لتتجه ناحيه الباب و تفتحه لتجد أهل عمر فى مواجهتها لتأخذها الحاجه فاطمه فى أحضانها بينما تبتسم لها هدى فى ود
- عشق ازيك يا بنتى حمدالله على السلامه بركه انك بقيتى بخير
- الله يسلمك يا ماما
- مبروك علينا حمزه و عشق يتربوا فى عزك و عز ابوهم يا بنتى
لتختنق عيناها بالدموع و هى تكاد تنفجر و لكنها لم تستطع ان تنطق بكلمه
- مالك يا بنتى فيكى ايه
- مفيش يا ماما انا هامشى من هنا مخنوقه
- لا استنى يا بنتى انا عايزه اتكلم معاكى انا كنت هاجى اطمن عليكى بس قلت لما تشدى حيلك شويه
- معلش يا ماما خليها فى وقت ثانى
- عشان خاطرى يا بنتى انا عمرى ما طلبت منك حاجه قبل كده خمس دقايق بس
جلسا معا وحدهما لتصمت الحاجه فاطمه قليلا ثم تنظر اليها لتقول
- عشق انا زى والدتك و انتى عارفه انا بحبك اد ايه و انك زى هدى وربنا يعلم يا بنتى
- انا عارفه يا ماما و الله
- طيب يا بنتى احنا مَش هنتكلم فى اللى فات انا عارفه و مقدره اللى كُنتُى فيه و مَش هاعاتبك انك مشيتى من غير ما تقولى و لا على قلقى عليكى خصوصا بعد ما عرفت من هدى انك حامل انا مش عايزه نقلب فى القديم انا بس عايزه اعرف انتى هتعملى ايه؟
- تقصدى ايه يا ماما مَش فاهمه
- ارجعى عيشى معانا يا بنتى و احنا هنشيلك فى عنينا وولادك هيكونوا نور عينيا
- مَش هاقدر يا ماما ما انتى عارفه انه مينفعش و بعدين انا مستريحه كده
- مَش هينفع يا بنتى هتعيشوا ازاى و هتصرفى منين دول اثنين يا بنتى و حمل و مسئوليه
- انا هاشتغل ثانى و اصرف عليهم مَش هاخليهم يحتاجوا حاجه و هاربيهم ان شاء الله احسن تربيه
- يا بنتى ولادك محتاجينك جنبهم و مَش هينفع تسيبيهم الوقت و تروحى تشتغلى و بعدين انتى مسئوله مننا
- لا يا ماما و متزعليش منى انا مَش هاقبل احسان من حد
- دا مَش احسان دا حق يا بنتى
- انا ماليش حق عندكم حقى مع ابنك مَش مع حد ثانى
- حاولى تسامحيه يا بنتى عشان خاطرى و خاطر ولاده
- ماما يعز عليا انى ارفضلك طلب بس انت عارفه انه مَش ممكن هاقدر عمر خلاص انتهى من حياتى و مَش هيكون له وجود ثانى فيها ابدا
لتبكى الحاجه فاطمه فى حزن
- ماما متضغطيش عليا اكثر من كده متعيطيش ارجوكى يعز عليا زعلكً ده بس انتى عارفه و مقدره ليه انا بأعمل كده و هاتسمحينى
- يعنى هتحرمينا منكم يا بنتى و من وجودكم فى حياتنا
- انا مقدرش اعمل كده يا ماما و لا انى ابعد أحفادك عنك ابدا انتى هاتشوفينا كثير و هانجى لكم باستمرار ان شاء الله
- اوعدينى يا عشق انك مَش هتتاخرى علينا
- متخافيش انتى عارفه انا بحبك اد ايه
رجعت الى غرفتها و قد ايقنت ان تلك الصفحهً من حياتها قد انتهت بعد تلك المواجهه لقد. صارت قويه و تستطيع مواجهته قلبها الضعيف الذى خفق له و باسمه لم يعد ملكه بعد الان لقد صار حراً و لكن هل تحرر حقا ام ان عشقه له لا ينتهى الا بالموت دخلت و اغلقت الباب خلفها لتجد داده عليه جالسه فى انتظارها نظرت لها بعتاب و سالتها
- كُنتُى عارفه
- ايوه يا بنتى
- و خبيتى عليا
لتصمت هذه المره و لا. ترد عليها
- طيب ليه يا داده عملتى كده
- غصب عنى يا بنتى و الله انا مكنتش عارفه اقولك ازاى و خفت عليكى و منك لما تعرفى انا كنت معاه لما صفيه اتكلمت و قالتلى الحقى عشق كنت خايفه عليكى لا دا انا كنت باموت و هو سمع المكالمهً كلها بقى زى المجنون ركب العربيه و كان هيموتنا اكثر من مره من سرعته و لما وصلنا حصل اللى حصل هو عرف انك محبوسه جوه دخل وراكى و الحمد لله قدر يخرجك بالسلامه انتى انكتب ليكى على إيديه عمر جديد يا بنتى
- لا انا كنت أفضل اموت زى اشجان ولا انه هو اللى ينقذنى و يكون له فضل عليا انا بأكره و بكره كل لحظه قضيتها معاه
لترد داده عليه و هى تنظر لها فى حزن
- لو كُنتُى كرهاه يا بنتى و لا مَش فارق معاكى مَكنتيش هتعملى كده
- داده لو بتحبينى انسى الموضوع ده عمر انتهى من حياتى خلاص و مَش هيكون له وجود ثانى فيها ابدا بعد كده .
