- يعنى مَش فاهمه يا بنتى هو زعل ليه ؟
كانت تلك داده عليه تسألها بابتسامه و هى تنظر اليها و هما جالستين فى شرفه الفيلا امام حمام السباحه كان كل من حمزه و عشق قد خلدا الى النوم و بقيت هى لتتحدث الى داده عليه و امامهما كوبين من الشاى
- لا يا داده مَش فأهمه هو أتضايق ليه
- لانه غيران من اياد و لانه مَش عايزك تبقى مع حد غيره و لو للحظه و لانه لِسَّه بيحبك يا عشق ها كفايه كده ولا أقول كمان
- لا يا داده مَش معقول ثم هو ماله بيا هو فاكر انى كنت هأقعد آستناه السنين دى كلها
- مَش كان بيكون نفسه يا بنتى و يثبت انه يستحقك و يليق بيكى يعنى هو دلوقت انسان ناجح و انتى دلوقت ممكن تفتخرى بيه فى اى مكان و تقولى انه جوزك و ابو ولادك
- داده عمر طليقى مَش جوزى و انا قدمته لإياد كده و بعدين الاثبات اللى كنت عايزاه مَش فلوس يا داده كان حب و اهتمام عمر من ساعه ما سافر و هو عمره ما سال عنى او اهتم بيا السنين دى كلها بس كان بيسأل على ولاده
- لا يا بنتى حرام هو كان بيسأل و عارف كل اخبارك
لتنظر لها عشق فى صدمه من كلامها المفاجىء و تسألها
- يعنى ايه يا داده انا مَش فاهمه حاجه من كلامك تقصدى ايه بالضبط ؟
- ها مقصدتش حاجه الظاهر انى كبرت و بلخبط فى الكلام
- داده انا عارفاكى اكثر ما انتى عارفه نفسك مخبيه ايه عليا بالضبط؟
- يا بنتى انتى عارفه انى بحبك اكثر من روحى و عمرى ما هافكر اضايقكً او أضرك
- ها يا داده كملى انا سامعه
- بصى بصراحه و من غير زعل و من غيرنا تعاتبينى على كده هو كان بيتصل بيا كل يوم تقريبا فى ميعاد معين و يفضّل يسأل عملتى ايه فى يومك و الشغل اخباره ايه و ازاى بتقضى وقتك و كمان لما كان حد من الولاد بيتعب كان بيتابع معايا اول بأول و مَش بينام الا لما يتصل بيا و يطمن عليكم
- انتى بتقولى ايه يا داده؟
- و الله دا اللى كان بيحصل يا بنتى و حتى لما كان بيكون عندك مشكله فى الشغل هو كان بيحاول يحلها من بعيد
- ازاى يعنى مَش فاهمه ؟
- اللى اعرفه انه كان متابع مع عّم سعيد اول بأول
- وكلكم كده اتفقتم عليا انتى و عّم سعيد كمان و كُنتُم يتنقلوا ليه اخبارى و انا اخر من يعلم
- هو كان قلقان عليكم و حابب يطمن يا بنتى و ربنا يعلم انى قصدت انى اريح قلبه بس يعنى كان قصدى خير
- و جايه تقوليلى ده يا داده بعد ست سنين ياه و انا كنت بأحس ان انا فعلا كان عندى حق و انه معندوش قلب و لا ضمير لانه سابنى انا وولاده وراح يدور على نفسه و حياته من غير ما يفكر فينا لحظه واحده و هنعمل ايه لوحدنا من غيره
- لا يا بنتى الشهاده لله عمر اتغير بجد فى الفتره الاخيره و لولا انى انا متاكدهً من كده مكنتش قولت له على اى حاجه و وبنا يعلم بالنوايا يا بنتى .
- خلاص يا داده و على العموم كل اللى قلتيه مَش هيغير حاجه
- ليه بس يا عشق يا بنتى هو علطول كان معاكم و جنبكم بس من بعيد لبعيد زى ما انتى طلبتى منه
- الحياه مَش بس سؤال يا داده دى عشره و سكن و رحمه و انك تلاقى حد تتسندى و تعتمدى عليه وقت الشده عمر مَش كده بالنسبه ليا ولا حتى لولاده
- بصى يا بنتى انتى تعرفى ان انا حقانيه و مَش بأعرف أقول كلام مزوق يعنى انتى تطلبى منه ان يبعد و يخرج من حياتك و انك مَش حابه انه يكون جزء منها وبعدين تزعلى اما ينفذ ليكى اللى طلبتيه انتى منه و بلسانك
- انتى مَش فاهمانى يا داده انا كنت مجروحه منه اوى من كل اللى عمله فيا و عايزه احس بس انى قويه و اقدر اعمل حاجه اقدر أقف قدّامه و أقوله ابعد اقدر اعتمد على نفسى و اثبت للكل و قبلهم عشق نفسها انى مش ضعيفه و انى اقدر أقف على رجليا من ثانى و أعدى كل اللى شفته و كنت فاكره انه هيثبت و يستنى وهيكون جنبى و فى ظهرى و هيستحملنى عشان يكفر عن كل اللى عمله فيا و انى لما افوق و ارجع ألاقيه قدامى و جنبى بس حتى لما دورت عليه وقتها ملقتوش كان بعد و مفكرش انه يقرب مفكرش انه يصبر و يستحمل و ينسى مفكرش أنه يسامح و يكون زيى يا داده ليه دايما انا و مَش هو و مع انه هو اللى غلطان انتو دايما تبرروا و تعذروا انا عايزه راجل يكون جنبى و فى ظهرى واحد زى ابويا كده يكون هو اللى ليا و يحمينى من غدر الزمن و الايام مَش يسيبنى و يمشى يا داده
- لا يا بنتى انا أقول الحق و رزقى على الله عمر كان معاكى الفتره اللى فاتت دى كلها و متابع كل حاجه و دايما بيسأل و يساعد بس من بعيد لبعيد
- و مين قالك انى كنت عايزاه يبعد يا داده انا كنت محتاجه وقتها انه يقرب و يقرب اوى كمان و مل انا أقوله ابعد يقرب اكثر
- يعنى انتى بتحسى بحاجه و تعملى و تقولى العكس يا بنتى و الله انا نفسى معدتش فاهمه انتى عايزه ايه بالضبط يا عشق
- انا نفسى معدتش فأهمه يا داده انا عايزه او محتاجه ايه بالضبط
- بصى يا بنتى انا اللى اعرفه انه كان متابع و بيحل لك كل مشاكلك و من غير ما تعرفى دا غير انه كان بيوصل الليل بالنهار عشان يبنى نفسه و يقدر يليق بيكى و تعتمدى عليه انتى بقى يا عشق عايزه ايه ؟