذا انا هسي مصدومه في عمر و ما قادره أصدق إنو انسحب و عمل عمله بطاله زي دي فـ أكيد هي صدمتها فيهو أكبر بكتير من صدمتي ، أنا أكتر وحده عارفه عمر هو شنو بالنسبه ليها ، هي ما غلطت لمن حبتو بس غلطت لمن سمحت لنفسها تكذب و تأذي غيرها عشان تصل ليهو ، ما كل غايه بتبرر الوسيله ، و دي مجرد مقوله لا آيه لا حديث عشان الناس تتبعها و تحاجج بيها !
حالياً أكتر حاجه أنا بلوم نفسي عليها إني ما كنت موجوده معاها ، ياريت لو ما خليتها و رجعت البيت ، لو كنت معاها ما كان حـ أخليها تغلط تاني و تحاول تنتحر ، متأكده انها عاشت لحظات عصيبه و جربت اسوأ الأحاسيس الخلتها تفكر في الإنتحار ، قبل كدا لاقتني مقوله بتقول :
" إذا فقدت مالك فقد ضاع منك شيء لهُ قيمة ، و إذا فقدت شرفك فقد ضاع منك شيء لا يقدر بقيمة ، و إذا فقدت الأمل فقد ضاع منك كل شيء "
و هي ضاع منها كل شي عشان كدا لقت الإنتحار أنسحب حاجه ليها 💔
"أعلم أنك لن تنساني ، قد تتناسى أحيانًا لكنك لن تنسى أبدًا ، لا أحد يستطيع ان ينسى شخصًا أعطاه هذا الكم الهائل من الحب ، ستتذكرني فجأةً في زحام يومك ، في أغنيةٍ ما ، في يومٍ ممطر ، لن تنسى أبدًا مهما فعلت."
يتبع.......
