الفصل الخامس و الثلاثون
- عشق عشق انتى فين يا بنتى؟
- انا هوا يا داده
- بتعملى ايه
- كنت براجع الورق اللى جابه عّم سعيد امبارح و باخلص شويه توقيعات
- ليه انتى صاحيه من امتى ؟
- من بدرى
- فطرتى
- الصراحه لا شربت قهوه بس
- و بعدين احنا مَش قلنا لازم نهتم بصحتنا و نفسنا شويه مَش كله شغل شغل
- معلش يا داده انتى عارفه انى لازم اعتمد على نفسى و اراعى مصالحى بنفسى الفتره دى
- طيب يا بنتى ربنا معاكى انا هاروح أعملك فطار
- مَش عايزه يا داده
- عشان خاطرى
- طيب بس تفطرى معايا
- ماشى يا ستى تحت امرك دقيقه واحده و هاعمل لنا احلى فطار
لتسمع صوت احد الاطفال من جهاز المتابعه الموضوع على المكتب و قد استيقظ و يبكى
- الظاهر اننا مَش هنشتغل ولا هنفطر يا داده
لتبتسم لها عليه و هى تتبعها
- الظاهر كده يا بنتى
مضت ساعه كامله قبل ان تجلس كل منهما على طاوله الطعام فى المطبخ ليتناولا افطارهما
- كلى انتى مبتكليش حاجه
- ما انا باكل أهه يا داده
- لازم تخدى بالك من نفسك اكثر من كده يا بنتى
- ان شاء الله داده ايه رايك نكلم صفيه من ساعه ما جينا هنا و احنا منعرفش عنها حاجه
- و ايه اللى فكرك بيها دلوقت يا بنتى
- انا عايزاها هنا معايا يا داده و كمان عايزه اكلفها بموضوع كده
- خير ان شاء الله يا بنتى
- عايزه اوفى الدين اللى عليا لاشجان الله يرحمها
- الله يرحمها يا بنتى انا مَش فاهمه حاجه دين ايه اللى عليكى ده؟
- هاقولك يا داده
جلست صفيه تنظر الى ما حولها فى توتر فرغم ان الحرس قد ادخلوها من الباب باحترام لتستقبلها داد ه عليه بالاحضان و تطلب منها الجلوس وتتركها لتعد لها شيئا لتشربه الا انها قد ارتبكت من مظاهر الثراء و الفخامه التى تحيط بها لم تكن تصدق ان عشق العامله على هذه الدرجه من الثراء اذا ما الذى دفعها الى العمل فى المشغل معهم كل هذا الوقت و هى تمتلك ما يشترى المشغل نفسه و كل ما يحيط به قطع افكارها صوت عشق يرحب بها
- صفيه ازيك يا حبيبتى وحشتينى اوى
لتحتضنها صفيه فى حب
- ست عشق
- اخبارك ايه يا صفيه كده بقالك كثير مبتساليش عنا ليه
غصب عنى يا ست عشق انا روحتلكم البيت و الله و لقيته مقفول و لما كلمت الست عليه قالتلى انكم هنا و ادتنى العنوان
- طيب مجتيش ليه علطول لازم نكلمك يعنى و نطلب منك تيجى
- انكسفت اجى و كمان كنت الفتره اللى فاتت مشغوله بدور على شغل انتى عارفه من يوم المشغل ما اتحرق و كل البنات بتدور على اى مكان تشتغل فيه
ابتسمت عشق لها و سالتها
- ها ولقيتى شغل ولا لِسَّه يا صفيه
- انا اتبهدلت اوى يا ست عشق و دورت كثير و فى الاخر ربنا رزقنى بشغلانه كده فى محل ملابس بس صاحبته صعب اوى لكن الحمد لله على كل حال محدش لاقى شغل اليومين دول
- أسمعى يا صفيه انتى تروحى تسيبى الشغل ده و تصفى حسابك و ترجعى ليا انتى هتشتغلى معايا انا ها ايه رايك ؟
لتدمع عين صفيه بالفرحه و تسألها
- صحيح يا ست عشق هتشغلينى معاكى طيب هاشتغل ايه ؟
- انا محتاجه حد اثق فيه يكون معايا هنا و فى الشركه يا صفيه - -- - هتبقى سكرتيرتى الخاصه ها ايه رايك؟
