مينا: بعدها ما اشوف الا سيف بوجهي عصبي....
سيف: ليش تأخرتي اني مو كلت لا تتأخرون تدرين ضل بالي عبالي صار بيكم شي شبيج انتي هلكد ممسؤلة...
مينا(بعصبية): شنو هل حجي وياية شنو ممسؤلة وين طالعين اخذتة للمتنزه دشوف الطفل شلون منطلق و فرحان مكدرت اكسر بخاطرة بس اشكرك ع كلامك اللطيف وياية....
كمت من مكاني بعصبية و بديت الملم الغراض شفتة راح يم آدم باسة و حضنة و خلا يلعب و اتجه لعندي واني جنت اباوع عليه من جوة ليجوة...
جنت اشيل بعصبية وازفر...لميت العلاكة وانداريت علية ..
-اتفضل هاي الأغراض لآدم ما طول انت جيت مالة داعي وجودي....
سيف: آسف....
مينا" رفعت عيني و وكعت الغراض من ايدي...
نزل للكاع وبدة يلم بيهم هزيت راسي مصدومة شبسرعة أعتذر....
سيف: أنتبهي شبيج انخبصتي...
مينا"هاا الضاهر الدنيا هم الها تأثير ع الأشخاص...
سيف: نكدر نكول الوقت الا حوبة...
مينا: هزيت راسي واخذت جنطتي من على المقعد...
سيف: وين رايحة....
مينا: للبيت وين مثلا؟!..
سيف: انتضري اوصلج...
مينا: ميحتاج اشكرك...
سيف: شوكت تبطلين عناد؟...
مينا" مو قصة عناد هسة العالم بس تشوفك موصلني تضل تحجي و قال وقيل و لأني مطلقة هسة يطلعولي الف عيب و اني مالي خلك ادخل بمتاهات....
سيف: شوكت الناس كالو شي براسة حظ؟! يفضلون يشوفون المرأة تنهان وتنكتل ع أن يشوفوها مطلقة ...
مينا: صحيح هو بس المجتمع يحكم...
سيف: زين أكدر اطلب منج طلب؟...
مينا: ابتسمتلة: - اطلب؟...
سيف: تعالي وياي ااا اقصد اخذكم ناكل موطة انتي وآدم لأن آدم مشفتة يضحك هل فترة الا وياج...
مينا: انداريت لآدم شفتة واكف يم ابوه و صافن...نزلت شلتة وبستة من خدودة ...
انداريت شفت سيف صافن علية بعدها نزل عينة...
-ماشي لخاطر آدومي.....
رحنا لمحل الموطة بالمنصور واكلنا موطة بس هيج طييبة...
شفت آدم وسخ نفسة بالموطة دا اخذ كلينكس و سيف هم مدينا ايدنا سوة بحيث تلامست اطراف ايدي وايدة...
حسيت بصعقة كهربائية وصلت لجسمي كلة..
ارتعشت و كلبي احسة حيطلع من ضخ الدم الزايد....
عركت ايدي واتوترت و هو هم ..
انطاني الكلينكس ونضفت حلك آدم و ايدة...
- احم خل نرجع اتأخرت ...
سيف: اي احسن لأن كبح النفس ميطول....
مينا: رفعت حاجبي : - ما شاء الله المتنبي....
سيف: لا ههههه اختصاصنا انكليزي ....
مينا: ضحكت و كأن هل كلمة رجعتنا لأيام الخوالي...
- بس الي اعرفة بس اني اختصاص انكلش حالياً...
