#زوجي_المزيف🔥🔥
الحلقة 6🔥🔥🔥
حط بنتو فسريرها
إيفان: اهتمي بيها مليح و عينك متغفلش عليها
حاضر مسيو إيفان
خرج من غرفة بنتو نازل للتحت ...فتحلو الحارس باب سيارتو و إنطلق بأقصى سرعتو
و زوج سيارات تاع حراسة يتبعو فيه
حبس قدام باب شركتو و نزل ..مد المفتاح للعساس و دخل رايح جهة المصعد ...ضغط على الزر و دخل ... جبد تلفونو من جيب سترتو و كومبوزا النيميرو
إيفان : ..نحب عيونك عليها ...تراقبها بلا مايرمشو عينيك ...نحب كل تحركاتها توصل لعندي
غلق الخط و تفتح باب المصعد ...توجه لمكتبو ..ناضت السيكريتيرا من بلاصتها كي لمحاتو
صباح الخير مسيو إيفان
جاز عليها بلا مايشوف فيها
إيفان : قهوة لمكتبي فورا
حاضر
فتح باب مكتبو و دخل لقى حاتم يراجع فالورق
دار على البيرو و قعد فكرسيه
إيفان : خير واش الحاجة المستعجلة لي ما تتأجلش
علامات التوتر كانت باينة على وجهو متردد أنو ينطق
خبط البيرو بكف يدو
إيفان : انطق ### ما تجهلنيش
حاتم : صرات كارثة
إيفان : تحكي دوك و لا نوض ليك
حاتم : الرجال لي راحو يسلمو شحنة السلاح البارح لقاوهم مقتولين و السلاح مسروق ...
وذنو بدات تصوني و عينيه تمتم رجعو حمورا من الزعاف كور قبضة يدو
إيفان : يعني المصايب كي يجو يجو على ضربة وحدة
حاتم: شحنة السلاح كانت كبيرة و الرجال لي يستناو فالسلاح طالبين نرجعولهم دراهمهم مع التعويض
دخلت السيكريتيرا و حطت كاس القهوة قدامو و خرجت
قعد إيفان يخمم و يخزر فالكاس
إيفان: مارانيش فحالة تسمح أني نتعامل ولا نكسر راسي معاهم
حاتم : واش حا نديرو ؟؟؟
هز راسو ليه و تبسيمة على شفايفو
إيفان : ساهلة راح نصفوهم
مجتمعين على طاولة العشاء ...ايفان على راس الطابلة ...أمو قاعدة على يمينو و حاتم على اليسار و قدامو حنين ...ياكلو فهدوء
نطقت يماهم و كسرت السكوت لي مغلف البلاصة
بشرى: إيفان لقيتلك عروس تناسبك و تناسبنا صح مزال ما جاز اسبوع على موت ريما أما هي بفمها قالتلك تزوج
إيفان: ايه صح أما قالتلي نتزوج أختها ماشي وحدة من اختيار امك
بشرى: و نتا من نيتك راح تتزوج وحدة مبهدلة و مشرشحة كيما هي ياك ليوم برك رحت و شفتها قلت راح تبدل رايك و عقلك يرجع لبلاصتو أما راني شايفاتك مصمم على قرارك حتى أنو خبرت المحامي يسرعلك فأوراق الزواج
إيفان : بما انك راكي عارفة علاه جاية تكسريلي فراسي مخصنيش وجع راس
مسح فمو بالمنديل و ناض من على الكرسي طالع لغرفتو
بشرى: هكاك دير لي فراسك و حصل بعدها ...خفضت من نبرة صوتها و حكات بغل ...يعني ما كفانيش جبتلي لآلة ريما دوك راح يجيبلي ختها ...اه راسي حكمت راسها تتمسكن قدامهم ..شفتو خوكم راح يجلطني شي يوم ...راح نتبهدلو أكيد بعدما يجيب الشرشوحة هاديك للقصر ...قلبت حنين عينيها و حاتم كمل يالكل طعامو كانو ماشي هامو و لا سامع أصلا
حنين : علاه مكبرة لحكاية ماما نتي لي راح تتزوجي بيها ؟؟؟
طرطق حاتم بالضحك ...يشوف فيماه كيفاه رجع وجهها حمر من الزعاف
بشرى: لسانك هذاك لازمو قص ...و نتا يا سي الشباب كمل اضحك
..ناضت بزعاف ...رايحة للجنينة ...قحرتلهم و راحت
فاطمة يا فاطمة جيبيلي قهوتي للجنينة إذا قعدت كثر هنا راح يجلطوني ولادي
أنت تقرأ
زوجي المزيف {من تأليف و كتابة Macilia Ch}
Romantikزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
