MAI HAKURI (shi ke da riba)

01.

*MAI HAK'URI*
(Shi ke da riba)

_Na_

*Rahma Kabir✍🏾*

_*Bismillahir Rahmanir Rahim*_
*Alhamdulillah ala kullu halin, Nagode ma Allah daya k'ara bani wani dama, da zan fara rubuta sabon Littafina Mai suna MAI HAK'URI (shi ke da riba). Wannan littafi k'agaggen Labari ne banyi shi dan wata ko wani ba.*

*_Gargad'i_*
*Ban yarda a juyamin Labarina ba ta wani fuska ko satar fasaha, Dan Allah a kiyaye*

_Page_ *1.*

Dare mahutar bawa. Duk kan wani Mutum mai rai yakan natsu ya huta da zarar dare yayi, Dare ya tsala sosai kukan Karnuka nake ji suna ta haushi, sai tsuntsaye masu yawon dare, da misalin k'arfe uku na dare na isa Gidan Alhaji Sani Buba.

D'aki ne mai duhu sosai baka iya ganin tafin hannunka, lantarkin d'akin yana a kashe, Jannat cike da tashin hankali da tsoro ta isa wurin makunnin hasken d'akin da lalube, nan take ta kunna haske ya gauraye ko ina, ganin abinda ba tayi tsammani ba ta k'ara shiga tsananin tashin hankali, idonta kamar zasu yo k'asa ta dafe kanta tace

"Na shiga ukuna ni Jannat"
Sai ta saki wani gigitaccen k'ara.

Abbanta ne kwance a tsakar d'akinta cikin jini, wanda ya malale tiles d'in d'akin, ya dafe gefen cikinsa da hannun damansa babu alaman rai a tattare dashi, wuk'ar dake hannunta ta kalla wanda duk jini ya gama b'ata shi tare da hannunta na hagu, kamar an tsikareta ta jefar da wuk'an a k'asa da k'arfi, wani ihun ta kuma saki wanda duk sai da ya tada duk Mutanen dake cikin gidan.

Agigice Yaya Amir, Anty Saudat, da Momy suka nufo d'akin a sukwane har suna bangaje juna, ganin Abba kwance a cikin jini babu alamar rai a tare dashi, yasa hankalinsu yayi matuk'ar tashi, Momy kuka ta saki mai k'arfi haka ma Anty Saudat kuka take tana ambaton Allah, Yaya Amir ne ya isa wurin Jannat ya kifa mata kyakkyawan mari tare da shak'e mata wuya, yace cikin d'aga murya babu alamar Imani a tare dashi,

"Wallahi tunda kika yi ajalin Abbanmu saina kashe ki nima"

Kakarin fitan rai ta soma, ta rik'e hannunsa gam tana k'ok'arin kwacen kanta, Momy da Anty Saudat suna durk'ushe wurin Abba suna jijjiga shi, cikin ihu Momy tace

"Amir, Alhaji na motsi bai mutu, ka saketa karka kasheta, alhakin mutuwanta ya rataya a kanka, ka barni inji da d'aya dan Allah"

A zabure ya saki Jannat ya nufi inda Abba yake, Jannat kuma durk'ushewa tayi tana tarin wuya da fidda numfashi da kyar, matsanan cin kuka ta saki da gunji, d'an kwalin kanta ta cire ta ya mutsa gashin kanta tare da bubbuga kanta da hannunta.

Yaya Amir ya fita da gudu ya kira ma'aikatan gidan suka taya shi d'aukan Abba suka fita dashi suka sanya shi a mota, Yaya Amir ya zauna mazaunin Driver, Momy na baya ta d'aura kan Abba bisa cinyarta, Anty Saudat ta shiga gaba, Yaya Amir ya kunna motar ya kalli d'aya daga cikin security na gidan cikin kakkausar murya yace

"Ku tabbatar kun sanya tsaro Akan Jannat kar ku bari ta fita" bai jira mai zaice ba ya figi motar a guje.

General Hospital suka isa a cikin duhun talatainin dare, kuka sosai Anty Saudat keyi, cikin sauri aka d'auki Abba aka wuce dashi Emergency room, sunyi sa'a Likitoci biyu suke aiki a wannan daren, kasan tuwar sunyi ma wani Mutumi Operation, cikin sauri Likitocin suka shiga d'akin suka fara bashi taimakon gaggawa. Gaba d'aya su Momy sun kasa zama sai kai koma suke yi a bakin d'akin, Addu'a suke Allah yasa a ceto ransa.

Sun d'auki kimanin Rabin sa'a, d'aya daga cikin Likotan ya fito yana sharb'e zufa, da sauri su Momy suka tare shi tace cikin rawar murya

"Likita ya farfad'o kuwa? ya bud'e ido?"

Sauke Ajiyar Zuciya yayi yace
"Hajiya ku kwantar da hankalin ku, hak'ik'a Alhaji ya samu mummunar rauni, munyi iya k'ok'arin mu amma abin yaci tura, yanzu mun bashi taimako zan kira Dr Zaid da Dr Ola suzo muyi aikin tare dasu, sannan dan Allah zuwa safiya kiyi k'ok'ari ku tawo da 'Yan Sanda domin zamu rubuta report akai" yana gama magana ya d'auki wayarsa ya kira Dr Zaid da Dr Ola.