عشق يا عشق اصحى بقى يا بنتى
- ايوه ياداده صباح الخير الساعه كام دلوقت
- الساعه ٨ يا بنتى
- ياه يا داده و سيبانى نايمه الوقت دا كله مَش قولتلك تصحينى بدرى
- يا بنتى هو انتى نمتى أساسا دا انتى صاحيه منمتيش طول الليل من الوجع اللى فى بطنك
- اه الاستاذ كان عمال يرفس فى جنبى طول الليل و مَش مخلينى أغمض حتى عينيا شكله هيطلع ولد شقى ياداده
- مين قالك ويمكن تطلع بنت حلوه زى مامتها المهم يا بنتى انتى ازيك دلوقت
- انا كويسه زى البمب مفيش فيا حاجه اه
- الحمد لله طيب ممكن تستريحى النهارده عشان مقلقش عليكى و انا هاروح الشغل بسر عه و استأذن و ارجعلك انا لولا انك محلفانى انى اصحيكى معايا كنت سبتك نايمه بس أعمل ايه بقى
- معلش يا داده مَش هينفع استريح النهارده بالذات خالص
- ليه بقى يا بنتى
- النهارده تسليم الطلبيه و صاحب المشغل منبه علينا كلنا اننا نبقى موجودين و الى هيتأخر او يغيب مَش هيقبض
مَش مشكله يا بنتى المعوض ربنا المهم صحتك انا شايفاكى تعبانه اقعدى ولا يهمك
- انا وعدته يا داده انى هاكون موجوده و اشرف على البنات و انتى عارفه انى مَش ممكن اخلف وعدى ابدا
- عارفه يا بنتى بس لا يكلف الله نفسا الا وسعها انتى تعبانه وولادتك قربت اقعدى و استريحىً النهارده عشان خاطرى انا
- بصى يا جميل انا هاروح النهارده بس و هاخد حسابى و اتفق مع صاحب المشغل على الاجازه روحى انتى كمان شغلك و حاولى تخلصى بدرى ونتقابل بالليل ها قلتى ايه
- انتى بتضحكى على يا عشق عايزه تخلصى منى و خلاص
- و انا اقدر يا جميل بس عشان خاطرى النهارده بس و الله
- مَش عارفه يا بنتى انا صاحيه النهارده وحاجه كده طابقه على صدرى و متضايقه و خايفه مَش عارفه ليه
- خير ان شاء الله يا داده انتى حاسه بحاجه
- ابدا انا صحتى زى الفل و الحمد لله بس مَش عارفه فيه ايه
- طيب استعيذى بالله و روحى شغلك بقى بلاش و النبى تعطلينى لحسن انا عايزه البس و انزل
- مفيش نزول من غير فطور
-؟بس يا داده انا متاخره
- هى كلمه واحده يا عشق هتفطرى قبل ما تنزلى
- حاضر يا داده هاخد حاجه كده على السريع عشان خاطرك
- طيب مَش عايزه منى حاجه
- لا يا حبيبتى تسلمى اشوفك على خير يا داده
- لا اله الا الله
- محمد رسول الله
خرجت داده عليه لتتبعها بعد ذلك عشق لتذهب الى عملها فى المشغل وصلت الى المكان لتدخل اليه كانت تبتسم فى هدوء فقد كان يومها الأخير قبل موعد ولادتها و عليها ان تترك انطباعا جيدا عنها اذا كانت ترغب فى الرجوع بعد فتره دخلت الى العنبر و هى تلقى التحيه على الفتيات و تجلس لتبدأ عملها قائله بِسْم الله الرحمن الرحيم توكلنا على الله .
-؟ست عشق ست عشق
- فيه ايه يا صفيه
- الحقى اشجان جوه تعبانه اوى ومش عارفين نعمل معاها ايه .
