ချစ်ခြင်းသွင်ပြင်

၂၁

( Recommend song for this part: Falling all in you - Shawn Mendes )

ကျွန်မရဲ့ သွင်က ရုံးမှာ ရှိနေမယ်လို့ ပြောခဲ့ပေမယ့် ကျွန်မလာမယ်လို့ဆိုတာကြောင့် အိမ်မှာပဲ အလုပ်လုပ်နေပါတယ်တဲ့လေ ။ ကျွန်မကိုတော့ မပင်ပန်းစေချင်ဘူးလို့ ပြောခဲ့ဖူးတာကိုလည်း မှတ်မိသေးပါရဲ့ ။

" ဘာတွေ ဝယ်လာတာလဲ ၊ အများကြီးပဲ "

" ကျွန်မ သွင့်ကို ဟင်းချက်ပေးမလို့လေ "

" ထပ်ပြောတာပေမယ့် မင်းလက်ရာကို ကြိုက်တယ်လို့လည်း မပြောမိပါဘူး "

" သိပါတယ် ၊ သွင်က ကျွန်မ လက်ရာကို ကြိုက်တာ မဟုတ်ဘူး "
" ကျွန်မကို ကြိုက်တာလေ ဟုတ်တယ်မလား "

" ကိုယ့်ဟာကိုယ် သယ်လာခဲ့တော့ လိပ်ကလေး "

သွင်က တို့ဖူးအတွက် အစာထုပ်ကိုပဲ ယူသွားပြီး ကျန်တာတွေကိုတော့ သယ်လာခဲ့ဖို့ အမိန့်ပေးသွားပါတယ် ။ သွင့်ကို မြင်လိုက်တာနဲ့ ပူပန်ခဲ့မိသမျှ လွင့်စင်ကုန်တော့တာပဲ ။

" ငါးကင်ပေးမလို့ကို ဂတ်စ်မီးဖို မရှိဘူးပဲ "

" Oven ရှိတယ် ၊ အဲဒါနဲ့ ကင်လိုက်လို့ရမယ်ထင်တယ် "

" Oven နဲ့ဆို ကျွန်မ လက်ရာ ဘယ်ပီသတော့မလဲ "

" ဒါဆိုလည်း နေခြောက်သွားလှမ်းထား မင်းရဲ့ ငါးကို "

သွင်က စသလိုနဲ့ အရွဲ့လည်း တိုက်တတ်ပါသေးတယ် ။ ကျွန်မကို အရွဲ့တိုက်နေပေမယ့် ဝယ်လာတဲ့ ပစ္စည်းတွေကိုတော့ နေရာချပေးနေသေးတဲ့ သွင့်ရဲ့ကျောပြင်ကို ထွေးဖက်လိုက်ချင်စိတ်က ထိန်းချုပ်လို့မရတာကြောင့် သွင့်ရဲ့ အနားကို အရဲကိုးလို့ ကပ်သွားမိတယ် ။

" မင်း ... "

အနားမရောက်ခင်မှာပဲ သွင်က ဆက်ခနဲ လှည့်လာတာကြောင့် ယောင်ယောင်အမ်းအမ်းနဲ့ အနောက်ကို ခြေတစ်လှမ်းဆုတ်လို့ ဘေးနားက ခုံစွန်းကို လှမ်းကိုင်လိုက်မိတဲ့အထိပဲ ။

" ဘာ ... ဘာလို့လဲ သွင် "

" ရေမွှေးပုလင်း မှောက်ကျလာတာလား "

" မဟုတ် ... ပါဘူး ၊ အနံ့အရမ်းမွှန်နေလို့လား "

ကိုယ့်ကိုယ်ကိုယ် အနံ့ခံကြည့်ပြန်တော့ အဲ့လောက်လည်း ဆိုးမနေပါဘူး ။ ဒါပေမယ့် သွင်ကတော့ ကျွန်မနားကို ကပ်လာပြီး အနံ့ရနေကြောင်းကို သက်သေပြတယ် ။