The Friendly Wedding (Season 1 & 2) - Published

Chapter Seventeen

CHAPTER SEVENTEEN

"LETSE ka, Johann! Letse ka!" bungad ng isang babae kay Johann paglabas nilang dalawa ng kotse ng asawa. Nag-park sila sa labas ng isang organic restaurant na makikita sa Tagaytay.

"Wow. Oo, miss din kita, Xan."

Pabirong sinampal nito si Johann. "Johann... Hu-hu!" Niyugyog pa nito ang mga balikat ng asawa. Dahil gabi na, wala nang masyadong nakakapansin sa kanila. "Hindi ka maniniwala sa nalaman ko mula sa lalaking sobrang yummy ang body at may eight pack abs. Super havey ang fez at masarap humalik. Ugh! Putek, Johann! Y-Yung nalaman ko... Diz iz zo kreyzi."

Napangiwi si Sapphire nang umiyak na si Xan. Kinabig ito payakap ni Johann. Niyakap din ito pabalik ni Xan at sumubsob sa dibdib nito.

May binulong-bulong dito si Johann na hindi niya narinig. Nanulis ang nguso ni Sapphire. Hindi pa nga sila napapakilala sa isa't isa ay biglang parang di na siya nag-e-exist sa mundo ng dalawa.

"Mag-usap tayo, Xan. May sasabihin ako sa'yo. Pero kailangan natin mag-usap privately."

Tumangu-tango si Xan. "K-Kaso sa loob ng resto, walang private room."

"Sa loob na lang tayo ng kotse." Tumikhim si Johann at napabaling sa kanya. "Sapphire, pasok ka muna sa loob ng resto. Mauna ka nang mag-dinner."

Tumaas ang kilay niya. Parang ayaw niyang iwan ang dalawa. Pero... mukha ngang importante ang pag-uusapan ng mga ito.

Napatingin sa kanya si Xan at parang nagulat ito nang makita siya. "Ay! May kasama ka pala, Johann." Nagpunas ito ng mga luha. "Hi, Miss! Ang ganda mo--wait..." Tinitigan siya nito ng mabuti. Lumapit pa ito sa kanya. "Hala! Sapphire Monteverde! Kilala kita! Nakikita kita sa mga socialite magazines. Pinsan ka ni Reeve Monteverde, diba?"

"Y-Yeah..." Hindi na siya nagulat na may nakakakilala sa kanya. Masyadong pamoso ang pamilya nila.

"Bakit ka kasama ng ugok na 'to?" biglang nang-intrigang tanong nito habang tinuturo si Johann.

"Asawa ko si Sapphire, Xan."

"Huwaaaaaat?!" Nanlaki ang mga mata ni Xan at nagpalipat-lipat ang tingin sa kanila. Maya-maya ay tumawa ito. "Ginu-good time mo ba 'ko, Johann? Sosyal kaya si Sapphire. Di siya papatol sa'yo! Pakasal pa!" natatawang sabi nito.

"But it's true," aniya. "Kasal kami."

Natigilan sa pagtawa si Xan. "Ay. Bakit?" Bumaling ito kay Johann.

"Gusto niya kasi magtayo ng bookstore."

"Huh?"

"Mamaya na kita kukuwentuhan. Ikaw muna ang magkuwento." Hinila na ito ni Johann sa kamay.

"Ano ba iyan! Confused na naman ako! Nung umalis ako, si Czarina pa--"

"Sshh! Halika na. Pumasok ka na sa kotse. Marami tayong pag-uusapan. Letse kang, babae ka. Aalis kang broken hearted, tapos tatawag ka na lang bigla na ngumangawa na naman dahil sumama ka sa lalaki!"

"Hindi lang siya basta lalaki, bhe! Yumminess ang aura ng fafaness na itey! Walo ang abs! Walo! Kaso may pinasabog siyang---"

"Pinasabog?! Madaming pinasabog?" nakangising sabi ni Johann.

Binatukan ito ni Xan. "Pucha! Hindi ganoong pasabog! Ang halay mo, ah!"

Pumasok na ang mga ito sa kotse. Si Sapphire, naiwan sa labas. She felt left out. Pero sanay naman siyang nale-left out kaya okay lang. But being left out by Johann... parang iba sa pakiramdam.