نزلت يدو من خشمي و قلت ليهو زح مني ، قال لي طيب بس أسمعيني ! قلت ليهو ما عايزا اسمع شي ، قال لي بقيتي لئيمه ! قلت ليهو زي لئامتك !... قال لي المهم يا زوله أنسي الشوفتيه و عليك الله ما تكلمي عمتي أو أي زول غيرها ، قلت ليهو بكلمها ، قال لي مستعد أعمل ليك أي شي انتي عايزاه بس ما تكلمي عمتي و بعدين عايزا تمشي تقولي ليها شنو يعني !؟ ما حـ تخجلي !؟
قلت ليهو و انت خجلت لمن كنت بتشوف في الفيديوهات ديك ! قال لي صدقيني نزلت عندي بالغلط ! قلت ليهو شايفني شافعه قدامك ! ... سكت مسافه بعدها قال لي تمام ما حـ أكررها تاني بس ما تكلمي عمتي ! عليك الله يا مها ما تكلميها ، أنا مش ود عمك ؟ بترضي انها تزعل مني و تشاكلني ؟ عمتي و براك عارفاها زعيله كيف و هسي لو عرفت يمكن توصل الكلام دا لأبوي في البلد ، ساعتها ما حـ يرحمني و حـ يحرمني من الجامعه و يرجعني البلد ! أصلاً هو ما مالي يدو بي و منتظر مني غلطه وحده بس ، بترضي لي حاجه زي دي يا بت العم ؟
بعد مسافه قلت ليهو طيب ما بكلمها ، قال لي مشكووووره يا أحلى بت عم في العالم كلو ، قلت ليهو بس ... قاطعني و قال لي ما حـ أكررها تاني ، خلاص عرفت غلطي ... على كدا كلامنا خلص و انتهى بس الشفتو ما خلص في عقلي و للأسف بديت أفكر فيهو !
المهم عدت الأيام و أنا ما جبت سيرة علاء لـ عمتي ، انشغلت في قرايتي مع معزه و في نفس الوقت استمريت مع سهى و الشله الجديده ، طبعاً هي صاحبت ليها بنات قاعدات في الكنبه الورا بس انا أقرب صديقه ليها ، صح انهم بمشوا و بجوا معانا بس مرات كتيره ما بنشاركهم الحاجات البتخصنا ، المهم يوم و نحنا قاعدين في الفصل ، جا حسن خت لي ورقه قدامي و مشى ، قلت اففف و بعدين مع العبيط دا !! سهى قعدت تضحك و قالت لي اتذكرت رسالتو ديك الفي الأساس ، شلت الورقه و كنت حـ أرميها بس سهى منعتني و قالت لي خلينا نضحك شويه ، فتحت الورقه و بقينا نقرا في الرساله ، كان كاتب لي :
لا أعلم ماذا اكتب ، تهرب مني الكلمات ، احببتك من النظره الأولى ، من يوم شفتك و انتي معشعشه في مخي ، كل يوم تشرقين في قلبي كـ الشمس ، و تمطرين كالمطر في قلبي ، عندما اسلم عليك و أصافح يدك في الصباح عندما آتي إلى المدرسه أحس كأنني في الجنه ، أشعر بسعادة كبيره ، كم أتمنى لو انك تتحدثين إلي ، كم اتمنى لو انك تحبينني كما أحبك
من معشوقك حسن ❤️
سهى قالت اشيييي اشيييي على الكلام الخطير دا ! قال ليك لمن يصافح يدك بحس نفسو في الجنه ! لا لا في تطور ملحوظ ، كنت عايزا اضحك والله لكن الولد دا شكلو جادي ، قلت ليها و يعني اعمل ليهو شنو ! حقو أمشي و أجدع ليهو الورقه دي في وشو ، قالت لي لا لا يا زوله ما حركه ظريفه ، قلت ليها بإستنكار : انتي البتقولي كدا !!؟
قالت لي الرسايل دي حـ تضرك بشنو ؟ حـ تنقص منك شنو !؟ يا بت خليهو يرسل سااااي و انتي أقري بس و لو عايزا اضحكي ، خليهو يجري وراك كدا بس ، و انتي شوفي نفسك عليهو ، يعني اتصرفي كأنك ملكه أو أميره و هو شاعر من عامة الشعب جاري وراك ، طبعاً لمن قالت كدا قعدت اضحك ، قالت لي أنا جااااده معاك ، عاد انتي الناقصك شنو تستاهلي يجروا وراك و يكتبوا فيك شعر ... طبعاً ملت لي راسي و خلتني أشوف نفسي من زاوية تانيه خالص !
