مشيت بتفكيري بعيد و بقيت اسأل نفسي عمر لييه بتصرف كدا !؟ ليييه بلمح لي ! أو يمكن هو بتعامل عادي و شايفني زي أختو و أنا البوهم نفسي مره تانيه !.. لا لا ما عايزا أعشم نفسي تاني ... طوالي نفضت الأفكار دي من بالي ، أمي جات و قالت لي عمر قال شنو ؟؟ قلت ليها قال بتصل عليك بعدين ، قالت اللهم أجعلو خير !
المهم و أنا برسم كدا و قاعده براي مشيت طلعت التلفون الجديد و شغلتو ، قلت حأشوفو و أصلاً عمر ما حـ يعرف إني استخدمتو ، المهم ركبت الشرايح المعاهو و فتحتو و بقيت اكشف و اشوف فيهو ، بالجد عجبني شديييد ! والله من لمن بعت تلفوني و أنا نفسي في تلفون جديد ! بس عمر كيف عرف إني عايزا تلفون ! ... أكيد عرف من أمي أننا بعنا تلفوني من زمان ، طبعاً عمر كان منزل لي رصيد كتيير في الشريحتين ! نشطت و دخلت اليوتيوب و بقيت أحضر في فيديوهات ليها علاقه بتصميم الأزياء ، شويه كدا أمي جات داخله و قالت لي أبوك جا هسي أطلعي سلمي عليهو ، قلت ليها ابوووي !؟ بالجد ؟... طوالي طلعت برا الغرفه لقيتو في الهول ، سلمت عليهو و قعدنا معاهو أنا و أمي ، رهف و رفيف جوا سلموا و طلعوا يلعبوا في الحوش ، أبوي قعد معانا شويه و مشى و قبل ما يمشي أداني قروش ، أصلاً هو جا يتطمن علينا و يتفقد أحوالنا ، مع إنو ما قالها بس كنت شايفه الندم في عيونو ، شايفه الحنيه و الإعتذار في عيونو ، أيوه أنا في البدايه زعلت شديد منو و حسيتو ظالم بس في الآخر اتفهمتو و ختيت ليهو العذر و أصلاً أنا السبب و أنا البديت الكذبه دي ، الأب دا أب في الأول و الآخر ، و مهما عمل حـ تفضل مكانتو ساميه ، حـ يفضل الحصن المـنيع و عمود البيت و زي ما بـقولوا سند البنيات أبوهن ❤️
المهم بعد ما مشى أمي قالت لي الحمدلله قبيل عمر إتصل و فهمني سوء الفهم الحصل ، قلت ليها بالنسبه لشنو ؟؟! قالت لي الولد شادي داك مش كان سمعناه بتكلم بالتلفون و قلنا إنو بتكلم مع أصحاب البيت و فهمنا إنو حـ يجوا راجعين و ساااي تعبنا نفسنا و طلعنا نفتش بيت !... عمر قال لي إنو شادي كان بتكلم عن حاجه تانيه إنو أصحاب البيت ما حـ يجوا قريب و قال لي ليه ما كلمتوني ، يعني إذا ناس البيت ديل جد جد كانوا جاين انتوا ما حـ تتصلوا و تكلموني و حـ تطلعوا تفتشوا بيت من وراي !... غيتو لامني شديد ، قلت ليها دقيقه هو عرف من وين ؟!
قالت لي واحد من ناس الحي بعرف عمر و لمن عرف اننا بنفتش على بيت اتصل على عمر و قال ليهو أنا عندي ليكم بيت
.. طبعاً عمر استغرب و سألو بيت شنو و الراجل قال ليهو شايف قرايبك ديل طلعوا و بفتشوا ليهم على بيت ، المهم عمر إتصل على شادي و سألو إذا أصحاب البيت جاين و كدا ... فـ شادي قال ليهو ماف كلام زي دا و و و بعدها عمر اتصل علي و حكيت ليهو الحصل كلو ...
