زوجي المزيف {من تأليف و كتابة Macilia Ch}

32

زوجي_المزيف🔥🔥🔥
#بقلمي_macilia_ch 🥀🥀
الحلقة 32: 🔥🔥🔥

بعد يومين ...
تفتح باب القصر ...رجعت ميسان و جوري بعدما كانوا غايبين...رجعوا أما هاذ المرة كأم و بنتها
دخلت ميسان للقصر محملة جوري بين يديها ..و إيفان وراهم
بشرى: أهلا و سهلا برجعتكم وليدي
إيفان: الله يسلمك ...شافت بشرى فميسان بنص عين تحكي ..
بشرى: أهلا و سهلا ميسان ...عوجت فمها تحكي ...ظهرت ختك ماشي ساهلة .. و فوقها يماك مساعدتها ..تغيضي يماك و ريما لعبوا عليك بكل سهولة و نتي كي الحمارة بيناتهم
غمضت ميسان عينيها بقهر ... أصلا هي نفسيتها تعبانة ...زادت بشرى كملت عليها
ايفان: مدام بشرى يكفي ...لوين  حابة توصلي؟؟؟ تعرفي مليح أنو ريما استغفلتني أنا تان ماشي غير ميسان و من فضلك ما نحبش هاذ الموضوع يتفتح من اليوم و رايح ... هاذ موضوع شخصي و ميخصكش
شاف فيها بخزرة تقتل و شد كتف ميسان يحكي
إيفان: هيا خلينا نطلعوا الفوق
هزتلو راسها و توجهوا جهة الدروج طالعين للفوق
حاتم: لازم دايمن تطلقي سمك ماما
بشرى: شوف شكون رجع يحكي ...روح شوف مرتك قبل وين راعي يمات ماهيش باينة ممبعد انطق
بشرى: فاطمة قهوتي
قلب عينيه منها ....جبد تلفونو من جيبو يقرا فالميساج لي بعثاتو هالة من يوم ما خرجت من القصر و ما رجعتش
" كي ترجع مرت خوك و بنتو للقصر سالمين أرواح لهاذ العنوان **** لازم نقعدو وحدنا و نحكو . "هالة"
رجع التلفون لجيبو و تنهد
خرج لبرا يحكي مع الحراس لي قدام الباب
حاتم: راني رايح عندي شغلة مهمة نديرها ...ما تخلوش الطير الطاير يطير بلا علمكم حلو عينيكم مليح ما نسحق حتى غلطة فهمتوا !!!
حاضر
ركب فطوموبيلتو و قلع طاير لعندها ...

عند ميسان ..بعدما دخلوا للجناح ...حطت جوري على السرير  بعدما باستها ...خرجت للصالة لعند إيفان ...قربت منو و حطت يدها على كتفو تحكي
ميسان: إيفان !!
تلفت لعندها يسأل فيها بعينيه بمعنى واش كاين؟؟
ميسان: حتى لدوك ما رانيش نقدر نصدق أنو جوري تكون بنتي و لا ريما تقدر دير فيا هك و لي قاهرني اكثر ماما خبات عليا و عاونتها
قعد على الفوتاي و قعدها جنبو يحكي
إيفان: صح حاجة متقدريش تصدقيها بسهولة خصوصي اذا جات من اقرب الناس ليك أما يماك دارت هك من خوفها عليك و من خسارتك ..ما رانيش نبرر فعلتها بصح على الأقل لازم تهدري معاها .. من نهار عرفنا و طردتيها من المشفى ما هدرتيش معاها ...نظن الوقت مناسب حتى تروحي لعندها
ميسان: ايه صح أما ماشي ساهل
إيفان: نعرف أما لازم تحكي معاها
ميسان: صح ...ناضت من بلاصتها رايحة لعندها
نفخ إيفان على جنب فاد ...هز يدو و حطها على عينيه
قربت ميسان من باب غرفة يماها ...حطت يدها على الباس تاع الباب مترددة من أنو تفتحوا ...غمضت عينها و تنفست بعمق ...فتحت عينيها و دقدقت فالباب ...ثواني حتى فتحتلها يماها الباب تحكي و الضحكة مرسومة على فمها
مريم: ميسان ...جبدتها من يدها و دخلتها للداخل
حطت يدها على وجه ميسان تمسح على خدها و تحكي
ميسان: توحشتك يا عمري حمدالله على سلامتك ...نحاتلها يديها من وجهها و تراجعت خطوات للور تحكي
ميسان: تحكي كأنو حتى حاجة ما صرات ؟؟ لهاذ الدرجة الحكاية عندك تافهة ؟؟
مريم: لا حاشى يا بنتي أما ...
قاطعتها ميسان تحكي
ميسان: انتي أكثر وحدة تعرفي الفراغ ة الشرخ الكبير لي خلاتو ريما بعدما راحت و انتي بكل بساطة شاركتيها بجريمتها ...انتي بعملتك خليتيني نحس كأني ما نعرفكش !!
مريم: كنتي راح تموتي ميسان افهمي مكانش بيدي ...ماقدرتش نتجاهل أنو نشوفك تموتي و انا عندي الحل و ما نتجاهلو بكل سهولة افهمي أنا أم و كنت خايفة على بنتي لي كانت بين الحياة و الموت  ...حطي روحك فبلاصتي حتى نتي ام
ضحكت ميسان باستهزاء تحكي
ميسان: ام ..  ههه ام ياك ؟؟؟ هههه بفضلك عرفت من ايام أني ام لجوري صح أما ماشي أنا لي حملت بيها ...محسيتش بيها و هي داخلي تتحرك ...حتى زواج متزوجتش كي الناس ..تغرغروا عينيها بالدموع و غصت فالكلام تحكي
ميسان: انتي و ريما دمرتولي حياتي و خصوصي نتي ماما خيبتي املي فيك و كسرتي ثقتي بيك ...الله اعلم واش مخبية تاني .. شافت فيها بحزن و دارت رايحة
قعدت مريم على السرير حاكمة دموعها تحكي
مريم : راح يجي يوم و تفهميني يا بنتي
خرجت من غرفة يماها و غلقت الباب ...طلعت الفوق وين الجناح تاعهم ....لمحت إيفان و تولين يحكو ...قربت منهم و هي تقحر لتولين ما حستش بعيون إيفان الحمر و هي تشوف فيها ...كانت راح تدخل للجناح  ديراكت بلا ما تحكي ....أما وقفها كلام إيفان لي خلاها تجمد فبلاصتها و تبلع ريقها شحال من خطرة  ...
إيفان: ميسان واش علاقتك بأدهم ؟؟