#طشت_خرز
كنوز القحطاني
ولي الله... رايه
شما گبرت الفرحه تبقى ناقصه بدونج ييمه
***********************************
رايه ::
الليل كله ما نمت فكره تاخذني و فكره تجيبني شي يعجز العقل يتقبله و يرفضه القلب اذا الاب هو العدو الغريب شنو اذا الاب هو اليدمر ابنه و مايهتم لشرف بناته
منو تشيله الغيره عليهم الغريب ،تغير كلشي و صرنا بزمن العجائب عشنا بفقر و بعوز ولي الله ترك المدرسه و ترك حلمه حتى يوفر النه عيشه زينه بوگت هو جان يلعب بالفلوس
و يمثل دور الفقير حتى لا تنكشف حقيقته الاف الاسئله تجول براسي بلا هو هل يا ياترى حبها لامي من صدك واذا حبها شلون گدر يشك بيها شلون گدر يخدعها شلون گدر يتهمها
و يكول الها كلام يجرح الروح اتذكر كلامه الها وهو يسئلها بكل برود ولي الله ابن منو ابن عجيد لو عاكف
وصل بي الشك ان امي بعد زواجها منه تلتقي بعاكف و ولي الله منه
لو عجيد لان يحترمها واعتبرها اخت و ساعدها شك أن عدهم علاقه و ولي الله منه،،، امي الله يرحمها گالت رابحه زرعت الشك بگلبه بس الي توصلت اله
صح رابحه زرعت الشك بگلبه والي أكد هذا الشك هو نفسه جنت اسمع المثل شتظن بالناس يگول اظن بالناس ما اظن بنفسي ابويه شاف نفسه لابس قناع الحب و الفقر گدام امي وهو شيطان شك بأمي مثله شك بيها ممكن تخونه
ابويه ما حب امي ابد عجبه جمالها عجبه ان هي ما عدها احد ماكو وراها اهل يسئلون عليها تأكد مهمها صار و حتى لو عرفت حقيقه ماراح تكدر تسوي شي مثل من زعلت و طلعت جان كلامه بلا اهتمام ماعدها احد مصيرها ترجع
اكول احنا چنه غشمه لو العدو ابونا ماگدر نشك بي ولا نحطه بدائرة الشك تذكرت من نظفت غرفته و لگيت موبايل صغير و ضربني وقتها كل و ظني موبايل بي شغله عادي و نسيت السالفه هو صدك بي شغله بس شغله
النجس طلعاته بليل و آخر شي غفران من عرفت عنده بيوت و املاك و كل أوراقه شغله بالبيت الجانت بي جان ماخذ حذره زين بس حبل الجذب كصير و الحرام ما يدوم و
حوبة شرف امي و صحة ولي الله و عمره ما راحت سُدى،، گمت من فراشي بعد ما عجزت انام عاينت ع رقيه نايمه عدلت الغطاء عليها و طلعت برا بالحديقه عكدت
جبيني من شفت ولي الله گاعد و مرجي ظهره ع حايط يدخن و صوت باسم ياخذك لعالم الأحزان
اناشد ع صبر ما ادري دربه منين
خذن ثلثلين حيلي مخلفات البين
دنياي نفرت عني و حتى الصبر
مل مني
شويه و اذان الاذان رحت يمه انتبه الي طفى الجگاره و سد الموبايل
رايه :- انت هم ماكدرت تنام
