يعنى ايه يا على ازاى ده حصل بالضبط انا مَش فاهمه؟
أستاذه عشق احنا كنّا عارفين و متوقعين اللى هيحصل ده من الاول انا مَش فاهم حضرتك ليه متضايقه دلوقت
مَش معنى انى كنت متوقعه انه هيحصل انى مَش هاتضايق يا على دا معناه اننا بدانا الحرب ضد الفساد و هتحصل مشاكل و مواجهات كثير انا كان عندى امل ان الموضوع ينتهى عند فتح المظاريف و يخافوا انهم يكملوا غلط
حضرتك عارفه يا أستاذه ان الموضوع فيه رشوه و ان اللجنه كلها متواطئهً معاه و ان فيه لعب جامد جدا وفساد فى الموضوع
طيب كانوا عايزين انى أتنازل عّن المناقصه وانسحب من الاول ليه يا على و عمالين يهددونى كل شويه انا مَش فاهمه لما هما ضامنين النتيجه عملوا كده ليه ؟
لأنهم خايفين منك و من اللى جاى و من رد فعلك بعد كده
طيب هانعمل ايه دلوقت يا على الخطوه الجايه ايه بالضبط؟
ولا حاجه يا فندم احنا مَش هانعمل اى حاجه مناقصه. و خسرناها كدا الموضوع بالنسبه لينا انتهى
انتى بتقول ايه يا على يعنى انت عايز انى انسحب من المواجهه انا لازم اكشفهم و اكشف الفساد بتاعهم قدام الكل و اخد حقى و حق الناس
أستاذه عشق دول ناس مجرمين و شبكه فساد كبيره عشان خاطرى ابعدى عن الموضوع ده
لا يا على انا متعودتش انى اهرب انا ابويا علمنى ان الحق لازم له قوه تحميه و انا قويه بالحق ده يا على
بصى يا أستاذه الموضوع ده احنا سلمنا المستندات بتاعته للجهات الرقابية و هى متابعه الموضوع من البدايه و هما هيتصرفوا بس هما محتاجين شويه وقت
برضه يا على احنا لازم نساعدهم
لا يا أستاذه احنا لو أدخلنا دلوقت يبقى بنعطل شغلهم هما لازم ياخدوا وقتهم و يحققوا فى الموضوع و يتأكدوا من صحه المستندات
و نتيجه المناقصه يا على دى مَش اكبر دليل و إثبات على كلامنا
لا حضرتك لانك طرف فى الموضوع و صاحبه مصلحه برضه هما لازم يتأكدوا بنفسهم
طيب يا على انا هاسمع كلامك مؤقتا بس انا عايزاك تتابع الموضوع ده بنفسك
ان شاء الله
طيب خلينا دلوقت نركز على التوسعات الجديده و خطوط الانتاج اجمع ليا مجلس الاداره انا حابه انى اتكلم معاهم
حاضر يا فندم تحبى امتى؟
ادينى ساعه واحده بس و بعدين نبتدى
خلاص انا مستنى فى مكتبى و لما حضرتك تستعدى بلغينى
تمام اتفضل انت دلوقت ليخرج من مكتبها وترفع هى سماعه الهاتف لتطلب رقما
ايوه يا سياده اللوا زى ما اتفقنا حضرتك انا عايزه كل المستندات و الادله على مكتبى و بأسرع وقت ممكن
......
لا لما حضرتك تجهزها انا هاقولك هنعمل بيها ايه بالضبط
.......
شكرًا مع السلامه وبنفس الوقت دخل على الى مكتبه متوترا ليرفع سماعه الهاتف هو الاخر و يطلب رقما و ما ان سمع محدثه على الطرف الاخر حتى قال
ايوه مساء الخير ازى حضرتك
.........
انا كنت لِسَّه معاها دلوقت و برضه مصممه تكمل فى الموضوع انا قدرت انى اقنعها تستنى شويه بس أظن انها مَش هتصبر كثير
.....
