اخذت تنظر الى قطعه الورق الصغيره بين يديها و الأرقام المدونه عليها فى شرود كانت تشعر بالقلق و التردد من الخطوه القادمه و لكنها حسمت امرها ورفعت سماعه الهاتف لتتصل بالرقم الموجود على الورقه انتظرت قليلا و هى تستمع لصوت الرنين على الطرف الاخر و كادت ان تتراجع و تغلق الخط لولا ان سمعت من يرد عليها
- السلام عليكم
- و عليكم السلام منزل الحاجه امال
- ايوه انا يا بنتى مين بيتكلم
- انا عشق لم تستطع ان تزيد على هاتين الكلمتين لتنتظر قليلا ثم تسمع صوت السيده تتنهد و تقول
- اهلًا يا بنتى انا كنت متوقعه المكالمه دى منك لانى سمعت عنك سمع خير
- سمعتى من مين
- من كل البنات هنا و الجيران
- شوفى يا حاجه باختصار صفيه قالتلى كل حاجه و بلغتنى رساله حضرتك و احب اقولك ان انا
- بدون قطع كلامك يا بنتى و قبل ما تقولى اى حاجه انا عايزه منك طلب او أقول رجاء
- اتفضلى تحت امرك
- ممكن نتقابل فى اى حته و نتكلم مع بعض الاول انا مَش هالزمك باى حاجه و لا حتى اطلب منك انى اشوف صفى قبل ما نتقابل و اتكلم معاكى ممكن يا بنتى لو سمحت
- ايوه بس انا
انا عارفه انك مشغوله و انك عندك اعمالك والوقت عندك بحساب بس ارجوكى نص ساعه بس و مَش هاعطلك و الله و لو حبيتى تمشى فى اى وقت مَش هامنعك
حاضر تحت امرك
- طيب تحبى نتقابل امتى وفين يا بنتى
- حضرتك حددى المكان و الميعاد اللى يناسبك و انا هاجيبلك لحد عندك
- تسلمى يا بنتى ممكن تشرفينى النهارده و حتى فيه ناس هنا عايزين يشوفوكى و يسلمواعليكى
- خلاص مسافه السكه
لتغلق الهاتف و تتناول حقيبتها و قد حسمت امرها وقررت ان تواجهها برفضها لطلبها من صفيه و من البدايه ووجهاً لوجه
- الغى كل مواعيدى النهارده يا نيرمين انا خارجه و احتمال أتأخر او مرجعش النهارده ثانى و لو فيه حاجه كلمينى
حاضر يا فندم
================
نزلت من السياره امام باب البيت فى شارع من الشوارع الشعبيه الموازيه لبيت داده عليه لتدخل من الباب و تصعد السلم ببطء و قد غمرتها الذكريات لقد اتت الى هذا المنزل مره واحده مع اشجان لتنزل دمعه وحيده من عينيها رغماً عنها فقد أقسمت لنفسها قبل ذلك انها لن تبكى بعد ذلك ابدا مهما كان لتمسحها بيدها و تطرق الباب لتسمع من الداخل صوتا و يفتح الباب لتجد أمامها سيده متوسطه العمر تبدو على ملامحها الهدوء و الطيبه
- عشق مش كده اتفضلى يا بنتى اهلًا وسهلاً
- الحاجه امال
- ايوه اتفضلى مَش هنتكلم على الباب ها تشربى ايه بقى
- لا شكرًا مَش عايزه حاجه انا جايه عشان أنهى الموضوع مع حضرتك
لتنظر اليها السيده مبتسمه فى هدوء و كأنها تتوقع منها هذا ثم تقول
- طيب نقعد الاول و نتكلم شويه يا بنتى و لا هتنهى الموضوع من قبل ما تسمعينى الاول
لتجلس عشق و قد شعرت بالحرج من هدوءها ولطفها
- لا ابدا انا اسفه عندك حق اتفضلى انا سامعاكى
- طيب نشرب قهوه ندى بن ممتاز وانا عارفه انك بتحبيها
لتنظر لها عشق فى استغراب من حديثها و بساطتها
- متستغربيش يا بنتى انا عرفت عنك حاجات كثير اوى فى الفتره البسيطه اللى قضتها هنا البنات هنا مالهمش سيره غير الكلام عنك و عن صفيه
- عنى انا لتسألها عشق بدهشه