- طيب فكرتى هتعملى ايه يا عشق بعد كده
- نمشى الاول يا داده من و بعدين نفكر انا حاسه انى مخنوقه هنا و مَش عارفه أتحرك
- خلاص يا بنتى اللى تشوفيه
لتنظر لها عشق فى تردد و تسألها
- داده انا محرجه منك جدا بس هو احنا معانا فلوس اد ايه ؟
- بتسالىً ليه يا بنتى ؟
- عشان فلوس المستشفى و الولاده دى مستشفى خاص و لازم نعرف التكاليف اد ايه عشان نحاول نتصرف
- متخافيش يا بنتى التكاليف كلها اندفعت و فيه فلوس كمان تحت الحساب
لتسألها عشق و قد بانت ملامح الغضب فى صوتها
- مين اللى دفعها يا داده
- عمر يا بنتى حط مبلغ كبير تحت الحساب تحت فى الحسابات
- الفلوس دى لازم ترجعله يا داده عمر مَش هيصرف عليا و لا على ولادى انا مَش عايزه منه حاجه ثانى يبعد بقى عنى و عن حياتى
- عشق اسمعينى انتى عارفه تكاليف المستشفى و الحضانه كام مَش هنقدر ندفعها و الظروف مكنتش تسمح اننا نقول لا والا اسيبك تموتى انتى وولادك . و بعدين انتى لازم تفهمى حاجه يا عشق اى حاجه دفعها عمر دى من حقك عليه و بعدين دى فلوسك و فلوس والدك اصلا يا بنتى .
- مَش عايزه منه حاجه يا داده مَش عايزه احس انى ضعيفه ثانى قدّامه انتى عارفه الإحساس ده بيعمل فيا ايه ؟
طيب يا بنتى خلاص حقك عليا انا هاروح اشوف الدكتور عشان نمشى من هنا.
------------------
- انا لازم اخرج من هنا
- ليه يا ابنى انت لِسَّه مكملتش علاجك و كتفك لِسَّه محتاج عنايه
- معلش يا حاج فيه حاجات لازم اعملها و مينفعش انى ااجلها اكثر من كده
- اى حاجه تستنى يا بنى بس انت لازم تهتم بصحتك احنا ماصدقنا ربنا اخد بيدك دا أمك كانت هتجنن لما عرفت
- معلش يا حاج سامحنى المره دى بس مَش هاسمع كلامك
- ايوه يا بنى بس ليقاطع كلامهما دخول الطبيب
- صباح الخير
- الحمد لله و اه الدكتور جه
- خير انشاء الله عامل ايه النهارده يا استاذ عمر احسن
- انا عايز تكتب ليا على خروج يا دكتور
- قريب ان شاء الله لما نتطمن عليك
- مَش هينفع انا لازم اخرج النهارده فيه حاجات مهمه لازم اعملها
- اى حاجه ممكن تتأجل لكن المهم صحتك يا استاذ عمر
- لا الحاجه دى بالذات مَش هاقدر ااجلها
- انت حالتك لِسَّه محتاجه علاج و عنايه و متابعه بعد العمليه و الا كل اللى عملناه هيضيع
- متخافش يا دكتور انا ممكن اكتبلك إقرار انه الخروج على مسئوليتى الشخصيه و هتابع مع حضرتك يوميا و هالتزم بالتعليمات بس أرجوك
- و ليه العند ده يابنى هى الدنيا هاتطير
- أرجوك يا حاج ها قولت ايه يا دكتور ؟
- طيب خلاص بس لازم تتابع معايا باستمرار و لو حسّيت باى حاجه او الم لازم تجيلى فورا
- حاضر
- دخلت هدى و امها فى تلك اللحظه لينظر. لهما الطبيب مبتسما
- صباح الخير
لترد الحاجه فاطمه بينما ظلت هدى صامته وراء والدتها
- صباح النور يا ابنى و النبى تطمنا على عمر
- احنا كنّا لِسَّه بنتكلم يا حاجه و نصحت الاستاذ عمر بس هو مصمم يخرج
لتردالحاجه فاطمه فى انزعاج
- يخرج يروح فين لا طبعا هو انا مستغنيه عنه
ليبتسم لها الطبيب على عفويتها بينما امسكها زوجها من يدها
خلاص يا حاجه فاطمه الدكتور سمحله يخرج و هيتابع معاه ان شاء الله
- طيب ليه ميكمل علاجه هنا الاول احسن
- ورآه حاجات مهمه و هتخسره كثير
- اى حاجه فداه تتعوض الا صحته
- طيب بعدين نبقى نتكلم الدكتور مَش فاضى لينا احنا بس
- لا أبداً انا تحت امركم بص يا استاذ عمر انا هاكتبلك على شويه إدويه و مسكنات بس لازم تعتنى بالجرح و تغير عليه كل يوم فيه حد ممكن يساعدك ولا اوفرلك ممرضه
- لا هدى موجوده وممكن تساعدنى
لينظر الطبيب لها سائلا
- هتقدرى تستحملى المنظر
لتجيب فى صوت منخفض
- ان شاء الله
- خلاص انا هاخلص مرور و بعدين اجى افهم الانسه هتعمل ايه بالضبط بس لازم تتابع معايا عموما دا رقمى الشخصىً و فيه ارقام تليفوناتى كلها اى حاجه كلمنى انا تحت امرك .