ربنا يسهل عموما هاحاول على اد ما اقدر
.........
خلاص اتفقنا نفس المعاد ونفس المكان. سلام دلوقت لان ورايا اجتماع مهم . اغلق الخط ليتجه الى قاعه الاجتماعات ليجد انها قد بدات لاجتماع بالفعل و دون انتظاره ليتنهد و هو يجلس بجوارها صامتا مستمعا الى ما تقول فى صمت لتمضى ساعتين و ينتهى الاجتماع لتخرج هى و تترك المكان بينما ينظر هو الى كرسيها الفارغ صامتا . مضى يومان دون اى تغيير حاول عمر الحضور و التحدث اليها و لكنها رفضت اى محاوله للحوار فيما بينهما انعزلت عن الجميع فى غرفتها تحتمى بها منهم و تتعلل بانشغالها عنهم فى العمل ليحمل لها هاتفها الكثير من المكالمات و الرسائل التى حرص عمر على إرسالها لها منذ تلك الليله فلم تحاول حتى ان تفتحها او تطلع عليها لتغلق هاتفها الخاص تماما حتى لا يستطيع هو ان يتواصل معها كاد ان يجن و هى تبتعد عنه مره اخرى كانت تعاقبه و تعاقب نفسها فى نفس الوقت معه .
عشق يا بنتى هتفضلًى كده كثير
فيه حاجه يا داده ؟
ايوه يا بنتى انتى وبعدين معاكى هتفضلًى حابسه نفسك هنا فى الاوضه دى لحد امتى و الولاد كمان متضايقين و حاسين ان فيه حاجه مَش مضبوطه
داده انا تعبت خلاص و مَش قادره كل واحد فيكم بيضغط عليا شويه الشغل و الصراعات و عمر و الولاد حتى انتى يا داده
متزعليش منى يا بنتى انا بس خايفه عليكى
متخافيش عليا يا داده انا كويسه اوى و حتى لو مكنتش لازم أقوم و اكمل عشان خاطر الولاد
طيب يا بنتى ممكن اعرف انتى ليه قافله تليفونك
هاجاوبك يا داده بصراحه بأنى مَش حابه انى اسمع صوته او اقرا كلامه ليا عايزه أغمض عينى و انسى كل حاجه حتى نفسى
طيب يا بنتى و الاستاذ اياد ماله؟
اياد مَش فاهمه ايه دخله بالموضوع؟
هو اتصل عليكى اكثر من مره و لقى التليفون خارج نطاق الخدمه فاتصل على البيت بيسأل عنك و بيفكرك بميعاد النهارده
يا خبر الحفله دا انا نسيت الموضوع ده خالص اعمل ايه انا دلوقت و مَش هاقدر انى اعتذر له فى اخر دقيقه امرى لله لازم الحق البس قبل ما يعدى عليا
انتى هتخرجى النهارده يا بنتى؟
ايوه يا داده رايحه حفله خاصه و بصراحه مَش عارفه هارجع امتى النهارده
ربنا يجعل ليكى فى كل خطوه سلامه
طيب يا داده انز لى انتى دلوقت و سيبينى استعد
طيب يا بنتى مضت ساعتين لتعود داده عليه و تخبرها ان اياد ينتظرها بالأسفل نزلت بعد نصف ساعه او يزيد كان أياد قد بدأ يشعر بالقلق من تأخرها لتلمحه و هى تنزل السلم ببطء و هوينظر فى ساعته فى توتر فتبادر بالاعتذار له
اياد انا اسفه جدا على التأخير انت عارف انى من الناس اللى بيحافظوا على مواعيدهمً اد ايه بس انا فعلا نسيت الميعاد و الحفله و مكنتش مستعده لولا ان داده عليه نبهتنى و قالت ليا انك اتصلت و هاتعدى عليا لينظر لها فى انبهار من هيئتها و جمالها دون ان ينطق لتنظر له فى دهشه و تسأله
اياد هو فيا حاجه غلط انت بتبص ليا اوى كده ليه ؟
اصلك النهارده حلوه اوى اوى لتبتسم فى خجل و تقول