- ايوه يا بنتى دول بيحبوكى جدا و بيجيبوا سيرتك بكل خير و دا اللى شجعنى انى اتكلم معاكى و نتفاهم
- نتفاهم فى ايه حضرتك مقدره موقفى و عارفه ان دى امانه و انا مينفعش أفرط فيها ابدا
- انا فاهمه يا بنتى بس ممكن تسمعينى الاول و بعدين انا هارضى باى حاجه تقرريها بعد كده
- اتفضلى
- طيب اتفضلى انتى القهوه دى الاول و قوليلى رايك فيها
لتبتسم لها عشق فى مجامله و هى تشربها صامته
ممتازه تسلم ايدكً
- تسلمى يا بنتى
بعد ساعه او اكثر من حديث ممتد بينهما نظرت لها عشق فى حيره لا تعلم بما تجيبها بعد ان سمعت منها ما سمعت
- بصى يا بنتى انا مَش هاقول ليكى ردى عليا دلوقت او خدى قرار خدى وقتك و فكرى مع نفسك براحتك بس انا عايزاكى تفكرى فى مصلحته و مستقبله هو الاول قبل اى حاجه
- انا فاهمه يا حاجه مَش هاكدب على حضرتك و هاقولك انى فعلا محتاره ومش عارفه اخد قرار انا كنت جايه وواثقه انى هاقولك لا و ارفض بأدب العرض بتاعك بس دلوقت و بعد اللى سمعته منك حقيقى مَش عارفه أفكر و لا أقرر حاجه
- انا مش مستعجله يا بنتى انا لِسَّه قدامى وقت كبير هنا و حاجات كثير هاعملها قبل ما اسافر انا حاسه بيكى و فاهمه انتى كُنتُى بتحبىً اشجان الله يرحمها اد ايه
- الله يرحمها
- طيب يا بنتى انا مَش هاضغط عليكى بس عندى امل انك توافقى
- أوافق على ايه ؟
- انا عايزه اشوف صفى ابن اشجان انا مشفتش امه الله يرحمها اصلا و هو اللى فاضل منها و من حبايبى ربنا يرحم الجميع لو ممكن يا بنتى متحرمنيش انى اشوفه و اقعد معاه شويه بس
لترد عليها عشق فى تعاطف
- انا طبعا معنديش اى مانع يا حاجه دا حقك و انا مقدرش أمنعك انك تشوفيه انا مقدره انه فى مقام حفيدك و انك مشتاقة تشوفيه عموما انا هاسيب حضرتك دلوقت و هاطلب من صفيه تجيبه و تيجى بكره عشان تقضى معاه طول النهار و تتعرفوا على بعض
- انتى بتتكلمى جد يا بنتى ممكن
- طبعا انا معنديش اى مانع انه يزورك و يتعرف عليكى دى صله رحم و انا مَش ممكن انى أقطعها
- ربنا يكرمك يا بنتى و يسعد قلبك يا رب البنات كان عندهم حق فى كل اللى قالوه عنك
- شكرًا لحضرتك .طيب انا هامشى دلوقت و هنبقى نتكلم ثانى يا حاجه بعد أُذنك
- ربنا يجعلك فى كل خطوه سلامه يا بنتى مع السلامه
دخلت الى منزلها اخيرا لتستقبلها داده عليه مبتسمه
- حمد الله على السلامه يا بنتى أحضرك الغدا ؟
- الولاد فين يا داده؟
-؟فوق يا بنتى
- وصفى ؟
- معاهم طبعا هيروح فين يعنى ؟
- طيب انا هاطلع لهم شويه لحسن وحشونى
- مَش هتاكلى
- انا تعبانه اوى ومرهقه بصى هاطلع شويه استريح و هبقى اكل بعدين
- كل يوم بتقولى كده ولا اكل و لا نوم و لا راحه انا تعبت معاكى يا بنتى
- خلاص بقى يا جميل متزعليش هاسمع الكلام النهارده و اكل بس تاكلى معايا
-؟اما نشوف
لتضحك و تصعد الى اطفالها لتقضى بعض الوقت معهم بعيدا عن افكارها المضطربه و بعد ساعتين نزلت لتجد داده عليه تنتظرها
-ها يا بنتى هنأكل بقى ولا ايه؟
- انتى لِسَّه مستنيه من غير اكل لحد دلوقت يا داده
- طبعا و انتى تفتكرى انى اقدر أحط لقمه فى بقى من غيرك
- ربنا يخليكى ليا امال فين صفيه تيجى تاكل معانا
- سالتها من شويه بتقول ملهاش نفس
