زوجي المزيف {من تأليف و كتابة Macilia Ch}

4 (اللقاء)

#زوجي_المزيف 🔥🔥🔥🔥
#macilia_ch
الحلقة 4🔥🔥🔥⁦❤️⁩⁦❤️⁩

تصدمت فكلام أمها ...لي وقع على وذنيها كي الرصاص
ميسان : كيفاه حبيتيني نتزوج بيه يا ماما هبلتي ؟؟؟ ..طلعتلك السخانة و لا واش ؟؟ من نيتك ..يا ربي مانيش مأمنة راكي عارفة واش قلتي ضرك ؟؟
مريم: عارفة واش خرجت من فمي ..علاه استغربتي قاع هك ؟؟
ميسان: قلتيلي تزوجي براجل أختك !! ههه تقولي فيها عادي ..مستحيل نتزوج بيه و لو يبقى آخر شخص فهاذ الدنيا سمعتي ؟؟ حتى أني منعرفوش !!!
مريم: أما يا بنتي هاذي آخر أمنية لريما وهي تلفظ فآخر أنفاسها ...قربت منها وحطت يديها الزوج على يدين ميسان تترجى فيها بعينيها
مريم: الله يخليك يا بنتي ..أقبلي تتزوجي بإيفان في خاطر بنت أختك ...حتى هو إذا ماشي ريما لي خلاتو يوعدها بسيف مكانش راح يقبل ...متخليش بنت اختك يتيمة هاذي الفرصة الوحيدة باه نكونوا جنبها إذا رفضتي مراحش نشوفوها و مراحش يجري وراك ولا يحاول يقنع فيك باه تقبلي مدابيه تخطي جرتو ماشي يقولو الخالة نصف الأم اقبلي يا بنتي في وجه الملايكة الصغيرة
ميسان: الملايكة لي تحكي عليها لا شفتها ولا كنت علابالي بلي راح تجي لهاذ الدنيا ..متنسايش بنتك العزيزة هربت من الدار و تزوجت بلا علمك و خلاتلك شقفة ورقة مكتوب فيها بلي رايحة تتزوج و تشوف حياتها و ميشرفهاش أنو يعرفوا بلي حنا عايلتها ولا يتعرفوا علينا و بلي هي تحشم بينا...هي تزوجت بواحد ملياردير و دراهمو مياكلهمش النار و حنا قعدنا هنا نتخبطو فالميزيرية و الفقر ...راحت عاشت حياتها و خلاتنا وراها بلا ما تعيي روحها و تقول خليت يما و اختي ورايا لا عارفة اذا كلاو و لا شربو ولا راهم حيين ولا ميتين متنسايش تان بلي بسبتها حبست قرايتي و رحت نحوس على خدمة ..حياتي ضاعت بسبتها و دوك حابة تقوليلي تزوجي براجلها ..فحياتها ما استعرفت بينا ..راحت و خلاتنا موراها و دوك حابة نربي بنتها و نكون عبدة عند راجلها هاكا حابة ماما ؟؟ فوق التمرميد لي عايشة فيه نزيد نتمرمد كثر و نكره حياتي و فوقها نرمم مور بنتك ؟؟ ..ماشي نتي لي قلتي قبل خمس سنين معنديش بنت وسمها ريما ؟؟ آه ؟؟؟
مريم : مراكيش فاهمة يا بنتي الراجل هذاك خطير و أخطر من الخطر بحد ذاتو ..الوقت قصير فأي لحظة راح يجي ...يا بنتي أقبلي بفم ساكت ...إذا ماقبلتيش مراحش نرجع نشوف حفيدتي ..على  خاطري يا بنتي و على خاطر باباك الله يرحموا
ميسان : دقيقة دقيقة ...ترجعي تشوفيها متقوليليش شفتيها من قبل !!!...و ...
قبل ما تكمل كلامها ...ترعبت على صوت محركات السيارات السوداء لي توقفوا في الحي و  اصطفوا قدام باب دارهم وحدة ورا وحدة
عقدت ميسان حواجبها بحيرة و دارت لعند يماها تستفسر
ميسان: ماما شكون هادو؟
مريم : ..حكمتها من خدودها  تترجى فيها ...جا هو هو ...ميسان اقبلي و بلاكي ترجعيلو الهدرة
ميسان: علاه راكي ترجفي و علاه خايفة منو قاع هك ؟؟
حكمتهم الخلعة من صوت الباب لي يدق
مريم: هو زعيم مافيا ...على قد ما نوصفهولك ميكفيش ..خزرة منو تقتل و تشل و الأهم أنو بلا رحمة .بنتي الله يخليك نقول و نعاود أقبلي و بلا ما تزيدي فالهدرة علابالي لسانك متبري منك ممبعد نفهمك هيا ...خلاتها حايرة و ضايعة وحدها و راحت تجري تفتح الباب
رجعت لعندها بعد ثواني و هي مزالت حايرة ...جرتها من يدها للصالة
غير دخلت قابلتها جهامة كبيرة ..راجل طويل و كتافو عراض ..مقدرت تلمح شي من غير هذا ..واقف قدام الشباك عاطيهم بظهرو ...فيقها صوت بكا بيبي صغير ...دارت لجنبها تشوف فيماها شادة طفلة رضيعة في حضنها تسكت فيها ...قربت منها يماها و حطت الطفلة بين ذراعتيها ...غير شافتها و شافت تفاصيلها الصغيرة و حست بدفا حضنها ..و تبسيمتها لي سحرتها تبكمت ما لقات ما تقول ...كي خبرتها أمها على الحكاية كانت موجدة كومة كلام راح تسمعهولو  أما كي شافتها تبكمت و حست حاجة تحركت فيها و شدتها لعندها و دوك واش حا دير راح ترفض و لا تقبل !!! فكل الحالات راح تفتح بواب جهنم على روحها
فيقها من سرحتها كي خذا منها الطفلة ما بين يديها .. ...طلعت راسها و طاحت عينها فعينو ...ترعبت فبلاصتها و بلعت ريقها ..شاف فيها بعينيه الحادة و
حكا بصوتو الرجولي لي خلى كل خلية من جسمها تترعب
إيفان : .....

يتبع .....