و بعدين معاك احنا هنبتدى الكلام ده من دلوقت هتخلينى ارجع فى كلامى و اخاف اروح معاك الحفله
لا فى عرضك انتى عارفه الحفله دى مهمه بالنسبه ليا اد ايه و انا معتمد على الله و عليكى يا عشق
اطمن ربنا يسهل ان شاء الله
بس انا مقدرتش فعلا امسك نفسى او لسانى قدام الجمال و الشياكه دى كلها
ثانى يا أياد
و الله باتكلم بحسن نيه و انتى عارفه ومتاكده من دا
ماشى يا سيدى طيب مَش يلا بينا عشان احنا كده اتاخرنا
طيب اتفضلى قدامى كانت الداده عليه واقفه تنظر لهم مبتسمه لتستدير عشق و تقول لها
داده انا خارجه لو احتجتى اى حاجه او حابه انك تكلمينى فى اى وقت إتصلى عليا انا فتحت التليفون بتاعى
ماشى يا بنتى اتكلى انتى على الله ربنا يجعلك فى كل خطوه سلامه
ربنا يخليكى ليا يا داده خرجت معه ليفتح لها باب السياره و تجلس بجواره مبتسمه
تعرفى النهارده يوم جميل و انا متفاءل جدا
مَش فاهمه ليه النهارده يعنى بالذات ؟
حد يكون جنبه الحلاوه و الجمال ده كله و ميكونش متفاءل و عنده امل فى الحياه لتضحك فى براءه و تسأله
انت ايه حكايتك النهارده بالضبط يا اياد ؟
تصدقى لو قلت ليكى انى مَش عارف بس انتى الوحيده اللى ممكن تعرفى و تفهمى مشاعرى دلوقت ايه
عارفه و فاهمه و يمكن حاسه بِيك اكثر من اى حد ثانى
طيب ايه لتنزل هى عينيها فى خجل منه و تسأله
هو فاضل كثير و نوصل؟
لا خمس دقايق و نكون هناك انتى عارفه طبعا هتعملى ايه يا عشق ؟
متخافش يا اياد انت عارف انت غالى عليا اد ايه و على اد الغلاوه دى هاتصرف
ربنا ما يحرمنى منك ابدا اه وصلنا خلاص لتجد نفسها تقف امام بوابه لقصر كبير متلالىء الأنوار يفوق قصر والدها بمراحل لتنظر الى للمكان بانبهار ودهشه
عشق مالك فيه ايه هتنزلى و لا ايه؟
تعرف المكان هنا جميل فعلا و يشد الانتباه
ها فعلا انا كمان باقول كده برضه كان يتحدث اليها و عيناه تتابع غاده حسناء جميله القسمات ترتدى ثوب ذهبى اللون مرصع بالجواهر و تتحدث الى الحاضرين مبتسمه
هى دى يا اياد؟ كانت عشق تسأله و هى تنظر الى الفتاه فى اهتمام ليجيبها فى ضيق
ايوه هى دى هايدى طليقتى
بصراحه حلوه اوى و شيك جدا كمان ليبتسم لها اياد و يرد عليها فى مرح
بس من اشيك و لا ارق منك انت يا جميل
مَش بقولك أن النهارده فيك حاجه غريبه مَش عارفه ايه هى
هابقى اقولك بعدين بقولك ايه ما تيجى نسلم عليها و نشكرها على الدعوه دى لترد عليه فى مرح مِمزوج بالسخريه
لا فعلا عندك حق واجب برضه ليمسك هو يدها و يتجه الى منتصف القاعه
ازيك يا هايدى عاش من شافك تنظر له فى دهشه تتحول الى ارتباك و نظره لا يمكن ان تعرف معناها حينما رأت عشق واقفه الى جواره و كأنها حوريه او اميره من أميرات الحكايات خرجت من كتب الأساطير بهذا الثوب الأسود الرائع الذى أحاطها بنعومه و رقه وشعرها المرفوع الذى يلتف حول راسها متاح يزينها و عينيها التى يمكن ان تتوه حين تنظر إليهما .
