الحلقة 13:
راحت جابت عصير و حطت فيه مادة مخدرة يعني لي يشربها يقعد صاحي أما ميقدرش يتحكم فتصرفاتو يرجع شخص آخر ...أشارت لسارفور يجي لعندها
بشرى : راك تشوف هاديك لي واقفة لهيك و لابسة روب حمرة ...
دارلها براسو إيه ..إيه شايفها
بشرى: روح مدلها هاذ الكاس و بلاك تقولها أنو أنا مديتهولك و لا تقول لكاش واحد..
حطو قدامها و روح بلا لف و لا دوران مفهوم ؟؟؟
مفهوم حاضر
شد الكاس و حطو فصينية رايح لجهة ميسان
طلقت بشرى روحها على الفوتاي تاع الصالون تشوف فيها من الزجاج
تبسمت بخبث ...
بشرى: إذا مكرهتلكش حياتك ميسمونيش بشرى ...
وصل لعندها السارفور و حط الكاس قدامها
تفضلي مدام طلبتي عصير
هزت راسها ليه ...أما ما طلبت شي ...قبل ما تكمل كلامها كان راح
عقدت حواجبها تشوف فالكاس
حست ريقها شاح
ميسان: مايهمش إذا طلبتو و لا نن ..أصلا جا في وقتو
هزت يدها و قرباتو لفمها و شرباتو على نفس واحد
بعد دقايق حكمتها الدوخة و حست راسها يدور
غمضت عينيها و عاودت فتحتهم شحال من خطرة
كانت الحفلة قريب تخلاص ...حست ميسان روحها ماشي مليحة و راح ترد ...فجأة راحت تمشي بالزربة و يدها على فمها ...شافها إيفان كيفاه راحت تجري ...جات لعندو يماه
بشرى: وليدي روح شوف مرتك حسيتها ماشي قد بعضاها
دارلها براسو إيه و طلع لفوق
دخلت ميسان للجناح و راحت ديراكت للدوش و إستفرغت تم ...بعدما كملت و حست روحها مليحة
بللت وجهها بالماء و خرجت تتطايح من الدوش تقول سكرانة
غير خرجت شافت إيفان مقابلها
فلحظة فقدت توازنها و كانت حطيح أما زرب و شدها من خصرها بقوة حتى ضربت في صدرو
تقابلو عينيهم مع بعض ...رمشت عينيها ورا بعض حاسة روحها دايخة و ماشي واعية لواش صاير حولها
إيفان : أنتي مليحة كاش حاجة توجع فيك؟؟
ما حستش على روحها حتى ضحكت معاه
ميسان: لا أنا مليحة ...حاسة روحي طايرة
إيفان : ما تقوليليش شربتي ؟؟
ميسان: لا شربت كاس عصير عادي
قربت منو كثر حتى صارو يتنفسوا نفس واحد ..حطت يدها على وجهو تمرر فيه على لحيتو ..بعدها هزت يديها الزوج حطتهم مور رقبتو ...تحكي بصوت قريب للهمس
ميسان: حابة نبوسك و نذوق شفايفك ..عضت شفايفها لي مطليين بالروج ...هزت صبعها و حطاتو جنب شفايفها..شتهيتهم
الحركة لي دارتها و كلامها زادو على ما بيه فوق ما متمني يذوق شفايفها من اللحظة الأولى لي شافها حاطة هذاك الروج عليهم و هو متمني يغطس فيهم و دوك عطاتو الإشارة الخضرا أما متردد حاسها ماشي فوعيها و ماشي حاب يجيب وجع راس لروحو خصوصي منها
...ميسان مخلاتوش يخمم أكثر و حطت شفافها على شفافو ...هنا ما قدرش يتحمل أكثر ...هز يدو حطها مور رقبتها و يد غلغلها في خصلات شعرها ..و غطس فشفايفها و تفنن فيهم كيما يحب
طلع الصباح و تسسللت أشعة الشمس داخل الغرفة ...كانت راقدة على السرير و شعرها مفروش على المخدة ...فتحت عينيها على ضو الشمس لي قلقها ...قعدت ثواني تخزر للسقف و تحاول تستوعب وين راهي ...فجأة شدها سطر قوي في راسها ... تقعدت فبلاصتها شادة راسها ...
ميسان: أه راسي
إيفان: صباح الخير
تنفضت على صوتو ...و دارت على جنبها لقاتو قاعد على الفوتاي لي جنب الشباك و كاس قهوة في يدو ...مضيق عينيه يخزر فيها
ميسان: صباح النور ...عاودت نزلت راسها و حكماتو من شدة الوجع
ناض من بلاصتو و مدلها الكاس لي كان على الطابلة جنبو
إيفان : شدي أشربي راح يتنحالك وجع الراس
شداتو من يدو دون كلمة وجع راسها مخلاهاش تحاول تخمم و لا تستفسر المهم يتنحالها الوجع
شرباتو على نفس واحد و ناضت من السرير
ضيقت عينيها كي لقات روحها مزالها بروب البارح ...دارت لعندو تستفسر
ميسان: واش صرا لبارح ما راني متفكرة حتى حاجة ؟؟
عاود قعد على الفوتاي و شد كاس القهوة بين يديه مرة على مرة يترشف شوية من القهوة
إيفان: سقسي روحك ..منعرف واش شربتي لبارح حتى رجعتي كي السكرانة
ميسان: كيفاه ؟؟ مفهمتش ؟؟
إيفان : ما راكي متفكرة والو من لي صرا البارح ؟؟
عقدت حواجبها بحيرة
ميسان: لا ؟؟ تقدر تخرج من حالة لي يحكي بالألغاز و تفهمني واش صرا بالضبط لأنو راسي حساتو راح يتكسر و ما رانيش فحالة نتناقش فيها !!!