و هي بتتكلم معاي كدا فجأه سمعنا صوت أولاد بضحكوا ، لمن إتلفتنا ورانا لقينا واحد شايل ورقه و رافعها لأصحابو و بضحك و جنبو حسن بحاول يشيل منو الورقه ، الولد قال يا جماعه معانا عنتره بن شداد في الفصل دا ، ركب في الكنبه و قعد يقرا في الورقه و هو بضحك و الباقين بضحكوا وراهو ، في نهاية قرايتو للرساله قال : من معشوقك حسن ... طبعاً كدا ياداب اتأكدت إنو حسن كان بكتب لي في رساله تانيه و الولد دا شافو و شال منو الورقه ، طبعاً حسن حس بالإحراج و ما قدر يقول حاجه ، قعدوا يضحكوا عليهو و يتنمروا ، سهى كفكفت أكمامها و مشت ليهم ورا ، جرت الولد و نزلتو من الكنبه و طلعت ورقه من جيبها و قالت بصوت عااااالي اسمعوا يا جماعه فلان دا كاتب شنو ، ركبت فوق الكنبه و بقت تقرا في الورقه :
شيراز احبك كـ حب الكديسه للحليب ، و كـ حب الأرنب للجزر ، و كـ حب السنجاب للبندق ، و كـ حب البطريق للثلج ، و كـ حب الدب القطبي للسمك ، و كـ حب القمله للشعر ، و كـ حب العصفورة للعش ، و كـ حب الأسد للفريسه ، و كـ حب الحمام للسلام ، آه لو تدرين كم أهواك يا شيراز ....
طبعاً كلنا قعدنا نضحك ، سهى قالت ليهو نسيت ما كتبت كـ حب القرد للموز ، و كـ حب الجمل للصحراء ... طبعاً ضحكنا ضحك ما عادي و الولد حس روحو بقى صغييير ، حسن ذاتو قعد يضحك ، سهى قالت ليهو عليك الله دي رسالة حب ولا حديقة حيوانات ، كان نفسي اشبهك بمجنون ليلى و اقول ليك مجنون شيراز ، بس انت حيوان شيراز ....في اللحظه ديك كتاااار مسكوا بطونهم من شدة الضحك ، والله اول مره أضحك للدرجه دي ، سهى دي مبااالغه ، لو قامت على التنمر و المسخره ماف زول بفوتها ، طبعاً شيراز ذاتا قعدت تضحك على الولد ، سهى اتنمرت كويس و شمتت في الولد و ضحكت الفصل عليهو ، بعدها إتلفتت على حسن و قالت ليهو انت كمان خلي الكلام الخارم بارم البتكتب فيهو دا و اكتب كلام زي الناس و لو ما بتعرف خش النت عديل و اتشف ليك كلام منو ، اتلفتت على باقي الفصل و قالت ليهم يلاااا كل واحد يرجع مكانو و يتلفت قدامو ، السيرك انتهى ...لمن جات و قعدت مكانها بنات كنبتنا قعدوا يتضاحكوا معاها و قالوا ليها انتي فظيعه والله ! قالت ليهم اي عارفه نفسي ، قلت ليها جبتي الرساله دي من وين ؟!
