Chapter 10
Tahimik lang kaming dalawa ni Ion habang pabalik sa bahay namin. Walang nagbabalak magsalita. Maging ako ay naguguluhan sa mga pangyayari na nagaganap.
Kinuha ko sa bulsa ko ang container kung saan nakalagay ang utak ko. Siguro naman ligtas na ako sa pagiisip ng mga bagay bagay. Hindi ko man alam kung paano nila nalalaman ang mga iniisip ko gamit ang kapiraso ng utak ko, hinahangaan ko pa rin ang ginawa nila.
Inikot ikot ko ito sa mga kamay ko. Naramdaman ko namang tumingin sa akin si Ion.
"Ano yan?" Tanong niya sa akin. Hindi ko siya pinansin at patuloy ko nalang tinitigan ang container.
"Ang sarap mo talagang kausap." Sabi niya pero hindi ko nalang sinagot. Wala naman siyang kwenta kausap.
Pagkatigil na pagkatigil ng sinasakyan namin, bumaba na kaagad ako at nagtungo sa kwarto upang magbihis ng aking uniporme. Base sa schedule ko, hanggang 6 pa ang pasok ko. Alas dose palang ng tanghali kaya papasok ako.
Lumabas na ako pagkatapos kong mag ayos. Nasalubong ko naman si Ion sa pintuan ko, mukhang papunta siya ngayon sa kwarto niya.
"Oh? papasok ka?" Tanong niya sa akin. Nilampasan ko nalang siya at nagpunta sa gate.
Pumara ako ng tricycle at sumakay dito. Ilang minuto lang, nasa school na ako. Lunch break ngayon kaya madaming tao sa labas. Nakakainis.
"Miss, pwede bang humingi ng number mo?" Lumapit sa akin ang isang lalaki. Maayos naman ang itsura niya ngunit ayoko pa din sa katulad niya. Hindi ko siya pinansin at nagdire diretso nalang sa gate ng school.
"Snobber!" Sigaw niya. Hinarang ako ng guard sa gate dahil wala akong I.D
"Miss, magpa I.D ka na mamaya huh." Sabi sa akin nung guard habang nakangiti at binuksan yung gate. Tuloy tuloy lang ako sa pagpasok ng may biglang humigit sa kamay ko.
"Acck." Daing ko dahil hawak ng humila sa akin ang hiwa ko sa baba ng braso ko.
"Bakit ngayon ka lang pumasok, Athena?" Tanong sa akin ni manok. Sinamaan ko naman silang dalawa ni daldalita ng tingin.
"Kamay mo." Sabi ko kay manok. Kumunot naman ang noo niya.
"Kamay pa din naman, Athena." Sabi niya. Hinila ko nalang ang kamay ko sa kaniya.
"Huwaaaa! Bakit nagdudugo yan?! Waaaa!" O.A na sigaw ni daldalita. Tinignan ko ang kamay ko, may dugo nga ito.
"O-oy, wala akong alam diyan huh! Wala akong blade sa kamay!" Depensa ni manok sa sarili niya. Psh. Naglakad na ako papalayo sa kanila, naramdaman ko namang sumusunod sila sa akin. Kailan ba nila ako tatantanan?
"Anong nangyari diyan, Thena?" Hinarap ko siya dahil sa tinawag niya sa akin. Bakit ba may sari sarili silang tawag sa akin.
"Athena." Sabi ko at nagpatuloy na sa paglalakad papunta sa classroom.
"Oy, tara linisin muna natin yan." Muli na naman akong hinila nila daldalita at manok. Nakalimutan ko na ang pangalan nilang dalawa.
Pumunta kami sa CR. Muli ko na namang nakita ang repleksyon ko kaya napatigil ako sa harap ng salamin.
"Wala bang salamin sa bahay to?" Rinig kong bulong ni Daldalita kay manok. Mahina iyon at malayo sila sa akin ngunit masyado lang talagang malakas ang pandinig ko.
"Tara dito sa lababo, Athena." Sabi ni daldalita, nagpunta nalang ako doon dahil baka marami pa silang sabihin.
"What are you doing?" Tanong ko sa kanila ng itapat nila ang kamay ko sa umaagos na tubig mula sa lababo.