- مفيش كلام من ده جهزى انتى بس الاكل و هى هتاكل معانا انا هاعرف أجيبها ازاى
اتجهت الى الملحق لتذهب الى غرفه صفيه وتطرق الباب
-؟ممكن ادخل
لتنظر لها صفيه بذهول من حضورها المفاجىء
- ست عشق طبعا اتفضلى
- انتى زعلانه منى ولا ايه يا صفيه ؟
- انا ابدا والله انا مقدرش أزعل منك ابدا ليه بتقولى كده؟
- عشان مَش راضيه تيجى تاكلى معايا
-اصلى معنديش نفس النهارده
- تبقى فعلا زعلانه من الكلام اللى انا قلته ليكى النهارده
- ابدا يا ست عشق دا انا اللى خايفه تكونى انتى زعلانه منى من اللى قلته ليكى بس و الله انا مليش ذنب
- خلاص يا صفيه حقك عليا بقى متزعليش منى انتى اختى الصغيره و تستحملينى لما أكون متضايقه شويه
- عارفه يا ست عشق و مقدره و الله
- انا قابلت الست امال النهارده روحتها بنفسى و شربت القهوه معاها كمان و شفت البنات و انا نازله من عندها لتنظر لها صفيه بذهول
- و قالتلك ايه طمنينى و انتى عملتى معاها ايه
- لا الموضوع طويل و عايز قعده تعالى نتغدى الاول لحسن داده عليه هتضربنا انا مذنباها من الصبح و ماكلتش حاجه لحد الوقت و بعدين نقعد نتكلم على رواقه
- اللى تشوفيه
لتبتسم لها عشق فى حب
- حبيبتى يا صفيه
بعد الغذاء جلس ثلاثتهم امام أكواب الشاى كانت عشق شارده عنهم تتذكر الحديث الذى دار بينها و بين الحاجه امال منذ عده ساعات
- ها هنفضل قاعدين كده كثير و انتى ساكته متكلمى بقى يا بنتى احكيلنا كل حاجه بالتفصيل
لتتنهد عشق و تقص عليهم كل ما دار و من البدايه
- بصى يا بنتى انا ست على قدى يمكن مكملتش تعليمى بس الحياه علمتنى كثير اوى انا سبت البلد دى و انا عندى ١٨ سنه ابويا و امى كانوا فقرا و معندهمش اللى يجهزوا بيه بناتهم و يستروهم احنا من عيله محترمه بس من الفرع الفقير فيها و عشان كده انا جوزونى من اول واحد خبط على بابى كان اكبر منى ب١٥ سنه و قالهم انه مهاجر من زمان و عايش بره و مَش هيكلفهم حاجه ابدا طبعا اختى كانت الأكبر منى و الكلام كان عليها لكن هى رفضت كانت بتحب واحد زميلها فى الشغل و متفقين على الجواز كان فقير زينا و محلتوش اى حاجه ولا حتى شقه يتجوزوا فيها يا دوب أوضه ليه فى البدروم و شويه عفش طبعا ابويا و امى رفضوا الجوازه دى بس اختى صممت و قالت انها مَش هتجوز غيره او هتفضل كده من غير جواز المهم العريس كان من نصيبى انا رغم فارق السن بينا و اتجوزت و سافرت علطول و انقطعت اخبارهم عنى شويه و عرفت بعدها انها هربت معاه و اتجوزته و ان اهلى و العيله اتبروا منها و اعتبروها ميته عدت مده كبيره و حاولت انى اعرف أخبارها او أتواصل معاها لكن عرفت بعد مده انها ماتت وبعد سنين ابويا و امى حصلوها لكن انا عرفت ان ليها بنت عند أهل ابوها بيربوها لان ابوها اتجوز واحده ثانيه و مكنتش عايزه بنته معاها فبعتها عند جدتها كنت هاتجنن و اشوفها لانها بنت اختى الوحيده و اللى فضلت ليا فى الدنيا و كنت قررت انى ارجع مصر و أجيبها تعيش معايا بره مكنش عندى اولاد جوزى مكنش بيخلف و انا رضيت بنصيبى معاه كان طيب وحنين و عمره ما ضايقنى ولا قسى عليا كان فى معاملته معايا زى ابويا مَش جوزى و يمكن احن عليا منه كمان و فعلا حددت