حط فنجان القهوة و ناض من بلاصتو ...يقرب منها خطوة خطوة و مع كل خطوة دقات قلبها تضرب بقوة أكثر في وسط صدرها
رجع مقابلها قريب يلسق فيها ...حاولت ميسان ترجع خطوات للور أما إيفان سبقها و شدها من خصرها حتى خبطت في صدرو بقوة
شهقت و بلعقت ريقها لي حساتو شاح تحكي بصوت فيه بحة
ميسان : واش راك دير؟؟ بعد ...
إيفان : أنتي قلتي نفهمك واش صرا البارح لقيت أفضل طريقة نفهمك بالفعل أفضل من الهدرة برك و غمزها ...و قبل ما تنطق ...حط يديها الزوج على رقبتو يحكي بصوت يذوب
إيفان: لبارح قربتي مني هك ...و حطيتي يدك على وجهي هك ..حكم يدها و حطها على وجهو يمرر فيها على لحيتو ...عاود حكم يدها الثانية و حط يديها الزوج ورا رقبتو ...بعدها قربتي مني و
قرب منها أكثر حتى صارو يتنفسو نفس واحد حست ميسان رجليها خانوها و راح تطيح ...بلعقت ريقها لي حساتو شاح تستنى فيه يكمل فهدرتو
إيفان : بعدها بستيني من شفايفي
فتحت عينيها على وسعهم و قبل ما دير ردة فعل و لا تبعدو ...غلغل يدو في شعرها و الأخرى حطها ورا رقبتها و باسها حتى انقطع النفس عليهم ...بعد منها و هي دزاتو من عليها تحاول ترد النفس لي راحلها
ميسان: أنت واحد كذاب فوق ما مغرور و شايف روحك استغليتني و حاولت تضحك عليا و تفتري عليا على حسب كلامك أنو أنا قربت منك و بستك الله أعلم واش صرا البارح حبيت تلسقو فيا ... شوف ...هزت صبعها لعند وجهو ..أنا مستحيل نقرب منك ولا نخمم مجرد فكرة أني نولي مرتك صح...انت تعرف مليح أنو نتا ارغمتني على هاذ الزواج و بسبب غرورك و كبريائك متقبلتش وحدة ترفضك علابيها درت هاذ السيناريو الفاشل تاع أني رميت روحي عليك هاكذا و أنا متأكدة كيما إسمي أنو حطيت حاجة فالعصير تاع البارح و بعتهولي راك تشوف فيا غبية باه تعديها عليا !!!
سكتت تحاول تستجمع أنفاسها لي راحولها وهي تحكي بلا توقف
عقد حواجبو ..و علامات الغش باينة على وجهو
إيفان : كملتي ؟؟
ميسان : لا مازلت مكملت ..قاطعها كي حط يدو على شفافها
إيفان: خلاص اسكتي صدعتيلي راسي بكلامك الفارغ ...هاكي شوفي و قوليلي شكون يكذب على شكون ؟؟
خزرت مرة فالتلفون لي بين يدو و مرة فيه ...حكماتو لعندها قابلها فيديو ...ضغطت على الزر و هي تشوف واش صرا البارح
عاود رجع الفوتاي و حط رجل على رجل يتفرج فتعابير وجهها لي تبدلت و وجهها لي رجع أحمر
إيفان: كيما راكي تشوفي عندي كاميرات مراقبة فكل القصر و فالجناح تاعي تان تحسبا لأي حاجة ممكن تصرا. .و نظن الفيديو لي قدامك شرحلك واش صرا البارح نتي لي رميتي روحك عليا و فوق هاد الشي كنت قادر نستغل ضعفك و نكمل للأخير أما أنا شخص ماشي من هذاك النوع أتاكدي ...حتى لو كنتي مرتي مستحيل نسيف عليك حاجة و انا لبارح عرفت أنو مراكيش فوعيك و بما انو نعرفك ماشي طايقتيني و ناقمة عليا و متمنية تتخلصي مني فكان ساهل عليا نعرف هاذ الشي و أنا ماشي من النوع لي يستغل نقاط ضعف أي شخص لمصلحتي ...كمل كلامو و شد التلفون من يدها ...و دار خارج
ميسان قعدت مصدومة فمكانها لولا الفيديو كانت راح تظلمو و تحكم عليه بلا ماتفهمو ...أما فنفس كبر فعينيها كي عرفت و شافت أنو كان قادر يستغل ضعفها و يدير واش يحب فيها و يتحجج بلي هي مرتو و من حقو يدي حقو الشرعي منها ...ترسمت ضحكة على شفافها و دخلت للدوش و هي تتبسم جاست كيما هذا منو خلاها تبدل نظرتها عليه ولو شوية وزيد ارتاحت كي ما صرا والو بيناتهم خصوصا انو مكانتش في وعيها ...ضربت طلة فالمرايا لقات شعرها طالع فالسماء و كحلها سايل و مكياجها فسد حطت يدها على فمها مصدومة من منظرها
ميسان: اخخخ واش هاذ التبهديلة كل هاذ الوقت كنت واقفة قدامو هك و نعارك فيه أكيد حسبني كاش مهبولة خارجة من السبيطار ...ضربت راسها بيدها ...غبية .
أنت تقرأ
زوجي المزيف {من تأليف و كتابة Macilia Ch}
Romanceزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