قالت لي فلان دا قبل كدا مرر الورقه دي عشان تصل لـ شيراز قدام و لمن جاتني الورقه الشمار حرقني و قلت إلا أفتحها و أقراها بعدها جات أستاذه داخله فـ دخلتها في الشنطه و نسيت امررها للقدامي و هو ما عرف الورقه مع منو ، قلت ليها نسيتي ولا قصداً ما مررتيها ، قالت لي ما مهم بس حسيت اني حـ احتاجها في يوم من الأيام ، خاصة إنو الكلب دا قبل كدا إتلائم معاي ، قلت ليها بالجد انتي فظيعه و قعدت أضحك ! فجأه حسن جا و قال لـ سهى أنا متكيف منك والله و شكراً ليك ، قالت ليهو اتخارج عليك الله ما عملت كدا عشان سواد عيونك ... ابتسم و مشى لأنو متعود على أسلوبها دا في الكلام و التعامل ، المهم في نهاية اليوم الدراسي الجو كان حلو و مغيم ، سهى قالت لي أرح نطلع نحوم شويه ، قلت ليها لا لا لو اتأخرت عمتي حـ تقلق ، قالت لي اففف منك ، الكلام دا مفروض اقولو أنا لأني ساكنه مع أهلي بس انتي ساكنه مع عمتك ، يعني حره أكتر مني ، قلت ليها عمتي دي زي أمي والله ، لو اتأخرت دقيقه بلقاها واقفه لي جنب باب الشارع ، قالت لي بتبالغ ! ما بحب الأهل الدراميين ! انتي بعد دا ما شافعه عشان هي تقيدك و تحاسبك على الدقيقه و تقيف ليك جنب الباب ! انتي بقيتي بت كبيره و كلها سنتين و تدخلي الجامعه ، خايفاها حتى و انتي في الجامعه تقيف ليك جنب الباب ! ئهه اتخيلي بت كبيره كدا جايه من الجامعه و عمتها واقفه ليها جنب الباب و بتسألها اتأخرتي دقيقه ليه ؟🤣🤣....قالت كدا و قعدت تضحك ... كلامها استفزاني و حسسني إني مقيده و ما صاحبة قرار ، قلت ليها مش قلتي عايزا نحوم !؟ أرح طيب ، قالت لي و عمتك ؟ قلت ليها بعرف اتصرف معاها ، المهم مشينا و بقينا لافين ساااي ، بعدها جينا بشلة أولاد مرصوصين في مسطبه جنب صالون حلاقه ، طبعاً من قعدوا يعاينوا لينا بنظرات ما ياها أنا خفت و سهى كانت عكسي تماماً ، همست ليها و قلت ليها خلينا نغير شارعنا ، قالت لي عشان شنو ؟؟؟
قلت ليها ما شايفه الأولاد ديل !؟ عايني ليهم بعاينوا لينا كيف ! قالت لي ما عندنا بيهم شغله و سحبتني معاها لحد ما جينا ماشين جنبهم و هم يشاغلوا سااااي وين يا مزز وين يا عسل ! أنا إتوترت و بقيت أعاين لـ سهى و هي ماشه تتقدل و رافعه راسها و بتتبسم ساي ، قلت ليها ياخ ديل شنو الحيوانين ديل ! قالت لي ما حيوانين ، خليهم يشاغلوا سااااي و يرفعوا لينا معنوياتنا ، البت الما بشاغلوها أولاد دي ما بت أساساً ، قلت ليها شفتي ديل لو جا حمار ماري بجنبهم و هو لابس طرحه بشاغلوهو ، قالت بشاغلوا البنات المزز ، قلت ليها والله لو جات أنثى كلب جنبهم بشاغلوها دي عادتهم ، قالت لي عايني يا أصليه ، أنا قلت بشاغلوا البنات المزز معناها بشاغلوا البنات المزز ما تناقشيني ، أي كلام تقولو سهى فهو الصح ، قلت ليها خلااااص يا أستاذه سهى ، المهم لفينا كدا بعدها مشينا محطة المواصلات قالت لي أرح معاي بيتنا ، قلت ليها لا لا الزمن أتأخر يا بت ، بجيك مره تانيه ، قالت لي خلاص تمام ، المهم كل وحده ركبت مواصلاتها و رجعت بيتها ...
