#طشت_خرز
كنوز القحطاني
رايه
وينك يالگِلت شيّال همّي
ودمّك يا عزيز الروح دمّي ..
اريدَنّك تجيني الليله يمّي
وتبچي اعليّه بچي الجابته امّي
*******************************
اسيا :: انتبهت ع ابويه يتصل ماعرف بمنو و القلق مبين ع وجه يروح و يرد بالصاله و كل شويه يوكف يصفن بتفكر عكد جبينه بوجع و كعد ع تخم بيده موبايله كأنه منتظر خبر
اسيا :- بابا شكو خير اكو خبر عن ولي الله
رفع راسه مسح وجه باثنين اديه و زفر انفاسه بصوت عالي بتنهيدة ألم
عاكف :- طارق عرف بـ ولي الله و شاهين ماخذين البضاعة مالته صايره لخه و سيارتهم مگلوبه صدام يگول ماتوا ثنينهم
عرك جسمي كله سندت حيلي بأيدي ع حايط گلبي انعصر عصر
اسيا :- شنو بابا شنو شنو ماتوا
من شاف وضعي نهض من مكانه سندني وهو يحجي يطمني
عاكف :- ماكو شي اكيد لسه اسيا ادعي طالعين منها بخير
قبل لا ارد انتبهت ع رايه گاعده ع درج بوجه شاحب أصفر كركم مثل ورقة خريف و ترجف جمعت قوتي و رحت عليها اركض اخذت رقيه من بين اديها انطيتها لأبويه گمبصت كدامها حاوطت وجها باديه
اسيا :- رايه اهدي ماكو شي بعدهم ما متأكدين ا..
قطعت كلامي من همست بصوت مهتز تعاين بضياع كأنها خسرت روحها
رايه :- يـ يكول مات
جريتها لحضني و مسحت ع ظهرها
اسيا :- ماكو شي يروحي مستحيل يروح و يعوفج مو انتِ بنته اكو اب يعوف بنته
بعدتها عني دموعها تنزل مثل المطر بسكوت اديها ترجف لزمت گلبها مثل الحاط جمره بايده تذكرت مرضها گمت اركض ادور علاجها لگيته بجنطتها انطيتها منه
طلعت غفران و رهف و ليال كلهن يبجن ماعرف المن التفتت بقيت اهدي برايه لان؟مريضه اجه عابد دخل يركض سئله ابويه بلهفه
عاكف :- هاا عابد هم لو لا
هز عابد راسه بـ لا و كال
عابد :- لا ا..
قطع من شاف وضع رايه اجه عليها بخطوات سريعه كعد كدامها
عابد :- رايه هسه جنت يم صدام هو طلع هيج خبر حتى طارق مايأذيهم
بلعت ريكها بمراره مثل التايهه مثل الغرگانه و تريد كشه تجلب بيها
رايه :- عليك الله احجي صدك عايش مو وينه ليش ما اجه
تقرب منها اكثر بتردد ما متعود يتعامل وياها حضنها و باس راسها
عابد :- و روح امي صدام طلع الخبر هي صح سيارتهم مگلوبه بس ثنينهم ماكو و طارق جان يدور عليهم تسعين بالميه يم جهم هو يحميهم لان يريد البضاعه و البضاعه عدهم لاتخافين
