طبعاً لمن سمعت صوت حركه من شدة الخوف جريت دخلت جوه و قفلت الباب علي ، بعد شويه جاني صوت عمر و هو بقول لـ عمتي وينا مشت وين ! طبعاً لمن سمعت نبرة صوتو قلت الحمدلله إني جوه الغرفه و ما انتظرتو في الهول ، بقى ينادي علي و عمتي شغاله ليهو الله يرضى عليك يا عمر ما تسألها !! قال ليها وينا هي خليها تجيني مارقه ، فاروق قال ليهو مستحيل تجيك مارقه و انت بتناديها بالطريقه دي !!
جا ضرب لي باب الغرفه و قال لي أطلعي لي برا ، نهاي ما اتكلمت معاهو ، قال لي يا بت الناس أنا بتكلم معاك أفتحي الباب دا !!
طبعاً كل ما يتكلم معاي بخاف منو أكتر ، عمتي قال ليهو البت مشت لصحبتها عشان تجيب منها كتابها ، غلطها الوحيد انها ما جات كلمتنا ، قال ليها المشكله إني نبهتها يا أمي ، و هي عارفه كويس إني مانعها تمشي بيت أي زول من المدرسه مالم تصل البيت ، بس شكلها عايزا تقوي راسها و تتحداني .... طبعاً قعد يجوط و أنا بسمع فيهو و ببكي ، في الآخر لمن كلامو وجعني قررت أفتح الباب و يحصل الحيحصل ، لو عايز يضربني خليهو يضربني ، حركت مقبض الباب و فتحتو ، طبعاً كلهم قعدوا يعاينوا لي لأنهم ما اتوقعوا إني أفتح الباب و عمر لسه فاير و معصب ، ختيت عيوني في عيونو و حاولت أظهر ليهو عدم خوفي منو و أنا من جوه قلبي مقبوض ، جا علي و قال لي كنتِ وين ؟؟
قلت ليهو عمتك ورتك أنا كنت وين ، قال لي كلمتي منو لمن مشيتي مع صحبتك !؟
ما رديت عليهو ، نهرني و قال لي بتكلم معاك أنا ، استأذنتي من منو لمن مشيتي مع صحبتك بيتهم !؟.... أنا مش نبهتك !؟ مش قلت ليك ما تمشي ساي !
طبعاً سكته سااااي ، أول ما اتحرك و كان حـ يقرب مني أكتر ظنيت إنو حـ يضربني كف ، فـ غمضت عيوني و لمن فتحتهم شفت علاء واقف قدامي و مديني ضهرو ، قال لـ عمر أنا ما قاعد اتجادل معاك و ما قاعد اتدخل في قراراتك إحتراماً ليك ، بس المره دي انت زودتها ، فعلاً مها غلطت بس غلطها ما بستاهل ردة فعلك دي كلها ، كلنا خفنا عليها و كلنا بتهمنا مصلحتها بس ما بنعاملها بالأسلوب دا ، عمر قال ليهو ما المشكله هنا ! مدنها حريتها على الآخر و ماف زول قاعد يسألها أو يحاسبها عشان كدا بتعمل الفي راسها و....
_ و انت القاعد يحاسبك منو ؟؟ قايل انك الوحيد الصح و انك الوحيد الما قاعد تتصرف تصرفات غلط !؟
طبعاً دا علاء القال ليهو كدا ! كلنا بقينا نعاين لـ علاء بإستغراب ! عمر قال ليهو تسكت و ما تحاسبها على غلطها حاجه و تقيف و تدافع عنها في غلطها حاجه تانيه خالص !
_ والله لو انت شايف إني بـ تصرفي دا بدعمها في الغلط فـ على كيفك ما عندي ليك أي تبرير....
هنا عمتي اتدخلت و قالت ليهم ، عمر ، علاء جنيتوا انتوا ولا شنو !؟ كفايه لحدي هنا أي زول يمشي و يشوف شغلتو !
عمر اتجاهل كلامها و قال لـ علاء ما محتاج منك تبرير و أصلاً تصرفك دا ما ليهو مبرر غير إنك عايز تقيف معاها و خلاص ، للأسف يعني انت تفكيرك نفس تفكيرها و ما بتقدر تشوف الموضوع من زاويه تانيه ، لو مصلحتها بتهمك ما بتقيف وقفتك دي
_ والله ما ضروري أصرخ عليها و اشاكلها قدامكم عشان أثبت ليك إنو مصلحتها بتهمني أو إني بخاف عليها ، مشكلتك يا عمر انك مفتكر نفسك وصي عليها و مسؤول منها و إنو ليك كامل الحق في انك تحاسبها على تصرفاتها الكبيره و الصغيره ، لو انت بتعمل كدا عشان هي بت خالك فأحب أذكرك انها بتكون بت عمي ، و لو في زول هنا من حقو يحاسبها فـ هو أنا لأنها بت عمي و لأني أولى بيها ، يمكن لو تصرفك دا اتصرفتو مع ماريا أو غيرها من بنات أعمامك ما كنت حـ أعترض لأنك أقرب ليهم مني و أنا مهما كانت صلة القرابه بيني و بينهم ما من حقي أفرض قوانيني عليهم و اتحكم فيهم 😊
