إنستغرام :wri.sa ...
حَسِبْتُ داري أَمان..
ولكنْ أَدْرَكتُ أَن وجودي بَينهم..
حِطامٌ لجَسدي و إِنْكِسار لِنَفسي..
ذْنبكما أماتَ كُلَ شُعورٍ فيَّ ، قطع داخلي لأَشلاءٍ..
هَلْ إعتدالَكُما أمْرٌ إِستَصْعَبَ فِعْلهُ ..
أَم إِنكما إعتَدْتما على أفعالِكما..
... إِغتمام روحَين ...
● باوعت نفسي بالمرآة ، إنتبهت من كثر التوتر كُصتي إِمتلأت مي....
ما إتحملت !، إنتفضت من مكاني وكسرت كُل التحفيات الزجاجية من على الميز....
كمت أَصيح بعلو صوتي و دموعي تِنزل بغزارة ..
الله لاينطيكم ،الله لايوفقكم، دمرتواا حيااتي شحصلت منكم ، شنو إستفاديتو من دَمرتوني ...
عيوني مورمة أَحس راسي راح ينفجر من التَفكير ..
رِجعت كعدت على التخم ...
يوم العرس هه .. ! ، المَفروض كُل بنية تحلم بهاي اللحظة بحياتها ..
اللحظة الي راح تكون عائِلة ..وتلاقي الإستقرار بحياتها
وتكملها وية الشخص المناسب الي راح يكون كل دنيتها ...
هاي الفكرة الي رسختها بعقلي .. ضحكت على برائتي ..
كمت اتخيل عالم وردي بفستاني الأبيض الي راح زوجي يلزم إيدي ونبدي حياة زوجية سعيدة ..
بس للأسف اكو هواي شغلات وامور تصير تخلينا نِكسر وعود أزلية ، تخلينا نموت ألف موتة بس ماكو شي يصيبنا إلا لذنب صار ! مرات نكون إحنا المذنبين و مرات نكون إحنا الضحية أو ثمن خطيئة إقترفها غيرنا ....
بس !! حتى لو الأسباب مختلفة بس النتيجة وحدة و الوجعْ واحد و الوحيد المُتضرر أنتَ و و روحَكْ الثانية ...
قبل ١١ سنة تقريبا..
إسمي مينا ، عمري 11 سنة ، صف خامس ابتدائي بشرتي بيضة وشعري بني داكن وعيوني جوزي غامِق..
البنية الأولى لأُمي و أبوية ..
أمي بَعد ٥ سنوات من زواجها يلا ولدَتني..
دائماً أنُك على أمي أريد اخ او اخت .. أضوج أبقى وحدي بالبيت ، جانت دائماً تصيح وتعيط عليَّ ودكلي عندج العاب هواي وهاي جيرانج روحي لعبي وياها ..
و ما أجيب من ابوج وحدة ثانية،فَضل مني متحملتج ومتحملة ابوج ....!
أني أشوفها هيج تحجي وياي، أغص !! و دموعي تتجمع ، رجلي تطكطك بعضها ببعض ، رأساً أروح أَركُض أبجي و أقفل باب الغرفة ..
لملمتْ رجلي و بديت أبجي ، ليش أمي تكرهني هيج ؟!.. ليش ما تحبني وتحجي عليَّ وعلى أبوية !
بالرغم من يجي بابا متحجي علية ولاتعيط ولاتضربني كدامة و بس دكلي حبيبتي وحياتي وبنتي واميرتي..
و بابا يضحك ويكول شلون بنت وام اني محصل حلوات ... لأن أنطي شبه لأمي أكثر..
صرت صف خامس ابتدائي إشتدت المواد علية .. وجنت مصممة اطلع من بنات متفوقات لأن أني شاطرة بالدراسة بس مو عبقرية كلش ههههههه ..