المهم بعد أيام كدا أمجد و أحمد جونا في البيت مع أبوهم ، قعد شويه و مشى و خلاهم معانا ، اليوم كان يوم خميس ، قعدوا معانا الخميس و الجمعه و أبوهم جا ساقهم يوم السبت بالعصر كدا ، طبعاً عمو النذير كان بحاول يقنع أمي ترجع معاهو بيتو و تشيل فكرة الطلاق دي من راسها بس هي رفضت و قالت ليهو تاني ما عايزا أي وجع راس ، خلينا بعاد كدا أحسن و الأولاد يكبروا بيناتنا يوم هنا و يوم هناك ، في اليوم البعدو جونا مازن و معزه !
مازن قال لينا معليش عملنا ليكم وجع وش بس معزه دي أصرت إنو أجيبها لـ مها ، أمي قالت ليهو الله يسامحك ، وجع وش شنو هو نحنا لاقنكم ! و متين انتوا جيتونا عشان تعملوا لينا وجع وش !
معزه قالت لي بقيتي كعبه ، من جيتي ما حصل فكرتي مره إنو تجيني في البيت ، حتى لمن جيتي لـ ناس عمتك ما غشيتي بيتنا !
أمي قالت ليها اتلومت معاك لكن حـ تجيك ان شاء الله ، المهم قعدنا نحنا الأربعه و شربنا الجبنه سوا ، مازن قال لي والله انا غير إصرار معزه عشان تجيك جيتك و أنا عشان فيك ... طبعاً لمن قال كدا عاينت ليهو بإستغراب و أمي نفس الشي ! قال لي طبعاً أنا و عمر عندما محل بتاع ملابس ليهو سنه و شويه و الشغل الحمدلله ماشي تمام بس فكرنا إنو بدل ما نشتري فساتين جاهزه نصمم فساتين على حسب رغبة الزبون ، الحاجه دي حـ تساعدنا نكبر شغلنا و نعمل ماركه خاصه بينا و يكون عندنا تصاميم بإسم المحل تبعنا و عمر شكرك لي و قال إنو شاف عندك تصاميم خرافيه فـ عشان كدا فكرت فيك و خطر على بالي إنو ممكن تجي و تشتغلي معانا و تصممي لينا فساتين أو غيرهم ، أمي فرحت و قالت ليهو آيي والله مها بترسم فساتين خطيييره شديد ، معزه قالت لي عليك الله جيبيهم لينا خلينا نشوفهم ، ناديت رهف و قلت ليها أمشي جيبي لي دفتري و فعلاً مشت و جابتو ، أديت الدفتر لـ معزه فـ بقت تشوف فيهو هي و مازن أخوها ، و كل ما يشوفوا تصميم يقولوا لي ما شاء الله والله إبداااع إبداااع !
في الآخر مازن قال لي عليك الله ما تحرجيني و عليك الله ما ترجعيني خايب ، أنا اقتنعت بتصاميمك دي و ما شاء الله عندك الموهبه ، يعني إذا انتِ من دون ما تدخلي كورسات أو ورشات تصميم الأزياء بتبدعي كدا إذا لقيتي فرصه حـ تعملي شنو ! حـ تكوني واحده من أبرز مصممي الأزياء في البلد دي بإذن الله ، ضحكت و قلت ليهو ما تمشي لـ بعيد ، دي كلها شخابيط و رسومات نهايتها حتكون في سلة الوساخه ! أمي قالت لي انتِ مالك بت جاحده للنعمه كدا ! لو مشيتي و اشتغلتي معاهم مالك ! منها تنمي موهبتك و منها تملي وقت فراغك بدل قعادك في البيت !... معزه قالت لي كلامك أمك حقيقه ، عليك الله يا مها ما تدفني الموهبه دي ، وقت ما رضيتي تواصلي قرايه اتبعي موهبتك و تعالي اشتغلي مع ناس مازن ، مازن قال لي يا جاااحده ، الناس بشهاداتهم لافين و ما لاقين شغل و انتِ لمن الشغل يجيك لحد عندك و يدق بابك ترفعي قزاز !😂
أمي قالت ليهو البت العويره دي ما بعرف فهمها بوين !... معزه قالت لي أنا ذاااتي لو لقيت طريقه بمشي و بشتغل معاهم ، شكلي في الآخر كدا حـ أجيهم راااجعه ، المهم قعدوا يتكلموا معاي كدا و يحنسوني لحد ما إقتنعت ليهم في الآخر ، مازن قال لي يلاااا حـ تبدي من بكرا طوالي ، الساعه 8 ألقاك في المحل ، قلت ليهو اها بدينا !؟ ضحك و قال لي لا خلاص تعالي في الوقت البناسبك ، عارفه موقع المحل صاح ؟؟!
