Every Beast Needs A Beauty (GLS#1)(Published under Pop Fiction, and MPress)

Kabanata 9

Kabanata 9

Awa

Iritado ako sa lahat. Sa pagsulpot ni Rage, sa babaeng nang mamaliit sa akin, sa lahat ng mga nakatingin sa akin ngayon. Nakakahiya.

"Bitiwan mo ako." Nabuo ko pa ang mga salitang iyan sa gitna ng paghatak niya sa akin.

Parang wala siyang narinig nang hinatak niya ako papasok sa loob ng bahay. Nakita ko na sinundan kami ng tingin ni Logan habang naka upo siya sa sofa. Natigil lang si Rage sa paglalakad nang may humarang na babae sa amin.

"Rage, sino 'yang kasama mo?" Napangiwi ang babae sa akin.

Itinago ko ang takong sa likod ko. Inayos ko rin ang tayo ko pero nakita niya parin na nasira ang pumps ko. Amoy sigarilyo na sa loob ng living room ng bahay. Hindi lang iyon, abala pa ang mga tao sa pagsasayaw at masasabi kong mas grabe pa ang nangyayari dito kumpara sa nangyayari sa mga bar.

"Just my employee, Lea." Ani Rage.

Humigpit ang hawak niya sa pulso ko. Napatingin ako sa pagngiwi ni Lea sa akin. Just. My. Employee. Tama naman. Napalunok ako.

"Your employee? Anong ginagawa ng empleyado mo dito?" Nagtaas ng kilay ang babae habang nilalaro niya ang strap ng kanyang damit.

Isa ba ito sa mga babae ni Rage? Baka naistorbo ko silang dalawa.

"This is the janitress, Rage, right?" Biglang sawsaw ng isa pang babae.

Nagulat ako nang nakita ko si Kara. Nakita ko na siya noon sa opisina ni Rage. Hindi lang iyong nasa mesa siya pero pati na rin nang sinugod niya si Rage para sumbatan. Maganda siya. Makinis, medyo morena, matangkad, at maporma. Kinagat niya ang labi niya habang nakatingin kay Rage. Ang pula niyang dress ay nagpapakita ng balat sa dibdib.

"Janitress?" Natatawang sinabi ng katabi niyang si Lea. "Gagawin mo sigurong maid, I bet?"

Mas humigpit ang hawak ni Rage sa akin.

"Why are you holding her dirty hand, Rage? Anong meron?" Kumunot ang noo ni Kara.

Mabilis kong kinalas ang kamay ko sa pagkakahawak ni Rage. Tama na. Ayoko nang makarinig ng pangmamaliit galing sa mga taong ito. At madudungisan lang si Rage pag patuloy niya akong tutulungan.

Humakbang ako para hanapin si Mia sa dagat ng mga nagsasayaw. Batid kong paika-ika ako dahil sa sirang pumps. Kinailangan ko pang abutin ang pumps para matanggal ko. Pwede namang mag paa na lang kesa sa magsuot ng sira.

Narinig ko ang malutong na mura ni Rage habang binabawi ang kamay ko. Hindi ko pa natatanggal ang pumps ay hinigit niya na ako pabalik.

"Rage, bitiwan mo ako!" Iritado kong sinabi.

"We still need to find your friend." Aniya.