طيب مَش تعرفنا يا اياد؟
دى عشق قصه عشق حكايه لوحدها يا هايدى و مَش هاقدر افهمهالك دلوقت بعدين بقى على رواقه نبقا نتكلم لتمد يدها اليها فى برود مصطنع لتقود لها
اه اهلًا وسهلا عموما اصحاب اياد لازم يكونوا أصحابى لتمد عشق يدها فى ود و تقول
الشرف ليا يا مدام هايدى اياد كلمنى عنك كثير اوى لتنظر لها بدهشه من حديثها وتسألها باهتمام
و قالك ايه عنى بقى؟
كل خير طبعا دا بيعز حضرتك جدا
اه عموما اهلًا وسهلا معلش انا هاستاذن دلوقت لانى لازم انى اهتم بضيوفى و اكيد هنتقابل و هيبقى لينا كلام كثير مع بعض بعدين لترد عشق بلطف
ان شاء اللهً بينما يكمل اياد بسخريه مقصوده
اتفضلى انتى يا هايدى و متشغليش نفسك بينا خالص و على فكره شكرًا اوى على الدعوه للحفله الحلوه دى انا و عشق كنّا فعلا محتاجين اننا نغير جو لتبتسم له بجمود و هى تنصرف فى سرعه ليطلق هو ضحكه مرحه بينما تنظر له عشق لائمه
اياد و بعدين معاك انا مستغربه اسلوبك اوى النهارده انت تعمدت انك تضايقها انت ايه حكايتك بالضبط
ولا حاجه يا عشق بس انا مَش زيك انا بأحب انى أصفى حساباتى اول بأول.
ايوه بس
انتى مَش عطشانه تعالى نشرب اى حاجه لتتنهد فى استسلام و تقول
ماشى يا اياد تحت امرك ليحضر لها عصير البرتقال و يناوله لها
انا عارف انك بتحبى عصير البرتقال مَش كده لتبتسم و تقول
فعلا يا اياد
طيب اتفضلى تحبى نقعد شويه
اللى تشوفه انت انا جايه النهارده الحفله دى عشان خاطرك انت بس
طيب تعالى ليدخل بها الى شرفه هادئه بعيده عن الأنظار لتدخل وراءه و تقول
بس المكان هنا هادى اوى يا اياد و مفيش حد هنا غيرنا
طيب و ايه يعنى عشان نقدر نتكلم براحتنا ولا هتضايقى كده
انا ليه لا ابدا اتفضل عادى انا ممكن اقعد معاك فى اى حته يا اياد انا باثق فيكً جدا
طيب احكيلى بقى ايه الجديد فى الموضوع بتاعك لتنظر لهً يصدمه وتسأله
اياد وهو ده وقته دا احنا فى حفله
مَش مشكله الحفله اصلا و بعدين هو احنا عندنا موضوع اهم عشان نتكلم فيه
المناقصه رسيت على مدحت شركه المجد اول امبارح
عارف يا عشق لتنظر له عشق فى دهشه هذه المره
طيب و لما انت عارف بتسألنى ليه على الجديد ؟
بصى يا عشق انا عرفت نتيجه المناقصه قبل ما المظاريف تتفتح حتى و اتاكدت لما النتيجه تم الإعلان عنها و الأخبار جت ليا فى ساعتها انا متابع كل التفاصيل دى انا لما بسالك على الجديد ابقى حابب انى اعرف انتى ناويه على ايه بالضبط بعد كده؟
و تفتكر انى ناويه على ايه يا اياد ؟
انا اللى سالت الاول يا عشق
تعرف الاستاذ على النائب بتاعى لما بلغنى النتيجه نصحنى انى انسى الموضوع و اسيبه للجهات الرقابيه اللى متابعاه لان الناس دول مجرمين انت ايه رأيك يا اياد اعمل كده لينظر لها اياد نظره طويله ثم يرد عليها بهدوء
للاسف عشق اللى انا اعرفها مَش ممكن تعمل كده طبعا لتبتسم له فى هدوء و تقول
