الحلقة 16:
بعد يوم طويل ...ميسان رقدت جوري و حطتها في سريرها ...راحت طلت على يماها و شربتها دواها بعدها خرجت بعدما تطمنت عليها
فتحت الباب تاع الجناح و دخلت بعدما غلقت الباب موراها ..دخلت للدوش و خذات دوش خفيف بعدها خرجت بعدما لبست بيجامة طويلة تريكو و سروال ..دخلت للغرفة الثانية لي فالجناح بما أنو الغرفة الاولى تاع إيفان ...تسطحت على السرير و غطات رجليها بالغطا و جبدت كتاب تقرا فيه ...فنفس الوقت ..دخل إيفان للجناح وجهو مقلوب ... رمى الفاست على الفوتاي يحوس بعينيه على ميسان ...دخل لغرفتو ملقاهاش ...اتجه للغرفة الثانية ..لمح الباب مشقوق و ميسان متسطحة فوق السرير فتح الباب و دخل لعندها و بلا أي كلمة تسطح هو تاني على السرير حاط راسو على حجرها
إيفان : ألعبيلي بشعري
عقدت حواجبها تخزر فيه بحيرة ..بعدها بلا ما تحس على روحها هزت يدها و غلغلت يدها في شعرو تمرر في صوابعها عليه
تنهد و غمض عينيه مستمتع بملمس يدها على راسو
عند أيمن ..قاعد جنب حنين يتأمل فتعابير وجهها لي تعملهم و هي تتألم ...بعدما خبر إيفان جا هو و حاتم يجرو لعندها يتطمنوا على صحتها و خلاوها بسيف هنا بعدما أقنعهم أيمن يخلوها عندو اليوم بعد ما شدد الحراسة على الفيلا تاعو
هز يدو و شبك صوابعو بصوابعها ...
أيمن: ليوم رميتي روحك و أنقذتيني يعني لولاك اليوم كنت ميت ..مهما درت حتى تبعدي عليا مفلحتش قاعدة غير تتمسكي بيا أكثر و أكثر ...تنهد من عروش قلبو صدقيني منستاهلش حبك و انتي متستاهليش تتوجعي هك كل ما راح تكوني جنبي كل ما راح تتوجعي أكثر
فتحت عينيها بصعوبة ...بلعت ريقها لي شاح تخزر فيه و تحكي
حنين : نعرف
أيمن هز راسو على صوتها ...قرب باسها من راسها يحكي ...أنتي مليحة ؟؟...كاش حاجة توجع فيك ؟؟
هزت روحها تقعدت على السرير تتوجع
حنين : قلبي ..بللت شفايفها لي حستهم شايحين تحكي بسيف..قلبي واجعني بسبتك أنت ..الحاجة لي متعرفهاش أنو ما عدتش نحبك و إذا رميت روحي و أنقذتك اليوم بسبة العشرة لا غير ...بعد اليوم أنت ولد عمي و بس تربطنا برك صلة دم لا اكثر ولا أقل ...بالنسبة ليا محيتك من قلبي من نهار طلبت مني أني نجهض الطفل لي كان مزالو فأحشائي و مزال مشافش الدنيا ولا تعرف عليها و مقدرتش حتى نحضنو و نشم ريحتو و نفرح بيه
بلع ريقو يحكي
أيمن: أنا مكنتش مستعد نصير أب ولا ..قاطعاتو حنين تحكي و الدموع نازلين على خدها
حنين : نعرف بلا ما تزيد تخليني نسمع الأسطوانة تاع دايمن صدقني حافضتها أكثر من إسمي ...كنت حاب يكون عندك اولاد مع ليلى نعرف أما هي ماتت اعرف تقدر الناس لي مزالهم عايشين و يحبوك
حاولت تنوض من على السرير بصح مقدرتش ...زرب أيمن شدها من كتافها مرجعها للور ...تكات على المخدة و هي عاضة على شفتها من كثرة الوجع
أيمن: ارتاحي مزال جرحك جديد
حنين : مرانيش حابة نقعد هنا اكثر من هك خصوصا معاك تحت سقف واحد ...عيط لإيفان ولا حاتم قوللهم يجو يدوني
أيمن: جاو مقبيل و تطمنوا عليك و كانو راح يدوك معاهم لكن أنا منعتهم
حنين : شكون نتا لحتى تمنعهم ؟؟؟ عيطلهم حابة نروح إذا كنت قادرة نهز روحي كنت نضت و خرجت منا
أيمن: بلا عناد ارتاحي هاذ الليلة و غدوة بنفسي نديك للقصر
سكتت و ما حكات حتى كلمة ...حاسة روحها تعبانة و ماشي قادرة تحكي أكثر. ..كي تنوض غدوة يحلها ربي ...غمضت عينيها و استسلمت للنوم
.. تسطح أيمن جنبها على السرير بعدما غطاها مليح ...قاعد يتأمل فيها ..حاس بغصة في حلقو ...يخزر فيها تتوجع بسبتو ...مكانش داير في بالو أنو مزالت موجوعة من الجنين لي خلاها تجهضو بسيف و مزالت تتوجع عليه ...طاحت دمعة على خدو ...و هو متحسر عليه يخمم لو مزالو عايش كانت حوايج بزاف تبدلت ...حنين عندها الحق ماشي مقدر قيمة الناس لي دايرين بيه و يحبوه لحتى يموتو كيما صرا مع ليلى معرفش قيمتها حتى ماتت و حضر جنازتها حتى هي كان هاملها و كان يمد وقتو الكل لخدمتو يرجع حتى الليل و يروح ديراكت يرقد بلا ما يسأل عليها و لا يسقسيها كيفاه جاز يومها ولا يسقسي عليها ولا يهتم بيها ...اليوم حنين كأنو مدتلو كف خلاه يفيق و يفتح عينيه و يقدر قيمة الأشياء و الأشخاص لي في حياتو بعد ما كان هاملهم كل هاذ السنين ..