- انا مَش مصدقه بس انا
- مالك يا صفيه خير اتكلمى
- انتى عارفه يا ست عشق انى مكملتش بعد الدبلوم ووظيفه زى دى ليها مواصفات و محتاجه مؤهل عالى
لتضحك عشق من قلبها على طيبه صفيه و براءتها
انا عارفه كل حاجه بصى يا صفيه انا بس محتاجه حد احبه و اثق فيه زى نفسى و اعتمد عليه
- برقبتى يا ست عشق و انتى عارفانى كويس
- بلاش ست عشق دى انا اسمى مدام عشق قدام الناس و الموظفين و مع بعض عشق بس
- انا مقدرش أقول كده من غير ألقاب أتكسف
- خلاص يا صفيه قولى.اللى تحبيه بكره تتعودى
- ان شاء الله طيب هاستلم الشغل امتى؟
- وقت ما تحبى
- الوقت حالا
- و شغلك
- هى قالتلى لوجيتى متاخره متجيش ثانى و انا كده اتاخرت ساعه
لتنظر لها عشق فى دهشه
- بس انتى جيتى و انتى عارفه انك هتتاخرى يا صفيه و مَكنتيش تعرفى انك هتشتغلى معايا
- ايوه يا ست عشق عارفه بس انتى لو تطلبى ايه أخدمك بعنيا مَش مجرد وظيفه
- تسلمى يا صفيه خلاص تستلمى الشغل دلوقت انتى ممكن مؤقتا تساعدىً داده عليه مع الاولاد لحد ما الاقى مربيه كويسه ليهم
- و مربيه ليه يا ست عشق ما انا موجوده اه
- لا انتى هتكونىً معايا انا يا صفيه مَش هتبقى فاضيه
- طيب انا ...
- عايزه تقولى ايه انا عارفكى من زمان
- البنات مَش لاقيه شغل يا ست عشق و فيه منهم ظروفهم صعبه جدا و عندهم ولاد ما تكسبى فيهم ثواب و تختارى واحده منهم تشتغل هنا و انتى عارفاهم كويس اوى كلهم اضمنهم برقبتى
- تعرفى يا صفيه عندك حق البنات دول ليهم حق عليا ولازم اوفيه بصى يا صفيه لما تخلصى الشغل مع داده تعالى على المكتب عوزاكى .
مضى بعض الوقت لتنتهى صفيه من عملها و تذهب الى المكتب طرقت صفيه باب المكتب لتسمع عشق تأذن لها بالدخول
-اتفضل
- تعالى ادخلى يا صفيه و اقعدى هنا
- انا تحت امرك يا ست عشق
- اتفضلى
- ايه ده ؟
- ظرف فيه فلوس هتكون ايه يعنى
- لمين ؟
- الظرف دا ليكى يا صفيه شهر مقدم ليكى عشان تدبرى امورك و حالك
- انا مَش عايزه حاجه يا ست عشق مستوره و الحمد لله
- تتعودى لما اديكى حاجه يا صفيه تسمعى الكلام.ك و تقولى حاضر متتعبيش قلبى معاكى من الاول
لتاخذ صفيه منه الظرف على استحياء و تقول
- ما عاش اللى يتعب قلبك او يزعلك طيب خلاص اللى تأمرى بيه شكرًا
- انتى لِسَّه قاعده فى الاوده اللى فوق السطوح يا صفيه
- ايوه يا ست عشق هو انا عندى مكان ثانى أعيش فيه
- لا انتى هتجيبى هدومك و تقعدى هنا معانا انا عندى جناح صغير ورا الفيلا هاديكى أوده فيه
- هنا ربنا يكرمك يا ست عشق دا كثير اوى عليا و الله
- لا يا صفيه مَش كثير انتى كُنتُى و نعم الصديقه معايا انتى وإشجان الله يرحمها
- الله يرحمها امين
- صفيه متعرفيش حاجه عن ابنها
- زى ما هو يا ست عشق من ساعه امه ما ماتت و حالته بتسوء
- لا حول و لا قوه الا بالله
- أخده معاه بعد موت اشجان بس انتى عارفه هو عنده عيال كثير و مراته اعوذ بالله
- اشجان قالتلى انه رفض يساعدها ويصرف على علاجه
- فعلا هو رامى الولد جوه البيت فى أوضه ولا بيأكله ولا بيعالجه و سايبه لقضى ربنا و ولاده بيضايقوه اوى انا روحت زرته مره واحده عشان اشوفه واطمن عليه و محدش هناك عاملنى كويس ابداً بالعكس كان ناقص يطردونى و حالته صعبه اوى الله اعلم بحاله بقى