قلت ليهو ايوه عارفه موقعو ، قال لي تمام بكرا ألقاك هناك و إياك تنسحبي ، قلت ليهو لو كنت حـ انسحب ما كان وافقت ، أمي قالت لي والله أحسن ليك يا بتي و ربنا يوفقكم و يفتح ليكم أبواب الرزق ... معزه قالت لأمي أديني رقمك عشان تاني اتصل لـ مها فيهو ، أمي قالت ليها مها بتلفونها عمر اشتراهو ليها ، قالت لي كويس معناها أديني رقمك و فعلاً أدتني رقمها هي و رقم مازن أخوها....
المهم تلف في اليوم البعدو إترددت في المشي و للحظات كنت حـ أتراجع بس أمي شجعتني و أصرت إنو أمشي و قالت لي لو بتخافي بمشي معاك أنا أوديك و أجي راجعه عشان أخواتك بجوا راجعين من الروضه و من المدارس ، قلت ليها لا لا ما بخاف بمشي براي ، قالت لي شلتي معاك تلفونك مش !؟ قلت ليها ياتو تلفون ؟! قالت لي الجابو ليك عمر ! قلت ليها لا ما شلتو ، قالت لي عايزا تجلطيني مش ! اها ماشه من دون تلفون عايزاني اتصل و اتطمن عليك كيف !؟... طوالي مشت و جابت لي التلفون و شيلتني ليهو بالغصب ، قالت لي سجلت ليك فيهو رقمي و رقم عمر ، قدمتني لحد المحطه ، ركبتني و رجعت .... طول الطريق كنت بفكر حـ أمشي أعمل شنو و كيف أكون مع عمر في مكان واحد و أمي كل دقيقه تتصل و تقول لي وصلتي وين ، كنت بفكر كدا لحد ما وصلنا المحطه ، نزلت و ركبت مواصلات تانيه ، طبعاً أنا عارفه موقع المحل بس لمن نزلت حسيت نفسي دايشه و ما عرفت أمشي على وين ، طلعت التلفون و اتذكرت إنو أمي سجلت لي رقم عمر ، كنت حـ اتصل عليهو بس في الدقايق الآخيره غيرت رأيي و اتصلت على مازن ، رد و قال آلو منو معاي ؟! قلت ليهو مازن دي أنا... مها ، قال لي يا زوله وينك الآن ، بس ما تقولي لي غيرتي رأيك ؟! قلت ليهو لا لا ما غيرتو أنا جيت بس راسي داش و هسي ما عارفه أمشي على وين ، قال لي طيب وين انتِ حالياً ... لمن وصفت ليهو قال لي ما بعيده ، دقائق و أكون عندك ، اقيفي لي في حته بارزه و أعملي حسابك لنفسك و تلفونك ، قلت ليهو طيب ، فعلاً شفت لي مكان مناسب كدا و وقف فيهو و دخلت التلفون جوه الشنطه ، فجأه تلفوني رن ، قلت أكيد دا مازن بس لمن طلعت التلفون لقيتها أمي ، رديت عليها و طمنتها علي و قلت ليها أنا كويسه و وصلت بس منتظره مازن يجيني عشان ما عرفت مكان المحل كدا بالتفصيل ، قالت لي أنا اتصلت و كلمت عمر يتلقاك قايلاهو في محلو بس قال لي في مكان تاني و قال حـ يتصل و يشوفك وصلتي وين ... طبعاً كان في الوقت داك عمر كان خاشي لي ، قلت ليها ياهو اتصل هسي ، قالت لي خلاص لمن تصلي أرجعي لي و كلميني ، قلت ليها طيب ، أول ما قفلت منها عمر اتصل تاني ، كنت حـ أرد بس لمحت مازن جا ماري قريب مني و ما شافني و مشى قدامي ، استعجلت