Alt Key: The Devil's Code (Completed)

10. Zeus' Revenge

CHAPTER 10

March 2, 2007

Sa paaralan, maagang nagkita sina Maynerd at Ulysses para sa isang plano - ang Oplan Pagbabago. Kailangan nilang makapasok sa server ng paaralan sa lalong madaling panahon. Dito centralized na kasing nakalagak ang lahat ng impormasyon ng bawat estudyande, simula sa personal hanggang sa academics. Pero kahit may kakayahan sila, alam nilang magagahol na sila sa panahon kung p'wersahan nila itong papasukin nang hindi madi-detect ng security system gamit ang kanilang hacking skills. Bukas kasi maari ng i-finalize ang unofficial list ng mga makakasama sa graduation na s'ya naman nilang pakay. Ilalabas ito ng maaga para ang mga bumagsak ay makagawa pa ng paraan para makasama pero sa loob na lamang ng isang linggo.

"Anong plano, dating gawi na lang?" Tanong ni Meynard.

"Yun na lang. Mas madali kasi yun dahil meron na tayong code." Sagot ni Ulysses.

"Si Registrar o si Dean?" Tanong ni Meynard.

Sila lang kasi ang authorized na magbago ng grades kapag nai-upload na ang mga ito sa server. Kung may babaguhin man, kailangang gumawa ng request letter ang professor na may hawak sa subject para mapalitan ang grade. Sa pagkakakilala din ng lahat, parehas silang babaero at may pagkamanyakis.

"Silang dalawa na lang para may buffer tayo."

"Ok."

Gamit ang Zeus malware o Zbot na nakuha nila sa isang international hacker, madali nilang mananakaw ang password ng kanilang target sa pamamagitan ng phishing scheme kung saan magpapadala sila ng picture sa kanilang email at kapag nabuksan ito, agad namang aatake ang virus para kumuha ng ilang personal information gaya ng password. Isa itong Trojan horse malware at madami na ring malalaking institusyon partikular sa US ang nabibiktima nito. Hindi pa pumapasok ang CIA or ang FBI para imbestigahan ito pero alam nila, silang mga black hat underground hackers, na hindi magtatagal kikilalanin ito nang buong mundo na isa sa pinaka kinakakatakutang malware sa mundo ng programming. At hindi malayong mangyari na mangyari din kay Ulysses, dahil marahil pareho silang Greek Gods.

Matapos makuha ang email address ng dalawang target, agad silang nagpadala ng porno photos at isang video at linagyan ng title na...

RE: Free sample pics and video.
It's our company's 5th anniversary. A random gift for you.
Attachment: zip file.

Matapos ang nakakainip na dalawang oras, wala pa ring nagbubukas ng kanilang mga ipinadala kaya't Plan B sila. Sasamantalahin nila ang pag-snack ni Dean at pag-leave ng secretary nito. Ang tawag nila dito ay snitch scheme. Target nila si Dean dahil naka-isolate ang office nito, hindi katulad ng office ni Mr. Registrar na madaming cubicle na nakapaligid.

Nasa 3rd floor ang office ng Dean of Education na napapagitnaan ng Dean of Engineering at Computer Science. Tambay muna sila one block away habang pinapanood ang mga sumasayaw sa ground floor. Tamang-tama din dahil sila lang ang nakatambay doon. Ilang saglit pa, bumukas na ang pinto hudyat para sila'y kumilos.

Mga isang dipa pa sila, lumabas si Dean na nakatuon ang atensyon sa hawak nitong cellphone. Hindi sila nito namalayan nang dumaan sila sa tabi nito. Dahil naka-hydraulics ang pinto at kusa na lang itong sumasara, hindi na nito hinintay na lubusang magsara ang pinto at humarap na ito sa hallway. Sinamantala ito ni Ulysses, na sa kaunting puwang na natitirang nakabukas, pasimple itong lumusot. Saktong walang sabit maliban sa malagabuhok nang sumagi ang ilong nito sa gilid ng pinto. Mabilis ding lumakad si Meynard at tinungo ang Com-Sci Department. Sa split seconds na nakalipas, matapos makapapagtext at para makasiguro, siya na mismo ang nagsara ng pinto at kasabay namang pagsara ng pinto sa Com-Sci Department. Tumingin pa ito sa kabilang room habang hawak pa ang doorknob. Lumakad ito papalayo na nakatingin ulit sa cellphone.