- لا حول ولا قوه الا بالله أسمعى يا صفيه اشجان الله يرحمها ليها حق عندنا واحنا لازم نتصرف
اؤمرينى و انا أنفذ
- انا عايزه عّم الولد تروحيله يا صفيه وقوليله انى عايزه أقابله
- ليه يا ست عشق
- اعملى انتى بس زى ما بقولك روحى هاتيه و تعالى
- حاضر
لم تمضى عده ساعات حتى رجعت صفيه و بصحبتها رجل تبدو ملامح الطمع على وجهه و ما دخل من الباب حتى ظلت عينيه تتجول فى البيت بجشع
- اقعد هنا لحد ما انده ست عشق
- انتى بس لو تفهمينى هى عايزانى فى ايه هاستريح
- ما انا قولتلك هو احنا اللى هنقوله نعيده فيه خير كثير عشانك فى الموضوع هى قالتلى عايزه تشوفك و كمان طلبت منى أجيبك فى ايدى و ارجع
- طيب ليه
- هتعرف كل حاجه الوقت متستعجلش على رزقك
نزلت عشق لتراه جالسا فى أدب و لكن لم تخفى على عيناها ملامح المكر و الشر التى بدت فى عينيه فقد صارت خبيره فى مثل تلك الأمور لتنظر له فى سخريه و استخفاف فهى تعلم معدن هذه النوعيه من البشر حيداً
- مساء الخير
ليقف متأدبا و هو ينظر اليها بمكر
- مساء النور يا ست هانم. تحت امرك اول ما صفيه بلغتنى ان حضرتك عايزانى سبت كل الشغل الى فى ايدى و جيت على طول مع انه كان رزق و جايلى و انا راجل على اد حالى و عندى عيال
- اقعد لو سمحت انا حابه اتكلم معاك شويه دلوقت انا عرفت انك الوصى الشرعى على صفى و انا كنت حابه أساعده
- صفى هو حضرتك جايبانى هنا و معطل شغلى كله عشان خاطر صفى
- ايوه مَش انت عمه و الوصى عليه بعد موت اشجان الله يرحمها لما احب أساعده لازم تكون انت فى الصوره انا كنت صاحبه اشجان الله يرحمها و لها دين فى رقبتىً و لازم اوفيه و ان شاء الله هارده فى ابنها
- و المطلوب منى يا ست هانم
- انا هادفع كل تكاليف علاجه و أتكفل بيه يعنى مَش هتدفع انت له ولا مليم كل المطلوب منك انك توافق
- أوافق على ايه يا ست هانم انا راجل غلبان وعلى قد حالى و عندى كوم عيال و ظروفى مَش هاتسمح انى اسيب شغلى و حالى و ألف على المستشفيات اتابع معاه و بعدين دى مسئوليه
- انا قلت ليك انى هادفع كل التكاليف و هاتحمل كمان المسئوليه
- و انا اللى هامضى و التزم يا هانم اضمن منين و كمان مَش هاقدر أعطل شغلى و أفضل معاه
- انا بقولك انى متكفله بكل المصاريف كلامك ده يعنى انت رافض انه يتعالج
- انا مقولتش كده يا هانم بس اما ظروفى تسمح ابقى اروح معاه و اتفرغله ان شاء الله
نظرت له غير مستوعبه ان يكون هناك انسان على مثل ذلك القدر من الانانيه والدناءه حتى انه يمنع العلاج عن طفل صغير من اجل مصلحته هو لتدور الأفكار فى عقلها و كأنها تحادث نفسها
كنت اعلم انه يستخدم الطفل و علاجه كوسيلة للضغط علي ليحصل على اكبر قدر من الاستفاده و المصلحه له و قد علمتنى الحياه ان على ان أتحدى هذا النوع من البشر و أواجهه .
- خلاص انت عمه و الأدرى بمصلحته انا عملت اللى عليا ورضيت ضميرى على العموم انا هاخلى صفيه تكتبلك رقم التليفون و لما ظروفك تسمح ممكن تكلمنى .