- تعبانه ازاى يعنى هى فين ؟
- فى المخزن احنا خدناها على هناك
- طيب تعالى ورايا
دخلت عشق الى المخزن تتبعها صفيه لتجداشجان مستلقيه على احد اجوله القماش و يبدو عليها الإرهاق و التعب فقد كانت تلتقط انفاسها بصعوبه بالغه و كأنها تختنق و قد التف حوالها العديد من فتيات المشغل يتابعون ما يحدث فى صمت
- اشجان اشجان مالك فيكى ايه ؟
- حاولت اشجان الاعتدال عندما سمعت صوت عشق يناديها و لكنها لم تستطع
- خليكى مستريحه ايه فيه ايه مالك خضيتننا عليكى انتى كويسه
تساقطت دموعها بغزارة و هى تحاول التقاط انفاسها المتلاحقة
- ايه يا اشجان فيه ايه بس ثم التفتت الى الفتيات قائله لهم
- معلش يا بنات ممكن حد يجيب حاجه لأشجان تشربها عشان ضغطها وطى و عندها هبوط
اسرعت احدى الفتيات قائله
- انا معايا علبه عصير هاجبها حالا ثم ذهبت و عادت بعد دقيقه واحده لتمد يدها الى عشق اتفضلى
ابتسمت لها عشق فى ود و اخذت منها علبه العصير لتفتحها وتصب منها قطرات قليله فى فم اشجان ثم تلتفت الى باقى الفتيات اللاتى وقفن يراقبن المنظر
- معلش يا بنات انتو عارفين ان المدير ممكن يزعل اننا موقفين الشغله انتو عارفين النهارده مهم اد ايه ممكن كل واحده تتفضل على شغلها و انا هأفضل هنا مع اشجان الحمد لله هى بقت كويسه الوقت و شكرًا ليكم
اتجهت البنات الى الباب دون اعتراض فقد كانوا يعرفون ان عليهم العوده الى عملهم مهما كانت الظروف لتلتفت عشق الى اشجان
- اه البنات مشيوا ايه مالك يا اشجان فيكى ايه يخليكى بالحاله دى انتى كُنتُى امبارح كويسه و زى الفل ايه اللى حصل ؟
لتنفجر اشجان فى البكاء بحرقه قائله
- ابنى ابنى يا عشق ابنى بيموت ومش عارفه اعمله حاجه ربنا بس هو العالم باللى بيا و اللى انا فيه
لتنظر لها عشق ودموعها تنزل حزنا فى تعاطف معها بينما تابعت اشجان قائله
- امبارح بالليل حالته ساءت جرينا بيه على الدكتور قالوا لازم يروح المستشفى حالا لان حالته مَش كويسه خدناه و جرينا بيه على المستشفى الحكومى الطوارىء قالولنا مفيش مكان و بعد خناق و زعيق واخذ ورد اتحجز بس مالوش علاج هناك لازم يروح مستشفى كويسه و متخصصه فى حالته و المستشفى اللى هو فيها مفيش فيها إمكانيات خالص احنا بس سبناه هناك عشان يبقى تحت الملاحظه لو حصل حاجه انا منمتش طول الليل قلبى كان بيتقطع يا ست عشق و اضطريت اسيبه و اجى النهارده عشان اقبض الدكتور الله يستره عرض يتنازل عن أتعابه فى العمليه عشان هو عارف و حاسس بيا وبظروفى بس تكاليف العمليه كثير اوى الافات يا ست عشق و انا اجيب منين العين بصيره و اليد قصيره لو عليا كنت جبت له الدنيا