زوجي المزيف {من تأليف و كتابة Macilia Ch}

5

#زوجي_المزيف🔥🔥🔥
من تأليفي Macilia Ch

الحلقة 5🔥🔥🔥

إيفان: جهزي روحك بعد يومين راح نتزوجو
فتحت فمها على وسعو من جرأتو و وقاحتو معاها
ميسان: ههه عفوا !!! مفهمتش ..راك تأمر فيا ولا واش؟؟؟
رد عليها ببرود إيه... عندك إعتراض ؟؟؟
قرصتها يماها من تحت ذراعها باه تسكت و ما تردش عليه ولا تخلى عليها اليوم
مريم: لا يا وليدي معندناش إعتراض
شافت فيها ميسان و شعلت فيها عينيها تاع واش راكي تقولي؟؟ دار رايح أما حبسو كلامها
ميسان : هاي أنت يا وسمك ...ماتمشيش عليا أوامرك حتى يكون عندك علم أنا ماشي وحدة من عبيدك باش تمشي عليا كلامك فهمت يا شاسمك ...دارت لعندها يماها ...ماما فكريني بأسمو ؟؟
شهقت يماها و تمتمت بين شفافها
مريم : يا ربي راح تجيب آخرتها إذا كملت تحكي هك ...حكات بشوي ...إيفان
ميسان : ايه صح إسم غريب جامي سمعت بيه
المهم إيفان ولا كيما يسموك ..أوامرك و كلامك غليهم فكاس ماء و شربهم ...و دوك تفضل بلا مطرود
مريم: ميسان واش راكي تقولي ...واش تفاهمنا ؟؟
ميسان : مستحيل نتزوج بواحد مغرور و متعجرف كيفو معندوش احترام لرأي الناس
كان مزالو عاطيهم بظهرو ...دار لعندها و قحرلها قحرة قاسحة خوفتها أما مبينتش ...
إيفان : حتى أنا ماشي ميت عليك ولا نتخيل نهار تكوني مرتي ...راح تكوني مجرد مربية لبنتي و مرتي قدام الناس برك ...و بالمناسبة أنا نمد أهمية لرأي الناس لي يستاهلو ..فهمتي الناس البشر يعني ماشي الحشرات كيما نتي ...ادعي لاختك لأنو لولاها كنت عفستك و معستك و جزت عليك كي الحشرة بالضبط ...أصلا متفاجئ كيفاه ريما تكون أختك من دم واحد ...متوحشة واش يجي من وحدة بنت شارع كيفك ...
متحملتش كلامو كثر ...قربت منو و هزت يدها راح تعطيه كف أما سبقها و شدها قبل ما توصل لخدو و كبس على يدها بقوة ..جبدها لعندو حتى صاروا يتفسو نفس واحد
عضت على شفتها و دمعت عينيها من يدو لي مزيرة على يدها
إيفان: آخر مرة تحطي يدك الموسخة عليا ...عيط عليها... آخر مرة و راح تتزوجي بيا بالسيف عليك ...
ميسان : مستحيل نتزوج بيك تحلم
ضحك بخبث راح نشوفو ...طلق يدها و هز  بنتو لي كانت مع يماها و خرج
قعدت على الكرسي حاكمة  يدها لي توجع فيها تحاول تمنع دموعها ينزلو ...
جابتلها يماها كاس ما ...خبطاتو على الأرض من زعافها
ميسان: شفتي ماما هذا لي حابتني نتزوج بيه مستحيل فهمتي ...حكمتها غصة تاع بكا ...مستحيل أنا ماشي ريما أنا ميسان ..عندي أحلام و راي و حرية نخير الراجل لي راح نقضي حياتي معاه راجل يحبني و نحبو ..يحترمني و يحطني في عينيه ...هزت راسها ليها ...عندي حق ياك ؟؟
مريم: بنتي أما أحلام لي راكي تحكي عليهم ..أحلامك راح يوكلولك خبز قولي ...شوفي حالتنا  مراحش تلقاي كيفو و فوق هاد الشي راح تكوني جنب بنت أختك ما تنكريش و تقولي ماتهمنيش شفتك كي كانت في حضنك كيفاه عيونك ضحكو بشوفتها أنا فقدت بنتي بلا ما نشبع  منها و بريحتها على القليلة خليني نكون جنب حفيدتي
ميسان: أنا قراري خذيتو مستحيل نتزوج بيه
و إذا حبيتي تكوني جنب حفيدتك روحي لعندها علاه قاعدة هنا ...ناضت رايحة لغرفتها مخلية يماها موراها
مريم : ميسان ...اه يا بنتي حابة مصلحتك برك