- نظر لى فى حيره و ارتباك فهو لم يتوقع منى ان اتراجع بهذه البساطه
- يا هانم ربنا العالم انا قلبى بيتقطع عليه اد ايه كل اما بشوفه بيتالم و مَش قادر ياخد نفسه لكن ظروفى الهم و العيال اللى فى رقبتى انا محتار و مَش عارف اتصرف ازاى ؟
- اقعد
كلمه واحده خرجت من فمى حاسمه لتقطع الصمت
- أسمعنى بقى كويس و افهم انا هاقولك ايه لانى مَش هاعيد الكلام ثانى و انا مَش بحب اتكلم كثير اوعى تفتكر انى معرفش كل اللى كان بيحصل اشجان الله يرحمها كانت بتحكى ليا بالدموع على كل حاجه على رفضك انك تساعدها و لا انك تديها فلوس عشان العلاج و لا حتى نصيب صفى من ميراث ابوه اللى نقلته كله باسمك يعنى انا عارفه و فاهمه كل حاجه كويس و من الاخر كده قولى انت عايز ايه بالضبط .
- انا مَش عايز حاجه حضرتك اللى طلبتى تقابلينى و تكلمى معايا
- عشان كنت فاكره انك انسان و لِسَّه عندك قلب او شويه رحمه
- انا مقبلش حد يتكلم معايا كده انا ماشى بعد إذنك
- من الاخر كده عايز كام
صمت فلم يكن يتوقع منى هجومى عليه او صراحتى
- ايه سكت ليه بص انت مرتبك كام كل شهر من الشغل الف ألفين انا هاديك خمسه و مَش هاطلب منك انك تسيب شغلك ده او تروح اى حته كل المطلوب منك انك تمضى على انك موافق على علاجه
- و انا اضمن منين ان حضرتك توفى بوعدك
نظرت له فى غضب لاجيبه بصوت بارد
- انا هاعتبر نفسى مسمعتش اى حاجه دلوقت مفيش اى حاجه تجبرنى انى اعمل كده اصلا و بعدين ابن اخوك عندك و القرار قرارك لو عايز تفكر انا معنديش مانع خد وقتك و بلغنى
- انا موافق يا هانم حد يجيله رزق من عند ربنا و يرفضه و متزعليش منى انا راجل غلبان و عندى كوم لحم عايز أربيهم
- خلاص الموضوع انتهى بس انا ليا شرط الفلوس هتوصلك لحد عندك اول كل شهر طول ما انت ومراتك بتعاملوا صفى كويس
- صفى دى ابن اخويا يا هانم و يتيم يعنى انا لازم اراعى ربنا فيه
كنت اعلم انه يكذب فقد اصبحت لدى خبره لا باس بها فى معرفه الحقيقه
- انا قولتلك و دا شرطى لو صفى اشتكى من أى حاجه او حد ضايقه بكلمه اعتبر الاتفاق ده لاغى
- تحت امرك يا هانم محدش هيزعله حتى بكلمه و حضرتك هتشوفى بنفسك
- خلاص اتفقنا
- صفيه
- نعم يا هانم
- هاتى الملف اللى على مكتبى لو سمحت
- حاضر
- الملف ده فيه الأوراق التى عملها المحامى مكتوب فيها انك عملتلى تفويض فى علاج صفى أمضى
- ايوه ما هانم بس
- فتحت الظرف الذى أحضرته صفيه لأخرج منها رزمه من الأوراق الماليه التى ما ان رآها حتى لمعت عيناه فى جشع
- انا أمضى لحضرتك على بياض حد طايل رزق و جاى من السما
- و أمضى على الوصل ده كمان انك استلمت الفلوس
- وصل طيب ليه يا هانمً
- عشان لو حبيت ترجع فى كلامك ترجعهم ليا مره ثانيه
- وضع توقيعه على الأوراق فى سرعه و مد يده ليختطف رزمه الأوراق الماليه فى لهفه و لكنى أبعدتها عنه فى سرعه لينظر الى مستفهما .
- مَش هاعيدها ثانى صفى لو اشتكى او قال ان حد ضايقه مَش هيعجبك اللى هاعمله
اخذ المظروف ومد يده ليتحسس النقود
- متخافيش عليه يا ست هانم صفى ده غالى عندى اوى وانا بأعامله زى ولادى بالضبط وأكثر
- خلاص اتفقنا بس لو زعل او اشتكى مَش هارحمك
- سيبيها على الله يا هانم حضرتك عايزه منى حاجه ثانى
- لا اتفضل انت دلوقت و انا هابعت العربيه و صفيه بكره ياخدوا صفى عشان يروح المستشفى .