كلها بس اعمل ايه انتى عارفه ان من ساعه جوزى ما مات و انا بأحاول أعيش و اصرف عليه و اوفر مصاريف العلاج و الادويه و عمه مَش راضى يدينى اى حاجه او حتى يساعدنى اخر مره وطيت على أيده أبوسها انه يدينى ثمن الحقنه بتاعه الولد مكنش معايا حاجه لكن قلبه حجر طردنى من بيته مع انى مَش بطلب حاجه لنفسى انا كنت عايزه حق ابن اخوه اليتيم او حتى يساعدنى فى تكاليف العلاج و الدوا
- هى العمليه هتتكلف كام ؟
- حوالى عشرين الف جنيه من غير أتعاب الدكتور دا غير المتابعه
صمتت عشق حائره فقد كان المبلغ كبيرا بالنسبه لما تستطيعه الان ربما كانت فى الماضى تستطيع ان تدفع تلك النقود ببساطه و دون عناء فهى بالنسبه لها وقتها شىء لا يذكر اما الان فهى مثل اشجان تكافح لكل تحصل على بضعه جنيهات لتعيش حقا هناك حكمه لكل ما يحدث لنا فلولا ما مرت به و ما فعله عمر معها ربما لم تكن لتعرف اشجان و لا ان هناك من يعانون فى الحياه و بلا ثمن نظرت لها فى شفقه و حزن على حالها وما تواجهه ثم امتدت يدها الى جيب فستانها لتخرج كيس نقودها و تقترب من اشجان فى لطف قائله
- بصى يا اشجان انا قبضت النهارده و دول ٥٠٠جنيه هما كل اللى معايا دلوقت و لما هاروح هابعتلك زيهم انا لو كنت اقدر اعمل اكثر من كده كنت عملت و الله بس ان شاء الله ربنا هيحلها من عنده يا حبيبتى قولى يا رب
- لا يا ست عشق انا مَش هاقدر اخد الفلوس دى انا عارفه ظروفك كويس انتى على وش ولاد ه و محتاجه كل قرش دلوقت وانا عارفه انك مَش هتقدرى بعد كده تشتغلى لفتره من غير الفلوس دى هتعملى ايه انتى ظروفك صعبه زى بالضبط و عايزه تدينى كل اللى معاكى لا مَش هاقدر سامحينى
-متبقيش عبيطه انا هاقدر اتصرف و بعدين ربنا مبينساش حد المهم دلوقت الولد لازم نحاول نجمع المبلغ عشان ابنك يخف و يبقى عال امسكى بقى متتعبيش قلبى انا مَش قادره على ألمناهده دى .
لتاخذ منها اشجان المبلغ و هى تبكى وتحتضنها قائله
- ربنا ما يحرمنى منك يا عشق ولا من طيبه قلبك لو اختى مَش هاتعمل معايا كده ان شاء الله اول ما ظروفى تتحسن هارجعهم ليكى و جميلك ده مَش هنساه ابدا
- متبقيش عبيطه يا اشجان احنا اخوات بصى انا هاخرج دلوقت عشان اكمل شويه الشغل اللى فاضلين بره دول عشان نروح خليكى انتى مستريحه هنا انا هابعتلك صفيه عشان لو عايزه حاجه و عموما مَش فاضل كثير على الورديه انا لو اقدر كنت اقولك روحى بس انتى عارفه انه مَش هينفع
لتحاول اشجان الاعتدال بصعوبه و هى تقول
- كثر خيرك يا عشق ربنا ما يحرمنى منك انا كويسه و ممكن اجى اشتغل معاكم يعنى انتى تشتغلى و انتى حامل و تعبانه و انا استريح.