طبعاً عمتي الفتره ديك كانت مشغوله بتجهيزات عرس محمد ، داخله و طالعه بتفكر تعمل شنو و تجيب شنو و كيف تخلي عرس ولدها فخم كل الناس تتكلم عنو ، و الفتره ديك أنا بقيت مركزه مع امتحاناتي ، مره معزه بتجيني و مره بمشي ليها لحد ما جات الإمتحانات ، بعد أسبوع من بداية الإمتحانات عمر و أبوهو جو راجعين من السفر عشان يقيفوا على ترتيبات زواج محمد ، خاصة إنو قال حـ يتأخر و ما حـ يجي إلا قريب للعرس و عمتي محتاجه رجال في البيت يقيفوا معاها في العرس دا ، يوم من إستعجالي طلعت و نسيت أشيل قروشي ، ركبت المواصلات و أنا ما معاي ولا قرش ، لمن نزلت حتى اتذكرت إني نسيت قروشي في البيت ، حكيت لـ عمو السواق و قلت ليهو ممكن اجيبهم ليك بكرا مش انت دائماً بتقيف في المحطه دي و.... قاطعني و قال لي أمشي أمشي ساي يا بتي ... طوالي جرييت على المدرسه لأني اتأخرت على الإمتحان ، لمن دخلت لقيتهم وزعوا الورق و الناس بدت تشتغل ، ختيت شنطتي بس و قعدت في اقرب مكان ، و أول ما استلمت ورقتي بديت أحل ... لمن طلعت من الإمتحان لقيت سهى واقفه لي برا ، قلت ليها الإمتحان جاك ساهل ولا شنو طلعتي بدري كدا ؟؟ قالت لي ساهل شنو ! أنا أصلاً ما عندي أخلاق للإمتحانات دي ولا بستحمل أقعد ساعتين عشان أفكر في حل لـ اسئله عبيطه زي دي ! قلت ليها غيتو انتي !! طيب انتي وقت بتكرهي المدرسه و ما بتحبي القرايه ليه لسه مواصله !؟ قالت لي ياخ ما دا كلو بسبب الراجل العارض داك ! قلت ليهو قصدك منو ؟؟
قالت لي أبوي ! قلت ليها شنووو !!؟ و بتقولي عليهو عارض ! قالت لي ايوه عاااارض و انتي عليك الله ما تقعدي تتغمصي لي دور البت المثاليه البتنصدم من أقل الأقوال و الأفعال ! قلت ليها ما كدا بس اول مره اشوف زول بقول كدا عن أبوهو ! قالت لي الكلمه دي قليله عليهو ، ياخ الراجل الشوم دا خلانا من زماااان و مشى لف و شاف حياتو و لمن قنع جا راجع و بحاول يعمل فيها الأب المثالي ، دخلني مدرسه خاصه و هو السبب في إعاداتي الكتيره ، كان ممكن أمشي لـ قدام حتى و أنا مستواي كعب بس هو أصر إني لو ما نجحت في فصل ما أمشي البعدو ، قلت ليها معاهو حق ! قلبت لي عيونها و قالت لي أنسينا منو أنا جعانه أرح ناكل ... طبعاً اتذكرت إنو ما معاي قروش ، فـ طوالي وريتها ، قالت لي أنا عندي ، أول ما إتحركنا كدا على البوفيه من بعيد شفت عمر جاي داخل المدرسه و بتلفت ساي ، وقفت و قلت لـ سهى داك ولد عمتي ، ثواني هسي برجع ليك و طوالي إتحركت من جنبها و مشيت لـ عمر لمن وصلتو قلت ليهو عمر ! إتلفت سلم علي و قال لي نسيتي قروشك ! قلت ليهو آيي عشان اتأخرت على الإمتحان ، قال لي الدفع ليك قروش المواصلات منو ؟؟
