في مدينة قصر الملك، كان كل واحد بيدافع عن الأرض وش لوش ضد الشياطين، معادا واحد من الحراس اللي كان نايم على ضهره ومستريح. الحارس ده كان الونبيسي، اللي كان محوط نفسه بشبكة البرق، وهي تقنية من التقنيات اللي اتعلمها بيقدر بيها يصنع جدار كهربائي مخفي. كل ما يحاول حد من الشياطين يهجم عليه، كان بيعدي من الشبكة وتتشل حركته بعدها الونبيسي يقتلو بأنصاله.
فوسط كل ده مرة واحدة حصل حاجة غريبة جدًا، الشياطين بطلت تحارب وبدأت ترجع وتقرب من البوابة، وده خلا الكل مستغرب اللي بيحصل. فجأة، كل اللي موجودين حسوا بهالة مشؤمة لمست قلوبهم طالعة من البوابة. الكل قرب منها بحذر الكل اتجمعو عند البوابة و استعدوا عشان يعملوا حسابهم للجاي، بس اتصدمو كلهم من اللي شافوه: رأس ضخمة خرجت من أعلى جزء من البوابة، بصت ليهم و كان أبشع منظر ممكن تتخيله. شيطان عملاق مرعب بيبص للجبابرة وبيبتسم.
بدأ يطلع من البوابة وظهر جسمه الرفيع جدًا. الجبابرة إبراهيم وأدهم وحسين اتثبتوا مكانهم مقدروش يتحركوا من بشاعة المنظر. الحراس كانوا بيتنفسوا بصعوبة من شدة رعبهم. خلاص خرج الشيطان من البوابة وبحركة واحدة من ديله عمل موجة، الكل حاول يتفاداها بس للأسف حسين وعبدالله معرفوش يهربوا وطيرتهم بعيد.
بدأ بعدها واحد من الحراس يقرب من الشيطان خطوة بخطوة وهو باصص للأرض. الشيطان لاحظ وبص تحتيه لقاه عباس و كان واقف مبيتحركش. ضحك الشيطان وحرك ديله بسرعة ناحية رقبته، لكنه وقف بسرعة واستغرب من اللي شافه. لقى عباس لسه ثابت ولا رمش حتى وباصص للشيطان وهو بيبتسم ابتسامة مريبة وبيعض شفايفه.
عباس: "متوقعتش ألاقي أنثى بالحلاوة دي من جنس الشياطين، كنتي فين من زمان؟"
الشيطانة بدأت تترعش وهي بتبصله بعينين واسعة، وفجأة رقبتها رجعت على ورا وجسمها بدأ يتلوى وحجمها بدأ يصغر لغاية ما ظهرت بشكل مختلف أكتر شيطانية وأنثوية.
إبراهيم و ادهم و الونبيسي: دي نتاية مش دكر!!!
الشيطانة: "أول مرة أسمع الكلام ده من حد."
عباس: "محدش بيقدر القشطة اليومين دول."
الشيطانة: "وإيه هي القشطة دي؟"
عباس: "ثواني! متعرفيش إيه القشطة؟ دي يا ستي حاجة حلوة زيك وقلبها أبيض زيك وطرية، بس مقدرش أقول زيك عشان لسه معرفش."
الشيطانة: "انت لعوب، تعجبني."
بدأت تقرب منه وحطت إيديها على كتفه وباستو من بقه. كل الجبابرة والحراس بقوا مصدومين ومش مصدقين اللي بيحصل، ابتسم ابتسامة خبيثة كأنه بيقول: الخطة نجحت.
الونبيسي: "الناس الطبيعية بتقول أعوذ بالله من الشيطان الرجيم، إيه اللي انت بتعمله ده؟"
