مينا: ضحكوا الكل جان احلا يوم بحياتي راح استقبل شي جديد بحياتي وراح اعيش مغامرة من نوع مختلف الا وهي الامومة....
واستمرت الأيام والشهور الي تمشي بسرعة كبيييرة ...
انتهت دراستي الي قاومت علمود اخلصها بين مشروع التخرج وحفلة التخرج وأجواء جميلة ما اكدر اوصفها...
بطني هل كبرها واني بين الدراسة جنت وشغل البيت وبين الموجات بيني وبين وسام..
ساعة صافين ما عدنا شي وساعة نتعارك...بس هو خفف علية لأن حامل ونفسي من كلشي تلعب...
تمر الساعات واني احاجي جنيني واوعدة راح اكون سند لضهرة مراح يعتاز احد بحياتة ولا راح اخلي حياة هل طفل مثل حياتي راح اوفر بقدر استطاعتي بيئة تسعدة حتلو على حساب نفسي اني!...
بدة حملي بنص شهر الواحد تقريبا ...
وهسة بتاريخ ٢٠٠٧/١٠/١٢....
نورت احلى قمر بحياتي...
نورت احلى شمعة بعتمتي..
نورت بنتي وحبيبتي وأميرتي...
لحضات الولادة من اصعب اللحضات الي تمر بيها المرأة...
بين الخوف والترقب وبين الفرحة والألم..
بس كلشي يهون من تشوف ثمار هذا التعب..
اول مرة اتلمست بنتي دموعي منشفت..
حضنتها وضليت اكلها نورت احلا شمعة بحياتي بنوتي الحلوة...
وابجي جانوا الكل حواليني ويصلون ع النبي لان شحماية تجنن...
اجة وسام وباس راسي..
وسام: الحمد لله ع سلامتج ...
مينا: ابتسمت وكلتلة..- تريد تشيلها؟..
وسام: ما اعرف اخاف تتأذة..
مينا: لا تخاف بس حط ايدك على ضهرها...
لزمها وكبر بأذنها وضل يبجي لأول مرة كدامي...
اخذوها من عندي ونمت من التعب جانت ولادة صعبة بس الحمد لله عدت على خير......
ضليت كم ساعة بالمستشفى وراها طلعنا للبيت و دنيا تسندني...
هي اختي الي ماجابتها امي وهي الي كدرت تساعدني بفترة عوزي ...
كد ما اشكر دنيا ما اكدر اوفيها اختي والنعم من الأخت....
دخلت للبيت واجتي ام دنيا طشت علية جكليت ودنيا تهلهل...
وحتة ام وسام فرحانة وبابا موجود ويبوس بيها...
فراس : اي هل حلوة شنو راح تسموها؟،...
وسام: والله اتفقنا الإسم لمينا...
خالدة: وانتَ ليش متسميها ابوها مو غريب ..
ابو وسام: خالدة رحمة لوالديج اسكتي هو و لا هي ماك. فرق اثنينهم اهلها...
مينا: راح اسميها ليان....
خالدة: شني ليان شهل اسم سموا اسامي عادية شهل تفستق هذا...
مينا: خالة ما بي شي واسم حلو وغريب وهو معناه الين و همين اني قارية الأسامي تنعكس ع اصحابها فاني سميتها ليان لان همين معنى اسمها العيش برفاه وبسعادة .....
دنيا: مبرووك ام لولو يخبل الأسم عاشت ايدج...
مينا: اجوا الكل باركولي وادري نصهم ممقتنعين بالأسم بس مجبورين لان اني احب الأسماء الغريبة بس خالدة اخخخ منها همزين سعيدة وبعيدة خوما هم تريد تأثر ع بنتي.....
بقوا الكل بالبيت ومر اسبوع الناس تتوافد لبيتي والجيرن يحبوني بشكل فأجوي يباركولي...
وياهو الي يشوف ليان يبوسها وبودة ياكلها شكلها لطيف بشكل...
واني ممصدكة صرت أم بالرغم تعبت وية ليان كل يومية مسهرتني للصبح...
ومرت ٨ اشهر بحياتي وية وسام بشكل عادي وانتبهت على وسام صار بالفترة الأخيرة بارد بشكل وياية...
تصرفاتة حجية مو مثل قبل يلزك ويلح وصاير يعصب من اقل شغلة....
مرة جنة كاعدين اني ويا نتناقش كلتلة اريد اطلع اشتري ملابس الي و ليان لان العيد قرب....
شو هو كوم واهرج البيت...
وسام: بنت الكلب بنك الخلفوج كل يومية تردين فلوس...
مينا: اول شي لا تغلط على ابوية وشنو قصتك يعني تعرف احنة بين فترة وفترة نشتري ممضخمة بالمصرف شبيك اتنحست وخرعت الطفلة بصياحك هذا تبقة متخلف طول عمرك....
اجة وضربني بوجهي...
وسام: ولا نفسسسسسس اكرميني بسكوتج وامشي يلا من كدامي ما اتحمل اشوف خلقتج....