خرج عمر من المستشفى بعد ان ألقى نظره على أولاده ظل منتظرا لفتره طويله فقد كان يرغب فى رؤيتها هى ولو من بعيد ولكنها لم تاتى رغم طول انتظاره بل أرسلت احدى الممرضات لتاتى بهم اليها ركب السياره التى طلبها بمساعده والده بينما جلس ثلاثتهم بالمقعد الخلفى ليشير عمر للسائق بالتحرك
- انا هوصلكم و بعدين امشى
- تمشى تروح فين انت لازم تستريح هو احنا هنبتدى يا عمر
- امال انا خرجت ليه انا قولت لحضرتك فيه حاجات مهمه لازم اعملها انا هاروح الشركه شويه
- يا بنى
- عشان خاطرى يا حاج انا تعبان و مَش مستحمل مناقشه ولا انك تزعل منى
- طيب يا بنى بس خلى بالك من نفسك يا عمر
- طيب هترجع امتى
- أوعدك مَش هاتاخر
================
- ادخل
دخل الحاج سعيد الى الغرفه و أغلق الباب
- حمد الله على السلامه يا عمر بيه الحمد لله انك بخير
- شكرًا يا حاج اتفضل
- تحت امرك
مضت ساعه او اكثر عليهما و هما يتحدثان
- خلاص يا حاج كده يبقى اتفقنا و كل حاجه هتمشى تمام ان شاء الله و لو فيه اى حاجه انا هاتابع مع حضرتك
- انا تحت امرك يابنى و مَش هاتاخر ولا اقصر ان شاء الله و ربنا يقدرنى
- طيب اتفق مع المحامى و ميعادنا بكره ان شاء الله
- تسعه بالضبط هاكون جاهز ان شاء الله
- شكرًا اتفضل انتى دلوقت عشان تعمل اللى اتفقنا عليه
- حاضر بعد إذنك ليخرج الحاج سعيد بعدها من الغرفه مبتسما فالحق لابد و ان يعود الى أصحابه يوما ما
==============
- خرجت امبارح يا فندم
ردت الممرضه على عمر الذى دخل الى الغرفه ليجدها خاليه فيشعر بالصدمه و يذهب الى الاستقبال ليسأل عنها
-!ازاى طيب و الولاد
ش الدكتور كتبلهم على خروج و متابعه تحب حضرتك تسال عن حاجه ثانى
- لا شكرًا
خرج من المستشفى مسرعاً ليطلب داده عليه التى وجد تليفونها مغلقا و خارج نطاق الخدمه ليتصل بالفيلا و يسال عنها ليجيبه محمود الحارس انها لم تحضر الى المكان منذ ان خرجت معه و انه كان ينوى اخباره بذلك .اغلق المكالمهً فى حنق لم يكن يعرف لهم عنوانا ماذا يفعل الان انه لن يفقدها مره اخرى بعد ان وجدها اخذ يقلب فى تليفونه لدقائق قليله ثم ابتسم فقد وجد ما يبحث عنه
سمعت عليه طرقات على الباب وهى تقف فى المطبخ لتنادى
- عشق يا بنتى فيه حد بيخبط ممكن تفتحى الباب تشوفى مين
- حاضر يا داده
حملت طفلتها التى استيقظت للتو قبل ان توقظ اخيها و اتجهت الى الباب لتفتحه
ايوه دقيقه واحده
فتحت الباب لتجده أمامها يقف فى ثبات انه اخر من تتوقع وجوده هنا أمامها لتسأله فى صدمه ..... عمر