ميعاد و حُجزت تذكره و كنت مبسوطه اوى بس للاسف جوزى تعب فجأه و راح المستشفى و فى يوم واحد اتغيرت كل حاجه الدكاتره فهمونى انها جلطه أدت لشلل نصفى و انه مَش هيقدر يتحرك ثانى ابدا و انه محتاج عنايه خاصه بعد كده مكنتش اقدر اسيبه او أتخلى عنه و انا كل اللى ليه فى الدنيا وطبعا بعد ما تعب لقيت الكل طمعان يا بنتى و كان لازم انزل مكانه و اراعى شغله عشان كل حاجه متضعش مننا أوقات مرت عليا لحظات صعبه اوى مَش هاقدر اوصفها ليكى و نا مكنتش اتخيل انهم ممكن يتصرفوا كده معايا او يطمعوا فيا بس الحمدلله بتعب و توفيق من ربنا قدرت بعد مده انى أقف على رجليا و ارجع كل حاجه زى ما كانت و احسن و أقف جنب جوزى فى محنته و مرضه و نسيت حلمًى ان ارجع مصر و اخد بنت اختى اليتميه اربيها سنين طويله عدت و خدتنى دوامه الحياه و الشغل لحد ما صحيت فى يوم لقيت جوزى مات و بقيت وحيده فى الدنيا و عمرى كله عدا وبعد ما خلصت الاجراءات و الالتزامات و الأوراق قعدت مع نفسى و اخدت قرار انى لازم ارجع مصر و ادور على اهلى و بنت اختى اللى فتها من سنين و نسيتها لوحدها فى الدنيا بعت اللى يدور و يسال و عرفت ان القصه اتكررت مره ثانيه و البنت حصلت امها فى عز شبابها. ماتت من غير ما أعرفها او حتى اشوفها ولو مره واحده و أخدها فى حضنى بس ربنا كريم عوضنى بصفى ابنها عشان كده انا سبت كل حاجه و جيت مَش هكررغلطتى ثانى ابدا صفى هو اهم حاجه عندى فى الدنيا الوقت هو امتداد ليا فى الدنيا و يمكن ربنا عمل كده عشان يعوضنى و يكون ليا ابن أربيه و احبه بعد السنين دى كلها و يكون ليا سند فى الدنيا لما اكبر و اتعب
- ايوه يا حاجه امال بس انا
- انا عارفه انك بتحبيه و انك وعدتى امه و حاربتى الدنيا كلها عشان الوعد ده و عشان تنقذى حياته و متاكدهً ان اللى بطلبه منك صعب اوى عليكى بس فكرى فيه يا بنتى صفى هيبقى ابنى ووريثى الوحيد هاوفر له احسن تعليم و رعايه و اديله اللى باقى من عمرى كله
- حضرتك انا عارفه و متاكدهً من حسن نيتك و حبك له بس انا مَش عارفه اذا كنت اقدر ابعد عنه ولا لا انا اتعودت عليه معانا خلاص و هو بقى ليه اخوات و حياه جديده صعب انى أبعده عنها مره ثانيه عشان يسافر بعيد عننا و يبدأ حياه ثانيه من جديد
- طيب فكرى يا بنتى انا مَش هاضغط عليكى بس انا حابه اشوفه دا مهما كان يعتبر حفيدى
- انا مَش هاقدر أبعده عنك طبعا انا هابعته مع صفيه بكره لحضرتك عشان يقضى طول النهار معاكى
تسلمى يا بنتى
===========
- انا لا و النبى يا ست عشق خلينى انا بعيد احسن كفايه اللى حصل قبل كده و ربنا ستر لكن انا مَش هاستحمل تزعلى منى ثانى ابدا دا لو تشوفى حالتى النهارده كانت ازاى زعلانه وبعيط لدرجه انى صعبت على الاستاذ على
لتبتسم عشق و تنظر لها فى مكر
- على قولتلى طيب احب اعرف عمل ايه بقى الاستاذ على لما لقاكى زعلانه كده الظاهر انى فيه حاجات كثير بتحصل من ورا ظهرى و انا مَش دريانه بحاجه
لترتبك صفيه ويخمر وجهها خجلاً و تقول
- ابدا و الله ما حصل حاجه كل الموضوع انى صعبت عليه و انا بعيط وحاول انه يخفف عنى
- ها و خفف عنك يا صفيه عمل ايه بقى احكيلى كل اللى حصل بالتفصيل
