- مبروك يا بنى يتربوا فى عزك يا رب قالتها الحاجه فاطمه و هى تغالب دموع الفرح التى تتساقط من عينيها بينما نظرت اليها هدى فى عتاب مرح قائله
- هو احنا مَش هنبطل العاده دى أبداً نزعل نعيط نفرح برضه نعيط ده كلام يعنى
لتضحك امها على كلامها و ترد عليها قائله بس يا غلابويه هو احنا مَش هنخلص من لسانك ده دى دموع الفرح ده اليوم اللى انا كنت مستنياه طول عمرى انى اشوف ولاد عمر و اشيلهم بأيديا أعز الولد ولد الولد يا هدى
- يا سلام يعنى انا لما اتجوز و اجيب ولاد هتعيطىً كده برضه و الا الدموع دى لسى عمر بس
- كده يا هدى انتى عارفه ان غلاوتكم عندى واحده انتم عينيا اللى بشوف بيها يا بنتى
- بهزر معاك يا بطوط بس ايه العيال دى يا ابيه حاجه مختلفه خالص قطط
- يعنى هيجيبوا منين انا ابنى ما شاء الله زى القمر و عشق انتى عارفاها الله اكبر عليها
- يعنى مين هيشهد غيرك يا حاجه بقى دا قمر ده حرام عليكى
- بس يا بت يا هدى
ليبتسم ابوه فى هدوء و هو يتابع حديثهما ويقول
- شايف يابنى ربنا كريم اد ايه مين كان يقول انك تلاقيها و ان ربنا ينعم بفضله علينا و انى اشوف اولادك يا عمر الحمد و الشكر ليك يا رب .
ليقبل عمر يد ابيه و دموعه تتساقط و هو يقول
- سامحنى يا حاج و ادعيلى
- ربنا هو المغفور الرحيم يا ابنى انا مسامحك و راضى عنك قلبى مقدرش يغضب عليك حتى بعد كل اللى حصل كنت بادعيلك بالهداية و الحمد لله ربنا استجاب بس مَش انا يا ابنى اللى تطلب منه السماح انت عارف انت عملت ايه و مع مين عشق اللى لازم تسامح و ترضى
- تفتكر ممكن تسامحنى بعد كل اللى حصل و اللى عملته معاها
- عشق يابنى طيبه اوى و بنت حلال قلبها ابيض و مليان بالحب و اللى بيحب بيسامح بس انت اصبر عليها و خليك حنين معاها هى الست عايزه ايه يا ابنى غير سكن و رحمه و ظهر تتسند عليه .
- عندك حق يا حاج بس انا مَش عارف اعمل ايه ولا أقابلها ازاى انا كنت بادور عليها.وهاتجنن اشوفها و حتى لما كانت فى الغيبوبه مفارقتهاش لحظه واحده بس دلوقت انا لاول مره خايف خايف اشوفها خايف من المواجهه دى اوى يا حاج و مَش عارف ايه اللى ممكن يحصل
- مهما عملت او قالت لك استحملها يا بنى اللى شأفته معاك و الى انت عملته فيها مكنش هين و لازم تصبر لحد ما هى تطمن ليك و تثق فيك من ثانى و انت عليك دور كبير يا عمر .
- ازاى يا حاج قولى
- اول حاجه تعملها يا عمر ان ترد الحقوق لصحابها و تسلم الامانه اللى امرك ابوها عليها لصاحبتها وقتها بس هتكون بدات اول الطريق السليم .
- انا كنت ناوى فعلا اعمل كده و اروح للمحامى عشان أرجعاها كل أملاكها انا مَش عايز اى حاجه غير انها تسامحنى و تخلينى جزء من حياتها
- ياه يا عمر اخيرا فوقت بس متاخر اوى يابنى عايز تبقى جزء من حياتها بعد ما كنت انت حياتها كلها سبحان الله لله فى خلقه شئون فعلا الانسان ده غريب مَش بيحس بالنعمه اللى ربنا ادهاله الا متاخر اوى .
- لترد الحاجه فاطمه. خلاص و النبى يا حاج و حياه عمر وولاد عمر لازم تنسى اللى فات و نساعده انه يبتدى من جديد و يربى ولاده .
- خلاص يا حاجه بس انا كان لازم افكره و أنبهه
- عمر ربنا نور له بصيرته و هداه و ربنا يتمم شفا عشق على خير و تتمم فرحتنا الا قولى يا عمر هاتسمى الولاد ايه
- حمزه و عشق يا امى
لتسأله فى استغراب
- اشمعنا الاسمين دول يا ابنى
- لان داده عليه قالتلى ان عشق لما كانت حامل حلمت ببباها و هو اللى قالها ان ربنا هيرزقها بحمزه مكنتش تعرف ان ربنا هيرزقها ببنت كمان
- طيب و ليه تسميها عشق يا ابنى ما كفايه مامتها
- انا عايز الاسم دا يفضّل علطول فى قلبى و على لسانى و كمان عشان تبقى قصتنا زى قصه ابوها و امها و اسميها عشق برضه لانى بعشق امها .
ضحكت هدى و هى تغمز له و تقول
- دلوقت بس عرفت انك بتعشقها و تموت فيها يا ابيه عجايب
لتنهرها الحاجه فاطمه قائله
- ثانى يا هدى كفايه بقى اخوكى مَش مستحمل
- خلاص أدينى سكت اه بس استلقى بقى وعدك و اللى هيجرالك منها لما تقابلها دى هتكون المواجهه الكبرى
- انتى مَش هتبطلى مناكفه فى اخوكى يعنى اللى فيه مكفيه مَش ناقص لسانك الطويل ده
- سكت اه لما نشوف
- طيب يالا بينا دلوقت و بعدين يحلها ربنا
