زوجي المزيف {من تأليف و كتابة Macilia Ch}

33

زوجي_المزيف🔥🔥🔥
#بقلمي_macilia_ch 🥀🥀
الحلقة 33: 🔥🔥🔥

عضت على شفتها و وجهها رجع حمر و هي
تخزر للنويزات لي بين يديها و تتخيل فروحها بين يديه ...تنهدت و حطتها على جنب داخلة للدوش ...نحات حوايجها و فتحت المرش عليها
خلات الماء ينزل و غمضت عينيها تخمم
هي حابة تكون معاه مراحش تنكر أما جزء منها ماشي حاب ..فكرة أنو كان مع ختها المحتالة من قبل .. تشعل نارها و قلبها يغلي ...الفكرة بحد ذاتها جننتها أنو كانت وحدة قبلها معاه و شكون بالتحديد ختها المحتالة ...زيرت على عينيها بوجيعة كبيرة في قلبها ...نزلت دمعة سخونة على خدها تحرق ...حتى لدوك مزال ما نساتش واش دارتلها ختها الوحيدة و بسبة شكون إيفان

أيمن: واش تقصدي بلي ماتعرفيش ؟؟ فهميني فهاذي ترا!!! حابة تجهليني و لا كيفاه؟؟؟ احكي نسمع فيك ؟؟؟
تولين: كل الورق المهمة مخليهم عندو و غالق عليهم في خزنة غير هو يعرف كلمة السر و اذا غلطت و حطيت كلمة سر غالطة ولا حاولت تكسر الخزنة و لا تخربش فيها راح يصيبك ماس كهربائي قاتل فثواني ترجع جثة هامدة
زم أيمن شفافو بغش يحكي ...
أيمن : لازم نعرفو كلمة السر فأقرب فرصة
رن تلفونو ...جبدو و حطو في وذنو يحكي
أيمن: ألو
.....
شكون تقصد ؟؟؟
......
لا تتمسخر صح
......
اوكي اوكي فهمت صحا ...غلق التلفون و جهو انخطف و رجع لونو صفر
عقدت تولين حواجبها تحكي
تولين: وشبيه وجهك رجع صفر شكون حكا معاك؟؟
أيمن: لي كنت خايف منو صار
تولين: واش تقصد ؟
أيمن: نص زعماء المافيا الكبار لي كانو تحت إمرتنا انقتلوا بأبشع طريقة ...لقاوهم كلهم مقتولين فقصورهم و احشائهم خارجة
بلعت ريقها تحكي
تولين: و رمز غريب منقوش على جبينهم !!
أيمن: ايه
تولين: جهنم رجع
أيمن: إذا عرف بواش راني نخطط راح تتخلط ...و راني متأكد أنو التحرك تاعو فهاذ الوقت بالتحديد مجاش من العدم
تولين: واش تأمر ؟؟
أيمن: إيفان لازم يموت اليوم قبل غدوة ...خبري الجاسوسة لي تم تنفذ مهمتها اليوم ...قبل ما يوصل جهنم لعندنا و يقضي علينا بأبشع طريقة
تولين: حاضر
أيمن:  و حاولي تعرفي رمز الخزنة
هزتلو براسها بايه و خرجت تنفذ واش أمرها تدير
نفخ على جنب و ضرب يدو فالهواء ...
أيمن: يا أنا يا أنت هاذ المرة

