الحلقة11
عند ميسان كانت تلبس فروبتها لي عطاتهالها حنين ...روب حمرة طويلة مبينتلها صدرها ...كتافها طايحين و مشقوقة من تحت
هزت شعرها ورا كتافها تتأمل راح روحها فالمراية تقول ماشي هي ...ميسان لي شعراتها مبعثرين كل وحدة فجهة ولا وجهها الصفر و عينيها المحوقين ...المكياج غيرها و لا الروب لي تفتق على بدنها مبينة تفاصيلها كثر
على تلفيتتها شافت إيفان داخل ...تقول جاي من حرب حوايجو مبهدلين و شوميزتو نصها على برا ...شافت فيه بنص عين أما هو مكلفش روحو أنو يخزرلها
ميسان: مغرور
حكمت بوشاتها رايحة تنزل للتحت وين الحفلة تمشي بشوية بسبة الطالون العالي لي ماشي موالفة تلبسو
دخل للدوش و نحا حوايجو ...فتح المرش و خلى قطرات الماء تنزل عليه ...حط يدو على الحيط مغمض عيونو ... يتذكر فالإحساس لي شدو كي كان داخل من شوية للجناح و شافها حس حاجة تحركت داخلو إحساس جامي حسو من قبل حتى مع ريما كي كانت مرتو ..الحاجة اللولة لي جذباتو الروج الأحمر لي على شفايفها بعدها نزل عينيه لفرقة صدرها الباينة من الروب ولا الشق لي باين من فخذها حتى لتحت...حسها متبدلة و زيانت على قبل أما الحاجة لي متبدلتش فيها و مستحيل تتبدل هي نظرتها لي فعيونها نظرة التحدي و القوة لي شافها فعينيها اول مرة قابلها فيها...نظرة جذباتو فأول لقاء جمعهم كيفكيف ...خزرة مخبية بزاف حوايج موراها و في نفسو حاب يكتشفها يكتشف ميسان و يحلها بالنسبة ليه ميسان أحجية صعبة و لغز صعب ينحل ..هذا قاع و اللالة ميسان تقول مشافهاش و معبرهاش و هو كان إفترسها بنظراتو و كمل ...
خرج من الدوش ينشف روحو لقاها خرجت ..جبد كوستيمو من الخزانة يلبس فيه كالعادة لونو أسود رش من بارفانو و دار خارج...
بعدما نزلت للحفلة ...عيون الحضور إنتقلو ليها يقيسوا فيها من التحت للفوق ...راحت خذات طاولة بعيدة عليهم أما مسلمتش من كلامهم ونظراتهم لي قاعدين يختارقوا فيها ..
....جاو لعندها زوج نسا
تنهدت فنفسها تدعي أنو الليلة تجوز على خير
مايا: مساء النور
جمانة: مساء النور
ميسان : أهلا مساء الخير ...رسمت تبسيمة صفرة على شفايفها
مايا: سمعت انو تزوجتي بإيفان مبروك عليك
ميسان : يبارك فيك
قحرتلها جمانة (كانت حاطة عينها على إيفان ): كنت راح نقولك مبروك أما منين راح تجي البركة من عندك ؟!!
لكزتها مايا على ذراعها باه تسكت : جمانة 🤨🤨
ميسان: عفوا !!! أما مفهمتش قصدك ؟؟
جمانة: نقصد واش راح يجي من وحدة تزوجت براجل ختها بعد أسبوع برك من موتها حتى أنو على الأقل مستناتش للربعين تاعها ....تؤتؤتؤ ...تعرفي كل النسا لي فالحفلة ماشي طايقين وجودك بداية بحماتك ..يعني وجودك ماشي مرغوب بيه
شعلت عينين ميسان بالغش كانت حا ترد عليها و توريلها مكانتها و واش تسوى لأنو شخصيتها ماشي ضعيفة وتجيب حقها بيدها أما كلامها اللخر قعد يرن في وذنيها "تزوجت بعد أسبوع من موت ختها مستناتش حتى للربعين يوم تاعها"
شافتها جمانة كيفاه ضايعة و تخزر للحضور بعيون فارغة كأنو أثرت عليها هدرتها تبسمت بخبث رايح تكمل ترمي سمها عليها ..