و بقيت ماشه وراهو و مع الزحمه و كواريك الناس ناديتو بس ما سمعني و التلفون كان برن و الرد صعب علي مع الزحمه دي و كنت خايفه على التلفون ، دخلتو جوا الشنطه و عجلت خطواتي و لمن بقيت قريبه من مازن ناديتو ، لمن إتلفت علي وقفت و بقيت اتنفس بصعوبه ، قلت ليهو من قبيل بنادي عليك بس ما سمعتني ، جريت وراك كدا لمن تعبت ، قال لي معلييش بس ما سمعتك مع الزحمه دي ! قلت ليهو زحمه مبالغه ، قال لي خلينا نطلع منها و فعلاً طلعنا منها ، قلت ليهو المكان قريب من هنا ولا بعيد ؟!
قال لي نص نص ، قلت ليهو بتمشي بالرجلين ولا لا ، قال لي بتمشي لكن بعد تعبك دا أحسن أركبك ركشه و فعلاً ركبنا ركشه و مشينا المحل ، طوالي إتصلت على أمي و كلمتها ، كنت حـ اتصل على عمر و اكلمو بس سمعت مازن بتكلم معاهو و كان بقول ليهو ايوه وصلت ... لا لا كويسه بس راسها كان دايش نزلت في المحطه و ما عرفت تمشي على وين لكن اتصلت و كلمتني ....
قلت خلاص بما إنو مازن كلمو ماف داعي اتصل و هو تاني ما اتصل علي ، مازن لف بي في المكان ، كانوا مشغلين معاهم 3 بنات ببايعوا الزباين وداني ركن كدا نهاية المحل نفسو الكان قعدنا فيهو أنا و بيان لمن جينا لـ عمر ، كانوا عاملين تربيزه شكلها ظريف كدا فيها أوراق كتيره و ألوان و أقلام بمختلف الأحجام و الأنواع و مساحات مختوته على جنب معاها كرسي و جنبها جلسه بسيطه كدا ، مازن قال لي الكرسي دا ليك ، أقعدي هنا و فجري طاقتك الإبداعيه ، كل حاجه حـ تحتاجيها موجوده قدامك ، طبعاً لحد اللحظه ديك ما كنت مصدقه ، قعدت على الكرسي و حسيت نفسي زي البحلم ، مازن ضيفني و بعدها قال لي أخدي راحتك أنا حأشوف شغلي و لو إحتجتي حاجه ناديني ، قلت ليهو طيب ، قعدت و بقيت اشخبط سااااي و ما رسمت ولا شي لأنو ما كان لي مزاج ، أنا برسم لمن أكون رايقه ، شويه كدا معزه اتصلت علي ، لمن رديت قالت لي اها مشيتي ولا موسرتي مازن !؟ قلت ليها لا لا مشيت و هسي في المحل ، قالت لي ممتاز شديد و أنا أول ما اخلص محاضراتي حـ أجي ماره عليك ، قلت ليها طيب ، بعدها اتكلمنا شويه و قفلنا من بعض ، بقيت قاعده في الكرسي و سانده فيهو ضهري و بلف بيهو ، طبعاً هو كرسي متحرك ما ثابت ، عملتو لي لعبه ، ألف بيهو زي الشفع ، حسيت نفسي في شركه و قااعده في مكتبي ، ضحكت على نفسي و قلت أنا شهاده ثانويه ما عندي دا مكتب وين دا الحـ أقعد فيهو !... المهم بعد مساااافه كدا معزه جات و مازن جاب لينا الفطور و نادى البنات الشغالين مهام يجوا يفطروا و هو طلع يفطر برا ، بعد خلصنا البنات قعدوا اتعرفوا علينا و اتونسوا شويه و مشوا على شغلهم ، مازن لمن جا راجع لقاني بتونس مع معزه ، شال الأوراق القدامي و ما لقى فيها غير الشخابيط ، قال لي دي معزه العارض دي ما خلتك تشتغلي صاح !... معزه قالت ليهو هييي ما تتهمني ساي أنا من جيت ساعه ما تميتها و هي من قبييل خاته ورقها قدامها !