- لا خليكى مستريحه هنا عشان خاطرى احنا قربنا نخلص خلاص و انا مَش تعبانه وبعدين النهارده اخر يوم ليا انا هاخد اجازه من بكره ان شاء الله عشان استريح شويه قبل الولاده انتى لازم تستريحى عشان انا عارفه انك ممكن تسهرى مع ابنك طول الليل ربنا يشفيه ليكى يا رب
- ربنا يقومك بالسلامه يا عشق و يفرحك بابنك امين
- تسلمى يا اشجان و يخليلك ابنك و ميحرمكيش منه ابدا
خرجت عشق و تركتها لتمضى لحظات قبل ان تدخل عليها صفيه مبتسمه
- ها يا اشجان بقيتى احسن دلوقت
- الحمد لله يا صفيه نحمده على كل حال
- شكلك لِسَّه تعبانً
- لا بس عندى شويه صداع مجننى
لتتجه صفيه الى احد الأركان لتشعل سخان كهربى صغير
- انا عارفه دواكى انتى مَش هيفوقك الا فنجان قهوه مضبوط من ايدى
- تسلمى يا حبيبتى متحرمش منك انتى طيبه اوى يا صفيه
لتبتسم صفيه لها و تقول و هى تقلب القهوه قبل ان تضعها على السخان
- انا طيبه امال الست عشق دى تبقى ايه انتى عارفه هى بتعمل ايه دلوقت
لتعتدل اشجان فى جلستها على الاجوله و هى تنظر اليها فى اهتمام
- عملت ايه يا صفيه
- الست عشق لفت على كل البنات و كلمتهم و حكتلهم على موضوع العمليه و اتفقنا نجمع مبلغ نساعد بيه و كل واحده هتدفع اللى تقدر عليه احنا عارفين يا اشجان انك محتاجه كثير و ان يمكن الفلوس دى متعملش حاجه بس والله كلنا بنحبك
نزلت الدموع من عينى اشجان و هى تنظر لصفيه قائله
- هى عملت كده ربنا ما يحرمنى منها و لا منكم ابدا كفايه انكم كلكم وقفتم جنبى و عايزين تساعدونى
- متقوليش كده احنا اهل و ... ليقاطعها صوت احدى البنات تناديها
- صفيه يا صفيه تعالى ساعدينا لحسن الشوال ده ثقيل اوى
- حاضر انا جايه لتلتفت صفيه الى اشجان قائله لها
- معلش يا اشجان هارجعلك علطول انتى عارفه ان الست عشق متقدرش تشيل حاجه بظروفها دى بصى انا ها روح أساعدهم و ارجعلك هنا أعملك القهوه
- روحى يا صفيه متشغليش نفسك بيه انا هاغمض عينى شويه لحد ما نمشى احسن
- طيب يا حبيبتى سلامتك لتخرج تاركه اشجان و هى تغمض عيناها فى إرهاق محاوله النوم و لم تنتبه الى السخان الصغير الذى تركته مشتعلا فى احد الأركان .
لا تعلم اى من العاملات فى المشغل كيف بدا الامر ربما صرخت احدهم بكلمه حريق او احست اخرى برائحته الدخان التى انتشرت فى المكان كله بفعل اجوله القماش المحترقه و لكن من المؤكد انها لحظات مجرد لحظات حتى تحول المشغل كله الى كتله ملتهبه من النيران المشتعله و التى تنذر بكارثه .تدافعت العاملات من المكان المشتعل صارخات يحاولن الخروج فى سرعه قبل ان يختنقن بفعل الدخان الذى انتشر فى المكان بينما حاولت أخريات المساعده فى محاوله لإطفاء النيران التى انتشرت فى المكان بسرعه دون جدوى بينما وقف من نجح فى الخروج يراقب المكان بعيون باكيه لا يمكنها استيعاب ما يحدث و بعد فتره ليست بالقصيرة وصلت اولى عربات الاطفاء التى استدعاها السكان لتحاول السيطره على النيران و التى بدات تنتشر بسرعه و تهدد بكارثه لكل ما حوله بينما وقفت صفيه تنظر فى رعب الى المشغل و الذى بدا بابه الخارجى يشتعل فى سرعه باكيه صارخه و هى تحاول الدخول بينما تمنعها باقى العاملات فى قوه خشيه ان تحرق نفسها لتصرخ فيهم سيبونى انا لازم أساعدهم ست عشق و اشجان جوه لازم نعمل حاجه حرام .لتبكى باقى العاملات بشده و هم يمنعونها فلا احد يمكنه ان يعبر هذا الأتون المشتعل لينقذهم بينما بدا رجال الاطفاء بمحاوله السيطره على النيران التى اشتعلت فى الباب فى محاوله يائسه للدخول لإنقاذ من يصرخون بالداخل .