- كل اللى حصل انه مسح دموعى وسألنى بعيط ليه وعزمنى فى الكافتيريا اللى قدام الشغل
- وعزمك على ايه بقى ليمون
- لا قهوه ساده
- قهوه ساده يا صفيه ارحمنى يا رب دا ليه الجنه بت انا هاروح انام احسن عشان عندى شغل مهم اوى بدرى و انتى اعملى حسابك تاخدى صفى بكره و تروحوا تزوروا الحاجه امال زى ما وعدتها
- طيب و الشغل . دا بكره المفروض انى هاتفق مع البنات على نظام الشغل الجديد
- مَش مشكله انتى تاخدى صفى و تروحى وانا هاخلى الاستاذ على يحصلك بالعقود
- طيب و صفى
- خليه يقضى اليوم معاها يا صفيه عشان يتعرفوا على بعض وتشبع منه
- حاضر ربنا يخليكى لينا
- طيب أقوم انا تصبحوا على خير
فى صباح اليوم التالى أيقظت صفيه صفى لتأخذه معها
- احنا رايحين فين
- عند جدتك
- جدتى هو انا عندى جده
- ايوه يا صفى
- طيب كانت فين من زمان و سيبانى عند عمى و العيال بيضايقوا فيا
- كانت مسافره و رجعت و عايزه تشوفك
- انا مَش عايز رجعينى عند عشق
- الست عشق يمكن تحصلنا
- لا انا مَش عايز اروح و اسيب عشق الصغيره خلينى معاها احسن
- اسمع الكلام يا صفى و متتعبنيش الله يرضى عليك
=========
- ها الأخبار ايه يا صفيه
- اطمنى يا ست عشق كله تمام انا هنا مع على و البنات بنمضى العقود و هما كمان أخدوا جزء من البضاعة اللى بعتيها و هيصرفوها بمعرفتهم على ما نخلص
- انا مَش بأسأل على الشغل دلوقت انا حابه اعرف اخبار صفى ايه
- هو كان رافض فى الاول ومش عايز يقعد بس الحاجه امال قدرت تقنعه واحده واحده انه بقعد معاها و بعد كده أخدته و خرجت قالت انها هتغديه بره و تجيبه شويه حاجات
- طيب خلاص انا هاتصل اطمن عليهم يا صفيه ركزى انتى فى الشغل و اخبار على معاكى ايه ؟
- هو فيه زى الاستاذ على امانه و التزام و أدب
- غريبه ايه الرضا دا كله دا اول معرفتكم كانت خناق سبحان الله
- الله بقى يا ست عشق
لتضحك عشق بصوت عالى و تقول
- خلاص يا صفيه ماشى انا فى المكتب لو احتجتى حاجه بلغينى
اغلقت الهاتف و ضغطت على زر استدعاء السكرتيرة
- تحت امرك يا فندم
- بلغى الاستاذ سعيد انى عايزه دلوقت
حاضر يا فندم
مضت عده دقائق ليدخل الاستاذ سعيد
- صباح الخير يا فندم تحت امرك
- اقعد يا استاذ سعيد انا عايزاك
- خير ان شاء الله
- اخبار مدحت ايه يا استاذ سعيد مسألش على الاتفاق او العقود؟
-لا واضح يا بنتى انه مستنى ان احنا منقدرش نصرف البضاعة ونبقى مضطرين اننا نتنازل و نتعامل معاه و بشروطه
- طيب انا عايزه أقابله اطلبه وحدد ليا معاد معاه
لينظر لها سعيد فى دهشه من طلبها
- ممكن اعرف ليه يا بنتى انا أسف طبعا انى بادخل و اسال بس احنا مَش عايزين منه حاجه خليه يروح لحاله و احنا خلينا فى شغلنا
- لا يا عّم سعيد لازم أقابله و اتكلم معاه الكل لازم يعرف اخر اللعب معانا بيكون ازاى انا هاعلمه درس عمره
-انتى مَكنتيش كده يا بنتى اتغيرتى اوى فى الفتره اللى فاتت دى
- محدش بيفضل على حاله لو شاف اللى انا شوفته لازم الكل يعرف ده و يتأكد منه يا عّم سعيد انا خسرت كثير اوى قبل كده و مَش مستعده اخسر ثانى ابدا مهما كان
- خلاص يا بنتى اللى تشوفيه انا هاكلمه و ابلغكً بالميعاد ان شاء الله .