😂 قلت ليهو فعلاً معزه ما ليها علاقه ، والله من قبيل ضغطت نفسي و حاولت ارسم شي بس ما قدرت ، قال لي سحرناك ولا شنو ! معزه قالت لي ما تضغطي نفسك ، استرخي و حسسي نفسك انك قاعده براك ، مازن قال لي ماف مشكله يا زوله ، دا اليوم الأول و سامحناك ، معزه قالت ليهو والله شغلكم الفيهو مسااامحه دي عجبني ، شغلوني معاكم ، قال لي والله إلا تشتغلي لينا مراسيل ، كفى الله الشر اسم موهبه سااااي كدا ما عندك عشان نشجع عليها !... ضحكت و قلت ليهو حرام عليك ! معزه قالت ليهو والله عندي مواهب كتيييره بس ما فاضيه ليها ، المهم انا حأمشي بعد دا ، مازن قال ليها بالمناسبه البت القالت ليك انها بتفتش على زول يصمم ليها فستان زي ما هي عايزا مشت وين ؟! قالت ليهو خلتو ، قال ليها أصلاً أي زول بجي من طرفك بكون ما جادي ، قالت ليهو كتر خيري أنا القاعده أعلن ليكم مجاااان .... المهم أخدت معانا خشم خشمين كدا بعدها ودعتني و مشت ، مازن ذاتو مشى يشوف شغلو و أنا بقيت شغاله بالتلفون بحضر فيديوهات لتصاميم و بحاول أستلهم منها ، مازن جا و مد لي تلفونو ، قال لي مشغول مع زباين واقفين لي ، إذا ما فيها تعب ممكن تردي على استفسارات المتابعين و تعليقاتهم في حساب المحل !؟ قلت ليهو طيب لكن أرد أقول ليهم شنو و أنا ما عارفه شي عن شغلكم دا ! طلع لي ورقه من جيبو و قال لي كان مفروض أديم ليها من قبيل ، المهم دي كل المعلومات عن المحل تبعنا ، موقعو و أوقات العمل و طريقة البيع و الخدمات البنقدمها و الأسعار ، قلت ليهو طيب تمااام ، أداني تلفونو و مشى فـ بقيت أرد على إستفسارات الناس ، طبعاً كنت كل ما اسمع صوت حركة زول أقول دا عمر جا بس بطلع دا ما هو ، ما عرفتو مشى وين ، المهم مر أسبوع و أنا شبه إتعودت على الشغل ، كنت بس بمشي أقعد و بحاول اعصر مخي و أطلع تصميم حلو و بعدها بسلم التصاميم لـ مازن بشوفهم و إذا حس إنو في حاجه لازم تتعدل بقول لي عليها و بعدها بشيل التصميم و القماش و بوديهم للترزي الجنب المحل ، قال لي لو كنتِ بتعرفي تقصي و تخيطي البتصمميهو كنا حـ نعتمد عليك في الموضوع دا ، قلت ليهو دي ما حاجه سهله و عايزا ليها ورشات و كورسااات مكثفه ، قال لي فعلاً ، قلت ليهو انتوا ليه ما بتشغلوا معاكم زول محترف هنا يصمم و يقص و يخيط ليكم ! يعني هسي بدل ما تجيبوني أنا كان جبتوا ليكم زول ينفعكم ما كان أحسن !😅
