زوجي المزيف {من تأليف و كتابة Macilia Ch}

37

زوجي_المزيف🔥🔥🔥
#بقلمي_macilia_ch
الحلقة 37:

من لي طبعها إيفان و خرج يجري ...طاحت فالأرض و قعدت تم مصدومة و الدمعة متحجرة في شفارها. ...مصدومة من كلام ادهم و من ردة فعل إيفان ...ناضت من الأرض و قعدت على السرير تفرك في يديها بتوتر ...حاسة لمصيبة جاية و احساسها ما خابش ...تنفضت على صوت الباب تخبط بالقوي ..ناضت من بلاصتها و بلعت ريقها بخوف
وصل للجناح و خبط الباب بقوة ...صدم كي الثور الهايج ...وجهو حمر و عينيه تتشاعل بالغش ...وصل للغرفة لقى ميسان واقفة تخزر فيه بخوف ..جبدها من ذراعها يحكي و يرص على سنيه
إيفان: واش كان يدير أدهم ### ل ### ### و واش معنتها كلامو واش كنتو ديرو هنا انطقي ... احكيييي
فتحت عينيها على وسعهم من جهة كلامو لكلو سبان لي في حياتها ما سمعاتو  و من جهة الكلام لي اتهمها بيه ..نحات يدها من يدو بقوة ...نزلت دمعة تحرق على خدها ..زربت مسحتها تحكي
ميسان: هذا لي جا معاك ؟؟ واش درنا ؟؟ من نيتك هاااا ؟؟؟ من نيتتتتك ...بدا صوتها يعلى ...كنت علابالي بيه ميت حتى لقيتو ليوم في وجهي منعرف منين جا و لا كيفاش و ميهمنيش فهمتتتت..دارت و عطاتو بظهرها خارجة ..زرب شدها من ذراعها مرة ثانية و دورها لعندو ..جات عينها في عينو يحكي
إيفان: ما زال ما جاوبتيش على سؤالي واش كان يدير هنا وواش كنتو ديرو ...راحت تنطق أما قاطعها
إيفان: ولا كلمة ...شفت حالتك كي دخلت ..متنكريش ...زمت شفافها و دمعو عينيها تحكي بصدمة
ميسان: واش؟؟ كيفاه تحكي هك واش معنتها كلامك ؟؟ ...عيط عليها خلاها تغمض عينيها و دموعها نزلو ملقاتش الكلمات المناسبة حتى تدافع على روحها
إيفان: ميسااان متهبلينيش متحاوليش تنكري ...في رايك كيفاه دخل ؟؟ كاين جيش تاع حراس برا متدربين احسن تدريب..كيفاه قدر يدخل بلا ما ينتبهولو هااا جاوبي !! الا اذا واحد من داخل عاونو صح ؟؟ و هو وين كان ...عندك هنا !! فهاذ الغرفة و معاك ..طبعها جات طايحة على السرير ..رمالها زوج كلمات و خرج
ايفان: متوقعتكش ####
غمضت عينيها بقهرة و طرطقت بالبكا ...كلش جاز فلمح البصر ..لي قاهرها أكثر أنو مقدرتش تدافع على روحها قدامو
خرج برا القصر يشم هواء ...هز يديه و غلغلغهم في شعرو ينفخ يحاول يهدي روحو
وقفت تولين قدامو تحكي ...حاكمة الضحكة ...سمعت كل لي جاز بينهم مقبيل و تشمتت بميسان كيما حبت أما هذا ميكفيش
...رسمت ملامح الجد على وجهها تحكي
تولين: إيفان ...واش رايك تريح يامات شوية بعيد عن القصر و مشاكلو ..علابالي ماشي وقتو أما ...قربت منو و حطت يدها على كتفو تحكي
تولين: واش رايك بما أنو رجعنا صحاب ...تجي معايا نروحو كيفكيف نجددو صداقتنا و منها تريح راسك ...عندي بيت فالجبل المنظر لي فيه يسحر العقل و يخليك تنسى همومك ..واش رايك ؟
خزر فيها مليح ...و نزل عينو ليدها لي على كتفو ..جات فكرة في راسو هذي أفضل فرصة حتى يتقرب منها و منها يريح راسو كيما قالت
عاود طلع راسو يحكي يضحك على جنب
إيفان: موافق
تبسمت تولين بخبث
إيفان: نتي اسبقيني ...راح نفري شغالات هنا و نجي ..و ابعثيلي الموقع
تولين: حاضر ما يكون غير خاطرك ..راح نستناك ...غمزاتو و دارت رايحة جهة الكاراج
نفخ على جنب حاط يدو على راسو يخمم
عقلو يقلو روح هذي فرصتك ..و قلبو يقلو لا متروحش واش راح يصرا في ميسان كي تعرف ..واش راح يصرا بمشاعرها ؟؟
غمض عينيه بعدها حلهم مقرر بعدما تفكر حكاية أدهم
وقف قدامو رئيس الحراس يحكي
موسيو إيفان ...شفنا تسجيلات تاع الكاميرا ..مقدرناش نعرفو منين دخل التسجيلات ما بينت والو .. بينت برك كي كان داخل القصر ...أما طريقة دخولو و خروجو ماشي معروفة ...في رايي كاين شكون عاونو يدخل
دار لعندو و قوس حواجبو بزعاف يحكي
إيفان: أعرفولي كيفاه دخل و شكون عاونو
حاضر
فهاذيك اللحظة كانت تولين خارجة بسيارتها من القصر ..بعدما ساقت حوالي نص ساعة ..توقفت على جنب و نزلت منها و فتحت الباكاج ...خرج منو أدهم يحكي
أدهم: اخخخ تخنقت كنت زدتي طولتي
قلبت عيونها تحكي
تولين: هاهاهاهاها نكتة بايخة
أدهم: ايه واش صرا ؟؟
ترسمت ضحكة على شفايفها تحكي
تولين: الخطة سارت كيما خططنالها و اكثر ...إيفان جاي لعندي ...انت تعرف الجزء الثاني من الخطة ..كي يلحق الوقت نخبرك حتى تنفذو
أدهم: اوكي
تولين : هيا باي
دارت و ركبت فسيارتها و انطلقت لبيت الجبل تتبسم فتبسيمة النصر