#طشت_خرز
كنوز القحطاني
ولي الله
اكابل عينك الحلوه واغني
وكل اليوجعنك يوجعني
إذا تنجرح اني انجرح وياك
مثل ما انا منك انت مني
************************************
جعد جبينه ولي الله عاگد مابين حواجبه و يباوع لحمزه كأنه مايعرفه
_ منو انت
ضل حمزه ع وگفته وهو محني ع ولي الله وفاتح حلگه عبالك وگف بي الزمن و ع راسه الطير ابتسم حيدره بتوتر
لان ولي الله حجاها بجديه مو سالفة ضحك تقرب ع حمزه لزمه من ذراعه يبعده
حيدره :- شبيك صدكت ينسى يمعود هاي من البنج هسه بس يصحصح يرجع طبيعي
هز حمزه راسه بـ بلا معنى گعد ع كرسي رجع نهض طلع برا حسيته من صدك ضاج رغم كلام حيدره مقنع و احتمال صدك تأثير البنج طلعت ورا وگف برا المستشفى يدخن
وگفت يمه طلع باكيت الجكاير مده الي بمعنى اخذ ضليت صافن عليه اول تالي يشوفني و ما يرزل يگلك مو صاحبه نساه اخوه طلعت صوت تؤ يعني ما اريد
طلعت مصاصه من جيبي حطيتها بحلگي خلص ثالث جكاره شمر الگطف و داس عليه بحذائه ردنا ندخل وكفت سيارة عابد نزل هو و عاكف فرك حمزه اديه وحده
بالثانيه لكه الي يطلع بي قهره تقرب علينا عابد بعده ما فاك حلكه ترسه حمزه بوكس ترس وجه وكعه بالكاع
صاح بي عابد
عابد :- شبيك لخاطر الله
لزمه حمزه من خوانيكه يعت بي و يصيح بحرگه
حمزه :- كله من وراك كواد و حگ علي داحي باب خيبر اذا صدك نساني اكهربك لحد ما تنسى حتى اسمك اخليك تمشى بالشارع مثل المخابيل حتى الشماعيه ما يدخلوك يمهم
نهى كلامه ودك بوكسات و عابد هم يضرب لتموا عليهم الناس و الحارس الي باب المستشفى يفاككون بيهم
مسح عاكف وجه بضيج و سئل
عاكف :- وينه
شاهين :- شنو ما تخلص ابنك
التفت عليهم بنظره سريعه جازعه روحه
_ نارهم تاكل حطبهم جزعت كلما واحد يشوف الثاني و تلازموا لو رويسيه مو هيج
ضحكت عفناهم كوه لازمين حمزه يهد و ينفلت و عابد يصيح و يغلط اول مره اشوفه يتعارك دخلنا لغرفة ولي الله
كلهم ساكتين عاكف ضل لازم الباب و يباوع عليهم بمعنى شكو خير حجه حيدره عبالك اكو مصيبه
حيدره :- نسى حمزه
تلاشت ابتسامة عمي و نرسم ع وجه الهم تقرب ع ولي الله
عاكف :- الحمد لله ع سلامه
باوع اله ولي الله راد يعدل گعدته ساعده حيدره بساع حط المخاد ورا ظهره
