بعدها مرت الأيام لحد ما جات إمتحانات الفتره الأولى ، طبعاً أيام الإمتحانات أنا نهاي ما بتهاون ولا بضيع زمن ، بقرا كويس للإمتحان و بتركيز عالي جداً ، المره دي جيت الخامسه ، زعلت شويه عشان كنت عشمانه أجي الأولى ، بس عمتي راضتني ، و قالت لي نهاي ما بطاله ، انتي لحد الآن محافظه على مستواك ، و من أولى دائماً بتجي من العشره الأوائل ، و دي حاجه كويسه شديد ، ما مهم جيتي التالته أو الخامسه المهم انك في العشره الأوائل ، و ان شاء الله ما تطلعي منهم ، قلت ليها المره الجايه حـ أجي الأولى عدييل ، قالت لي ما بعيده عنك و أنا على كل حال مبسوطه و متكيفه منك ، المهم يوم أثناء ما نحنا قاعدين ورا الفصول جانا أسامه و طوالي مد لي ورقه مطبقه ، قلت ليهو دي شنو !؟ قال لي أفتحيها ! رؤى حمرت ليهو و قالت ليهو فيها شنو الورقه دي يا أسامه ؟! قال ليها دا حسن قال لي أدي الورقه دي لـ مها ، سهى خطفتها منو و فتحت الورقه بعدها قعدت تضحك ! فاديه و رؤى شالوها منها و لمن قروها هم كمان قعدوا يضحكوا لدرجة انهم مسكوا بطونهم من شدة الضحك ! طبعاً أنا استغربت ، شلت منهم الورقه و لقيت مكتوب فيها :
من رأيتك لا اعلم ماذا حصل لي ، أحسست أن الوقت وقف ، و الهواء وقف ، و أمواج البحر توقفت عن الحركه ، و الأرض وقفت عن الدوران ، و الهلال بقى مريخ ، و المريخ بقى هلال ، من يوم شفتك مع سهى لا اعلم ماذا حدث لي ، احببتك من الشوفه الأولى ، من لمن جيتي مع سهى و نحنا كنا واقفين ليها جنب الباب اتذكرين ؟ منذ أن شفتك زادت دقات قلبي ، بقيت كل ما أشوفك بفرح ، زي فرح العصفور لمن يرجع لـ عشو ، و زي كتاكيت الدجاجه لمن تفقس من البيضه ، و زي الجعان لمن يلقى قدامو صحن شيه ، و زي المفلس لمن يلقى قروش واقعه ، و زي العطشان لمن يلقى بركة مويه ، احبك من كل قلبي ، إذا كنتي تحبينني مثلما أحبك ارسمي قلب في الورقه دي و أديها لإسامه عشان يرجعها لي ...
من معشوقك حسن ❤️
طبعاً قريت كلامو مرتين و قلبي شغال دق دق و ناس سهى ديل يضحكوا سااااي ! ما عرفت أقول شنو ! اتخلعت و اتحيرت في نفس الوقت !
سهى و هي بتضحك قالت لي : كاتب ليك من رأيتك و أحسست أن الوقت وقف و الهواء وقف و أمواج البحر توقفت ، بالله شوفي العربي الفصيح دا كيف 🤣
فاديه قالت ليها حسن دا وهمي ساي و كتابتو وهميه زيو ! رؤى قالت ليهم حرام عليكم هو بس حب يعبر عن مشاعرو و أحاسيسو !
أسامه قال لي أقول ليهو شنو !؟
كرفست الورقه و رميتها ، رؤى قالت لي حرااام عليك ياخ ! مشت شالت الورقه و جات قالت لي على الأقل احترمي مشاعرو شويه و ما تجدعي الورقه بالطريقه دي ! قلت ليها أعمل ليهو شنو يعني ! أنا ما بحب الحركات دي !... طبعاً قلت كدا و أنا عيوني مليانه دموع ! سهى قالت لي خلاااص خلااااص ما تتباكي فينا مع إنو الموضوع ما خطير ! أسامه قال لي اها هسي اقول ليهو شنو ! رؤى قالت ليهو : قول ليهو قرت الورقه لكن ما قالت حاجه ، قال ليها خلاص جيبي الورقه ، سهى قالت ليهو لا خليها معانا عشان كل ما نزهج نفتحها و نقعد نضحك ، المهم بعدها قعدوا يشغلوها لي و يقول علي حبيبة حسن !
