#طشت_خرز
الكاتبة كنوز
عاكف
شفت طيفك يحوم اليوم
كلت رد ليه اليوم......
تالي حلم جذاب ..... وتالي فركة احباب ...
وهيج كل جرح بيّ
********************************
ولايه :: گمت وياه بساع طلعت اله ملابس وهو راح للحمام غسل و بدل و نزل يركض،، ضليت بالغرفه افكر بفاطمه أول مره شفتها بيها بالحادث و عرفت قصتها هالبنيه
شوكت ترتاح ماعرف اخذت ملابسي غسلت و صليت باوعت الساعه بـ تسعه نزلت جوه البنات كلهن گاعدت اول ما شافتني اسيا اجت تباركلي
اسيا :- صباح الخير
ولايه :- صباح النور
سلمن البنات هم طبت رايه من الحوش بيدها الموبايل هم سئلتها بقلق
ولايه :- ها لگوها
تنهدت بتعب
رايه :- لا وين راح يرحون للبصره لان اخوانها هناك ساكنين
حجت رهف وهي ترضع ابنها شكد چنت اشوفها طفله و ناعمه هس صارت ام و ام حنينه حاضنه ابنها و ماتقبل ترضعه اله طبيعي
رهف :- اكلج شلون اخذوها من البيت مو هو موجوده
هزت ايدها رايه بسخريه
رايه :- طالع لشغل و بس هي و أمه موجودات و طابين جاريها و مأخذيها
رهف :- مو بيت عمه لحيدره عدهم ثار وياهم و شاردين شرجعهم
رايه :- مو من صار الحادث و حيدره عباله ابن عمه الدعم فاطمه تالي تصافوا و بيت عمه انطوا الأمان لاخوة فاطمه يرجعون مقابل يسلمون ابنهم القاتل لشرطه بس باعتبار صار نسابه
فرت ايدها اسيا مستهزئه
اسيا :- انطوهم الأمان و صاروا دهن و دبس و البنيه طاحت بيها محد رحمها لا أهلها و لا الدهر
ردت رايه بقهر حيل مقهوره ع فاطمه
رايه :- هاي لو ماخذين فاطمه فصليه چا ما رحموها ،، جلاب الطرفين جلاب
صاحت رهف بخوف من ابنها تقيئ
رهف :- رايه لحيكني مادري شبي تقيئ
أخذته منها رايه مسحت حلكه و گلبته ع بطنه ادكدكله
رايه :- مابي شي رضع زايد و انتِ هم مو اربعه و عشرين ساعه حاطته و ترضعين
مسحت رهف دموعها صفنت عليها من بجت صدك اسم ع مسمى
رهف :- وين اربعه و عشرين ساعه توي رضعته
رايه :- يا توج من كعدنا و انتِ حاطته ع صدرج و ارضع يمه ارضع ترى طفل مو هايشه
رهف :- غير جوعان