خرجت من الدوش لابسة حوايجها ...وقفت قدام المرايا تنشف في شعرها ...تنهدت بالصوت و هي تشوف فإنعكاسها فالمرايا  ...رفدت المشط تمشط في شعرها ...عقدت حواجبها وهي تشوف فانعكاس واحد ورا الستائر تاع التاقة ...بلعت ريقها وجمدت فبلاصتها و هي تخزر فيه من المرايا...مقدرتش تلمح ملامحو قدرت تلمح غير تبسيمتو الشيطانية لي على فمو ...فجأة و فرمشة عين اختفى كأنو مكانش موجود ...حركت راسها يمين و يسار تحكي
ميسان: أكيد نتخيل
فيقها من سرحتها يدين تحطت على كتافها ...تنفضت في بلاصتها ... و بلعت ريقها و هي تشوف فإيفان وراها قدقد ...يخزر فيها بنظرتو الحادة من المرايا
شد خصلة من شعرها و قربها لنيفو يشم فيها و هو يخزر فيها فنفس الوقت ...حست السخانة طلعتلها و ذابت في حوايجها ...لمستو على شعرها حرقتها ...هي تحبو أما متحبش تضعف قدامو ...متحبش تكون لقمة ساهلة و يحصل عليها بسهولة تحب يتعب حتى يوصللها ...و الأهم أنو يعرف قيمتها ...مزالت متفكرة واش صرا فالمشفى كي مرضت جوري كيفاه همشها و قريب كلاها بالهدرة
حكا بصوت قريب للهمس
إيفان: ريحة شعرك تهبل ...قرب منها كثر كأنو معنقها ...غمضت عينيها كي دخلت ريحتو لنيفها ...غطاها بجهامتو حتى ولات متبانش و حاوطها بيديه ..حاشي راسو في رقبتها يشم في ريحتها ...تكبست و تروهجت من لمستو ...دارت لعندو و طلعت راسها تخزر لعينيه المذبالين قاعد يخزرلها بخزرة مفهمتهاش ذوبتها ....دوختها...زاد ضحكلها على جنب ..حست بخدودها حمارو ...عضت على شفتها تخبي في احساسها و كمية المشاعر لي تحس بيها غير تشوفو.... فلحظة قرب وجهو من وجهها و شفايفو من شفايفها ...غمضت عينيها تستنى فيه يبوسها ...ضحك على جنب و راح و خلاها وحدها تم مادة شفافها للريح
فتحت عينيها كي حست بلي طول ...رجع وجهها حمر من الزعاف و من الحشمة ...
زمت شفافها ماشي عاجبها الحال ...دمعوا عينيها  و دارت داخلة للغرفة ....قبل ما تدخل ... حست بيدو لي شدتها من وسطها و دورها لعندو ...خبطت فيه و حطت يديها الزوج على صدرو تخزر فيه و عينيها مفتوحين على وسعهم ...قبل ما تستوعب و لا تقدر تنطق بحرف باغتها كي حط يدو ورا رقبتها و شفافو على شفافها يبوس فيها ...حست برجليها ماشي حاملينها ...رعشت في بلاصتها من قربو ... غمضت عينيها تستحلى فبوستو...بعد دقايق ... جبد روحو من عليها يحاول يرد فالنفس ...و يحكي
إيفان: حبيت نعتذر على مقبيل ..مكانش لازم نتصرف هك و لا نقول الكلام لي قلتهولك ..أنا واثق فيك و مصدقك فكل حرف تحكيه...حاب دوك تحكيلي على علاقتك بادهم من الأول حتى اللخر ..و حاجة ثانية حابك توعديني من اليوم و رايح ما راح تخبي عليا حتى حاجة ..نحب نبداو علاقتنا من جديد و نتعرفو على بعض أكثر ...نحبو بعض ...و حتى لو جاء نهار و زعفتك فيه حابك تهربي مني ليا ...نحبك تفتحي قلبك ليا ...اوعديني منا و جاي ما راح تخبي حتى حاجة عليا
تبسمت و ضحكو عينيها بفرحة
ميسان: قبلت اعتذارك
شاف فيها بنص عين يحكي
إيفان: ميسان 😐😐
تبسمت بتسيتسيت و قربت منو حاطة نيفها على خدو و يديها على صدرو تحكي
ميسان: وعد