مينا: دا اجاوبة وسمعت ليان تصرخ عضيت شفتي وكلتلة..
- مع الأسف عليك انت المفروض تصير قدوة لبنتي....
مشيت لليان واهدي بيها ...
-شش ماما حبيبتي لا تخافين ماكو شي..
شلتها واطبطب عليها فازة من النوم ع صوت الصريخ و خايفة...
الله لا ينطيك شوكت تنصلح ومن هذا اليوم قررت اتوظف واعين نفس حسيت انذليت هواي من عندة....
خابرت على بابا وفهمتة يشوفلي صديقة لان عندة واسطة بالدولة و يعيني .....
رجع وسام من الشغل و كلت لازم ابلغة .. كعد ع العشة وراها راد جاي جبتة وكلتلة..
- بابا كالي لكة واسطة بالدولة ويعيني مدرسة....
وسام : شو بكيفج ترحين تحجين وتسوين...
مينا: شنسوي دا اشوفك متضايق بالمصرف اشيل عنك شوية....
وسام: وليان وين تحطيها...
مينا: يم ام دنيا وارجع اخذها ورة ميخلص الدوام ماكو مشكلة كلشي يبقة ع حالة بس راح يكون زيادة وضيفة وتعب الي....
وسام : ماشي......
مينا: شهرين يلا طلع التعيين راح اشتغل مدرسة انكليزي بمدرسة *****.....
وبديت احضر للدوام و وسام نص مكيف ونص معارض الفكرة واني كلت احسن من كعدة البيت بس بالي يم ليان وشلون راح اضبط الوضعين...
داومت بشهر التاسع بسنة ٢٠٠٨.....
حياة التدريس حلوة وخاصة من مهنة الشخص يحبها .... بس المشكلة احس بفراغ داخلي و احاول اسدة قدر الأمكان....
بما ان اني مدرسة جديدة فانطوني صف اول متوسط وثاني...
درستهم ومر شهرين الطالبات معجبات بية ويتلهفون للدرس بشكل جبير وجانوا الطالبات مثل بناتي اهتم بيهم واسئل عن صحتهم و احاول احببهم بالمادة قدر الأمكان...
بس بالنسبة للطرف الثاني ليان الي الي اسهر عليها الليل كلة وأبوها نايم ولا همة...
كمادات وادوية وتصرخ وتبجي يطلعولها سنون وبس تحك ومنا شغل البيت والأكل كوة الحك لكلشي....
وبالصفحة الثانية وسام الي لعب نفسي من الحياة بس شافني اشتغل كام وقلل طلعاتة للشغل وميهتم اذا اجة شغل لو لا وهذا كلة بسبب ابوه لان جان يصرف علية وهسة خلا يعتمد على نفسة واني جنت ما ادري عبالي هو يشتغل.....
متت قهر بوقتها حسيت نفسي متزوجة دجاجة والله حتة الدجاجة بيها فايدة....
اجيب الراتب يبقيلي منة ١٠٠ الف وياخذ الباقي يابه ليش لان اريد اضمه مشترك سلفة ويخليني الوب لان ما اعرف وين يودي الفلوس ممقتنعة بكلامة....
الى ان بيوم اجاني بالليل ويطوطح عرفتة سكران لطمت على خدي هم حظي هذا...
شفتة من الباب ودخلتة جوة..
-شنو هل حركات وسام متستحي وبنتك دتكبر شنو من قابلية عندك.... استغفر الله....
هو ضل يحجي ويتمتم بكلام كوة افهمة عبالك عتوي والله.....
اتلمست جيبة لكيت فلوس ورق...
كمت ارجف كلت بسلا مخلص فلوسي على......لا هه استغفر الله شهل افكار.....
اخذت الفلوس الي بجيبة وضميتهم بمكان مستحيل يندلة كلت هاهي الى متى اني اصرف علية...
خليتة ينام على التخم واني رحت لغرفتي وخليت لولو بحضني و مسحت على راسها وشميتها...
- اخخ بنتي شنو الحل واخلي ابوج ينعدل.....
وقتت المنبه ونمت....
كعدت الصبح سويت ريوك الي شفت وسام كعد و يتثاوب....
كملت الأكل واتريكت بدون حجي جان يوم جمعة وماعندي دوام....
وسام: شبيج مبومة من الصبح....
مينا: اهااا الضاهر صحصحت گرة عيني .....
وسام: انتي شبيج...
مينا: كمت من مكاني بعصبية وكلتلة...
يتبع.....
سلام اعتذر ع تأخير بس هل اخر كم يوم مجنت بالبيت جنت ببيت جدي و مساعدة تنضيف راجعين من سفر وعدنا مريض وبعدها رجعت للبيت قبل يومين يلا بالدوب اشتريت ملابس العيد والبارحة لل ٣ ونص يلا خلصنا تنضيف وهلكت...
ردت اكتبلكم بارت كامل بس اليوم اول يوم العيد وانتوا قيسوا فهذا الي كدرت علية واكيد باجر اكمل ...
