الحلقة 12
طلعت للجناح تاعهم ...فتحت الباب و دخلت حاسة راسها يسطر من الوجع
وقفت فنص الغرفة و هزت يدها غلغلتها في شعرها ...غمضت عينيها لثواني منبعد عاودت فتحتهم ..قابلتها صورة ريما ..قربت لوين محطوطة الصورة و رمات يدها رفدتها
ميسان: كلو بسبتك أنتي حتى و نتي ميتة مارانيش قادرة نعيش حياتي كيما نحب نكرهك نكرهك سمعتينيي نكرهك ...دخل إيفان فهاديك اللحظة و نطرلها الصورة من يدها
إيفان : واش راكي ديري هبلتي؟؟
تجمعوا الدموع بين عينيها ....و دارت للحيط بلا ما ترد عليه
نفخ على جنب و تنهد يحكي
إيفان : ما نعرفش السبب الحقيقي لكرهك لأختك ممكن لأنو تخلات عليكم قبل خمس سنين و لا بسبب غيرو أما ريما كانت تحبك و تحكيلي عليك دايمن
ميسان : هي بحد ذاتها كذبة كبيرة نكرهها إيه راحت و تخلات علينا من خمس سنين سمعتني أنا و ماما كلام قسملنا قلبنا لنصين و ماما مرضت من جرتها دايمن كانت تخفي حقيقتها كانت حية تحت التبن تهتم برك لمصلحتها
إيفان : مهما حكيت مراحش تستوعبي ولا تحاولي تفهمي ولا تتفهمي حتى شي...راسك يابس و لازمو تكسار ...نوضي و روحي للدوش اغسلي وجهك و انزلي للحفلة متخلينيش نتعصب أكثر من هك
دار خارج أما حبسو سؤالها المفاجئ
ميسان: كنت تحب ريما؟ على حساب ما راني نشوف موتها ماشي مأثر فيك ؟؟
إيفان : علاقتي بريما مراحش تقدري تفهميها و لا عقلك الصغير راح يستوعبها...كمل كلامو و خرج
عوجت شفافها ماشي عاجبها الحال تحكي مع روحها
ميسان : هاذ البنادم يحكي بالألغاز نظن سألتو سؤال بسيط !! اوف شحال مغرور و دايها فروحو
كان يمشي و يتلفت من ومن ...جا فايت على بيت من البيوت لي لتم حتى جبدو واحد من ذراعو و دخلو للغرفة
****: حبيبي توحشتك
أدهم : متخميش نتي و إذا شافنا كاش واحد ؟؟ تجبديني هك ؟؟
***: يوو حبي متكبرش الموضوع حتى و لو شافك كاش واحد من الخدم و لا غيرو ميهمش مبقاش بزاف و راح نعلن علاقتنا مع بعض و راح تولي فرد من هاذ العايلة و فرد من جماعتنا تان ...غمزاتو و عضت على شفتها ...متوحشتنيش ؟؟
هز يدو و حطها على رقبتها و قرب وجهها. من وجهو و باسها من شفايفها و بعد
أدهم: نظن وصلك الجواب ..راح ننزل دوك ..عاود خطف بوسة من شفايفها و خرج من الغرفة و كان نازل للتحت أما حبس فبلاصتو كي لمح ميسان نازلة من الطابق الثالث ..غير حطت رجلها على الدرجة اللخرة تقابلت عينيها مع عيون أدهم لي غير شافها قرب منها ..بلعت ريقها وحست العرق البارد ينزل من جبينها أما هو فتبسم على جنب يكيل فيها من فوق لتحت
أدهم : أهلا مدام ميسان ..مقدرناش نحكو برياحة من شوي حسيتك كأنو كنتي مقلقة
ميسان : لا راني تعبانة شوي
أدهم : نظن صعب عليك أنو تتزوجي راجل أختك ..حبيت نقلك أنو ترمي الآراء و الإنتقادات السلبية لي تسمعي فيهم خصوصا فهاذ الحفلة نضمنلك كلهم منافقين و فأول فرصة ينهشوا لحم بعضاهم كي الكلاب الجيعانة نتمنى متوسخيش روحك بالمستنقع هذا و لا بالناس لي فيه ..أديها نصيحة من صديق تبسم معاها و هي تبسمت معاه بسيف فوق من قلبها الوضع هذا حساتو غريب بزاف و خصوصا الشبه الكبير بين فارس و هذا أدهم ..
أدهم: تفضلي ننزلو كيفكيف
ميسان: اوكي و شكرا على النصيحة أما حبيت نسقسيك؟
أدهم : العفو أكيد تفضلي
ميسان : معندكش خوك توأم ؟
طلق ضحكة عالية بعدها سكت كي شافها عقدت حواجبها
أدهم: أحم لا معنديش أنا الفرد الوحيد فعايلتي علاه؟؟
ميسان: آه أوكي ..أنت تشبه لواحد نعرفوا لهذا سقسيت
أدهم : كيما يقولو يخلق من الشبه أربعين
ميسان: إيه صح
كملو نازلين حتى لتحت و كل واحد شد طابلت
أنت تقرأ
زوجي المزيف {من تأليف و كتابة Macilia Ch}
Любовные романыزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
