أشخاص سيؤون

اشخاص سيوؤن.حلقه.19

#《اشخاص_سيوؤن》..حلقه.19

👍لايك قبل تقري😉😘

هدرزنا وفات الوقت لبعد المغرب جاني خالد قالي هيا .. طلعنا طول

انا : وين ماشي حبي

خالد : ناخدو دجاج نديرو شواء

مشينا خدينا دجاج للشواء وروحنا نزلت فتحت الحوش لقيته مرتب دخلت لدار النوم لقيتها مرتبه ومنظمه كيف ماخليتها استغربت معقوله خالد ضمها  وهوا قال ناض مخلوع وجاني طول وانا مازلت نحلل ف عقلي جاني خالد حضني من الخلف

خالد :  استاحشتك حبيبتي

انا : لفيت عليه وشبحتله اماالا وين رقدة حبي

خالد :ارتبك لكن بسرعه لقف الموقف وحط راسه ف رقبتي  مش قتلك حبي روحت تاعب ورقدة ف مربوعتنا غادي

انا : حسيت بيه يتهرب من الموضوع وماصدقتاش ولا تريحت لكلامه مع اني متأكده اني ماجابش سيرة حوشهم بكل بس ماحبيتش نكبر الموضوع ونكد الجو ..

انا : اها به حبي ترا شوي خلي نغير حوايجي

خالد : باسني ف رقبتي ورفع راسه وشد وجهي بين يديه به حبيبي امالا بدلي والحقيني برا مابين وتيت العواله وباسني وطلع

انا : طلع خالد وسكرت وراه الباب وقعمزة ع السرير ..

[ تعالو نقوللكم تفصيلت الحوش كيف باش تتخايلو المواقف .. هيا استراحه فيها جنان كبيير وحيطها لاصق ف صور مدرسه و فيها استيديو صغير اول ماتفتحي الباب تجيك صاله صغيره وع يدك ليمين دار النوم وع يدك ليسار ممر فيه حمام..حاشاكم.. وكوجينه صغيره يعني حوش ملموم ف بعضه وهاادي ]..

نرجعو لقصتنا ....

انا : قعمزة ع السرير و ونشوف لروحي ف مراية الدولاب ونحكي ف سري .. ان شاءالله ماتطلعش تكذب عليا ياخالد وتستغبي فيا ..اوووف هزيت راسي ونا نحاول نطرد هالافكار من راسي مانبيش الشك يخش لراسي ولا نبي نظلمه نسمع ف خالد يضبح عليا .. نضت غيرت حوايجي وطلعتله ....

                    ؛؛؛؛؛؛؛:؛:؛؛؛؛؛؛؛::؛؛؛؛؛؛؛؛؛؛

ف حوش العيله ... ف الجنان

لطيفه : يا أيه بطلي تعنكيش فوق الحيط

حياة سلفتي : خليها خليها والله كان اطيحي الا مانجي نكمل عليك انزلي

ايه : به يا ماما نلعبو احني شويه بس

ساميه : جت تحت الصور وفتحت ايديها .. انزلي حبيبتي تو اطيحي تنكسري

ايه : به شديني هي ونطت ف حجر اختها

لطيفه : والله مامخربها الا انتي يا سومه

ساميه : هه علاش بنخربها تو انا جيتها بالسياسه نزلت معايا وانتم اللي تتحلفو فيها من بكري لاخافت ولا عدلت عليكن