انت الوحيد اللى بتفهمنى و عارف دماغى كويس يا اياد
بس ده مَش معناه انى مَش خايف عليكى يا عشق و هاقولك ان الاستاذ على ده عنده حق الناس دى من متابعتى للموضوع مَش سهله ووراها شبكه فساد كبيره اوى يعنى ان فعلا انتى لو دورتى وراهم تبقى بتدخلى نفسكً فى عِش الدبابير
وانا مَش خايفه يا اياد بالعكس
انا فاهم يا عشق ان نقطه ضعفك الوحيده ولادك و هما كمان لو صممتى انك تدورى وراهم ممكن يدخلولك منها لانهم عارفين ده كويس زيي بالضبط متفتكريش ان الناس دى بتلعب دى بتدور و تعرف عّم اللى قدامها كل حاجه لتنظر له فى قلق و توتر و تسأله
تفتكر ممكن يعملوا كده؟
وايه اللى هيمنعهم يا عشق بصى انا طبعا معاكى وزى ما وعدتك محدش ان شاء الله هيقدر يقرب ليكى او للولاد طول ما انا موجود و جنبك بس برضه دا مَش معناه انك تستفزيهم كل اللى بطلبه منك دلوقت انك تهدى شويه و تاخدى بالك كويس اوى و يا ريت فعلا تبعدى عن الموضوع ده شويه لحد ما اقدر انى أخلصه ليكى
ايوه يا اياد بس انا. ... لتقاطعهم هايدى التى لاحظت جلوسهم فى ذلك المكان الهادىء بمفردهم لتسالهم فى برود و ملامح الضيق و الغيره باديه على وجهها
ايه يا عشق قاعده هنا لوحدك مع اياد و سايبين الحفله الظاهر انها مَش عجباكى ولا ايه؟ لتبتسم لها عشق و ترد
لا ابدا بالعكس الحفله لطيفه خالص زى صاحبتها بس اياد طلب منى اننا نقعد هنا نتكلم شويه لتنظر له هى بعينين تلمعان من الغضب لتقول
اياد طول عمره كده مَش بيحب جو الحفلات انا حتى استغربت انه قبل دعوتى النهارده على الحفله و جابك معاه. ليبتسم اياد لها فى تهكم و يقول
عادى يا هايدى الواحد برضه بيزهق و بيحب يجدد و بعدين انا كنت حابب انى اعرف عشق عليكى لأنكم هتتقابلوا كثير بعد كده اوى لتنظر له هايدى فى صدمه من معنى كلامه لها و تقول بصوت بارد
عموما مفيش مشكله لما تخلصوا كلامكم تقدروا تنضموا لينا جوه همت ان تذهب و لكنه استوقفها قائلاً
هايدى انا حابب انى اشوف يوسف لتنظر له بابتسامه متحفظه وًترد
اياد انت عارف كويس اوى انى مَش بأمنع يوسف عنك ابدا بالعكس دا اختياره هو مَش انا عموما لو حابب تشوفه ممكن تطلبه و تتكلم معاه و لو هو حابب انه يشوفك ممكن تيجى تاخذه انا معنديش اى مشكله لينظر لها فى تحدى و يجيب
عندك حق يا هايدى الموضوع ده بينى و بين ابنى و مَش لازم اى حد ثانى يدخل بينا فعلا عشق تعالى ندخل جوه لان الجو بدأ يبقى بارد هنا اوى ليتركها و ليمسك بيد عشق و يذهب بها و هى تتابعهم بعينان تلمعان من الغضب بينما كانت عشق تذوب خجلاً من حديثه لها و تقول له بصوت منخفض و هى تتجه معه الى الداخل
اياد انت زودتها اوى معاها و بعدين انا حاسه انك أهنتهاباسلوب غير مباشر و كنت شايفه الدموع بتلمع فى عنيها و انا خارجه ليرد و هو يعض على اسنانه من غضبه