أما إيفان فشل خططها كي جا و شبك يدو بيد ميسان ...جرها معاه لوسط الجنينة بعدما مد لجمانة قحرة تقتل خوفتها و خلاتها قريب ديرها تحتها
حكم مغرفة بيدو الأخرى و ضرب بيها كاس من الكيسان لي كانو فوق الطابلة باش يجلب إنتباه الحضور ليه هو و ميسان
إيفان: أهلا و مرحبا بيكم اليوم يشرفنا حضوركم لهاذ الحفلة و فرحنا أنو لبيتو دعوتنا و نظن انتشر خبر زواجي و الكل صار يعرف بيه مكانكم بين العين و الراس أما صر على كلمة أما و حضن ميسان بيدو ..لي يقرب لمرتي ولا يفكر مجرد فكرة أنو يأذيها سواء بالفعل و لا القول يقدر يودع حياتو من دوك لأني مراحش نرحمو مهما كان يكون منقبلش مرتي تتضر بكلمة و لو صغيرة و لا عن طريق الخطأ نظن فهمتو بلا ما نعاود ...دور راسو لجهة ميسان لي حاضنها ..لقاها تخزر فيه بخزرة ماشي مفهومة بينها و بين روحها أول مرة تسمع هاذ الكلام لي
كان كي العسل على قلبها وطفالها نارها لي شعلتها الحية تاع جمانة و لا كلمة مرتي لي خرجت من فمو خلاتها تحس بشعور غريب فحياتها ما حساتو ولا تعرفلو أي تفسير ...فوسط تخمامها و صراعها مع روحها ...دورها إيفان لعندو و قدام كل الحضور ...حط شفافو و باسها بكل حنية على جبهتها ..
...خلات بوستو و ملمس شفايفو عليها تتسلل قشعريرة لكل خلية من جسمها ...بعدت من عليه و رمات عينها على الجهة الأخرى و فتحت عينيها على وسعهم كي لمحت فارس جاي جيهتهم لابس و متأنق بكل أناقتو و الأهم حست خزرتو متبدلة ...وصل لعندهم و سلم على إيفان ..بدات دقات قلبها تضرب بعنف فوسط صدرها خايفة يتذكروا إيفان و يأذيه
أدهم أهلا مسيو إيفان
إيفان : أهلا بيك شرفنا حضورك اليوم مسيو أدهم
أدهم : الشرف ليا ...دور راسو لجهة ميسان لي كانت مصدومة من إختلاف الأسماء
أدهم: أهلا بيك مدام ...مدلها يدو حتى تصافحو
إيفان: هاذي مرتي ميسان و هذا السيد أدهم شريكنا الجديد ...ضيقت ميسان عينيها كيفاه هذا شريكهم الجديد و كيفاه إيفان معرفوش؟؟؟...
..صح كلش متبدل فيه ثيابو ..شعرو ...خزرتو ...طريقة كلامو.. أما متأكدة أنو هذا فارس أما لي حيرها إسمو المتبدل أدهم !!...ضيقت عينيها فيه تحوس في وجهو على أي تفسير للموضوع حطت يدها في يدو و صافحاتو
أدهم: عن إذنكم ..دارلو إيفان براسو إيه و ميسان قاعدة حايرة حتى أنو شكت فروحها
ميسان: ممكن يشبهلو زعما؟؟
إيفان: عفوا قلتي حاجة ؟؟
ميسان: لا ..طالعة نشوف جوري
إيفان: أوكي أما أرجعي الحفلة مزالت فأولها
دارتلو براسها إيه وطلعت للفوق ترتب فأفكارها متمنية تلقى إجابة لأسئلتها .
أنت تقرأ
زوجي المزيف {من تأليف و كتابة Macilia Ch}
रोमांसزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