==========
-خلاص يا بنات احنا كده اتفقنا و هستناكم بكره ان شاء الله عشان تاخذوا البضاعة اللى اتفقتوا عليها و تبتدوا توزعوها
- طيب و المكان هيجهز امتى يا صفيه؟
-الحقيقه انا مَش عارفه بالضبط بس قريب و كمان هانفتح فروع فى أماكن ثانيه زى ما اتفقنا
- يعنى يا صفيه نطمن اننا خلاص شغلنا معاكى من النهارده و نعتمد عليكى
- الاعتماد على ربنا و عشان الكل يطمن الست عشق بلغتنى ان مرتباتكم ساريه من يوم ما تمضوا العقد مهما كأن بالمبالغ اللى اتفقنا عليها و إنتوا و شطارتكم بقى
لتصاعد صيحات الفرح من العاملات و الدعوات
- ربنا يباركلها و يرزقها يا رب
- طيب انا هاروح اشوف التجهيزات وصلت لحد فين
تركت جمع الفتيات بعد ان أنهت حديثها معهم و اتجهت الى الموقع لتسأل حارس الأمن الواقف امام السياره
- مشفتش الاستاذ على؟ اصلى عايزاه ضرورى عشان اساله على حاجه
- لا هو قال انه شويه و هيرجع علطول
- طيب مَش مشكله انا هستناه او هاطلبه فى التليفون اشوفه فين
كانت تهم بإخراج التليفون من حقيبتها عندما اتى المهندس المسئول عن التجهيزات فى الموقع ليراها واقفه فيتجه اليها
- صباح الخير
- صباح النور يا باشمهندس
- ازيك يا انسه صفيه ايه الصدف السعيده دى
- ابدا اصل انا حبيت اعرف الشغل وصل لحد فين لان البنات كانت بتسألنى على المكان
- طيب اتفضلى و انا هاعرض عليكى كل حاجه و اوضحلك بالضبط فاضل اد ايه
- لتقول له فى تردد فقد كانت تبحث عن على لتسأله
- لا خلاص مَش مهم وقت ثانى انا مَش حابه انى اتعب حضرتك انا عارفه انك مشغول
- بالعكس انا يسعدنى انى اوضح لك كل حاجه تحبى تعرفيها و بالمره تشربى فنجان قهوه معايا هو مَش انتى كنتى بتسالى على الشغل؟
لترد فى حرج
- بس انا خايفه أكون باعطل حضرتك او باتعبك
ليرد فى سرعه و هو يتجه بها ناحيه المكتب الخاص بالموقع
- لا تعب ولا حاجه اتفضلى القهوه هتيجى حالا
- ساده لو سمحت
ليضحك و هو يقول لها انا عارف يا انسه صفيه
مضت فتره من الوقت شربت فيها صفيه فنجان القهوه الموضوعه أمامها و اطلعت على ما تم تنفيذه و بيان بتفاصيل الاعمال النهائية و موعد التسليم كان المهندس يشرح لها بالتفصيل و بأسلوب بسيط واضح و يجيب على أسئلتها بوضوح
لتتنهد صفيه و هى تبتسم وتغلق الأوراق الموضوعه أمامها
- بصراحه شغل ممتاز يا باشمهندس انا مَش لاقيه اى تعليق او ملاحظه واحده حتى عشان أبلغها لحضرتك
- المهم يكون الشغل عجبك
- جدا ممتاز فى كل حاجه التصميم و التنفيذ و الدقه
- طيب و الشرح
- أفندم مَش فاهمه حضرتك تقصد ايه ؟
- اقصد يا ترى انا وصلت المعلومة ليكى كويس يعنى قدرت انك تفهمينى ؟
- ايوه اسلوبك واضح و بسيط لدرجه انى فهمت كل حاجه و من اول مره
- مَش باين خالص انك فهمتى
-؟ايه حضرتك بتقول ايه؟
- لا ابدا ولا حاجه انا اقصد انك انسانه ذكيه و جميله و سهل اى انسان يتعامل معاكى و
- و ايه كمان يا باشمهندس كمل
كان هذا على يقف امام باب الحجره و هو ينظر اليهم فى غضب بعد ان استمع الى اخر الحديث الذى دار بينهم .