قلت ليهو ولا زول حكيت لـ عمو بتاع العربيه و قلت ليهو إني نسيت قروشي في البيت ، قال لي اها الإمتحان كان كيف ؟؟ قلت ليهو حلو شديييد ، قال لي في جلسه تانيه ؟؟ قلت ليهو لا ، اليوم عندنا امتحان واحد بس ، قال لي تمام بما إنو ما عندك شي تاني خلينا نمشي ، قلت ليهو حـ أكلم صحبتي ، ثواني بس ، قال لي تمام حـ أقيف ليك برا ، لمن مشيت لـ سهى لقيتها اشترت الفطور ، قلت ليها ولد عمتي جاني و حـ أمشي معاهو ، انتي طالعه ؟؟ قالت لي طالعه بس جعانه ، خلينا نفطر اول شي ، قلت ليها لكن هو واقف برا ! قالت لي أرح طيب بفطر في المواصلات ، المهم طلعنا ليهو و عرفتو على سهى ، بعدها التلاته مشينا سوا لحد المواصلات و في الأثناء دي عمر كان بسألنا عن الإمتحانات ، لمن وصلنا المحطه ، سهى دخلت لي الفطور في شنطتي و قالت لينا يلا يا جماعه ، عمر قال ليها مواصلاتك ما نفس مواصلاتنا ؟ قالت ليهو لا ، ودعتني و مشت ، لمن ركبت عمر دفع ليها حق المواصلات و ما وقف ليها عشان تمنعو ، طوالي جاني و قال لي يلا اركبي ، المهم لمن ركبنا و العربيه إتحركت ، قال لي معقوله في الفصل كلو ماف بت قدرك عشان كدا صاحبتي البت الكبيره دي !؟ قلت ليهو دي صحبتي من الأساس ، قال لي حسيتها بت غريبه ، قلت ليهو بالعكس هي بت ظريفه و دمها خفيف ، قال لي بس ما حسيتها كدا ! المهم قعد يتكلم معاي كدا لحد ما وصلنا البيت ، بعد الضهر بشويه سهى اتصلت علي ، لمن رديت عليها قالت لي واااي انا من ولد عمتك العسل ، اسمو منو عليك الله ، قلت ليها عمر ، قالت لي قبيل دفع لي قروش المواصلات ! قلت ليها ايوه شفتو ، قالت لي عندو ذوق و محترم ، قولي لي معرس ولا خاطب ؟؟
ضحكت و قلت ليها يا بت انتي جنيتي ولا شنو ؟؟ قالت لي انتي بس قولي لي ! قلت ليها لا معرس لا خاطب ، قالت لي ريحتيني ، خلاص من هسي أنا حاجزاهو ، قلت ليها لكن هو عايز يعرس وحده قطريه ، قالت لي نعم نعم !؟ قطريه ؟؟ قلت ليها ايوه ، أصلاً هو شغال في قطر و اتعرف عليها هناك ، قالت لي احييي أنا كمان طلع مغترب قطر ! 😍 قطررر و القروش مطررر ! قالت لي أديني رقمو ، قلت ليها أكيد جنيتي ، قالت لي ما تكوني بتحبيهو ، قلت ليها ياااا بت دا كلام شنو ! واعيه للبتقولي فيهو دا ! قالت لي اها ليه ما عايزا تديني رقمو ! قلت ليها أديك ليهو ليه و أساساً عايزا ترسلي ليهو بصفتك منو !؟ و ما تنسي اني قلت ليك إنو بـ زولتو يعني شيليهو من بالك ، قالت لي هييي بت السودان أولى بيهو من بت قطر ، المهم اسمعيني ما عندو أخوان ؟؟