ضحكت و قال لي ما تكوني إتحسستي بسبب كلامي ! والله ما قاصد شي ، ما تفهميني غلط ، قلت ليهو لا لا ما اتحسست أصلاً أنا مبتدئه و عارفه نفسي و في ناس أفضل و أحسن مني بمية مره لأنهم دارسين المجال دا ، قال لي والله نحنا عايزنك تستفيدي و تفيدنا معاك و صدقيني ما ندمانين ، أقعدي اتعلمي ساااي و ما تتحسسي من شي ... كنت عايزا اسألو و اقول ليهو عمر وين و ليه ما قاعد يجي ! بس ما قدرت ، طبعاً طول الأسبوع دا ما شفتو ، من جيت اشتغلت معاهم و هو ما جا كان بتصل على أمي و سامعاها بتتكلم معاهو بس لا بتصل علي لا أنا بتصل عليهو ، المهم في نفس اليوم دا كنت بصمم في فستان كدا شكلو غريب ، يعني فجأه كدا لقيت نفسي برسم فيهو ، لمن خلصت حسيتو مختلف عن كل الحاجات الكنت برسمها ، شلت الورقه و مشيت لـ مازن ، كان ببايع زبونه انتظرتو لمن خلص بعدها قلت ليهو مازن سوف ، رأيك شنو في دا ؟! شكلو غريب بس عجبني !
مسك مني الورقه و بقى يعاين فيها ، قال لي ما مجامله مني بس دا أفضل و أجمل حاجه انتِ صممتيها ، بديتي تتحسني و كل يوم بتتفوقي على نفسك ، قلت ليها ايوه ايوه كسر لي تلج ، قال لي ليه بحسك دائماً بتقللي من نفسك !؟ ليه بتحسي إنو الناس بتكسر ليك تلج لمن تمدحك ! ما واثقه في نفسك يعني !؟
قلت ليهو عشان واااثقه في نفسي عشان كدا بقول ليك ما تكسر لي تلج ، ضحك و قال لي انتِ انسانه ما طبيعيه ، المهم شوفي عندي شوية ملاحظات مع إني ما واو في المجال دا بس حـ اقول ، قلت ليهو قول قول عادي أنا ذاتي ما واو ، قال مثلاً هنا ممكن .... و بقى يتكلم لي و أنا مركزه معاهو و الإتنين مركزين في الحاجات البنقولها و ما جايبين خبر لزول ، و لمن يجوا زباين بمشوا ليهم البنات الشغالات معانا ، المهم و نحنا مندمجين فجأه كدا رفعت راسي و لقيت عمر قاعد في الجلسه خالف رجل على رجل و بعاين لينا !... مازن لمن رفعو راسو و شافو قال ليهو بسم الله جيت متين انت و بعدين إختفيت يا مان و قام سلم على عمر بس هو كان بارد شديد معاهو ! طبعاً أنا نهاي ما عاين لي تاني ولا سلم علي ، كلامو كلو كان مع مازن ، طبعاً مازن كان يشيل و يشكرني ليهو و هو ما علق و ما قال شي ، حسيت في شي اتغير ، رغم إنو ماف شي واضح بيني و بين عمر بس في آخر فتره حسيت إنو حتى لو ما كان في شي حيكون في شي بس هسي و بعد تصرفو الغريب دا حسيت إنو كل واحد طريقو بختلف عن التاني ، حسيت إنو أنا جد جد كنت واهمه نفسي ، بالجد اليوم داك ما عرفت عمر مالو بس اتأكدت إنو نحنا الإتنين سكتنا ما واحده و دا بسبب تصرفاتو معاي طول اليوم داك و الأيام البعدها ، بقى يحسسني كأني ما موجوده ، كأنو ما شايفني و لو سألت أو اتكلم هو ما بتكلم و معاي أو يرد على اسئلتي مازن هو الكان بجاوب علي وهو