حنين عندها يومين على أعصابها ...كلام نيروز مزال يرن في وذنيها ...أدهم عايش ...وقفت من على السرير تخمم و تحاول تربط الخيوط ببعضها ...فهاذ اليومين حاولت تحكي معاه ...أما كأنو فص ملح و ذاب ...حبت تحكمو و تقولو منين تعرف أنو عايش و علاه جيت قلتلي أنا بالذات؟؟ و كي عايش وين راه؟ و كيفاه ما ماتش ؟؟ و أسئلة بزاف ما لقاتش أجوبتها حتى لدوك ...حرقت مخها بالتخمام أما شي
وقفت قدام التاقة تطل منها ...لمحت أيمن لتحت واقف وحدو قدام البيسين ...عقدت حواجبها و ما ترددتش للحظة حتى تنزل للتحت لعندو
وقفت وراه ...تخزر فيه و تبلع في ريقها بالسيف ...حكات بصوت شبه مسموع
حنين: أيمن
دار لعندها مقطب حواجبو بحيرة
أيمن: حنين!!
حنين: حابة نحكي معاك في موضوع
أيمن: ايه واش هو الموضوع ؟
ترددت حتى تحكي ..هزت راسها ليه
حنين: أدهم سمعت أنو عايش
عقد حواجبو مصدوم
أيمن: كيفاه عايش ؟؟ ههه خرفتي !! كلنا شفناه كي طرطقت الفيلا و هو داخلها منين حا يعيش مثلا!! حنين بطلي هلوساتك ..أدهم مات و مراحش يرجع طمني روحك ...قرب منها يحكي
أيمن: نظن لازم تشوفي طبيب نفسي
كرزت و جنت من كلامو
حنين: تقصد اني مهبولة !!
أيمن: شكون قال ؟؟ انا مقلتش اما خليني نرد على كلامك لي يشوف طبيب نفسي ماشي مهبول أما تجاوز مرحلة الجنون ...روحي داوي روحك  ...ضحك على جنب ضحكة استفزتها من داخل أما مبينتش
حنين: نظن لزوج نعرفو شكون لي يحتاج يروح عند طبيب نفساني أكثر لأنو هاذ اليامات اللخرة تصرفاتك و كلامك متناقضين ...مرة تقولي نحبك و مرة تستفز فيا بهدرتك... مرة تبعدني عليك و مرة تقربني منك ...حطت عينيها فعينيه تحكي و تقحرلو
حنين: روح راجع روحك قبل ما تحكي عليا نظن انت لي تحتاج طبيب لأنو حياتك داخلة فحيط و كلامك ماشي متوازن و انت بكلك كذبة تعرف غير تكذب ...كملت كلامها و دارت داخلة أما حبست على كلامو اللخر
شد على قبضة يدو بزعاف و تنهد
أيمن: غالطة  حكاها بصوت عالي ...ضحك على جنب ...الشي الوحيد لي متوازن و الحقيقي في حياتي هو أني نحبك و قلبي يدق جيهتك و هاذ الشي ما راحش يتغير أما منقدروش نكونو مع بعض
دارت لعندو تحكي باستهزاء  و تمشي جيهتو ...وقفت قبالتو تحكي بغل
حنين: السبب؟؟ علاه؟؟ قول ؟؟ احكي كلمة و برر و لا تعرف غير تكذب ..أصلا نتا كذبة كبيرة فحد ذاتك و تعرف تخرج من فمك غير لكذب ...اقعد ما تكذب على روحك و على الباقي لأنو ما رانيش مصدقاتك و لا راح نصدقك ...أما تعرف اكثر حاجة نادمة عليها أكثر من أني حبيتك هو اني وقفت فطريق الرصاصة لي كانت حا تنهي حياتك و تخلصني منك ...
أيمن: لهاذ الدرجة كارهتيني ؟؟
حنين: و اكثر ..
تبسم
أيمن: تكذبي ...توترت و حاولت متبينش قدامو رسمت ضحكة صفرة على شفايفها  و دارت داخلة تجري للداخل
نفخ على جنب و دار لجهة البيسين يحكي مع روحو
أيمن: كلشي راني نديرو ليك و لسلامتك ..نهايتي معروفة أما نتي حياتك مزال حتى ما بداتش ..ضحك ضحكة تاع واحد مغلوب على أمرو ...ضحكة تاع واحد شايد هم كبير ورا ظهرو ... ضحكة فيها بزاف معاني ... ضحكة حزن على محبوبتو لي ما راحش يقدر يجتمع معاها فنفس السقف