قلت ليها عندو 3 و قعدت أحكي ليها عنهم ، قالت لي خلااااص معناها حـ أجي عرس الإسمو محمد دا و أشوف أخوان عمر ديل بالمره ، ما معروف يمكن اعرس واحد منهم ، قلت ليها ياداب اتأكدت انك مجنونه ، قالت لي هسي بيني و بينك كدا ما بتحبي ولا واحد من الأربعة ديل ؟ بالإضافه لـ ولد عمك داك ؟؟ معقوله خمسه و ما فيهم واحد عاجبك أو حابيك ؟؟
قلت ليها سهاااا ! قالت لي اصلك وحده هبله و عويره ساي ، اقفلي هسي لمن نتلاقى بعد بكرا ، المهم اليوم البعدو كان قاب أو أوف ، جاتني معزه و قعدنا نقرا كدا لمن زهجنا ، طبعاً هي ذاتا كانت ممتحنه كيمياء زيي ، جدولنا ما زي جدولهم بس عندنا مواد مشتركه ، المهم عمر جا قعد معانا و قال لينا متين بديتو قرايه عشان تزهجوا و تملوا للدرجه دي !؟ معزه قالت ليهو بكرا ممتحنين كيمياء و الماده دي غيااااظه خلاص ، قدر ما نحاول نخلصها ما بتخلص ! قلت ليها أنا بالجد زهجت لحد هنا و خلاص ، عملت العلي و قدر القريتو حـ ادخل بيهو الإمتحان ، عمر قال لي ما تخليك زهيجه و ملوله كدا ! ... شال المذكره و قال لينا حـ أشوف ليكم الإمتحانات الهنا و اسألكم و انتوا جاوبوا و كدا حـ تكونوا مريتوا على المقرر كلو في نص ساعه أو اكتر ، بعدها إذا حابين ممكن تقروا باقي الأبواب بالتفصيل ، الكيمياء بتعتمد على الفهم ، لو فهمتو معادله واحده بس حـ تقدروا تحلوا المعادلات الزيها ، المهم خلونا نبدا ، بقى يسألنا سؤال و جواب و حل معادلات ، مره علي و مره على معزه ، كل الزهج و الملل الكنا حاسين بيهو إتلاشى ، بقى في حماس و تنافس بيناتنا ، استمتعنا جداً و نحنا بنتسابق عشان نجاوب و نحل و دا كلو بسبب وجود عمر ، فجأه كدا فاروق جا داخل ، سلم علينا و قال لـ عمر في الآخر قررت تبقى أستاذ ولا شنو ؟؟ قال ليهو شبه كدا ، فاروق قال لينا بكرا ممتحنين شنو ؟ قلنا ليهو كيمياء ، قال لينا الله يعينكم ، والله انا بسببها مشيت أدبي ، دي وجع راس و وجع قلب ساي ، عمر قال ليهو أنا ارفع في المعنويات و انت تجي تنزلها ! المهم ونسنا شويه و مشى ، بعدو بمسافه معزه ذاتا مشت ، عمر قال لي إرتاحي شويه بعدها تعالي اقري تاني ، قلت ليهو أنا لو قمت من هنا و مشيت ختيت راسي على المخده صدقني ما حـ أصحى تاني إلا تاني يوم ، قال لي خلاص نومي ساي و ريحي نفسك و أنا شاهد على قرايتك و إجتهادك و متأكد انك بكرا حـ تقدري تحلي الإمتحان بكل سهوله و يسر ، قلت ليهو ان شاء الله...
" ولك ف قلــ♥️ـبي..
نبضة عشق
لا يحتويها أحد غيرك
و لك عهدا مني
أن لا ترى عيني أحد غيرك
ولك انت روحي
لن...ولا... ولا... تشتاق إلا لك
و لك انت وحدك حنين عشقي و نبضي
لن ينبض إلا لك " ❤
يتبع......
