زوجي_المزيف 🔥🔥🔥
الحلقة 21:
خرجت حنين من عند أدهم رايحة تركب فطنوبيلتها ...حست بواحد جبدها من ذراعها تخبطت في صدرو ...هزت راسها ليه تخزر فيه
حنين : واش تحب مني علاه لاحقني حتى لهنا
أيمن : راح نفتحلك عيونك على حبيب قلبك
حنين : ههه وكيفاه مهما حكيت مراحش نصدقك
أيمن : راح تصدقي و بسيف عليك ...أرواحي ...جرها من يدها و دخلها فطوموبيلتو
شغل الموتور و قلع ...بعد نص ساعة لحقو لواحد الفيلا فوسط الشجر ... حبس بعيد وين ما يقدروش يشوفوهم
حنين : ايه و درك؟؟
قعد مركز يخزر للقدام ..
أيمن : شوفي قدامك
دورت راسها تخزر لوين يخزر ...فتحت عينيها على وسعهم
حنين : لا مستحيل كيفاه ...هزت يديها تحك في عينيها ماشي مصدقة واش راهي تشوف
عند هالة كانت وصلت قدام فيلا صغيرة ...عطات للطاكسي حقو و نزلت تمشي بشوية شادة كرشها بيدها تتوجع
هزت يدها و دقت الباب ...استنات شوية حتى فتحتلها وحدة لابسة نويزات تمضغ فالشوينقوم منظرها وحدو قززها و عيفها فروحها
خير واش تحوسي ؟؟
قلبت عينيها منها تحكي
هالة : أنا نكون مرت هذاك لي داخل يا ###...قبل ما تخليها تستوعب واش قالت ... حكمتها هالة من شعرها رماتها برا و غلقت عليها الباب
قعدت هاذيك تخبط فالباب و تعيط ...تجاهلتها و دخلت للداخل تحوس عليه بعينيها ...
حاتم : واش هاذ الصوت ...نازل من الدروج عريان يحك في شعرو و يتثاوب ...حبس كي شافها قدامو ...حكم فالحيط يوازن في روحو من كثرة الشراب لي شربو يحكي
حاتم : ههههه أهلا واش جابك فكريني فإسمك نسيتو يا سكر ...قرب منها شاد خصلة من شعرها يشم فيها
حاتم : ريحة شعرك تهبل ههه
زمت شفافها تسب فيه في قلبها تخزر فيه بغش
حكماتو من يدو و كركراتو حتى الصالة رماتو على الفوتاي داخلة للكوزينة تحضرلو فقهوة لحتى يصحصح
سند راسو على الفوتاي مغمض عينيه من وجيعة راسو
هالة : شد اشرب وصحصح عندنا ما نحكو ...حكم الفنجان يشرب ...كمل و حطو فوق الطابلة ...هز راسو ليها يخزر فيها
حاتم : مرسي على القهوة ..علاه جيتي مزال جرحك جديد
هالة : و نتا واش دخلك ...ماشي نتا لي تسببت بهاذ الجرح زيد جاي لهنا تجوز في وقتك مع ل$### تاعك و ماشي مقيمني حتى
حاتم : و أنا واش راح نديرلك لتكوني صدقتي روحك بلي نتي مرتي صح ...ماشي كي مديتلك وجه خلاص أمنتي روحك و حاسبة راح تتفرعني فوق راسي ...حتى واحد ما قالك اهبطي للتحت و لا عاونيني حتى خليني نموت نتي واش دخلك ؟؟
هالة : مراكش متفكرني ...قربت وجهها من وجهو ... مراكش متفكر هاذ الوجه ...اتمعن فيه مليح و خبرني ماشي نتا سقسيتني من يومين أنو إذا شايفني من قبل ؟؟؟
عقد حواجبو يخزر فيها ما ينكرش أنو اول حاجة جذباتو ليه اول مرة هي لون عينيها الزرق ..متأكد أنو شافهم فكاش بلاصة !!! أما وين ؟؟؟
حاتم : ما رانيش شافي عليك علاه راكي تماطلي بالهدرة احكي و خلصيني نقعد نلعب معاك لعبة
حل اللغز و لا كيفاه ؟؟؟
ناضت من بلاصتها و قربت منو ...قعدت جنبو على الفوتاي ...هزت يدها حطتها على وجهة تمرر فيها على طول خدو
عقد حواجبو مستغرب يحاول يعرف وين حابة توصل
هالة : من ست سنين تلاقينا ...كذبت عليا ...حطت عينيها فعيونو تحكي
هالة : خليني نفكرك إذا تفكرت أصلا ...البنت لي خدعتها و أوهمتها بحبك بعدها قتلت والديها قدام عينيها و خوها الصغير لأنو باباها كان صحفي جايبها ورا عايلتكم ...باباك مد أمر بتصفيتو أما نتا حبيت تلعب شوية لأنو حياتك بلا إثارة ما تسوى والو ياك؟؟ لعبت بيا و قتلت كل عايلتي حتى أنا رميتني من الوادي بلا رحمة و لا شفقة أما عشت ههه بوجه جديد و هوية جديدة ...تنفض من بلاصتو مصدوم ..
حاتم: كنت علابالي شايف عيونك فشي بلاصة طلعتي نتي مرام ...ضحك و طبس على ركبتو ..هز يديه حطهم على خدها يحكي
حاتم: نتي عايشة !! مرام ههه أنا ..قبل ما يكمل كلامو حس بدوخة قوية حكماتو نحا يديه من عليها شاد راسو بزوج يدين ...هز راسو يخزر فيها و الضحكة مرسومة على فمها
حاتم : واش درتيلي ؟؟
هالة : أحلام سعيدة ...على كلمتها طاح فالأرض على ظهرو فاقد وعيو
ناضت و حكمت تلفونها و بعتت ميساج
تبسمت بخبث و خزرت فيه
أنت تقرأ
زوجي المزيف {من تأليف و كتابة Macilia Ch}
Romansaزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