- تمام خلاص بالأذن انا دلوقت
- اتفضل
خرج لتشيعه بعينيها حتى اغلق الباب لتتنهد فى ضيق من كلامه و تصرفاته مع ابن أخيه اليتيم لتحادث نفسها
- اه يا اشجان الله يرحمك يا حبيبتى كُنتُى بتشتكى من قسوته عليكى و على ابن اخوه و انا كنت فاكره انك بتبالغى و انه غلبان عنده عيال و ظروفه وحشه و الدنيا صعبه لكن لما قابلته حسّيت انتى اد ايه كان عندك حق دا مَش مهتم باى حاجه الا الفلوس بس اطمنى ابنك زى ابنى بالضبط و مَش هارتاح الا لما اطمن عليه و يبقى كويس و بخير عهد عليا يا حبيبتى اطمنى و ارتاحى الله يرحمك .
قطع افكارها دخول صفيه لتسألها
- مشى
- ايوه
- اعوذ بالله دا راجل فظيع مَش ممكن انا عمرى ما شوفت و لا هاشوف كده ابدا
- مَش مشكله يا صفيه خلاص انا اعرف اتعامل مع اللى زيه كويس المهم بكره تاخدى العربيه و تروحى تجيبى صفى و انا هستناكم فى المستشفى عشان نعمل الاجراءات
- ان شاء الله ربنا يقدرك يا ست عشق على فعل الخير
- دا واجب يا صفيه انا عمرى ما هنسى اشجان
- تعيشىً و تفتكرى يا حبيبتى
فى صباح اليوم التالى كانت تنتظرهم
لتدخل صفيه يتبعها طفل صغير هزيل لا يتعدى الخامسه من عمره يرتدى ملابس بسيطه تنم عن رقه الحال
كان ينظر الى المكان فى خوف و هو يختبىء خلف صفيه
نظرت له عشق مبتسمه لتنادينه
- صفى تعال
نظر لها الطفل بعيون متسعه ثم نظر الى صفيه
- دى حلوه اوى
ضحكت عشق مما يقول
لتجذبه ناحيتها لتحتضنه و تقبله و تعطيه قطعه من الشوكولاتة احضرتها خصيصا له
- اسمك عشق
- ايوه ايه رايك ؟
- حلو اوى زيك
لتضحك عشق و تجيبه
- انت اللى عسل و سكر
- هنعمل ايه دلوقت ؟
- بص احنا هنروح المستشفى دلوقت نعمل شويه تحاليل و بعدين نروح نتفسح و نشترى شويه حاجات ها ايه رايك ؟
- بجد هتفسحينى ولا بتضحكى عليا ؟
- ايوه يا حبيبى يالا بينا
-داده
-ايوه يا بنتى
- احنا هانخرج دلوقت خدى بالك من الولاد
-متخافيش عليهم فى عنيا يا بنتى اتكلى انتى على الله
- طيب يا حبيبتى و لو محتاجين حاجه إتصلى بيا
أمضت اليوم كله معه لتتم اجراءات المستشفى والتحاليل المطلوبه ثم ذهبت بِه الى احد المراكز التجارية المشهوره لتشترى له الكثير من اللعب و الألعاب و فى نهايه اليوم طلبت من صفيه ارجاعه الى منزله ليرفض
- انا مَش عايز اروح انا عايز أفضل معاكى هنا
- معلش يا صفى انا هستناك بكره ان شاء الله
- انا خايف ولاد عمى ممكن يضربونى و ياخدوا لعبى
- محدش هيقدر يأذيك ولا يزعلك و لو حد ضايقك قولى على طول بس انت خليك لطيف معاهم
- حاضر
- هات بوسه بقى انا مقدرش على السكر ده كله هستناك بكره يا حبيبى
رجعت الى المنزل لتجد داده عليه تنتظرها
- ها عملتى ايه يا بنتى
خلعت حذائها فى إرهاق
- كل خير يا داده كان يوم حلو بس متعب اوى
- الولاد فين
- جوه متخافيش عليهم
- طيب انا هاخد شاور و اروح اطمن عليهم
مضت عده ايام لم تكن تسمح لنفسها بالتفكير فيه او السؤال عنه هل مضى شهر كامل على اخر لقاء لهما معا حين وعدها انه سيخرج من حياتها ام انه كان بالامس فقط و لم يمضى كل هذا الوقت كانت تحاول ان تشغل وقتها كله بالعمل و رعايه الطفلين و ما تبقى لها من وقت سعت فيه لتنهى كافه اجراءات العلاج ليتحدد موعد العمليه للطفل بعد عده ايام .
