بعد مساااافه كدا عمتي جات دقت لي الباب ، لمن فتحتو لقيتها شايله لي عصير ليمون بنعناع ، قالت لي بتكوني مصدعه ، هاك أشربي العصير دا و روقي نفسك شويه ، عمر حكى لي الحصل ، أنا مستغربه في إنو أمك بعد دا كلووو عايزا تسوقك و تسكّنك معاها ! يعني إذا نسابتها هي ما طايقنها و عاملين معاها مشاكل قدر دا ، حـ يطيقوك انتي !
ليه عايزا تسكّنك معاها في الجحيم الهي ساكنه فيهو كما أنانيه منها ! دا كلو عشان عندها مشكله معاي ، صدقيني هي ما بتهمها مصلحتك ، هي بس بتغير و ما عايزاك تريديني أكتر منها ، مسكت العصير شربتو و قلت ليها أنا جعانه ، قالت لي هسي حـ اخت الغدا ، أصلاً كنا منتظرنكم ، المهم لمن اتلمينا كلنا في صينية الغدا محمد قال لي ما عندك شغله بالمشاكل الفي بيت أمك ، انتي عليك تقومي بـ واجبك و بس ، عمتي قالت ليهو بري تاني ما بتمشي ليهم ، أمها لو عايزاها تجيها هنا ، دا مش كلامك !؟
قال ليها طيب تمام ، المهم بعدها غيروا الموضوع ، بقوا كلهم يتونسوا إلا أنا ساكته ، طبعاً ماريا كلامها كتييير و جنها ونسه و علاء نفس الشي ، عشان كدا هم الكانوا بتكلموا كتير و بكاااوا بعض ! طبعاً محمد اعتذر من عمتي و راضاها بعد ما كانت زعلانه منو ...
أثناء ونستهم ماريا قالت لـ عمر إجازتك المره دي طويله ؟؟ قال ليها ايوه طويييله شديد ، قالت ليهو أدوك شهر ولا شنو ! قال ليها أكتر من شهر ، قالت ليهو هووووي ما يكون ناسبت صاحب الشركه و نحنا ما عارفين ! ضحك و قال ليها ياريت ، طبعاً أنا هنا طوااالي اتذكرت البت القطريه القال عايز يعرسها ديك !! عمتي قالت ليهو الحمدلله إنو المره دي حنوا عليك و أدوك إجازه طويله ، قال ليها بما انكم جبتوا السيره دي فـ عايز اقول ليكم إني ما أخدت إجازه ، أنا خليت الشغل !!
طبعاً عمتي ختت يدها على صدرها و قالت ليهو سجمييي !! كيف يعني خليت شغلك !! أجي يا عمر دا كلام شنو !؟ علاء قال ليهو من متين الكلام دا !! قال ليهم قبل ما أجي قدمت استقالتي ، فاروق قال ليهو و السبب شنو ؟؟ قال ليهم حصلت معاي شوية مشاكل و بعدين انا أصلاً ما كنت مرتاح في الوظيفه دي ، المهم قررت أجي هنا و ابدأ من الصفر بالعندي ، افضل لي من الغربه ، عمتي قالت ليهو والله ما عارفه أفرح ولا ازعل ! كدي يا محمد قول حاجه ! قال ليها أنا عارف و أبوي كمان عارف و عمر كبير ما صغير و أكيد فكر كويس قبل ما يقدم استقالتو ، عمتي قالت ليهو دي مشاكل شنو الحصلت معاك دي !؟... قال ليها ياها المشاكل العاديه البتحصل في أي الشغل ، ماريا قالت ليهو ربنا يعوضك بالأحسن منو ، منهل قالت ليهو كلو لـ خير ، قال ليهم أكيد و أنا أصلاً لي فتره مفكر أرجع السودان و استقر هنا ، فجأه أنا قلت ليهو و البت ديك ؟؟!!
كلهم عاينوا لي ، قلت ليهو البت القطريه القلت عايز تعرسها ! عمتي قالت ليهو صحي يا عمر موضوعك داك حصل فيهو شنو !؟ بس ما تقول لي ضيعت البت !! قال ليها لا لا بس لسه ما اتوفقنا ، قالت ليهو اها يعني لمن تجهز حـ تسافر قطر عشان تقابل اهلها !؟ قال ليها ان شاء الله ، منهل قالت ليهو اششييي عليه يعني انت مقرر تعرس قطريه !! ماريا قالت ليهو من متين الكلام دا !! عمتي قالت ليها من بدررري ربنا يوفقو و يسدد خطاهو ، فاروق قال يبدو إنو أنا و الحيط الفي البيت دا بس الما عارفين ، علاء قال ليهو انت بتجي من جمعه لـ جمعه و مرات ما بتجي ذاتو يعني الشمارات بتتراكم و بننسى نشمر ليك و ذاتو الموضوع دا إتفتح مره وحده بس تقريباً يمكن قبل 3 سنوات و تاني ما اتفتح إلا هسي !
فاروق قال ليهم تمام أحكوا لي من البدايه ، عمتي قالت ليهو ماف شي يتحكي ، أخوك قال عايز بت قطريه لكن لسه ما جاهز ، بس دا كل الموضوع ، ماريا قالت ليهو خليت بنات عماتك و أعمامك و بنات بلدك و مشيت فتشت في البلدان التانيه !؟ يخسسسي عليك يا خائن بنات الوطن !!
طبعاً قعدوا يضحكوا على كلامها ، منهل قالت ليهو اسمها منو و لو معاك صورها ورينا ليها ، قال ليهم عنود و طبعاً لمن وراهم صورها قالوا ليهو عزااال والله يا عمر ! فاروق قال ليهو يعني هسي البت السمحه دي حتجي و تسكن معانا هنا ؟! اسمع ما عندها أخت أصغر منها !؟ قال ليهو لا ما عندها ، منهل قالت خلونا من دا ، ناسين إنو الأسبوع الجاي تخريج فاروق ! عمتي قالت ليها عاااد دي حاجه بتتنسي !!... المهم قعدوا يخططوا و قالوا لـ فاروق بكرا حـ نحننك قال ليهم لا لا ما عايز أي حنه بس لو عايزين تعملوا لي حفله و تشتتوا فيني قروش ماااف أي مشكله !😂
