لمن دخلت الهول عمتي قالت لي ما لقيتي عمر ولا شنو ؟! قلت ليها لقيتو و قال جاي ، علاء قال لي لو ما جا حـ تفوتو جبنه ظاااابطه شديد ، قلت لـ عمتي لمن طلعت أنادي عمر سمعتو بتكلم مع بت ، علاء ضحك و قال عمر طلع ما هين ! عامل فيها زول تقيل و ما بتاع الحركات دي !😂
عمتي قالت لي بت !! دي منو و قال ليها شنو ؟؟؟
طبعاً أنا عشان الشمار حارقني و كنت مستعجله عشان أقولو لـ عمتي ما فهمت الكلام كويس ، قلت ليها قال ليها كلام كدا كتير ، قالت لي ما متذكره حاجه من القالو ؟
قلت ليها زي القال ليها انتِ إعترضتي و تاني قال ليها أنا مشيت شفت أهلك و اتقدمت ليك ! عمتي ختت يدها على صدرها و قالت سجمي دا كلو من وراي !! عمر ليه ما كلمني !! ليه اتقدم لـ بت من دون ما يستشيرني أو يجيب لي سيره !! غريبه أنا ولا مرت أبوهو !... علاء قال ليها يمكن خايفك تعملي ليهو نفس حكاية سليم ... علاء قال كدا و قعد يضحك بس لمن شاف عمتي صاااانه قال ليها والله بهظر ! المهم أصبري يا عمتي يمكن عندو أسبابو و أكيد في الآخر حـ يجي يكلمك لأنو دي ما حاجه بتندس ! قالت ليهو يكلمني متين ؟؟ لمن يودي الشيله و لا يوم العرس !
فجأه عمر جا داخل و قال ليها عرس منو ؟؟ قالت ليهو عرسك انت ! اها حددت الموعد ؟ الجمعه دي ولا البعدها !؟
قال ليها يا أمي بتقولي في شنو انتِ !؟
قالت ليهو اتقدمت للبت متين !؟ سقت معاك أبوك و أعمامك ولا أبوك و مرتو !؟ و أساساً البت دي منو ؟؟
قال ليها يا أمي في شنو ياخ !
قالت ليهو البت الكنت بتتكلم معاها قبل شويه و الإتقدمت ليها دي منو ؟
هنا طوالي عمر عاين لي ، عمتي قالت ليهو ما تعاين ليها عاين لي أنا دي و جاوبني ، قال ليها بت أخوك قالت ليك إني مشيت و اتقدمت لـ بت و سقت معاي أبوي ولا قالت ليك حـ أعقد عليها الجمعه الجايه ؟!!
قالت ليهو المهم انك اتقدمت للبت من دون ما تكلمني أو تلمح لي ! يعني أبوك عارف ؟؟ عدوتك أنا يا عمر ؟؟
قعد و أخد نفس و قال ليها أولاً انا مستحيل أخطي خطوه زي دي بدون علمك خليك متأكده من المعلومه دي ! هو فعلاً في بت بس صدقيني ما اتقدمت ليها ، و ايوه أبوي عارف بس عرف بالصدفه ... عرف إني عايز وحده بس لسه ما حددت يوم ولا كلمت زول ، البت دي اتعرفت عليها في قطر يا أمي و هي قطرية الجنسيه ، قالت ليهو شنووو !! بت قطريه عديييل كدا يا عمر !! يعني هي كمان عايزاك ؟😍
قال ليها ايوه بس حالياً نحنا ما جاهزين أو بالأصح انا الما جاهز عشان أفتح بيت ، يعني ياداب في البدايات و مشواري لسه طويل ، عشان كدا فكرت اجهز نفسي و اظبط أموري أول شي و بعدها أكلمكم و أمشي أقابل أهلها ، بس صدقيني ما كنت مخطط أعمل شي من وراك ! انتِ أمي في النهايه و ماف شي بمشي من دون رضاك و موافقتك و في المكالمه القبل شويه دي كنا بنتناقش في الموضوع دا و بت أخوك الشليقه دي خطفت الكلام و شقلبتو !.... هنا ياداب عمتي إبتسمت و حست بالرضا ، قالت ليهو ربنا يسعدك و يهنيك يا ولدي و ان شاء الله تلقى الفي مرادك ، لكن قولك أهلها ديل حـ يقبلوا بيك !؟ قصدي حـ يقبلوا يدوا بتهم لواحد من جنسيه تانيه ؟؟ قال ليها حسب القالتو لي أهلها ما بمانعوا ، أهم شي عندهم أخلاق الشخص المتقدم و شغلو و مكانة أسرتو ... قالت ليهو كان كدي عديله تب و ربنا يكتب ليك الفيهو الخير ، ما قلت لي اسمها منو عروستنا القطريه !؟ قال ليها عنود ، قالت ليهو اسمها سمح ان شاء الله هي ذاتا تكون سمحه ، علاء قال ليها البت قطريه يا عمتي فـ كيف ما تكون سمحه ؟! عمتي قالت ليهو لا لا إلا أشوفها ، قالت لـ عمر ما عندك صوره ليها ؟؟