ذاتو حس انو عمر متغير فـ سألو بس عمر قال ليهو ماف شي ، المهم يوم اتأخرت في البيت و لمن وصلت الساعه كانت 9 ، أول ما جيت داخله اتفاجأت بشوفة ماريا مع عمر ، البت دي لمن قربت أنساها تاني ظهرت لي ، ما عارفه مالا بس عيونها كانت وارمه و مليانه دموع و كانوا قاعدين في الزاويه ، طبعاً عملت نفسي ما شايفاهم ، دخلت طوالي و عشان المكتب البقعد فيهو هم قاعدين في الجلسه الجنبو ما مشيت قعدت فيهو ، بقيت لافه و بعاين في الملابس و أنا بالي في حته تانيه ، طبعاً هم ما كانوا شايفني ، شويه كدا مازن قال يا مها ... أول ما قال كدا أنا و عمر و ماريا إتلفتنا في نفس اللحظه ، لمن مشيت ليهو قال لي نزلت فيديوهات مهمه شديد ممكن تستفيدي منها هاك شوفيهم و حوليهم لـ تلفونك ، قلت ليهو طيب و انتظر عشان أديك تلفونك ، حولت منو الفيديوهات و أديتو تلفونو ، طبعاً ما عاينت لـ عمر و ماريا عشان ما يقولوا شفتهم و ما سلمت عليهم ، أول ما إتحركت كدا جانا صوت ماريا و هي بتناديني ، أخدت نفس و إتلفت عليها و عملت نفسي متفاجأه بشوفتها ! قالت لي ماف داعي للتمثيل ، عارفاك شايفاني من قبيل ، قامت من مكانها و جات حضنتني و سلمت علي و قالت لي معليش ما لقيت فرصه عشان أجيك لمن جيتي راجعه بعد الغيبه دي كلها ، طبعاً ما كنت عارفه اقول ليها شنو !
هزيت ليها راسي بس و هي طوالي رجعت و قعدت مع عمر ، قبل ما اتحرك جوا بنات داخلين و ماريا لمن شافتهم نادتهم و جات سلمت عليهم ، قالت ليهم ليه ما قلتوا لي انكم جاين هنا !!... طبعاً بتتكلم معاهم و هي ماشه بيهم على عمر ، لمن وصلتو قالت ليهو حابه اعرفك على صحباتي و ذكرت ليهو أساميهم و قالت ليهم يا بنات دا عمر ولد عمي و.... وحده استعجلت و قالت ليها و خطيبك !! وااااي حلوين شديد مع بعض والله ! ليه يا غتيته يا خسيسه ما قلتي لينا ! وحده تانيه قالت ليها بالجد زعلت منك يا ماريا ، معقوله تتخطبي من ورانا ! ... طبعاً عمر كان بعاين ليهم عشره عشره ، جنو و جن الحركات دي ، أول ما كان حـ يتكلم ماريا ضحكت و قالت ليهم كل حاجه حصلت بسرعه المهم انتوا تعالوا عايزا أوريكم فستان عجبني شديد و طوالي ساقتهم بسرعه و خلت عمر محتار فيها بعدها رجعت ليهو في نفس اللحظه و قعدت تتكلم معاه ، ما عارفه كانوا بقولوا في شنو بس استغربت في حتة إنو عمر سكت و ما قال شي !! ليه ما قال إنها ما خطيبتو !؟ عجبو الموضوع يعني ولا عايز يخطبها جد جد ؟!
"هُناك دائماً ذلك الشَخص الرمادي بحياتك، لا يكتمل بياضه ولا سواده، عالق بمنتصف كل شيء، شَخص تدرك أنه لن يكُون لك، ومع ذلك تَعجز عن إقتلاعِه منك، أنتَ دوماً في إشتِياق له، تحبه وتقبله ..كما هو🖤🍁
يتبع.....
