Every Beast Needs A Beauty (GLS#1)(Published under Pop Fiction, and MPress)

Kabanata 22

Warning: SPG

-----------------------------------------------

Kabanata 22

Good Girl

Na guilty ako sa ginawa ko kay Kid. Lalo na nang tinext niya ako na susunduin niya ako mamayang gabi pero tinanggihan ko na agad siya. Kailangan ko siyang tanggihan dahil may trabaho pa ako mamaya bilang Marlboro Girl. Naintindihan niya naman iyon pero may halong tabang ang kanyang reply.

Kid:

Ok Sunny. See you tomorrow. I know you deserve better.

Hindi na ako nakapagreply. Alam kong ang tinutukoy niya ay 'yong kay Rage. Hindi ko sinasabi na gusto ko si Rage pero nararamdaman niya iyon base sa reaksyon ko kanina.

Tumikhim si Mia nang pumasok sa loob ng Lounge. Dalawang beses niya na akong nadatnan na nakatunganga sa sofa at hinihintay siya. Wala akong nagawa buong araw at natatakot akong malaman 'yon ni Mrs. Ching. Kaya lang, wala akong magagawa. Hindi kaya ng sikmura ko ang umakyat sa 40th floor nang naroon parin si Rage.

"Hanep ka rin, ah?" Tawa ni Mia. "Okay lang kahit dito ka lang buong araw."

Umismid ako at natulala. Kinwento ko na sa kanya ang nangyari kanina. Hindi ko kasi maitago dahil sa nakabusangot kong mukha.

"Sa bagay, patay na patay yung may ari sayo."

Nginiwian ko siya. "Hindi ko alam na naniniwala ka sa bola niya. Akala ko ba kilala mo na ang mga mayayaman at ganong klaseng lalaki?"

Tumabi si Mia sa akin sa sofa. Ngumisi siya at pumangalumbaba. Sa gitna ng makapal na make up ay pag tinititigan mo siya, kitang kita parin ang kanyang malalim na eyebags. Alam kong hindi parin siya mabuti dahil kay Eric. Hindi ko maisip na ganito ang mga epekto ng lalaki sa babae. Ginagawa nilang mahina ang babae at ayaw ko ng ganon.

"May mga bagay na kahit duda kang hindi totoo ay umaasa kang sana ay maging totoo." Aniya.

Tinitigan ko siya. Umiling din ako pagkatapos ng ilang sandali. Nag iwas ako ng tingin.

"No. Hindi ko kayang umasa sa wala. Sana tigilan niya na 'to. Walang mangyayari dito." Sabi ko kahit na alam kong kabaliktaran ang sigaw ng aking sistema.

"Well, may point ka. Tsaka, nagtitiwala naman ako sayo. May paninindigan ka at marami kang pinag daanang ganito. Nawalan na ako ng tiwala sa mga lalake pero maganda paring makita na nangyayari sa iba ang mga gusto mong paniwalaan." Tinapik niya ang balikat ko bago tumayo. "Bihis na tayo. We have a long night."

Ilang sandali ko pa siyang sinundan ng tingin bago ko naisipang mag bihis na rin. Dumiretso na ako sa locker para kunin ang shorts at t shirt ko na madalas kong sinusuot patungo sa building kung saan kami magbibihis ng dress namin para sa gabing iyon.

Kumain muna kami sa labas bago dumiretso sa building para makapag bihis at makapag make up. Iba ang dress namin ngayon. Kulay dark blue at mas maiksi kumpara doon sa ibang sinusuot namin.

"May event ngayon sa isang bar na pupuntahan kaya mas maganda kung ibang dress ang susuotin."

Tumango kaming lahat at nagpatuloy sa pag mi-make up.