يمكن لو كان بس ختيت الحصل معاي في الأساس بسبب صداقتي مع ناس سهى في عين الإعتبار و لو بس اقتنعت إنو الصاحب ساحب و إنو صديق السوء زي الخنزير حـ يخليك تتمردغ معاهو في الطين و إنو مع الزمن حـ تبقى نسخه منو ، لو بس فهمت إنو الحصل في الأساس مفروض يكون لي قرصة أذن ، ما كان كررت نفس الغلط و وقعت في الجحر مرتين !
_ ياخ أنا عديل ما بقدر إلا أشوف فيديو أو اتنين في اليوم ، بحس إنو في حاجه ناقصاني لو ما شفت الفيديوهات دي ، و أنا ما بقول ليك كدا عشان تعذريني لا أنا بقول ليك كدا عشان تفهمي انك مهما اتكلمتي معاي ما حـ تخليني أبطل العاده دي ، أنا كنت و حأكون كدا و إذا شخصيتي دي ما عاجباك يا مها بتقدري تمشي و تشوفي صحبات غيري ، بالنسبه لي انتي من أفضل الناس الإتعرفت عليهم و انتي صديقه حقيقيه و وفيه لكن لو انتي شايفه إنو أنا بت ما كويسه و ما بنفع أكون صحبتك طوالي أمشي و شوفي غيري ...
= أنا ما قلت كدا يا سهى ، انتي صحبتي و أنا ما عايزا أصاحب غيرك لكن الفيديوهات دي بالجد بتوترني ، انتي عارفه لو في زول اكتشف انك جايبه تلفون معاك المدرسه و بتشوفي في الفيديوهات دي الحيحصل شنو ؟؟
_ عامله حسابي ، ماف زول حيكشفني ، إلا لو براك مشيتي و شكيتيني !
= أنا مستحيل أعمل كدا يا سهى ، المهم أرح نمشي بعد دا ، هسي الجرس حـ يضرب
_ آه ما عندي مزاج أحضر الحصه الزفته دي ، المره المعاطه دي أصلي ما بطيقها !
قلت ليها انتي شكلك ما بتطيقي المعلمين كلهم ، قالت لي فعلاً بكره وزارة التربية و التعليم دي من وزيرها لـ اصغر معلم فيها !! قلت ليها غيتو انتي !! المهم أنا حـ أمشي ، قالت لي ظابط ، قمت مشيت و خليتها ، دخلت الفصل و قعدت مكاني ، طبعاً أنا قاعده في الكنبه التالته و سهى قاعده معاي في نفس الكنبه !
أكيد بتسألوا نفسكم أنا اللماني شنو بـ سهى دي تاني !
لمن المدارس قربت تفتح و تم توزيعنا على المدارس أنا اتوزعت في مدرسه ثانويه غير نموذجيه ، أما معزه فـ اتوزعت في مدرسه نموذجيه و قالوا إنو المدرسه دي شاطره شديد ، عمتي قالت لي أصلاً كنت مفكره اقريك في مدرسه ثانويه خاصه بس برضو كنت متمنيه انك تجيبي درجه كبيره و عشمي فيك كان كبير ... طبعاً أبوي لأنو اتحسس من كلام عمتي أيام النتيجه قرر إنو يسوقني و يسكني معاهو ، قال لـ عمتي دي بتي و مفروض أنا الأتحمل مسؤوليتها ، انتي ما قصرتي منها والله و قدمتي ليها الما قدرت أنا أقدمو ليها بس لغاية هنا و كفاك بعد دا و بتي أنا المسؤول عنها ، طبعاً عمتي فهمت الحاصل فـ بقت تشيل و تعتذر منو و قالت ليهو صدقني يا أخوي ما كنت قاصده أحرجك و ما خاته حاجه في بالي ، والله اتكلمت في لحظات زعل بس بسبب درجتها ، والله مها لو ما كانت بتهمني ما كان زعلت منها قدر دا ، قال ليها عارفك والله ما قاصده حاجه و عارف انك بتريدي بتي و مصلحتها بتهمك لكن يا سميره أنا أبوها و أنا المفروض اتحمل مسؤوليتها بعد دا ! يعني عايزا الناس يقولوا هامل بتو و جادعها لـ أختو !؟ قالت ليهو ديل منو القالوا كدا ؟! سررررعه وريني ليهم ، شكلو كلامك دا ما جاي من فراغ ، قال ليها أصلاً دا الحـ ينقال ، قالت ليهو أنا ما عندي شغله بزول ، و بتك دي أنا بعتبرها بتي و نهاي ما برضى بيها ، قال ليها حـ اسوقها بس ما حـ تنقطع منك و متى ما حبت حـ أجيبها ليك ، قالت ليهو حلفتك بالله ما تسوقها مني ، والله مونساني و ماليه علي بيتي و حياتي ، الله ما رزقني بنات ، عشان كدا بعتبرها بتي الوحيده ، طبعاً أنا كنت شاهده على حديثهم دا ، قلت لأبوي عايزا أقعد مع عمتي ، ما عايزا أمشي بيتك داك ، عمتي قالت ليهو سمعت !؟ هي ذاتا ما عايزا المشيه دي ، عليك الله ما تشيلها مني ، في الآخر أبوي وافق و قال ليها والله وافقت عشان ريدتك ليها دي و تعلقك فيها ، قالت ليهو دي بقت حته من قلبي...