مقدرتش امسك نفسى يا عشق و أكون لطيف معاها يعنى انتى مَش شايفه غرورها و ردها عليا لما طلبت منها انى اشوف ابنى مَش كفايه انها عمرها ما حاولت انها تقرب ما بينا و بتبعده عنى علطول و بكل طريقه لا وردودها كمان ليا مستفزه
اياد علاقتك بابنك حاجه بايدك انت هى ملهاش دخل بالموضوع ده خالص لازم تحاول معاه اكثر من كده انا لما انت حكيتلى ان عندك ابن مكنتش مصدقه اصلا
زى ما حكيت ليكى يا عشق انا وًهى كنّا صغيرين اوى و كنّا بنحب بعض اول حب و اول ذكرى بس هى اتغيرت بعد كده اوى و مكنتش عارف أتفاهم معاها خالص
ودا معناه انك تتخلى عنها يا اياد و كمان تحملها فشل علاقتك بابنك انت غلطان زيها بالضبط انكم مَش حابين انكم تحاولوا اوًحتى تقربوا من بعض
تعرفى اول ما شفت حمزه و عشق فكرونى بأبنى يوسف علطول عشان مده اتشديت لهم اوى بس كانت احلى صدفه انى لقيتك
طيب بقولك ايه كفايه الكلام ده و كمان الوقت أتأخر احنا مَش هنمشى بقى؟
ليه الحفله لِسَّه فى أولها
معلش يا اياد انت عارف انى عندى بكره شغل ولازم اصحى بدرى ولا انت مَش عايز تسيب الحفله و صاحبه الحفله و تمشى
لا خلاص اللى تحبيه يلا بينا . عادت الى المنزل لتصعد الى غرفتها و تستغرق فى النوم دون ان تعرف ما يخبىء لها الغد من احداث . استيقظت على صوت الهاتف الخاص بها يدق لترفعه و تستمع الى صوت اياد يحدثها لتسأله بدهشه.
اياد صباح الخير ليأتى صوته قلقاً متوتراً و هو يرد عليها
صباح الخير يا عشق انا اسف انى أزعجتك بدرى كده بس
خير فيه حاجه يا اياد مَش من عوايدك انك تكلمنى بدرى كده و خصوصاً اننا كنّا مع بعض بالليل فى الحفله؟
اصل فيه حاجه كده حصلت النهارده و حبيت انك تعرفيها منى قبل ما تعرفى من حد ثانى لتعتدل فى فراشها و هى تسأله بقلق
خير انا مَش فاهمه انت تقصد ايه و حاجه ايه اللى لازم انى اعرفها منك ؟ ليتنهد فى ضيق و يسألها
هو اللاب بتاعك جنبك؟
ايوه موجود
ممكن تفتحيه على مجله .... لتذهب و تفتحه وًهى تترقب ما سيظهر لتطلق صرخه دهشه و هى تنظر الى الصور الموجوده و الكلام الذى ظهر أسفلها
ايه دا بالضبط يا اياد فهمنى انا مَش فاهمه حاجه ازاى ده حصل و امتى ؟
عشق ارجوكى انا اتصدمت زيك بالضبط كده اول ما شفتها و الناس بدات تكلمنى و تسال انا كنت هاكلم المجله دى حالاً و انشر تكذيب للخبر و هاطلب رفع الصور دى كلها بس قلت انى أكلمك انتى الاول و أعرفك قبل ما تعرفى من حد ثانى غيرى بصى يا عشق انا مَش حابب انك تفتكرى انى كنت باستغلكً او باستغل وجودك معايا فى الحفله انتى كُنتُى معايا و شفتى اللى حصل المصور ده اخد شويه صور للذكرى زى اى مصور بيبقى موجود فى الحفلات من النوع ده لكن انا مكنتش فاكر انه ممكن انه ينشرها او يستغلها بالشكل ده لتتنهد و هى تفكر