هز يدو و جبدها لعندو بلعقل ...حطلها راسها على صدرو ...غلغل صوابع يديه في شعرها يمسح عليه و يحكي بصوت هامس
أيمن : راح نحاول نصلح لي فسدتو و نعوضك على لي فات وعد ...باسها من راسها و غمض عينيه و استسلم للنوم حتى هو .
فتحت حنين عينيها مع الصباح ...حست بيدين محضنينها ...طلعت راسها لقات روحها فحضن أيمن ...نفخت على جنب و حاولت تبعد يديه منها ... ناضت من السرير تبدل في حوايجها مرة على مرة تتلفت لعندو تخزر فيه إذا فاق و لا لالا !!
فتحت الباب و تسرسبت بالعقل ...غير خرجت برا ضربتها نسمة خفيفة طيرتلها شعرها وقعدت تلعب بيه فالهواء ...حست كتفها يوجع فيها من الحركة الزايدة لي دارتها حتى حوايجها لبستهم بسيف ....توجهت جهة سيارتها ...فتحت الباب راح تركب أما حست يد جبدتها و تنغلق باب السيارة بقوة و رجعت خطوات وراها ..
عند ميسان ناضت صباح لقات روحها وحدها فالسرير ...تقعدت تحك فعينيها ...بعدها دخلت للدوش غسلت وجهها و بدلت حوايجها نزلت لتحت ...لقات إيفان يفطر وحدو ...جبدت كرسي و قعدت ...
ميسان: صباح الخير
إيفان: صباح الخير
ميسان : حابة نروح نجيب حوايج خاصيني فالدار...هز راسو يخزر فيها و يحكي
إيفان: إيه روحي ..راح نقول للسائق يديك و يجيبك
ميسان: أوكي
ناض خارج أما هي كملت فطورها بعدها خرجت و ركبت مع السائق رايحين لحومتها
فتحت الباب و دخلت لغرفتها ...جبدت فاليزة صغيرة و عمرت فيها واش تسحق و خرجت
ستنات السائق يفتح الباكاج تاع السيارة ولا ينزل يشد عليها الفاليز أما منزلش ...عقدت حواجبها و نفخت على قصتها لي طايحة على وجهها بفدة ...قربت من السيارة راح تركب ...رمات عينها جهة السائق لقاتو حاط وجهو على الفولون كأنو راقد إستغربت كثر ...فتحت الباب راح تركب فجأة يد تمدت من وراها و حطت منديل على نيفها ...حاولت أنو تقاوم و تخبش فيه بظفارتيها أما بلا فايدة ...بعد ثواني داخت بين يديه ...حملها و حطها فسيارتو ...لي كانت مركونة ورا دارها ....
عند حنين كي راحت تركب فسيارتها ...حست بشكون جبدها من يدها و دورها لعندو حتى تخبطت في صدرو ...بعدت عليه معصبة تخزر فيه
حنين : واش تحب مني علاه وقفتني راني رايحة بعد ..دارت حتى تروح أما عاود جبدها لعندو يحكي و يلز على سنيه
أيمن : متجهلينيش مع الصباح علاه نضتي من فراشك ؟؟؟ حابة تهبليني اليوم قلتلك البارح أنا راح نديك علاه ميبسة راصك قاع هك ؟؟
شعلت فيه عينيها تحكي
حنين : و نتا واش دخلك ؟؟ اخطيني لبارح برك رميتلك الخاتم على وجهك و كنت راح نموت بسبتك واش حاب مني كثر ميكفيكش واش خليتني نعاني مزال حاب تشوفني نتوجع كثر حتى يفرح داخلك قول ؟؟
أيمن : علاه حابة تنفصلي عليا بشدة قبل كنتي تموتي عليا و على التراب لي نمشي عليه و مهما درت و مهما جرحتك و مهما خنتك و مهما حاولت نبعدك عليا و نخليك تكرهيني أما قعدتي متمسكة بيا كثر ...دوك واش لي تبدل؟؟؟ بطلتي تحبيني صح ؟؟؟
بلعت ريقها و جاوباتو و هي تخزر فعينيه
حنين : ايه بطلت كرهتك و عفتك قلبي تجرح منك و مولاش يحس بسبتك فقدت الإحساس و رجعت وحدة ثانية بسبتك مولاش يهمني شي فهاذ الدنيا غير مصلحتي أنا ...طبعاتو من صدرو بيدها الصحيحة
حنين : دوك خطيني ..ما رانيش حابة نزيد نقعد معاك كثر من هك و لا نتناقش معاك أكثر من هك. ..فض كلش خخلااص أفهم ياك هذا لي حبيتو و نتا بفمك قلت أنو كنت حابني نكرهك و نبعد عليك ...إيه !! هاني كرهتك و راح نبعد عليك ...إياك ثم إياك نزيد نشوف خليقتك مرة ثانية ....خذات نفس طويل بعدما كملت حكات ...دارت لسيارتها و ركبت فيها خارجة من تم
أنت تقرأ
زوجي المزيف {من تأليف و كتابة Macilia Ch}
Romanceزوجي المزيف 《مكتملة 》 تتمحور أحداث القصة عن بنت عشرينية إسمها ميسان تتزوج بزوج أختها المتوفية رغما عنها و تتوالى الأحداث داخل إطار تشويقي مزيج بين الغموض و الرومانسية باللهجة الجزائرية❤️ {من تأليفي Macilia Ch} ...