انا عارفه و متاكدهً يا اياد ان الموضوع ده بعيد عنك تماما بس كده الموضوع ممكن يتعقد اكثر و اكثر و بعدين الناس لما تشوف الخبر ده هتقول ايه وهتكلم علينا كل اما تشوفنا مع بعض
عشق انا اسف و محرج منك جدا انا اللى حطيتك بايدى فى الموقف ده يمكن مكنتش اقصد بس اللى حصل
طيب يا اياد انا لسه صاحيه على مكالمتك دى ممكن تسيبنى شويه أفكر و اقولك هنعمل ايه مع الناس دى بالضبط انت عارف اننا مَش لازم نتسرع والا ممكن نخسر كثير اوى
طيب يا عشق انا هاسيبك شويه تفوقى و تشربى قهوه و أكون انا عملت كام مكالمه كده و هارجع أكلمك ثانى
ماشى يا اياد
عشق انا اسف مره ثانيه على كل اللى حصل و بيحصل ده
خلاص يا اياد اللى حصل حصل المهم اننا نتصرف ليغلق الخط و تتأمل هى الصور الموجوده على شاشه الجهاز و التى جمعتها مع اياد فى حفله اليوم السابق يبتسمان و وضع تحتها عنوان بالخط العريض عن قرب اقتران رجل الاعمال الناجح بزهره المجتمع و سيده الاعمال. لماذا يتحول كل امر بسيط تفعله لمساعده الآخرين الى كارثه تنهدت فى ضيق و هى تفكر فى الامر علها تجد له حلاً لتقوم من فراشها و تنادى داد ه عليه لتعد لها كوبا من القهوه لم تسمع اعتراضها ولم تنتبه حتى له . رجعت الى غرفتها لترتدى ملابسها. شارده تفكر فى القادم الذى تخشاه كثيرا ليرن جرس التليفون لينتزعها من. شرودها فتنتفض للحظه كادت ان تتجاهله لولا انها خشيت ان يكون الامر هاما لترفع سماعه الهاتف و تجد اخر صوت تتوقعه فى هذه اللحظه انها فى حال لا تسمح لها بالكلام او المواجهه الان فيكفيها ما عانت و تعانى. ...
عشق
ايوه يا عمر
مبروك يا عروسه
هو ده كل اللى انت قدرت عليه يا عمر انك تبارك ليا
امال عايزانى اقولك ايه بعد ما شفت و قريت كل اللى اتكتب فى الجرايد و المجلات يا هانم
عمر انا مسمحتش ليك انك تكلمنى بالأسلوب ده و بعدين حتى لو الخبر ده صحيح ممكن اعرف انت مالك و ايه اللى مضايقك بالضبط اعتقد انك عارف و انا قولت لك قبل كده بدل المره عشره انى انسانه حره و من حقى أعيش حياتى و اشوف نفسى طالما مش بأعمل اى حاجه غلط
وانا يا عشق لينتبه الى خطأه ويقول اقصد الاولاد ايه حسابهم فى المعادله دى بقى ؟
تقصد ايه يا عمر بالضبط انا مَش فاهمه
اقصد انى مَش هاسمح لولادى انهم يتربوا ابداً فى حضن راجل غريب و انا موجود على وش الدنيا يا عشق
من امتى يا عمر
مَش فاهم تقصدى ايه ؟
زى ما قلت لك جاوبنى من امتى يا عمر دول ولادك و خايف عليهم دول ولادى انا مَش ولاد حد ثانى انا اللى تعبت وسهرت و كبرت و فى الاخر جاى تقول هاتسمح و لا مَش هاتسمح من امتى يا عمر
الكلام ده مفيش منه فايده يا عشق بعد اللى حصل ده و الصور اللى اتنشرت فى كل حته و الخبر كمان مَش هاقدر اقولك غير انك انتى انسانه و حره فى اختيارك رغم انى لِسَّه باحبك و مَش قادر انى استغنى عنك بس مَش هاقدر انى اتحكم فيكى لو أجبرك زى ما قلتى انتى انسانه حره بس ولادى لا يا عشق مَش هينفع ولادى انا الى هاربيهم و هاعيش لهم كل اللى جاى من حياتى كله و انتى بقى ربنا يوفقك لترد عليه فى ثوره و قد أوجعتها كلماته لانه لم يسألها و انه لم يحارب من اجلها او يدافع حتى عن حبه لها رغم اعترافه به لتجيبه فى تحدى
اسمع يا عمر ولادى انا محدش يقدر يبعدهم عن حضنى مهما كان انا سمحت لك تكون جزء من حياتهم عشان خاطرهم هما مَش عشانك بس مَش هتقدر يا عمر مَش هتبعدهم عن حضنى مهما حاولت او عملت
طيب يا عشق براحتك اعملى اللى تحبيه
فعلا يا عمر انا حره و اعمل الى احبه و هاعمله يا عمر لتغلق الخط فى ثوره و تصرخ فى غضب و هى تحدث نفسها
كده يا عمر هو ده اللى انت قدرت عليه انك تهددنى تاخد منى ولادى و تحرمنى منهم بدل ما تسالنى و تعرف منى بتحاول تضغط عليا من ثانى هو ده الحب و التعويض اللى وعدتنى بيهم بس انا اللى غلطانه يا عمر انا اللى عملت فى نفسى كده ضعفى معاك و حبى ليك هو اللى خلاك تبيع و تتحكم فيا بس خلاص كل شىء اتغير اوعدك انك انت كمان هتاخد منى درس عمرك يا عمر عهد عليا بكده و مبقاش عشق ان ما خليتك تندم لترفع سماعه التليفون و تطلب اياد.
اياد انا عشق ممكن نتقابل تقدر تيجى انا عايزه اتكلم معاك
........
لا متعملش اى حاجه قبل ما نتكلم و نتفق و يا ريت دلوقت
.....
طيب انا مستنياك
يعنى ايه يا عشق انا مَش فاهم انتى تقصدى ايه بكلامك ده بالضبط ؟
ليه يا اياد اللى مَش واضح فى كلامى ؟
بصراحه كله انا لما شفت الخبر و اتفاجات بيه الصبح كنت خايف من رد فعلك هتعملى ايه و هاتظنى فيا ايه كنت بأكلمك و انا مرعوب انك تفتكرى انى استغليت وجودك معايا امبارح عشان مصلحتى بس لا و الله يا عشق محصل
انا عارفه و متاكدهً من ده يا اياد و انك ملكش اى دخل بالموضوع ده
انا كنت جاى و فاكر انك هتطلبى منى أكلم المجله دى قدامك و اكذب الخبر الاقى انك بعد دا كله بتقولولى ماتكلمش حد و متكذبش الخبر بالعكس معلقش حتى عليه و اخد الامور ببساطه كده انتى عايزه ايه بالضبط يا عشق؟ لترد عليه فى غضب و توتر مما عانته فى الساعات الماضيه
مَش فاهمه انت بتكلمنى كدا ليه يا اياد انت كمان و لا تفتكر انى ممكن أكون انا السبب او ليا يد فى اللى حصل و نشر الصور و الأخبار دى ليتراجع هو امام هجومها و ثورتها و يقول
عشق انا اسف انا مقصدتش اللى فهمتيه دا كل الحكايه انى مَش عارف استوعب اللى قلتيه ليا من شويه ده
تستوعب ايه يا اياد انى بقولك انى موافقه على خطوبتنا دى
خطوبه ايه يا عشق هو احنا اتخطبنا اصلاً؟
طيب ممكن تقعد و تهدى و انا هافهمك على كل حاجه و بعدين محدش هيقدر يجبرك على حاجه انت مَش عايزها
لا عايزها طبعا طيبين كل الحكايه انى مَش فاهم
طيب ممكن تقعد شويه و تسمعنى من غير مقاطعه شوف بقى انا ....
